| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
6. ஸுத்தவிஞ்ஞத்திஸிக்கா²பத³வண்ணனா
6. Suttaviññattisikkhāpadavaṇṇanā
ச²ப்³பி³த⁴ங் கோ²மஸுத்தாதி³ந்தி ‘‘ஸுத்தங் நாம ச² ஸுத்தானி கோ²மங் கப்பாஸிகங் கோஸெய்யங் கம்ப³லங் ஸாணங் ப⁴ங்க³’’ந்தி (பாரா॰ 638) ஏவங் வுத்தங் ச²ப்³பி³த⁴ங் கோ²மஸுத்தாதி³ங். தத்த² கோ²மந்தி (பாரா॰ அட்ட²॰ 2.636-38) கோ²மவாகேஹி கதஸுத்தங். கப்பாஸிகந்தி கப்பாஸதோ நிப்³ப³த்தங். கோஸெய்யந்தி கோஸியங்ஸூஹி கந்தித்வா கதஸுத்தங். கம்ப³லந்தி ஏளகலோமஸுத்தங். ஸாணந்தி ஸாணவாகேன கதஸுத்தங். ப⁴ங்க³ந்தி பாடேக்கங் வாகஸுத்தமேவாதி ஏகே. பஞ்சஹிபி மிஸ்ஸெத்வா கதஸுத்தங் பன ‘‘ப⁴ங்க³’’ந்தி வேதி³தப்³ப³ங். தேஸங் அனுலோமந்தி தேஸங் கோ²மாதீ³னங் அனுலோமங் து³கூலங் பத்துண்ணங் ஸோமாரபட்டங் சீனபட்டங் இத்³தி⁴ஜங் தே³வதி³ன்னந்தி ச²ப்³பி³த⁴ங் ஸுத்தங்.
Chabbidhaṃ khomasuttādinti ‘‘suttaṃ nāma cha suttāni khomaṃ kappāsikaṃ koseyyaṃ kambalaṃ sāṇaṃ bhaṅga’’nti (pārā. 638) evaṃ vuttaṃ chabbidhaṃ khomasuttādiṃ. Tattha khomanti (pārā. aṭṭha. 2.636-38) khomavākehi katasuttaṃ. Kappāsikanti kappāsato nibbattaṃ. Koseyyanti kosiyaṃsūhi kantitvā katasuttaṃ. Kambalanti eḷakalomasuttaṃ. Sāṇanti sāṇavākena katasuttaṃ. Bhaṅganti pāṭekkaṃ vākasuttamevāti eke. Pañcahipi missetvā katasuttaṃ pana ‘‘bhaṅga’’nti veditabbaṃ. Tesaṃ anulomanti tesaṃ khomādīnaṃ anulomaṃ dukūlaṃ pattuṇṇaṃ somārapaṭṭaṃ cīnapaṭṭaṃ iddhijaṃ devadinnanti chabbidhaṃ suttaṃ.
துரீதி வாயனூபகரணோ ஏகோ த³ண்டோ³, வீதவீதட்டா²னங் யத்த² ஸங்ஹரித்வா ட²பெந்தி. வேமந்தி வாயனூபகரணோ ஏகோ த³ண்டோ³, ஸுத்தங் பவேஸெத்வா யேன ஆகோடெந்தோ க⁴னபா⁴வங் ஸம்பாதெ³ந்தி. தஸ்ஸ ஸப்³ப³ப்பயோகே³ஸு து³க்கடந்தி தந்தவாயஸ்ஸ யே தே துரிவேமஸஜ்ஜனாதி³கா பயோகா³, தேஸு ஸப்³பே³ஸு பயோகே³ஸு பி⁴க்கு²ஸ்ஸ து³க்கடங், தஸ்ஸ தந்தவாயஸ்ஸ பயோகே³ பயோகே³ பி⁴க்கு²ஸ்ஸ து³க்கடந்தி வுத்தங் ஹோதி. துரிஆதீ³னங் அபா⁴வே தேஸங் கரணத்த²ங் வாஸிப²ரஸுஆதீ³னங் மக்³க³னநிஸானருக்க²ச்சே²த³னாதி³ஸப்³ப³ப்பயோகே³பி ஏஸேவ நயோ. தந்தூனங் அத்தனோ ஸந்தகத்தா வீதவீதட்டா²னங் படிலத்³த⁴மேவ ஹோதீதி ஆஹ ‘‘படிலாபே⁴ன நிஸ்ஸக்³கி³யங் ஹோதீ’’தி, விகப்பனுபக³பச்சி²மசீவரப்பமாணே வீதே நிஸ்ஸக்³கி³யங் ஹோதீதி வுத்தங் ஹோதி. தேனேவ வக்க²தி ‘‘தீ³க⁴தோ வித³த்தி²மத்தே, திரியஞ்ச ஹத்த²மத்தே வீதே நிஸ்ஸக்³கி³யங் பாசித்திய’’ந்தி. எத்த² ச ‘‘இத³ங் மே, ப⁴ந்தே, சீவரங் ஸாமங் ஸுத்தங் விஞ்ஞாபெத்வா தந்தவாயேஹி வாயாபிதங் நிஸ்ஸக்³கி³ய’’ந்தி இமினா நயேன நிஸ்ஸஜ்ஜனவிதா⁴னங் வேதி³தப்³ப³ங்.
