| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
6. ஸுத்தவிஞ்ஞத்திஸிக்கா²பத³வண்ணனா
6. Suttaviññattisikkhāpadavaṇṇanā
636. தேன ஸமயேனாதி ஸுத்தவிஞ்ஞத்திஸிக்கா²பத³ங். தத்த² கோ²மந்தி கோ²மவாகேஹி கதஸுத்தங். கப்பாஸிகந்தி கப்பாஸதோ நிப்³ப³த்தங். கோஸெய்யந்தி கோஸியங்ஸூஹி கந்தித்வா கதஸுத்தங். கம்ப³லந்தி ஏளகலோமஸுத்தங். ஸாணந்தி ஸாணவாகஸுத்தங். ப⁴ங்க³ந்தி பாடேக்கங் வாகஸுத்தமேவாதி ஏகே. ஏதேஹி பஞ்சஹி மிஸ்ஸெத்வா கதஸுத்தங் பன ‘‘ப⁴ங்க³’’ந்தி வேதி³தப்³ப³ங்.
636.Tenasamayenāti suttaviññattisikkhāpadaṃ. Tattha khomanti khomavākehi katasuttaṃ. Kappāsikanti kappāsato nibbattaṃ. Koseyyanti kosiyaṃsūhi kantitvā katasuttaṃ. Kambalanti eḷakalomasuttaṃ. Sāṇanti sāṇavākasuttaṃ. Bhaṅganti pāṭekkaṃ vākasuttamevāti eke. Etehi pañcahi missetvā katasuttaṃ pana ‘‘bhaṅga’’nti veditabbaṃ.
வாயாபேதி பயோகே³ பயோகே³ து³க்கடந்தி ஸசே தந்தவாயஸ்ஸ துரிவேமாதீ³னி நத்தி², தானி ‘‘அரஞ்ஞதோ ஆஹரிஸ்ஸாமீ’’தி வாஸிங் வா ப²ரஸுங் வா நிஸேதி, ததோ பட்டா²ய யங் யங் உபகரணத்தா²ய வா சீவரவாயனத்தா²ய வா கரோதி, ஸப்³ப³த்த² தந்தவாயஸ்ஸ பயோகே³ பயோகே³ பி⁴க்கு²ஸ்ஸ து³க்கடங். தீ³க⁴தோ வித³த்தி²மத்தே திரியஞ்ச ஹத்த²மத்தே வீதே நிஸ்ஸக்³கி³யங் பாசித்தியங். மஹாபச்சரியங் பன ‘‘யாவ பரியோஸானங் வாயாபெந்தஸ்ஸ ப²லகே ப²லகே நிஸ்ஸக்³கி³யங் பாசித்திய’’ந்தி வுத்தங். தம்பி இத³மேவ பமாணங் ஸந்தா⁴ய வுத்தந்தி வேதி³தப்³ப³ங். விகப்பனுபக³பச்சி²மஞ்ஹி சீவரஸங்க்²யங் க³ச்ச²தீதி.
Vāyāpeti payoge payoge dukkaṭanti sace tantavāyassa turivemādīni natthi, tāni ‘‘araññato āharissāmī’’ti vāsiṃ vā pharasuṃ vā niseti, tato paṭṭhāya yaṃ yaṃ upakaraṇatthāya vā cīvaravāyanatthāya vā karoti, sabbattha tantavāyassa payoge payoge bhikkhussa dukkaṭaṃ. Dīghato vidatthimatte tiriyañca hatthamatte vīte nissaggiyaṃ pācittiyaṃ. Mahāpaccariyaṃ pana ‘‘yāva pariyosānaṃ vāyāpentassa phalake phalake nissaggiyaṃ pācittiya’’nti vuttaṃ. Tampi idameva pamāṇaṃ sandhāya vuttanti veditabbaṃ. Vikappanupagapacchimañhi cīvarasaṅkhyaṃ gacchatīti.
