| Library / Tipiṭaka / ತಿಪಿಟಕ • Tipiṭaka / ವಿಮತಿವಿನೋದನೀ-ಟೀಕಾ • Vimativinodanī-ṭīkā |
೬. ಸುತ್ತವಿಞ್ಞತ್ತಿಸಿಕ್ಖಾಪದವಣ್ಣನಾ
6. Suttaviññattisikkhāpadavaṇṇanā
೬೩೬. ಛಟ್ಠೇ ವೀತವೀತಟ್ಠಾನಂ ಯಸ್ಮಿಂ ಚತುರಸ್ಸದಾರುಮ್ಹಿ ಪಲಿವೇಠೇನ್ತಿ, ತಸ್ಸ ತುರೀತಿ ನಾಮಂ। ವಾಯನ್ತಾ ತಿರಿಯಂ ಸುತ್ತಂ ಪವೇಸೇತ್ವಾ ಯೇನ ಆಕೋಟೇನ್ತಾ ವತ್ಥೇ ಘನಭಾವಂ ಆಪಾದೇನ್ತಿ, ತಂ ‘‘ವೇಮ’’ನ್ತಿ ವುಚ್ಚತಿ।
636. Chaṭṭhe vītavītaṭṭhānaṃ yasmiṃ caturassadārumhi paliveṭhenti, tassa turīti nāmaṃ. Vāyantā tiriyaṃ suttaṃ pavesetvā yena ākoṭentā vatthe ghanabhāvaṃ āpādenti, taṃ ‘‘vema’’nti vuccati.
‘‘ಇತರಸ್ಮಿಂ ತಥೇವ ದುಕ್ಕಟ’’ನ್ತಿ ಇಮಿನಾ ವಾಯಿತುಂ ಆರದ್ಧಕಾಲತೋ ಪಟ್ಠಾಯ ಯಥಾವುತ್ತಪರಿಚ್ಛೇದನಿಟ್ಠಿತೇಯೇವ ದುಕ್ಕಟಮ್ಪಿ ಹೋತಿ, ನ ತತೋ ಪುಬ್ಬೇ ವಾಯನಪಯೋಗೇಸೂತಿ ದಸ್ಸೇತಿ।
‘‘Itarasmiṃ tatheva dukkaṭa’’nti iminā vāyituṃ āraddhakālato paṭṭhāya yathāvuttaparicchedaniṭṭhiteyeva dukkaṭampi hoti, na tato pubbe vāyanapayogesūti dasseti.
ತನ್ತೇ ಠಿತಂಯೇವ ಅಧಿಟ್ಠಾತಬ್ಬನ್ತಿ ಏತ್ಥ ಏಕವಾರಂ ಅಧಿಟ್ಠಿತೇ ಪಚ್ಛಾ ವೀತಂ ಅಧಿಟ್ಠಿತಗತಿಕಮೇವ ಹೋತಿ, ಪುನ ಅಧಿಟ್ಠಾನಕಿಚ್ಚಂ ನತ್ಥಿ। ಸಚೇ ಪನ ಅನ್ತರನ್ತರಾ ದಸಾ ಠಪೇತ್ವಾ ವಿಸುಂ ವಿಸುಂ ಸಪರಿಚ್ಛೇದಂ ವೀತಂ ಹೋತಿ, ಪಚ್ಚೇಕಂ ಅಧಿಟ್ಠಾತಬ್ಬಮೇವಾತಿ ದಟ್ಠಬ್ಬಂ। ಏತ್ಥ ಚ ಕಪ್ಪಿಯಸುತ್ತಂ ಗಹೇತ್ವಾ ಅಞ್ಞಾತಕಅಪ್ಪವಾರಿತೇನಾಪಿ ಅಕಪ್ಪಿಯತನ್ತವಾಯೇನ ‘‘ಸುತ್ತಮತ್ಥಿ, ವಾಯನ್ತೋ ನತ್ಥೀ’’ತಿಆದಿಪರಿಯಾಯಮುಖೇನ ವಾಯಾಪೇನ್ತಸ್ಸ ಅನಾಪತ್ತಿ। ತೇನೇವ ಮಾತಿಕಾಟ್ಠಕಥಾಯಂ (ಕಙ್ಖಾ॰ ಅಟ್ಠ॰ ಸುತ್ತವಿಞ್ಞತ್ತಿಸಿಕ್ಖಾಪದವಣ್ಣನಾ) ‘‘ವಾಯಾಪೇಯ್ಯಾ’’ತಿ ಪದಸ್ಸ ‘‘ಚೀವರಂ ಮೇ, ಆವುಸೋ, ವಾಯಥಾತಿ ಅಕಪ್ಪಿಯವಿಞ್ಞತ್ತಿಯಾ ವಾಯಾಪೇಯ್ಯಾ’’ತಿ ಅತ್ಥೋ ವುತ್ತೋ, ಏವಂ ವದನ್ತೋ ಅಕಪ್ಪಿಯತನ್ತವಾಯೇನ ವಾಯಾಪೇತಿ ನಾಮ, ನಾಞ್ಞಥಾ।
