| Library / Tipiṭaka / තිපිටක • Tipiṭaka / විමතිවිනොදනී-ටීකා • Vimativinodanī-ṭīkā |
6. සුත්‌තවිඤ්‌ඤත්‌තිසික්‌ඛාපදවණ්‌ණනා
6. Suttaviññattisikkhāpadavaṇṇanā
636. ඡට්‌ඨෙ වීතවීතට්‌ඨානං යස්‌මිං චතුරස්‌සදාරුම්‌හි පලිවෙඨෙන්‌ති, තස්‌ස තුරීති නාමං. වායන්‌තා තිරියං සුත්‌තං පවෙසෙත්‌වා යෙන ආකොටෙන්‌තා වත්‌ථෙ ඝනභාවං ආපාදෙන්‌ති, තං ‘‘වෙම’’න්‌ති වුච්‌චති.
636. Chaṭṭhe vītavītaṭṭhānaṃ yasmiṃ caturassadārumhi paliveṭhenti, tassa turīti nāmaṃ. Vāyantā tiriyaṃ suttaṃ pavesetvā yena ākoṭentā vatthe ghanabhāvaṃ āpādenti, taṃ ‘‘vema’’nti vuccati.
‘‘ඉතරස්‌මිං තථෙව දුක්‌කට’’න්‌ති ඉමිනා වායිතුං ආරද්‌ධකාලතො පට්‌ඨාය යථාවුත්‌තපරිච්‌ඡෙදනිට්‌ඨිතෙයෙව දුක්‌කටම්‌පි හොති, න තතො පුබ්‌බෙ වායනපයොගෙසූති දස්‌සෙති.
‘‘Itarasmiṃ tatheva dukkaṭa’’nti iminā vāyituṃ āraddhakālato paṭṭhāya yathāvuttaparicchedaniṭṭhiteyeva dukkaṭampi hoti, na tato pubbe vāyanapayogesūti dasseti.
තන්‌තෙ ඨිතංයෙව අධිට්‌ඨාතබ්‌බන්‌ති එත්‌ථ එකවාරං අධිට්‌ඨිතෙ පච්‌ඡා වීතං අධිට්‌ඨිතගතිකමෙව හොති, පුන අධිට්‌ඨානකිච්‌චං නත්‌ථි. සචෙ පන අන්‌තරන්‌තරා දසා ඨපෙත්‌වා විසුං විසුං සපරිච්‌ඡෙදං වීතං හොති, පච්‌චෙකං අධිට්‌ඨාතබ්‌බමෙවාති දට්‌ඨබ්‌බං. එත්‌ථ ච කප්‌පියසුත්‌තං ගහෙත්‌වා අඤ්‌ඤාතකඅප්‌පවාරිතෙනාපි අකප්‌පියතන්‌තවායෙන ‘‘සුත්‌තමත්‌ථි, වායන්‌තො නත්‌ථී’’තිආදිපරියායමුඛෙන වායාපෙන්‌තස්‌ස අනාපත්‌ති. තෙනෙව මාතිකාට්‌ඨකථායං (කඞ්‌ඛා. අට්‌ඨ. සුත්‌තවිඤ්‌ඤත්‌තිසික්‌ඛාපදවණ්‌ණනා) ‘‘වායාපෙය්‍යා’’ති පදස්‌ස ‘‘චීවරං මෙ, ආවුසො, වායථාති අකප්‌පියවිඤ්‌ඤත්‌තියා වායාපෙය්‍යා’’ති අත්‌ථො වුත්‌තො, එවං වදන්‌තො අකප්‌පියතන්‌තවායෙන වායාපෙති නාම, නාඤ්‌ඤථා.
Tanteṭhitaṃyeva adhiṭṭhātabbanti ettha ekavāraṃ adhiṭṭhite pacchā vītaṃ adhiṭṭhitagatikameva hoti, puna adhiṭṭhānakiccaṃ natthi. Sace pana antarantarā dasā ṭhapetvā visuṃ visuṃ saparicchedaṃ vītaṃ hoti, paccekaṃ adhiṭṭhātabbamevāti daṭṭhabbaṃ. Ettha ca kappiyasuttaṃ gahetvā aññātakaappavāritenāpi akappiyatantavāyena ‘‘suttamatthi, vāyanto natthī’’tiādipariyāyamukhena vāyāpentassa anāpatti. Teneva mātikāṭṭhakathāyaṃ (kaṅkhā. aṭṭha. suttaviññattisikkhāpadavaṇṇanā) ‘‘vāyāpeyyā’’ti padassa ‘‘cīvaraṃ me, āvuso, vāyathāti akappiyaviññattiyā vāyāpeyyā’’ti attho vutto, evaṃ vadanto akappiyatantavāyena vāyāpeti nāma, nāññathā.
640. අනාපත්‌ති චීවරං සිබ්‌බෙතුන්‌තිආදීසු ඉමිනා සික්‌ඛාපදෙනෙව අනාපත්‌ති, අකතවිඤ්‌ඤත්‌තිපච්‌චයා පන දුක්‌කටමෙවාති වදන්‌ති. අකප්‌පියසුත්‌තතා, අත්‌තුද්‌දෙසිකතා, අකප්‌පියතන්‌තවායෙන අකප්‌පියවිඤ්‌ඤත්‌තියා වායාපනන්‌ති ඉමානෙත්‌ථ තීණි අඞ්‌ගානි.
640.Anāpatti cīvaraṃ sibbetuntiādīsu iminā sikkhāpadeneva anāpatti, akataviññattipaccayā pana dukkaṭamevāti vadanti. Akappiyasuttatā, attuddesikatā, akappiyatantavāyena akappiyaviññattiyā vāyāpananti imānettha tīṇi aṅgāni.
සුත්‌තවිඤ්‌ඤත්‌තිසික්‌ඛාපදවණ්‌ණනා නිට්‌ඨිතා.
Suttaviññattisikkhāpadavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවිභඞ්‌ග • Mahāvibhaṅga / 6. සුත්‌තවිඤ්‌ඤත්‌තිසික්‌ඛාපදං • 6. Suttaviññattisikkhāpadaṃ
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවිභඞ්‌ග-අට්‌ඨකථා • Mahāvibhaṅga-aṭṭhakathā / 6. සුත්‌තවිඤ්‌ඤත්‌තිසික්‌ඛාපදවණ්‌ණනා • 6. Suttaviññattisikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 6. සුත්‌තවිඤ්‌ඤත්‌තිසික්‌ඛාපදවණ්‌ණනා • 6. Suttaviññattisikkhāpadavaṇṇanā
