| Library / Tipiṭaka / တိပိဋက • Tipiṭaka / ဝိမတိဝိနောဒနီ-ဋီကာ • Vimativinodanī-ṭīkā |
၆. သုတ္တဝိညတ္တိသိက္ခာပဒဝဏ္ဏနာ
6. Suttaviññattisikkhāpadavaṇṇanā
၆၃၆. ဆဋ္ဌေ ဝီတဝီတဋ္ဌာနံ ယသ္မိံ စတုရသ္သဒာရုမ္ဟိ ပလိဝေဌေန္တိ, တသ္သ တုရီတိ နာမံ။ ဝာယန္တာ တိရိယံ သုတ္တံ ပဝေသေတ္ဝာ ယေန အာကောဋေန္တာ ဝတ္ထေ ဃနဘာဝံ အာပာဒေန္တိ, တံ ‘‘ဝေမ’’န္တိ ဝုစ္စတိ။
636. Chaṭṭhe vītavītaṭṭhānaṃ yasmiṃ caturassadārumhi paliveṭhenti, tassa turīti nāmaṃ. Vāyantā tiriyaṃ suttaṃ pavesetvā yena ākoṭentā vatthe ghanabhāvaṃ āpādenti, taṃ ‘‘vema’’nti vuccati.
‘‘ဣတရသ္မိံ တထေဝ ဒုက္ကဋ’’န္တိ ဣမိနာ ဝာယိတုံ အာရဒ္ဓကာလတော ပဋ္ဌာယ ယထာဝုတ္တပရိစ္ဆေဒနိဋ္ဌိတေယေဝ ဒုက္ကဋမ္ပိ ဟောတိ, န တတော ပုဗ္ဗေ ဝာယနပယောဂေသူတိ ဒသ္သေတိ။
‘‘Itarasmiṃ tatheva dukkaṭa’’nti iminā vāyituṃ āraddhakālato paṭṭhāya yathāvuttaparicchedaniṭṭhiteyeva dukkaṭampi hoti, na tato pubbe vāyanapayogesūti dasseti.
တန္တေ ဌိတံယေဝ အဓိဋ္ဌာတဗ္ဗန္တိ ဧတ္ထ ဧကဝာရံ အဓိဋ္ဌိတေ ပစ္ဆာ ဝီတံ အဓိဋ္ဌိတဂတိကမေဝ ဟောတိ, ပုန အဓိဋ္ဌာနကိစ္စံ နတ္ထိ။ သစေ ပန အန္တရန္တရာ ဒသာ ဌပေတ္ဝာ ဝိသုံ ဝိသုံ သပရိစ္ဆေဒံ ဝီတံ ဟောတိ, ပစ္စေကံ အဓိဋ္ဌာတဗ္ဗမေဝာတိ ဒဋ္ဌဗ္ဗံ။ ဧတ္ထ စ ကပ္ပိယသုတ္တံ ဂဟေတ္ဝာ အညာတကအပ္ပဝာရိတေနာပိ အကပ္ပိယတန္တဝာယေန ‘‘သုတ္တမတ္ထိ, ဝာယန္တော နတ္ထီ’’တိအာဒိပရိယာယမုခေန ဝာယာပေန္တသ္သ အနာပတ္တိ။ တေနေဝ မာတိကာဋ္ဌကထာယံ (ကင္ခာ. အဋ္ဌ. သုတ္တဝိညတ္တိသိက္ခာပဒဝဏ္ဏနာ) ‘‘ဝာယာပေယ္ယာ’’တိ ပဒသ္သ ‘‘စီဝရံ မေ, အာဝုသော, ဝာယထာတိ အကပ္ပိယဝိညတ္တိယာ ဝာယာပေယ္ယာ’’တိ အတ္ထော ဝုတ္တော, ဧဝံ ဝဒန္တော အကပ္ပိယတန္တဝာယေန ဝာယာပေတိ နာမ, နာညထာ။
Tanteṭhitaṃyeva adhiṭṭhātabbanti ettha ekavāraṃ adhiṭṭhite pacchā vītaṃ adhiṭṭhitagatikameva hoti, puna adhiṭṭhānakiccaṃ natthi. Sace pana antarantarā dasā ṭhapetvā visuṃ visuṃ saparicchedaṃ vītaṃ hoti, paccekaṃ adhiṭṭhātabbamevāti daṭṭhabbaṃ. Ettha ca kappiyasuttaṃ gahetvā aññātakaappavāritenāpi akappiyatantavāyena ‘‘suttamatthi, vāyanto natthī’’tiādipariyāyamukhena vāyāpentassa anāpatti. Teneva mātikāṭṭhakathāyaṃ (kaṅkhā. aṭṭha. suttaviññattisikkhāpadavaṇṇanā) ‘‘vāyāpeyyā’’ti padassa ‘‘cīvaraṃ me, āvuso, vāyathāti akappiyaviññattiyā vāyāpeyyā’’ti attho vutto, evaṃ vadanto akappiyatantavāyena vāyāpeti nāma, nāññathā.
၆၄၀. အနာပတ္တိ စီဝရံ သိဗ္ဗေတုန္တိအာဒီသု ဣမိနာ သိက္ခာပဒေနေဝ အနာပတ္တိ, အကတဝိညတ္တိပစ္စယာ ပန ဒုက္ကဋမေဝာတိ ဝဒန္တိ။ အကပ္ပိယသုတ္တတာ, အတ္တုဒ္ဒေသိကတာ, အကပ္ပိယတန္တဝာယေန အကပ္ပိယဝိညတ္တိယာ ဝာယာပနန္တိ ဣမာနေတ္ထ တီဏိ အင္ဂာနိ။
640.Anāpatti cīvaraṃ sibbetuntiādīsu iminā sikkhāpadeneva anāpatti, akataviññattipaccayā pana dukkaṭamevāti vadanti. Akappiyasuttatā, attuddesikatā, akappiyatantavāyena akappiyaviññattiyā vāyāpananti imānettha tīṇi aṅgāni.
သုတ္တဝိညတ္တိသိက္ခာပဒဝဏ္ဏနာ နိဋ္ဌိတာ။
Suttaviññattisikkhāpadavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝိဘင္ဂ • Mahāvibhaṅga / ၆. သုတ္တဝိညတ္တိသိက္ခာပဒံ • 6. Suttaviññattisikkhāpadaṃ
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā / ၆. သုတ္တဝိညတ္တိသိက္ခာပဒဝဏ္ဏနာ • 6. Suttaviññattisikkhāpadavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၆. သုတ္တဝိညတ္တိသိက္ခာပဒဝဏ္ဏနာ • 6. Suttaviññattisikkhāpadavaṇṇanā
