| Library / Tipiṭaka / তিপিটক • Tipiṭaka / ৰিমতিৰিনোদনী-টীকা • Vimativinodanī-ṭīkā |
৬. সুত্তৰিঞ্ঞত্তিসিক্খাপদৰণ্ণনা
6. Suttaviññattisikkhāpadavaṇṇanā
৬৩৬. ছট্ঠে ৰীতৰীতট্ঠানং যস্মিং চতুরস্সদারুম্হি পলিৰেঠেন্তি, তস্স তুরীতি নামং। ৰাযন্তা তিরিযং সুত্তং পৰেসেত্ৰা যেন আকোটেন্তা ৰত্থে ঘনভাৰং আপাদেন্তি, তং ‘‘ৰেম’’ন্তি ৰুচ্চতি।
636. Chaṭṭhe vītavītaṭṭhānaṃ yasmiṃ caturassadārumhi paliveṭhenti, tassa turīti nāmaṃ. Vāyantā tiriyaṃ suttaṃ pavesetvā yena ākoṭentā vatthe ghanabhāvaṃ āpādenti, taṃ ‘‘vema’’nti vuccati.
‘‘ইতরস্মিং তথেৰ দুক্কট’’ন্তি ইমিনা ৰাযিতুং আরদ্ধকালতো পট্ঠায যথাৰুত্তপরিচ্ছেদনিট্ঠিতেযেৰ দুক্কটম্পি হোতি, ন ততো পুব্বে ৰাযনপযোগেসূতি দস্সেতি।
‘‘Itarasmiṃ tatheva dukkaṭa’’nti iminā vāyituṃ āraddhakālato paṭṭhāya yathāvuttaparicchedaniṭṭhiteyeva dukkaṭampi hoti, na tato pubbe vāyanapayogesūti dasseti.
তন্তে ঠিতংযেৰ অধিট্ঠাতব্বন্তি এত্থ একৰারং অধিট্ঠিতে পচ্ছা ৰীতং অধিট্ঠিতগতিকমেৰ হোতি, পুন অধিট্ঠানকিচ্চং নত্থি। সচে পন অন্তরন্তরা দসা ঠপেত্ৰা ৰিসুং ৰিসুং সপরিচ্ছেদং ৰীতং হোতি, পচ্চেকং অধিট্ঠাতব্বমেৰাতি দট্ঠব্বং। এত্থ চ কপ্পিযসুত্তং গহেত্ৰা অঞ্ঞাতকঅপ্পৰারিতেনাপি অকপ্পিযতন্তৰাযেন ‘‘সুত্তমত্থি, ৰাযন্তো নত্থী’’তিআদিপরিযাযমুখেন ৰাযাপেন্তস্স অনাপত্তি। তেনেৰ মাতিকাট্ঠকথাযং (কঙ্খা॰ অট্ঠ॰ সুত্তৰিঞ্ঞত্তিসিক্খাপদৰণ্ণনা) ‘‘ৰাযাপেয্যা’’তি পদস্স ‘‘চীৰরং মে, আৰুসো, ৰাযথাতি অকপ্পিযৰিঞ্ঞত্তিযা ৰাযাপেয্যা’’তি অত্থো ৰুত্তো, এৰং ৰদন্তো অকপ্পিযতন্তৰাযেন ৰাযাপেতি নাম, নাঞ্ঞথা।
Tanteṭhitaṃyeva adhiṭṭhātabbanti ettha ekavāraṃ adhiṭṭhite pacchā vītaṃ adhiṭṭhitagatikameva hoti, puna adhiṭṭhānakiccaṃ natthi. Sace pana antarantarā dasā ṭhapetvā visuṃ visuṃ saparicchedaṃ vītaṃ hoti, paccekaṃ adhiṭṭhātabbamevāti daṭṭhabbaṃ. Ettha ca kappiyasuttaṃ gahetvā aññātakaappavāritenāpi akappiyatantavāyena ‘‘suttamatthi, vāyanto natthī’’tiādipariyāyamukhena vāyāpentassa anāpatti. Teneva mātikāṭṭhakathāyaṃ (kaṅkhā. aṭṭha. suttaviññattisikkhāpadavaṇṇanā) ‘‘vāyāpeyyā’’ti padassa ‘‘cīvaraṃ me, āvuso, vāyathāti akappiyaviññattiyā vāyāpeyyā’’ti attho vutto, evaṃ vadanto akappiyatantavāyena vāyāpeti nāma, nāññathā.
৬৪০. অনাপত্তি চীৰরং সিব্বেতুন্তিআদীসু ইমিনা সিক্খাপদেনেৰ অনাপত্তি, অকতৰিঞ্ঞত্তিপচ্চযা পন দুক্কটমেৰাতি ৰদন্তি। অকপ্পিযসুত্ততা, অত্তুদ্দেসিকতা, অকপ্পিযতন্তৰাযেন অকপ্পিযৰিঞ্ঞত্তিযা ৰাযাপনন্তি ইমানেত্থ তীণি অঙ্গানি।
640.Anāpatti cīvaraṃ sibbetuntiādīsu iminā sikkhāpadeneva anāpatti, akataviññattipaccayā pana dukkaṭamevāti vadanti. Akappiyasuttatā, attuddesikatā, akappiyatantavāyena akappiyaviññattiyā vāyāpananti imānettha tīṇi aṅgāni.
সুত্তৰিঞ্ঞত্তিসিক্খাপদৰণ্ণনা নিট্ঠিতা।
Suttaviññattisikkhāpadavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৬. সুত্তৰিঞ্ঞত্তিসিক্খাপদং • 6. Suttaviññattisikkhāpadaṃ
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ৬. সুত্তৰিঞ্ঞত্তিসিক্খাপদৰণ্ণনা • 6. Suttaviññattisikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৬. সুত্তৰিঞ্ঞত্তিসিক্খাপদৰণ্ণনা • 6. Suttaviññattisikkhāpadavaṇṇanā