Turīti vāyanūpakaraṇo eko daṇḍo, vītavītaṭṭhānaṃ yattha saṃharitvā ṭhapenti. Vemanti vāyanūpakaraṇo eko daṇḍo, suttaṃ pavesetvā yena ākoṭento ghanabhāvaṃ sampādenti. Tassa sabbappayogesu dukkaṭanti tantavāyassa ye te turivemasajjanādikā payogā, tesu sabbesu payogesu bhikkhussa dukkaṭaṃ, tassa tantavāyassa payoge payoge bhikkhussa dukkaṭanti vuttaṃ hoti. Turiādīnaṃ abhāve tesaṃ karaṇatthaṃ vāsipharasuādīnaṃ maggananisānarukkhacchedanādisabbappayogepi eseva nayo. Tantūnaṃ attano santakattā vītavītaṭṭhānaṃ paṭiladdhameva hotīti āha ‘‘paṭilābhena nissaggiyaṃ hotī’’ti, vikappanupagapacchimacīvarappamāṇe vīte nissaggiyaṃ hotīti vuttaṃ hoti. Teneva vakkhati ‘‘dīghato vidatthimatte, tiriyañca hatthamatte vīte nissaggiyaṃ pācittiya’’nti. Ettha ca ‘‘idaṃ me, bhante, cīvaraṃ sāmaṃ suttaṃ viññāpetvā tantavāyehi vāyāpitaṃ nissaggiya’’nti iminā nayena nissajjanavidhānaṃ veditabbaṃ.
தேனேவாதி விஞ்ஞாபிததந்தவாயேனேவ. ஏவங் இத⁴ து³க்கடந்தி இதா⁴பி தந்தவாயேனேவ தீ³க⁴தோ வித³த்தி²மத்தே, திரியங் ஹத்த²மத்தே வீதே து³க்கடந்தி அத்தோ². அகப்பியஸுத்தமயேதி விஞ்ஞாபிதஸுத்தமயே. இதரஸ்மிந்தி அவிஞ்ஞத்திஸுத்தமயே பரிச்சே²தே³. ததோ சே ஊனதராதி வுத்தப்பமாணதோ சே ஊனதரா, அந்தமஸோ (பாரா॰ அட்ட²॰ 2.636-638) அச்சி²மண்ட³லப்பமாணாபீதி அதி⁴ப்பாயோ. கப்பியதந்தவாயேனபி அகப்பியஸுத்தங் வாயாபெந்தஸ்ஸ யதா² புப்³பே³ நிஸ்ஸக்³கி³யங், ஏவமித⁴ து³க்கடங். தேனேவ கப்பியஞ்ச அகப்பியஞ்ச ஸுத்தங் வாயாபெந்தஸ்ஸ ஸசே பச்சி²மசீவரப்பமாணா வா ஊனகா வா அகப்பியஸுத்தபரிச்சே²தா³ ஹொந்தி, தேஸு பரிச்சே²த³க³ணனாய து³க்கடங். கப்பியஸுத்தபரிச்சே²தே³ஸு அனாபத்தி. அத² ஏகந்தரிகேன வா ஸுத்தேன, தீ³க⁴தோ வா கப்பியங் திரியங் அகப்பியங் கத்வா வீதங் ஹோதி, பமாணயுத்தே பரிச்சே²தே³ பரிச்சே²தே³ து³க்கடங்.