அபிசெத்த² ஏவங் வினிச்ச²யோ வேதி³தப்³போ³ – ஸுத்தங் தாவ ஸாமங் விஞ்ஞாபிதங் அகப்பியங், ஸேஸங் ஞாதகாதி³வஸேன உப்பன்னங் கப்பியங். தந்தவாயோபி அஞ்ஞாதகஅப்பவாரிதோ விஞ்ஞத்தியா லத்³தோ⁴ அகப்பியோ, ஸேஸோ கப்பியோ. தத்த² அகப்பியஸுத்தங் அகப்பியதந்தவாயேன வாயாபெந்தஸ்ஸ புப்³பே³ வுத்தனயேன நிஸ்ஸக்³கி³யங். தேனேவ பன கப்பியஸுத்தங் வாயாபெந்தஸ்ஸ யதா² புப்³பே³ நிஸ்ஸக்³கி³யங், ஏவங் து³க்கடங். தேனேவ கப்பியங் அகப்பியஞ்ச ஸுத்தங் வாயாபெந்தஸ்ஸ யதி³ பச்சி²மசீவரப்பமாணேன ஏகோ பரிச்சே²தோ³ ஸுத்³த⁴கப்பியஸுத்தமயோ, ஏகோ அகப்பியஸுத்தமயோதி ஏவங் கேதா³ரப³த்³த⁴ங் விய சீவரங் ஹோதி, அகப்பியஸுத்தமயே பரிச்சே²தே³ பாசித்தியங், இதரஸ்மிங் ததே²வ து³க்கடங். யதி³ ததோ ஊனபரிச்சே²தா³ ஹொந்தி, அந்தமஸோ அச்சி²மண்ட³லப்பமாணாபி, ஸப்³ப³பரிச்சே²தே³ஸு பரிச்சே²த³க³ணனாய து³க்கடங். அத² ஏகந்தரிகேன வா ஸுத்தேன தீ³க⁴தோ வா கப்பியங் திரியங் அகப்பியங் கத்வா வீதங் ஹோதி, ப²லகே ப²லகே து³க்கடங். கப்பியதந்தவாயேனபி அகப்பியஸுத்தங் வாயாபெந்தஸ்ஸ யதா² புப்³பே³ நிஸ்ஸக்³கி³யங், ஏவங் து³க்கடங். தேனேவ கப்பியஞ்ச அகப்பியஞ்ச ஸுத்தங் வாயாபெந்தஸ்ஸ ஸசே பச்சி²மசீவரப்பமாணா ஊனகா வா அகப்பியஸுத்தபரிச்சே²தா³ ஹொந்தி, தேஸு பரிச்சே²த³க³ணனாய து³க்கடங். கப்பியஸுத்தபரிச்சே²தே³ஸு அனாபத்தி. அத² ஏகந்தரிகேன வா ஸுத்தேன தீ³க⁴தோ வா கப்பியங் திரியங் அகப்பியங் கத்வா வீதங் ஹோதி, ப²லகே ப²லகே து³க்கடங்.
Apicettha evaṃ vinicchayo veditabbo – suttaṃ tāva sāmaṃ viññāpitaṃ akappiyaṃ, sesaṃ ñātakādivasena uppannaṃ kappiyaṃ. Tantavāyopi aññātakaappavārito viññattiyā laddho akappiyo, seso kappiyo. Tattha akappiyasuttaṃ akappiyatantavāyena vāyāpentassa pubbe vuttanayena nissaggiyaṃ. Teneva pana kappiyasuttaṃ vāyāpentassa yathā pubbe nissaggiyaṃ, evaṃ dukkaṭaṃ. Teneva kappiyaṃ akappiyañca suttaṃ vāyāpentassa yadi pacchimacīvarappamāṇena eko paricchedo suddhakappiyasuttamayo, eko akappiyasuttamayoti evaṃ kedārabaddhaṃ viya cīvaraṃ hoti, akappiyasuttamaye paricchede pācittiyaṃ, itarasmiṃ tatheva dukkaṭaṃ. Yadi tato ūnaparicchedā honti, antamaso acchimaṇḍalappamāṇāpi, sabbaparicchedesu paricchedagaṇanāya dukkaṭaṃ. Atha ekantarikena vā suttena dīghato vā kappiyaṃ tiriyaṃ akappiyaṃ katvā vītaṃ hoti, phalake phalake dukkaṭaṃ. Kappiyatantavāyenapi akappiyasuttaṃ vāyāpentassa yathā pubbe nissaggiyaṃ, evaṃ dukkaṭaṃ. Teneva kappiyañca akappiyañca suttaṃ vāyāpentassa sace pacchimacīvarappamāṇā ūnakā vā akappiyasuttaparicchedā honti, tesu paricchedagaṇanāya dukkaṭaṃ. Kappiyasuttaparicchedesu anāpatti. Atha ekantarikena vā suttena dīghato vā kappiyaṃ tiriyaṃ akappiyaṃ katvā vītaṃ hoti, phalake phalake dukkaṭaṃ.
