| Library / Tipiṭaka / तिपिटक • Tipiṭaka / विमतिविनोदनी-टीका • Vimativinodanī-ṭīkā |
६. सुत्तविञ्ञत्तिसिक्खापदवण्णना
6. Suttaviññattisikkhāpadavaṇṇanā
६३६. छट्ठे वीतवीतट्ठानं यस्मिं चतुरस्सदारुम्हि पलिवेठेन्ति, तस्स तुरीति नामं। वायन्ता तिरियं सुत्तं पवेसेत्वा येन आकोटेन्ता वत्थे घनभावं आपादेन्ति, तं ‘‘वेम’’न्ति वुच्चति।
636. Chaṭṭhe vītavītaṭṭhānaṃ yasmiṃ caturassadārumhi paliveṭhenti, tassa turīti nāmaṃ. Vāyantā tiriyaṃ suttaṃ pavesetvā yena ākoṭentā vatthe ghanabhāvaṃ āpādenti, taṃ ‘‘vema’’nti vuccati.
‘‘इतरस्मिं तथेव दुक्कट’’न्ति इमिना वायितुं आरद्धकालतो पट्ठाय यथावुत्तपरिच्छेदनिट्ठितेयेव दुक्कटम्पि होति, न ततो पुब्बे वायनपयोगेसूति दस्सेति।
‘‘Itarasmiṃ tatheva dukkaṭa’’nti iminā vāyituṃ āraddhakālato paṭṭhāya yathāvuttaparicchedaniṭṭhiteyeva dukkaṭampi hoti, na tato pubbe vāyanapayogesūti dasseti.
तन्ते ठितंयेव अधिट्ठातब्बन्ति एत्थ एकवारं अधिट्ठिते पच्छा वीतं अधिट्ठितगतिकमेव होति, पुन अधिट्ठानकिच्चं नत्थि। सचे पन अन्तरन्तरा दसा ठपेत्वा विसुं विसुं सपरिच्छेदं वीतं होति, पच्चेकं अधिट्ठातब्बमेवाति दट्ठब्बं। एत्थ च कप्पियसुत्तं गहेत्वा अञ्ञातकअप्पवारितेनापि अकप्पियतन्तवायेन ‘‘सुत्तमत्थि, वायन्तो नत्थी’’तिआदिपरियायमुखेन वायापेन्तस्स अनापत्ति। तेनेव मातिकाट्ठकथायं (कङ्खा॰ अट्ठ॰ सुत्तविञ्ञत्तिसिक्खापदवण्णना) ‘‘वायापेय्या’’ति पदस्स ‘‘चीवरं मे, आवुसो, वायथाति अकप्पियविञ्ञत्तिया वायापेय्या’’ति अत्थो वुत्तो, एवं वदन्तो अकप्पियतन्तवायेन वायापेति नाम, नाञ्ञथा।
Tanteṭhitaṃyeva adhiṭṭhātabbanti ettha ekavāraṃ adhiṭṭhite pacchā vītaṃ adhiṭṭhitagatikameva hoti, puna adhiṭṭhānakiccaṃ natthi. Sace pana antarantarā dasā ṭhapetvā visuṃ visuṃ saparicchedaṃ vītaṃ hoti, paccekaṃ adhiṭṭhātabbamevāti daṭṭhabbaṃ. Ettha ca kappiyasuttaṃ gahetvā aññātakaappavāritenāpi akappiyatantavāyena ‘‘suttamatthi, vāyanto natthī’’tiādipariyāyamukhena vāyāpentassa anāpatti. Teneva mātikāṭṭhakathāyaṃ (kaṅkhā. aṭṭha. suttaviññattisikkhāpadavaṇṇanā) ‘‘vāyāpeyyā’’ti padassa ‘‘cīvaraṃ me, āvuso, vāyathāti akappiyaviññattiyā vāyāpeyyā’’ti attho vutto, evaṃ vadanto akappiyatantavāyena vāyāpeti nāma, nāññathā.
६४०. अनापत्ति चीवरं सिब्बेतुन्तिआदीसु इमिना सिक्खापदेनेव अनापत्ति, अकतविञ्ञत्तिपच्चया पन दुक्कटमेवाति वदन्ति। अकप्पियसुत्तता, अत्तुद्देसिकता, अकप्पियतन्तवायेन अकप्पियविञ्ञत्तिया वायापनन्ति इमानेत्थ तीणि अङ्गानि।
640.Anāpatti cīvaraṃ sibbetuntiādīsu iminā sikkhāpadeneva anāpatti, akataviññattipaccayā pana dukkaṭamevāti vadanti. Akappiyasuttatā, attuddesikatā, akappiyatantavāyena akappiyaviññattiyā vāyāpananti imānettha tīṇi aṅgāni.
सुत्तविञ्ञत्तिसिक्खापदवण्णना निट्ठिता।
Suttaviññattisikkhāpadavaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / महाविभङ्ग • Mahāvibhaṅga / ६. सुत्तविञ्ञत्तिसिक्खापदं • 6. Suttaviññattisikkhāpadaṃ
अट्ठकथा • Aṭṭhakathā / विनयपिटक (अट्ठकथा) • Vinayapiṭaka (aṭṭhakathā) / महाविभङ्ग-अट्ठकथा • Mahāvibhaṅga-aṭṭhakathā / ६. सुत्तविञ्ञत्तिसिक्खापदवण्णना • 6. Suttaviññattisikkhāpadavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / सारत्थदीपनी-टीका • Sāratthadīpanī-ṭīkā / ६. सुत्तविञ्ञत्तिसिक्खापदवण्णना • 6. Suttaviññattisikkhāpadavaṇṇanā