Tenevāti viññāpitatantavāyeneva. Evaṃ idha dukkaṭanti idhāpi tantavāyeneva dīghato vidatthimatte, tiriyaṃ hatthamatte vīte dukkaṭanti attho. Akappiyasuttamayeti viññāpitasuttamaye. Itarasminti aviññattisuttamaye paricchede. Tato ce ūnatarāti vuttappamāṇato ce ūnatarā, antamaso (pārā. aṭṭha. 2.636-638) acchimaṇḍalappamāṇāpīti adhippāyo. Kappiyatantavāyenapi akappiyasuttaṃ vāyāpentassa yathā pubbe nissaggiyaṃ, evamidha dukkaṭaṃ. Teneva kappiyañca akappiyañca suttaṃ vāyāpentassa sace pacchimacīvarappamāṇā vā ūnakā vā akappiyasuttaparicchedā honti, tesu paricchedagaṇanāya dukkaṭaṃ. Kappiyasuttaparicchedesu anāpatti. Atha ekantarikena vā suttena, dīghato vā kappiyaṃ tiriyaṃ akappiyaṃ katvā vītaṃ hoti, pamāṇayutte paricchede paricchede dukkaṭaṃ.
யதி³ பன (பாரா॰ அட்ட²॰ 2.636-638) த்³வே தந்தவாயா ஹொந்தி ஏகோ கப்பியோ ஏகோ அகப்பியோ, ஸுத்தஞ்ச அகப்பியங், தே சே வாரேன வினந்தி, அகப்பியதந்தவாயேன வீதே பமாணயுத்தே பரிச்சே²தே³ பரிச்சே²தே³ பாசித்தியங், ஊனதரே து³க்கடங். இதரேன வீதே உப⁴யத்த² து³க்கடங். ஸசே த்³வேபி வேமங் க³ஹெத்வா ஏகதோ வினந்தி, பமாணயுத்தே பரிச்சே²தே³ பரிச்சே²தே³ பாசித்தியங். அத² ஸுத்தங் கப்பியங், சீவரஞ்ச கேதா³ரப³த்³தா⁴தீ³ஹி ஸபரிச்சே²த³ங், அகப்பியதந்தவாயேன வீதே பரிச்சே²தே³ பரிச்சே²தே³ து³க்கடங், இதரேன வீதே அனாபத்தி. ஸசே த்³வேபி ஏகதோ வினந்தி, பமாணயுத்தே பரிச்சே²தே³ பரிச்சே²தே³ து³க்கடங். அத² ஸுத்தம்பி கப்பியஞ்ச அகப்பியஞ்ச, தே சே வாரேன வினந்தி, அகப்பியதந்தவாயேன அகப்பியஸுத்தமயேஸு பச்சி²மசீவரப்பமாணேஸு பரிச்சே²தே³ஸு வீதேஸு பரிச்சே²த³க³ணனாய பாசித்தியங், ஊனதரேஸு கப்பியஸுத்தமயேஸு ச து³க்கடங். கப்பியதந்தவாயேன அகப்பியஸுத்தமயேஸு பமாணயுத்தேஸு வா ஊனகேஸு வா து³க்கடமேவ, கப்பியஸுத்தமயேஸு அனாபத்தி.
Yadi pana (pārā. aṭṭha. 2.636-638) dve tantavāyā honti eko kappiyo eko akappiyo, suttañca akappiyaṃ, te ce vārena vinanti, akappiyatantavāyena vīte pamāṇayutte paricchede paricchede pācittiyaṃ, ūnatare dukkaṭaṃ. Itarena vīte ubhayattha dukkaṭaṃ. Sace dvepi vemaṃ gahetvā ekato vinanti, pamāṇayutte paricchede paricchede pācittiyaṃ. Atha suttaṃ kappiyaṃ, cīvarañca kedārabaddhādīhi saparicchedaṃ, akappiyatantavāyena vīte paricchede paricchede dukkaṭaṃ, itarena vīte anāpatti. Sace dvepi ekato vinanti, pamāṇayutte paricchede paricchede dukkaṭaṃ. Atha suttampi kappiyañca akappiyañca, te ce vārena vinanti, akappiyatantavāyena akappiyasuttamayesu pacchimacīvarappamāṇesu paricchedesu vītesu paricchedagaṇanāya pācittiyaṃ, ūnataresu kappiyasuttamayesu ca dukkaṭaṃ. Kappiyatantavāyena akappiyasuttamayesu pamāṇayuttesu vā ūnakesu vā dukkaṭameva, kappiyasuttamayesu anāpatti.