யதி³ பன த்³வே தந்தவாயா ஹொந்தி, ஏகோ கப்பியோ ஏகோ அகப்பியோ, ஸுத்தஞ்ச அகப்பியங், தே சே வாரேன வினந்தி, அகப்பியதந்தவாயேன வீதே ப²லகே ப²லகே பாசித்தியங், ஊனதரே து³க்கடங். இதரேன வீதே உப⁴யத்த² து³க்கடங். ஸசே த்³வேபி வேமங் க³ஹெத்வா ஏகதோ வினந்தி, ப²லகே ப²லகே பாசித்தியங். அத² ஸுத்தங் கப்பியங், சீவரஞ்ச கேதா³ரப³த்³தா⁴தீ³ஹி ஸபரிச்சே²த³ங், அகப்பியதந்தவாயேன வீதே பரிச்சே²தே³ பரிச்சே²தே³ து³க்கடங், இதரேன வீதே அனாபத்தி. ஸசே த்³வேபி வேமங் க³ஹெத்வா ஏகதோ வினந்தி, ப²லகே ப²லகே து³க்கடங். அத² ஸுத்தம்பி கப்பியஞ்ச அகப்பியஞ்ச, தே சே வாரேன வினந்தி, அகப்பியதந்தவாயேன அகப்பியஸுத்தமயேஸு பச்சி²மசீவரப்பமாணேஸு பரிச்சே²தே³ஸு வீதேஸு பரிச்சே²த³க³ணனாய பாசித்தியங். ஊனகதரேஸு கப்பியஸுத்தமயேஸு ச து³க்கடங். கப்பியதந்தவாயேன அகப்பியஸுத்தமயேஸு பமாணயுத்தேஸு வா ஊனகேஸு வா து³க்கடமேவ. கப்பியஸுத்தமயேஸு அனாபத்தி.
Yadi pana dve tantavāyā honti, eko kappiyo eko akappiyo, suttañca akappiyaṃ, te ce vārena vinanti, akappiyatantavāyena vīte phalake phalake pācittiyaṃ, ūnatare dukkaṭaṃ. Itarena vīte ubhayattha dukkaṭaṃ. Sace dvepi vemaṃ gahetvā ekato vinanti, phalake phalake pācittiyaṃ. Atha suttaṃ kappiyaṃ, cīvarañca kedārabaddhādīhi saparicchedaṃ, akappiyatantavāyena vīte paricchede paricchede dukkaṭaṃ, itarena vīte anāpatti. Sace dvepi vemaṃ gahetvā ekato vinanti, phalake phalake dukkaṭaṃ. Atha suttampi kappiyañca akappiyañca, te ce vārena vinanti, akappiyatantavāyena akappiyasuttamayesu pacchimacīvarappamāṇesu paricchedesu vītesu paricchedagaṇanāya pācittiyaṃ. Ūnakataresu kappiyasuttamayesu ca dukkaṭaṃ. Kappiyatantavāyena akappiyasuttamayesu pamāṇayuttesu vā ūnakesu vā dukkaṭameva. Kappiyasuttamayesu anāpatti.
அத² ஏகந்தரிகேன வா ஸுத்தேன தீ³க⁴தோ வா அகப்பியங் திரியங் கப்பியங் கத்வா வினந்தி, உபோ⁴பி வா தே வேமங் க³ஹெத்வா ஏகதோ வினந்தி, அபரிச்சே²தே³ சீவரே ப²லகே ப²லகே து³க்கடங், ஸபரிச்சே²தே³ பரிச்சே²த³வஸேன து³க்கடானீதி. அயங் பன அத்தோ² மஹாஅட்ட²கதா²யங் அபாகடோ, மஹாபச்சரியாதீ³ஸு பாகடோ. இத⁴ ஸப்³பா³காரேனேவ பாகடோ.
Atha ekantarikena vā suttena dīghato vā akappiyaṃ tiriyaṃ kappiyaṃ katvā vinanti, ubhopi vā te vemaṃ gahetvā ekato vinanti, aparicchede cīvare phalake phalake dukkaṭaṃ, saparicchede paricchedavasena dukkaṭānīti. Ayaṃ pana attho mahāaṭṭhakathāyaṃ apākaṭo, mahāpaccariyādīsu pākaṭo. Idha sabbākāreneva pākaṭo.
