| Library / Tipiṭaka / ತಿಪಿಟಕ • Tipiṭaka / ವಜಿರಬುದ್ಧಿ-ಟೀಕಾ • Vajirabuddhi-ṭīkā |
೬. ಸುತ್ತವಿಞ್ಞತ್ತಿಸಿಕ್ಖಾಪದವಣ್ಣನಾ
6. Suttaviññattisikkhāpadavaṇṇanā
೬೩೭. ಛಟ್ಠೇ ಕಿಞ್ಚಾಪಿ ‘‘ಸಾಮಂ ಸುತ್ತಂ ವಿಞ್ಞಾಪೇತ್ವಾ’’ತಿ ವುತ್ತಂ, ಮಾತಿಕಾಟ್ಠಕಥಾಯಂ ಪನ ‘‘ಚೀವರತ್ಥಾಯ ಸಾಮಂ ವಿಞ್ಞತ್ತಂ ಸುತ್ತ’’ನ್ತಿ ಅವತ್ವಾ ಕೇವಲಂ ‘‘ಚೀವರತ್ಥಾಯ ವಿಞ್ಞಾಪಿತಸುತ್ತ’’ನ್ತಿ ಅಙ್ಗೇಸು ವುತ್ತತ್ತಾ ಅಞ್ಞೇನ ಚೀವರತ್ಥಾಯ ವಿಞ್ಞತ್ತಂ ಸುತ್ತಮ್ಪಿ ಸಙ್ಗಹಂ ಗಚ್ಛತೀತಿ ವೇದಿತಬ್ಬಂ। ಸಾಮನ್ತಿ ಚೇತ್ಥ ಕಸ್ಸಚಿ ನಿಯಮನಂ। ‘‘ಸಾಮಂ ವಿಞ್ಞಾಪೇತ್ವಾ’’ತಿ ಕಿಞ್ಚಾಪಿ ವುತ್ತಂ, ತಥಾಪಿ ‘‘ಸಾಮಂ ವಾಯಾಪೇಯ್ಯಾ’’ತಿ ಅತ್ತನೋ ಅತ್ಥಾಯ ವಾಯಾಪೇಯ್ಯಾತಿ ಏವಂ ಸಮ್ಬನ್ಧೋ, ಅತ್ಥೋ ಚ ವೇದಿತಬ್ಬೋ, ಪಾಳಿಯಂ ಪನ ಆಸನ್ನಪದೇನ ಯೋಜನಾ ಕತಾ, ತಸ್ಮಾ ಸಾಮಂ ವಿಞ್ಞತ್ತಂ ಸುತ್ತನ್ತಿ ಅಞ್ಞವಿಞ್ಞತ್ತಂ ಕಪ್ಪಿಯಂ ಆಪಜ್ಜತಿ, ಹತ್ಥಕಮ್ಮಯಾಚನವಸೇನ ಲದ್ಧತನ್ತವಾಯೋಪಿ ಕಪ್ಪಿಯೋ। ವಿಕಪ್ಪನುಪಗಪಚ್ಛಿಮಪ್ಪಮಾಣಂ ಚೇ, ತನ್ತೇ ವೀತಂಯೇವ ಸಕಿಂ ಅಧಿಟ್ಠಾತಬ್ಬಂ, ಪುನ ಅಧಿಟ್ಠಾನಕಿಚ್ಚಂ ನತ್ಥಿ ಅಧಿಟ್ಠಿತೇನ ಏಕೀಭಾವೂಪಗಮನತೋ। ‘‘ಸಚೇ ಪನ ಪರಿಚ್ಛೇದಂ ದಸ್ಸೇತ್ವಾವ ಚಿನಸಾಟಕಂ ವಿಯ, ಅನ್ತರನ್ತರಾ ಅಧಿಟ್ಠಿತಂ ಹೋತಿ, ಪುನ ಅಧಿಟ್ಠಾತಬ್ಬ’’ನ್ತಿ ವುತ್ತಂ। ‘‘ಪಟಿಲಾಭೇನಾತಿ ವಚನೇನ ವಾಯಾಪೇತ್ವಾ ಠಪೇಸ್ಸಾಮೀತಿಆದಿ ಏಕಸ್ಮಿಂ ಅನ್ತೋಗಧಂ ಹೋತೀ’’ತಿ ವದನ್ತಿ।
637. Chaṭṭhe kiñcāpi ‘‘sāmaṃ suttaṃ viññāpetvā’’ti vuttaṃ, mātikāṭṭhakathāyaṃ pana ‘‘cīvaratthāya sāmaṃ viññattaṃ sutta’’nti avatvā kevalaṃ ‘‘cīvaratthāya viññāpitasutta’’nti aṅgesu vuttattā aññena cīvaratthāya viññattaṃ suttampi saṅgahaṃ gacchatīti veditabbaṃ. Sāmanti cettha kassaci niyamanaṃ. ‘‘Sāmaṃ viññāpetvā’’ti kiñcāpi vuttaṃ, tathāpi ‘‘sāmaṃ vāyāpeyyā’’ti attano atthāya vāyāpeyyāti evaṃ sambandho, attho ca veditabbo, pāḷiyaṃ pana āsannapadena yojanā katā, tasmā sāmaṃ viññattaṃ suttanti aññaviññattaṃ kappiyaṃ āpajjati, hatthakammayācanavasena laddhatantavāyopi kappiyo. Vikappanupagapacchimappamāṇaṃ ce, tante vītaṃyeva sakiṃ adhiṭṭhātabbaṃ, puna adhiṭṭhānakiccaṃ natthi adhiṭṭhitena ekībhāvūpagamanato. ‘‘Sace pana paricchedaṃ dassetvāva cinasāṭakaṃ viya, antarantarā adhiṭṭhitaṃ hoti, puna adhiṭṭhātabba’’nti vuttaṃ. ‘‘Paṭilābhenāti vacanena vāyāpetvā ṭhapessāmītiādi ekasmiṃ antogadhaṃ hotī’’ti vadanti.
ಸುತ್ತವಿಞ್ಞತ್ತಿಸಿಕ್ಖಾಪದವಣ್ಣನಾ ನಿಟ್ಠಿತಾ।
Suttaviññattisikkhāpadavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಿಭಙ್ಗ • Mahāvibhaṅga / ೬. ಸುತ್ತವಿಞ್ಞತ್ತಿಸಿಕ್ಖಾಪದಂ • 6. Suttaviññattisikkhāpadaṃ