அத² ஏகந்தரிகேன வா ஸுத்தேன, தீ³க⁴தோ வா அகப்பியங் திரியங் அகப்பியங் கத்வா வினந்தி, உபோ⁴பி வா தே வேமங் க³ஹெத்வா ஏகதோ வினந்தி, அபரிச்சே²தே³ சீவரே பமாணயுத்தே பரிச்சே²தே³ பரிச்சே²தே³ து³க்கடங், ஸபரிச்சே²தே³ பரிச்சே²த³வஸேன து³க்கடானி. தேனாஹ ‘‘ஏதேனேவ உபாயேனா’’திஆதி³.
Atha ekantarikena vā suttena, dīghato vā akappiyaṃ tiriyaṃ akappiyaṃ katvā vinanti, ubhopi vā te vemaṃ gahetvā ekato vinanti, aparicchede cīvare pamāṇayutte paricchede paricchede dukkaṭaṃ, saparicchede paricchedavasena dukkaṭāni. Tenāha ‘‘eteneva upāyenā’’tiādi.
எத்த² ச தந்தவாயோ தாவ அஞ்ஞாதகஅப்பவாரிததோ விஞ்ஞத்தியா லத்³தோ⁴ அகப்பியோ, ஸேஸோ கப்பியோ. ஸுத்தம்பி ஸாமங் விஞ்ஞாபிதங் அகப்பியங், ஸேஸங், ஞாதகாதி³வஸேன உப்பன்னஞ்ச கப்பியந்தி வேதி³தப்³ப³ங். திகபாசித்தியந்தி வாயாபிதே வாயாபிதஸஞ்ஞிவேமதிகஅவாயாபிதஸஞ்ஞீனங் வஸேன தீணி பாசித்தியானி. சீவரத்தா²ய விஞ்ஞாபிதஸுத்தந்தி ஸாமங் வா அஞ்ஞேன வா சீவரத்தா²ய விஞ்ஞாபிதஸுத்தங் . கிஞ்சாபி பாளியங் ‘‘ஸாமங் ஸுத்தங் விஞ்ஞாபெத்வா’’தி வுத்தங், ததா²பி இத⁴ ‘‘சீவரத்தா²ய ஸாமங் விஞ்ஞாபிதஸுத்த’’ந்தி அவத்வா கேவலங் ‘‘சீவரத்தா²ய விஞ்ஞாபிதஸுத்த’’ந்தி அங்கே³ஸு வுத்தத்தா அஞ்ஞேன சீவரத்தா²ய விஞ்ஞாபிதஸுத்தம்பி ஸங்க³ஹங் க³ச்ச²தீதி வேதி³தப்³ப³ங். அகப்பியவிஞ்ஞத்தியாதி ‘‘சீவரங் மே, ஆவுஸோ, வாயதா²’’தி ஏவங்பூ⁴தாய அகப்பியவிஞ்ஞத்தியா.
Ettha ca tantavāyo tāva aññātakaappavāritato viññattiyā laddho akappiyo, seso kappiyo. Suttampi sāmaṃ viññāpitaṃ akappiyaṃ, sesaṃ, ñātakādivasena uppannañca kappiyanti veditabbaṃ. Tikapācittiyanti vāyāpite vāyāpitasaññivematikaavāyāpitasaññīnaṃ vasena tīṇi pācittiyāni. Cīvaratthāya viññāpitasuttanti sāmaṃ vā aññena vā cīvaratthāya viññāpitasuttaṃ . Kiñcāpi pāḷiyaṃ ‘‘sāmaṃ suttaṃ viññāpetvā’’ti vuttaṃ, tathāpi idha ‘‘cīvaratthāya sāmaṃ viññāpitasutta’’nti avatvā kevalaṃ ‘‘cīvaratthāya viññāpitasutta’’nti aṅgesu vuttattā aññena cīvaratthāya viññāpitasuttampi saṅgahaṃ gacchatīti veditabbaṃ. Akappiyaviññattiyāti ‘‘cīvaraṃ me, āvuso, vāyathā’’ti evaṃbhūtāya akappiyaviññattiyā.
ஸுத்தவிஞ்ஞத்திஸிக்கா²பத³வண்ணனா நிட்டி²தா.
Suttaviññattisikkhāpadavaṇṇanā niṭṭhitā.