ஸசே ஸுத்தம்பி கப்பியங், தந்தவாயோபி கப்பியோ ஞாதகப்பவாரிதோ வா மூலேன வா பயோஜிதோ, வாயாபனபச்சயா அனாபத்தி. த³ஸாஹாதிக்கமனபச்சயா பன ஆபத்திங் ரக்க²ந்தேன விகப்பனுபக³ப்பமாணமத்தே வீதே தந்தே டி²தங்யேவ அதி⁴ட்டா²தப்³ப³ங். த³ஸாஹாதிக்கமேன நிட்டா²பியமானஞ்ஹி நிஸ்ஸக்³கி³யங் ப⁴வெய்யாதி. ஞாதகாதீ³ஹி தந்தங் ஆரோபெத்வா ‘‘தும்ஹாகங், ப⁴ந்தே, இத³ங் சீவரங் க³ண்ஹெய்யாதா²’’தி நிய்யாதிதேபி ஏஸேவ நயோ.
Sace suttampi kappiyaṃ, tantavāyopi kappiyo ñātakappavārito vā mūlena vā payojito, vāyāpanapaccayā anāpatti. Dasāhātikkamanapaccayā pana āpattiṃ rakkhantena vikappanupagappamāṇamatte vīte tante ṭhitaṃyeva adhiṭṭhātabbaṃ. Dasāhātikkamena niṭṭhāpiyamānañhi nissaggiyaṃ bhaveyyāti. Ñātakādīhi tantaṃ āropetvā ‘‘tumhākaṃ, bhante, idaṃ cīvaraṃ gaṇheyyāthā’’ti niyyātitepi eseva nayo.
ஸசே தந்தவாயோ ஏவங் பயோஜிதோ வா ஸயங் தா³துகாமோ வா ஹுத்வா ‘‘அஹங், ப⁴ந்தே, தும்ஹாகங் சீவரங் அஸுகதி³வஸே நாம வாயித்வா ட²பெஸ்ஸாமீ’’தி வத³தி, பி⁴க்கு² ச தேன பரிச்சி²ன்னதி³வஸதோ த³ஸாஹங் அதிக்காமேதி, நிஸ்ஸக்³கி³யங் பாசித்தியங்.
Sace tantavāyo evaṃ payojito vā sayaṃ dātukāmo vā hutvā ‘‘ahaṃ, bhante, tumhākaṃ cīvaraṃ asukadivase nāma vāyitvā ṭhapessāmī’’ti vadati, bhikkhu ca tena paricchinnadivasato dasāhaṃ atikkāmeti, nissaggiyaṃ pācittiyaṃ.
ஸசே பன தந்தவாயோ ‘‘அஹங் தும்ஹாகங் சீவரங் வாயித்வா ஸாஸனங் பேஸெஸ்ஸாமீ’’தி வத்வா ததே²வ கரோதி, தேன பேஸிதபி⁴க்கு² பன தஸ்ஸ பி⁴க்கு²னோ ந ஆரோசேதி, அஞ்ஞோ தி³ஸ்வா வா ஸுத்வா வா ‘‘தும்ஹாகங், ப⁴ந்தே, சீவரங் நிட்டி²த’’ந்தி ஆரோசேதி, ஏதஸ்ஸ ஆரோசனங் ந பமாணங். யதா³ பன தேன பேஸிதோயேவ ஆரோசேதி, தஸ்ஸ வசனங் ஸுததி³வஸதோ பட்டா²ய த³ஸாஹங் அதிக்காமயதோ நிஸ்ஸக்³கி³யங் பாசித்தியங்.
Sace pana tantavāyo ‘‘ahaṃ tumhākaṃ cīvaraṃ vāyitvā sāsanaṃ pesessāmī’’ti vatvā tatheva karoti, tena pesitabhikkhu pana tassa bhikkhuno na āroceti, añño disvā vā sutvā vā ‘‘tumhākaṃ, bhante, cīvaraṃ niṭṭhita’’nti āroceti, etassa ārocanaṃ na pamāṇaṃ. Yadā pana tena pesitoyeva āroceti, tassa vacanaṃ sutadivasato paṭṭhāya dasāhaṃ atikkāmayato nissaggiyaṃ pācittiyaṃ.
