| Library / Tipiṭaka / တိပိဋက • Tipiṭaka / သာရတ္ထဒီပနီ-ဋီကာ • Sāratthadīpanī-ṭīkā |
၆. သုတ္တဝိညတ္တိသိက္ခာပဒဝဏ္ဏနာ
6. Suttaviññattisikkhāpadavaṇṇanā
၆၃၆. ဆဋ္ဌေ ပာဠိယံ စီဝရကာရသမယေတိ ဣမိနာ ဝသ္သံဝုတ္ထဘိက္ခူနံ စီဝရကမ္မသမယတ္တာ စီဝရမာသော ဝုတ္တော, အထညောပိ ပန စီဝရကမ္မကာလော စီဝရကာရသမယောတိ ဝတ္တုံ ဝဋ္ဋတိ။
636. Chaṭṭhe pāḷiyaṃ cīvarakārasamayeti iminā vassaṃvutthabhikkhūnaṃ cīvarakammasamayattā cīvaramāso vutto, athaññopi pana cīvarakammakālo cīvarakārasamayoti vattuṃ vaṭṭati.
၆၃၈. ပဉ္စဟိပိ မိသ္သေတ္ဝာတိ ခောမာဒီဟိ ပဉ္စဟိ မိသ္သေတ္ဝာ။ ဝီတဝီတဋ္ဌာနံ ယတ္ထ သံဟရိတ္ဝာ ဌပေန္တိ, တသ္သ တုရီတိ အဓိဝစနံ။ သုတ္တံ ပဝေသေတ္ဝာ ယေန အာကောဋေန္တာ ဃနဘာဝံ သမ္ပာဒေန္တိ, တံ ဝေမန္တိ ဝုစ္စတိ။ ယံ ယန္တိ ယံ ယံ ပယောဂံ။ တန္တူနံ အတ္တနော သန္တကတ္တာ ဝီတဝီတဋ္ဌာနံ ပဋိလဒ္ဓမေဝ ဟောတီတိ အာဟ ‘‘ဒီဃတော။ပေ.။ ဝီတေ နိသ္သဂ္ဂိယံ ပာစိတ္တိယ’’န္တိ။ ပာဠိယမ္ပိ ဟိ ဣမိနာဝ အဓိပ္ပာယေန ‘‘ပဋိလာဘေန နိသ္သဂ္ဂိယ’’န္တိ ဝုတ္တံ, တသ္မာ ယာဝ စီဝရံ ဝဍ္ဎတိ, တာဝ ဣမိနာ ပမာဏေန အာပတ္တိယော ဝဍ္ဎန္တိ။
638.Pañcahipimissetvāti khomādīhi pañcahi missetvā. Vītavītaṭṭhānaṃ yattha saṃharitvā ṭhapenti, tassa turīti adhivacanaṃ. Suttaṃ pavesetvā yena ākoṭentā ghanabhāvaṃ sampādenti, taṃ vemanti vuccati. Yaṃ yanti yaṃ yaṃ payogaṃ. Tantūnaṃ attano santakattā vītavītaṭṭhānaṃ paṭiladdhameva hotīti āha ‘‘dīghato…pe… vīte nissaggiyaṃ pācittiya’’nti. Pāḷiyampi hi imināva adhippāyena ‘‘paṭilābhena nissaggiya’’nti vuttaṃ, tasmā yāva cīvaraṃ vaḍḍhati, tāva iminā pamāṇena āpattiyo vaḍḍhanti.
သေသော ကပ္ပိယောတိ ဧတ္ထ ဟတ္ထကမ္မယာစနဝသေန။ ပုဗ္ဗေ ဝုတ္တနယေန နိသ္သဂ္ဂိယန္တိ ဒီဃသော ဝိဒတ္ထိမတ္တေ တိရိယံ ဟတ္ထမတ္တေ စ ဝီတေ နိသ္သဂ္ဂိယံ။ တေနေဝာတိ အကပ္ပိယတန္တဝာယေန။ တထေဝ ဒုက္ကဋန္တိ ပရိစ္ဆေဒေ ပရိစ္ဆေဒေ ဒုက္ကဋံ။ ကေဒာရဗဒ္ဓာဒီဟီတိ အာဒိ-သဒ္ဒေန အစ္ဆိမဏ္ဍလဗဒ္ဓာဒိ ဂဟိတံ။ တန္တေ ဌိတံယေဝ အဓိဋ္ဌာတဗ္ဗန္တိ ဧတ္ထ ‘‘ပစ္ဆာ ဝီတဋ္ဌာနံ အဓိဋ္ဌိတဂတိကမေဝ ဟောတိ, ပုန အဓိဋ္ဌာနကိစ္စံ နတ္ထိ။ သစေ ပန ပရိစ္ဆေဒံ ဒသ္သေတ္ဝာ အန္တရန္တရာ အဝီတံ ဟောတိ, ပုန အဓိဋ္ဌာတဗ္ဗ’’န္တိ ဝဒန္တိ။ ဧသေဝ နယောတိ ဝိကပ္ပနုပဂပ္ပမာဏမတ္တေ ဝီတေ တန္တေ ဌိတံယေဝ အဓိဋ္ဌာတဗ္ဗန္တိ အတ္ထော။ စီဝရတ္ထာယ ဝိညာပိတသုတ္တံ, အတ္တုဒ္ဒေသိကတာ, အကပ္ပိယတန္တဝာယေန ဝာယာပနန္တိ ဣမာနေတ္ထ တီဏိ အင္ဂာနိ။
Seso kappiyoti ettha hatthakammayācanavasena. Pubbe vuttanayena nissaggiyanti dīghaso vidatthimatte tiriyaṃ hatthamatte ca vīte nissaggiyaṃ. Tenevāti akappiyatantavāyena. Tatheva dukkaṭanti paricchede paricchede dukkaṭaṃ. Kedārabaddhādīhīti ādi-saddena acchimaṇḍalabaddhādi gahitaṃ. Tante ṭhitaṃyeva adhiṭṭhātabbanti ettha ‘‘pacchā vītaṭṭhānaṃ adhiṭṭhitagatikameva hoti, puna adhiṭṭhānakiccaṃ natthi. Sace pana paricchedaṃ dassetvā antarantarā avītaṃ hoti, puna adhiṭṭhātabba’’nti vadanti. Eseva nayoti vikappanupagappamāṇamatte vīte tante ṭhitaṃyeva adhiṭṭhātabbanti attho. Cīvaratthāya viññāpitasuttaṃ, attuddesikatā, akappiyatantavāyena vāyāpananti imānettha tīṇi aṅgāni.
