| Library / Tipiṭaka / ติปิฎก • Tipiṭaka / วชิรพุทฺธิ-ฎีกา • Vajirabuddhi-ṭīkā |
๖. สุตฺตวิญฺญตฺติสิกฺขาปทวณฺณนา
6. Suttaviññattisikkhāpadavaṇṇanā
๖๓๗. ฉเฎฺฐ กิญฺจาปิ ‘‘สามํ สุตฺตํ วิญฺญาเปตฺวา’’ติ วุตฺตํ, มาติกาฎฺฐกถายํ ปน ‘‘จีวรตฺถาย สามํ วิญฺญตฺตํ สุตฺต’’นฺติ อวตฺวา เกวลํ ‘‘จีวรตฺถาย วิญฺญาปิตสุตฺต’’นฺติ อเงฺคสุ วุตฺตตฺตา อเญฺญน จีวรตฺถาย วิญฺญตฺตํ สุตฺตมฺปิ สงฺคหํ คจฺฉตีติ เวทิตพฺพํฯ สามนฺติ เจตฺถ กสฺสจิ นิยมนํฯ ‘‘สามํ วิญฺญาเปตฺวา’’ติ กิญฺจาปิ วุตฺตํ, ตถาปิ ‘‘สามํ วายาเปยฺยา’’ติ อตฺตโน อตฺถาย วายาเปยฺยาติ เอวํ สมฺพโนฺธ, อโตฺถ จ เวทิตโพฺพ, ปาฬิยํ ปน อาสนฺนปเทน โยชนา กตา, ตสฺมา สามํ วิญฺญตฺตํ สุตฺตนฺติ อญฺญวิญฺญตฺตํ กปฺปิยํ อาปชฺชติ, หตฺถกมฺมยาจนวเสน ลทฺธตนฺตวาโยปิ กปฺปิโยฯ วิกปฺปนุปคปจฺฉิมปฺปมาณํ เจ, ตเนฺต วีตํเยว สกิํ อธิฎฺฐาตพฺพํ, ปุน อธิฎฺฐานกิจฺจํ นตฺถิ อธิฎฺฐิเตน เอกีภาวูปคมนโตฯ ‘‘สเจ ปน ปริเจฺฉทํ ทเสฺสตฺวาว จินสาฎกํ วิย, อนฺตรนฺตรา อธิฎฺฐิตํ โหติ, ปุน อธิฎฺฐาตพฺพ’’นฺติ วุตฺตํฯ ‘‘ปฎิลาเภนาติ วจเนน วายาเปตฺวา ฐเปสฺสามีติอาทิ เอกสฺมิํ อโนฺตคธํ โหตี’’ติ วทนฺติฯ
637. Chaṭṭhe kiñcāpi ‘‘sāmaṃ suttaṃ viññāpetvā’’ti vuttaṃ, mātikāṭṭhakathāyaṃ pana ‘‘cīvaratthāya sāmaṃ viññattaṃ sutta’’nti avatvā kevalaṃ ‘‘cīvaratthāya viññāpitasutta’’nti aṅgesu vuttattā aññena cīvaratthāya viññattaṃ suttampi saṅgahaṃ gacchatīti veditabbaṃ. Sāmanti cettha kassaci niyamanaṃ. ‘‘Sāmaṃ viññāpetvā’’ti kiñcāpi vuttaṃ, tathāpi ‘‘sāmaṃ vāyāpeyyā’’ti attano atthāya vāyāpeyyāti evaṃ sambandho, attho ca veditabbo, pāḷiyaṃ pana āsannapadena yojanā katā, tasmā sāmaṃ viññattaṃ suttanti aññaviññattaṃ kappiyaṃ āpajjati, hatthakammayācanavasena laddhatantavāyopi kappiyo. Vikappanupagapacchimappamāṇaṃ ce, tante vītaṃyeva sakiṃ adhiṭṭhātabbaṃ, puna adhiṭṭhānakiccaṃ natthi adhiṭṭhitena ekībhāvūpagamanato. ‘‘Sace pana paricchedaṃ dassetvāva cinasāṭakaṃ viya, antarantarā adhiṭṭhitaṃ hoti, puna adhiṭṭhātabba’’nti vuttaṃ. ‘‘Paṭilābhenāti vacanena vāyāpetvā ṭhapessāmītiādi ekasmiṃ antogadhaṃ hotī’’ti vadanti.
สุตฺตวิญฺญตฺติสิกฺขาปทวณฺณนา นิฎฺฐิตาฯ
Suttaviññattisikkhāpadavaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / วินยปิฎก • Vinayapiṭaka / มหาวิภงฺค • Mahāvibhaṅga / ๖. สุตฺตวิญฺญตฺติสิกฺขาปทํ • 6. Suttaviññattisikkhāpadaṃ