ஸசே தந்தவாயோ ‘‘அஹங் தும்ஹாகங் சீவரங் வாயித்வா கஸ்ஸசி ஹத்தே² பஹிணிஸ்ஸாமீ’’தி வத்வா ததே²வ கரோதி, சீவரங் க³ஹெத்வா க³தபி⁴க்கு² பன அத்தனோ பரிவேணே ட²பெத்வா தஸ்ஸ ந ஆரோசேதி, அஞ்ஞோ கோசி ப⁴ணதி ‘‘அபி, ப⁴ந்தே, அது⁴னா ஆப⁴தங் சீவரங் ஸுந்த³ர’’ந்தி? ‘‘குஹிங், ஆவுஸோ, சீவர’’ந்தி? ‘‘இத்த²ன்னாமஸ்ஸ ஹத்தே² பேஸித’’ந்தி. ஏதஸ்ஸபி வசனங் ந பமாணங். யதா³ பன ஸோ பி⁴க்கு² சீவரங் தே³தி, லத்³த⁴தி³வஸதோ பட்டா²ய த³ஸாஹங் அதிக்காமயதோ நிஸ்ஸக்³கி³யங் பாசித்தியங். ஸசே பன வாயாபனமூலங் அதி³ன்னங் ஹோதி, யாவ காகணிகமத்தம்பி அவஸிட்ட²ங், தாவ ரக்க²தி.
Sace tantavāyo ‘‘ahaṃ tumhākaṃ cīvaraṃ vāyitvā kassaci hatthe pahiṇissāmī’’ti vatvā tatheva karoti, cīvaraṃ gahetvā gatabhikkhu pana attano pariveṇe ṭhapetvā tassa na āroceti, añño koci bhaṇati ‘‘api, bhante, adhunā ābhataṃ cīvaraṃ sundara’’nti? ‘‘Kuhiṃ, āvuso, cīvara’’nti? ‘‘Itthannāmassa hatthe pesita’’nti. Etassapi vacanaṃ na pamāṇaṃ. Yadā pana so bhikkhu cīvaraṃ deti, laddhadivasato paṭṭhāya dasāhaṃ atikkāmayato nissaggiyaṃ pācittiyaṃ. Sace pana vāyāpanamūlaṃ adinnaṃ hoti, yāva kākaṇikamattampi avasiṭṭhaṃ, tāva rakkhati.
640. அனாபத்தி சீவரங் ஸிப்³பே³துந்தி சீவரஸிப்³ப³னத்தா²ய ஸுத்தங் விஞ்ஞாபெந்தஸ்ஸ அனாபத்தீதி அத்தோ². ஆயோகே³திஆதீ³ஸுபி நிமித்தத்தே² பு⁴ம்மவசனங், ஆயோகா³தி³னிமித்தங் விஞ்ஞாபெந்தஸ்ஸ அனாபத்தீதி வுத்தங் ஹோதி. ஸேஸமெத்த² உத்தானத்த²மேவாதி.
640.Anāpatti cīvaraṃ sibbetunti cīvarasibbanatthāya suttaṃ viññāpentassa anāpattīti attho. Āyogetiādīsupi nimittatthe bhummavacanaṃ, āyogādinimittaṃ viññāpentassa anāpattīti vuttaṃ hoti. Sesamettha uttānatthamevāti.
ச²ஸமுட்டா²னங், கிரியங், நோஸஞ்ஞாவிமொக்க²ங், அசித்தகங், பண்ணத்திவஜ்ஜங், காயகம்மவசீகம்மங், திசித்தங், திவேத³னந்தி.
Chasamuṭṭhānaṃ, kiriyaṃ, nosaññāvimokkhaṃ, acittakaṃ, paṇṇattivajjaṃ, kāyakammavacīkammaṃ, ticittaṃ, tivedananti.
ஸுத்தவிஞ்ஞத்திஸிக்கா²பத³வண்ணனா நிட்டி²தா.
Suttaviññattisikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 6. ஸுத்தவிஞ்ஞத்திஸிக்கா²பத³ங் • 6. Suttaviññattisikkhāpadaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 6. ஸுத்தவிஞ்ஞத்திஸிக்கா²பத³வண்ணனா • 6. Suttaviññattisikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 6. ஸுத்தவிஞ்ஞத்திஸிக்கா²பத³வண்ணனா • 6. Suttaviññattisikkhāpadavaṇṇanā