Tanteṭhitaṃyeva adhiṭṭhātabbanti ettha ekavāraṃ adhiṭṭhite pacchā vītaṃ adhiṭṭhitagatikameva hoti, puna adhiṭṭhānakiccaṃ natthi. Sace pana antarantarā dasā ṭhapetvā visuṃ visuṃ saparicchedaṃ vītaṃ hoti, paccekaṃ adhiṭṭhātabbamevāti daṭṭhabbaṃ. Ettha ca kappiyasuttaṃ gahetvā aññātakaappavāritenāpi akappiyatantavāyena ‘‘suttamatthi, vāyanto natthī’’tiādipariyāyamukhena vāyāpentassa anāpatti. Teneva mātikāṭṭhakathāyaṃ (kaṅkhā. aṭṭha. suttaviññattisikkhāpadavaṇṇanā) ‘‘vāyāpeyyā’’ti padassa ‘‘cīvaraṃ me, āvuso, vāyathāti akappiyaviññattiyā vāyāpeyyā’’ti attho vutto, evaṃ vadanto akappiyatantavāyena vāyāpeti nāma, nāññathā.
೬೪೦. ಅನಾಪತ್ತಿ ಚೀವರಂ ಸಿಬ್ಬೇತುನ್ತಿಆದೀಸು ಇಮಿನಾ ಸಿಕ್ಖಾಪದೇನೇವ ಅನಾಪತ್ತಿ, ಅಕತವಿಞ್ಞತ್ತಿಪಚ್ಚಯಾ ಪನ ದುಕ್ಕಟಮೇವಾತಿ ವದನ್ತಿ। ಅಕಪ್ಪಿಯಸುತ್ತತಾ, ಅತ್ತುದ್ದೇಸಿಕತಾ, ಅಕಪ್ಪಿಯತನ್ತವಾಯೇನ ಅಕಪ್ಪಿಯವಿಞ್ಞತ್ತಿಯಾ ವಾಯಾಪನನ್ತಿ ಇಮಾನೇತ್ಥ ತೀಣಿ ಅಙ್ಗಾನಿ।
640.Anāpatti cīvaraṃ sibbetuntiādīsu iminā sikkhāpadeneva anāpatti, akataviññattipaccayā pana dukkaṭamevāti vadanti. Akappiyasuttatā, attuddesikatā, akappiyatantavāyena akappiyaviññattiyā vāyāpananti imānettha tīṇi aṅgāni.
ಸುತ್ತವಿಞ್ಞತ್ತಿಸಿಕ್ಖಾಪದವಣ್ಣನಾ ನಿಟ್ಠಿತಾ।
Suttaviññattisikkhāpadavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಿಭಙ್ಗ • Mahāvibhaṅga / ೬. ಸುತ್ತವಿಞ್ಞತ್ತಿಸಿಕ್ಖಾಪದಂ • 6. Suttaviññattisikkhāpadaṃ
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಮಹಾವಿಭಙ್ಗ-ಅಟ್ಠಕಥಾ • Mahāvibhaṅga-aṭṭhakathā / ೬. ಸುತ್ತವಿಞ್ಞತ್ತಿಸಿಕ್ಖಾಪದವಣ್ಣನಾ • 6. Suttaviññattisikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ೬. ಸುತ್ತವಿಞ್ಞತ್ತಿಸಿಕ್ಖಾಪದವಣ್ಣನಾ • 6. Suttaviññattisikkhāpadavaṇṇanā