မာတိကာဋ္ဌကထာယံ (ကင္ခာ. အဋ္ဌ. သုတ္တဝိညတ္တိသိက္ခာပဒဝဏ္ဏနာ) ပန ဝာယာပေယ္ယာတိ ဧတ္ထ ‘‘စီဝရံ မေ, အာဝုသော, ဝာယထာတိ အကပ္ပိယဝိညတ္တိယာ ဝာယာပေယ္ယာ’’တိ အတ္ထံ ဝတ္ဝာ အင္ဂေသုပိ ‘‘အကပ္ပိယတန္တဝာယေန အကပ္ပိယဝိညတ္တိယာ ဝာယာပန’’န္တိ ဝိသေသေတ္ဝာ ဝုတ္တံ, တထာဝိဓံ ပန ဝိသေသဝစနံ နေဝ ပာဠိယံ, န အဋ္ဌကထာယံ ဥပလဗ္ဘတိ။ ပာဠိယမ္ပိ ‘‘ဉာတကာနံ ပဝာရိတာန’’န္တိ ဧတ္တကမေဝ အနာပတ္တိဝာရေ ဝုတ္တံ, အဋ္ဌကထာယဉ္စ သုတ္တတန္တဝာယာနမေဝ ကပ္ပိယာကပ္ပိယဘာဝေန ဗဟုဓာ နယော ဒသ္သိတော , န ကပ္ပိယာကပ္ပိယဝိညတ္တိဝသေနာတိ။ ‘‘အကပ္ပိယဝိညတ္တိယာ ဝာယာပေယ္ယာ’’တိ စ ဝိသေသေတ္ဝာ ဝဒန္တေန အယံ နာမ ကပ္ပိယဝိညတ္တီတိ ဝိသုံ န ဒသ္သိတံ, တသ္မာ ဝီမံသိတ္ဝာ ဂဟေတဗ္ဗံ။
Mātikāṭṭhakathāyaṃ (kaṅkhā. aṭṭha. suttaviññattisikkhāpadavaṇṇanā) pana vāyāpeyyāti ettha ‘‘cīvaraṃ me, āvuso, vāyathāti akappiyaviññattiyā vāyāpeyyā’’ti atthaṃ vatvā aṅgesupi ‘‘akappiyatantavāyena akappiyaviññattiyā vāyāpana’’nti visesetvā vuttaṃ, tathāvidhaṃ pana visesavacanaṃ neva pāḷiyaṃ, na aṭṭhakathāyaṃ upalabbhati. Pāḷiyampi ‘‘ñātakānaṃ pavāritāna’’nti ettakameva anāpattivāre vuttaṃ, aṭṭhakathāyañca suttatantavāyānameva kappiyākappiyabhāvena bahudhā nayo dassito , na kappiyākappiyaviññattivasenāti. ‘‘Akappiyaviññattiyā vāyāpeyyā’’ti ca visesetvā vadantena ayaṃ nāma kappiyaviññattīti visuṃ na dassitaṃ, tasmā vīmaṃsitvā gahetabbaṃ.
သုတ္တဝိညတ္တိသိက္ခာပဒဝဏ္ဏနာ နိဋ္ဌိတာ။
Suttaviññattisikkhāpadavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝိဘင္ဂ • Mahāvibhaṅga / ၆. သုတ္တဝိညတ္တိသိက္ခာပဒံ • 6. Suttaviññattisikkhāpadaṃ
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā / ၆. သုတ္တဝိညတ္တိသိက္ခာပဒဝဏ္ဏနာ • 6. Suttaviññattisikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / ၆. သုတ္တဝိညတ္တိသိက္ခာပဒဝဏ္ဏနာ • 6. Suttaviññattisikkhāpadavaṇṇanā
