| Library / Tipiṭaka / ཏིཔིཊཀ • Tipiṭaka / སཱརཏྠདཱིཔནཱི-ཊཱིཀཱ • Sāratthadīpanī-ṭīkā |
༦. སུཏྟཝིཉྙཏྟིསིཀྑཱཔདཝཎྞནཱ
6. Suttaviññattisikkhāpadavaṇṇanā
༦༣༦. ཚཊྛེ པཱལི༹ཡཾ ཙཱིཝརཀཱརསམཡེཏི ཨིམིནཱ ཝསྶཾཝུཏྠབྷིཀྑཱུནཾ ཙཱིཝརཀམྨསམཡཏྟཱ ཙཱིཝརམཱསོ ཝུཏྟོ, ཨཐཉྙོཔི པན ཙཱིཝརཀམྨཀཱལོ ཙཱིཝརཀཱརསམཡོཏི ཝཏྟུཾ ཝཊྚཏི།
636. Chaṭṭhe pāḷiyaṃ cīvarakārasamayeti iminā vassaṃvutthabhikkhūnaṃ cīvarakammasamayattā cīvaramāso vutto, athaññopi pana cīvarakammakālo cīvarakārasamayoti vattuṃ vaṭṭati.
༦༣༨. པཉྩཧིཔི མིསྶེཏྭཱཏི ཁོམཱདཱིཧི པཉྩཧི མིསྶེཏྭཱ། ཝཱིཏཝཱིཏཊྛཱནཾ ཡཏྠ སཾཧརིཏྭཱ ཋཔེནྟི, ཏསྶ ཏུརཱིཏི ཨདྷིཝཙནཾ། སུཏྟཾ པཝེསེཏྭཱ ཡེན ཨཱཀོཊེནྟཱ གྷནབྷཱཝཾ སམྤཱདེནྟི, ཏཾ ཝེམནྟི ཝུཙྩཏི། ཡཾ ཡནྟི ཡཾ ཡཾ པཡོགཾ། ཏནྟཱུནཾ ཨཏྟནོ སནྟཀཏྟཱ ཝཱིཏཝཱིཏཊྛཱནཾ པཊིལདྡྷམེཝ ཧོཏཱིཏི ཨཱཧ ‘‘དཱིགྷཏོ…པེ॰… ཝཱིཏེ ནིསྶགྒིཡཾ པཱཙིཏྟིཡ’’ནྟི། པཱལི༹ཡམྤི ཧི ཨིམིནཱཝ ཨདྷིཔྤཱཡེན ‘‘པཊིལཱབྷེན ནིསྶགྒིཡ’’ནྟི ཝུཏྟཾ, ཏསྨཱ ཡཱཝ ཙཱིཝརཾ ཝཌྜྷཏི, ཏཱཝ ཨིམིནཱ པམཱཎེན ཨཱཔཏྟིཡོ ཝཌྜྷནྟི།
638.Pañcahipimissetvāti khomādīhi pañcahi missetvā. Vītavītaṭṭhānaṃ yattha saṃharitvā ṭhapenti, tassa turīti adhivacanaṃ. Suttaṃ pavesetvā yena ākoṭentā ghanabhāvaṃ sampādenti, taṃ vemanti vuccati. Yaṃ yanti yaṃ yaṃ payogaṃ. Tantūnaṃ attano santakattā vītavītaṭṭhānaṃ paṭiladdhameva hotīti āha ‘‘dīghato…pe… vīte nissaggiyaṃ pācittiya’’nti. Pāḷiyampi hi imināva adhippāyena ‘‘paṭilābhena nissaggiya’’nti vuttaṃ, tasmā yāva cīvaraṃ vaḍḍhati, tāva iminā pamāṇena āpattiyo vaḍḍhanti.
སེསོ ཀཔྤིཡོཏི ཨེཏྠ ཧཏྠཀམྨཡཱཙནཝསེན། པུབྦེ ཝུཏྟནཡེན ནིསྶགྒིཡནྟི དཱིགྷསོ ཝིདཏྠིམཏྟེ ཏིརིཡཾ ཧཏྠམཏྟེ ཙ ཝཱིཏེ ནིསྶགྒིཡཾ། ཏེནེཝཱཏི ཨཀཔྤིཡཏནྟཝཱཡེན། ཏཐེཝ དུཀྐཊནྟི པརིཙྪེདེ པརིཙྪེདེ དུཀྐཊཾ། ཀེདཱརབདྡྷཱདཱིཧཱིཏི ཨཱདི-སདྡེན ཨཙྪིམཎྜལབདྡྷཱདི གཧིཏཾ། ཏནྟེ ཋིཏཾཡེཝ ཨདྷིཊྛཱཏབྦནྟི ཨེཏྠ ‘‘པཙྪཱ ཝཱིཏཊྛཱནཾ ཨདྷིཊྛིཏགཏིཀམེཝ ཧོཏི, པུན ཨདྷིཊྛཱནཀིཙྩཾ ནཏྠི། སཙེ པན པརིཙྪེདཾ དསྶེཏྭཱ ཨནྟརནྟརཱ ཨཝཱིཏཾ ཧོཏི, པུན ཨདྷིཊྛཱཏབྦ’’ནྟི ཝདནྟི། ཨེསེཝ ནཡོཏི ཝིཀཔྤནུཔགཔྤམཱཎམཏྟེ ཝཱིཏེ ཏནྟེ ཋིཏཾཡེཝ ཨདྷིཊྛཱཏབྦནྟི ཨཏྠོ། ཙཱིཝརཏྠཱཡ ཝིཉྙཱཔིཏསུཏྟཾ, ཨཏྟུདྡེསིཀཏཱ, ཨཀཔྤིཡཏནྟཝཱཡེན ཝཱཡཱཔནནྟི ཨིམཱནེཏྠ ཏཱིཎི ཨངྒཱནི།
Seso kappiyoti ettha hatthakammayācanavasena. Pubbe vuttanayena nissaggiyanti dīghaso vidatthimatte tiriyaṃ hatthamatte ca vīte nissaggiyaṃ. Tenevāti akappiyatantavāyena. Tatheva dukkaṭanti paricchede paricchede dukkaṭaṃ. Kedārabaddhādīhīti ādi-saddena acchimaṇḍalabaddhādi gahitaṃ. Tante ṭhitaṃyeva adhiṭṭhātabbanti ettha ‘‘pacchā vītaṭṭhānaṃ adhiṭṭhitagatikameva hoti, puna adhiṭṭhānakiccaṃ natthi. Sace pana paricchedaṃ dassetvā antarantarā avītaṃ hoti, puna adhiṭṭhātabba’’nti vadanti. Eseva nayoti vikappanupagappamāṇamatte vīte tante ṭhitaṃyeva adhiṭṭhātabbanti attho. Cīvaratthāya viññāpitasuttaṃ, attuddesikatā, akappiyatantavāyena vāyāpananti imānettha tīṇi aṅgāni.
མཱཏིཀཱཊྛཀཐཱཡཾ (ཀངྑཱ॰ ཨཊྛ॰ སུཏྟཝིཉྙཏྟིསིཀྑཱཔདཝཎྞནཱ) པན ཝཱཡཱཔེཡྻཱཏི ཨེཏྠ ‘‘ཙཱིཝརཾ མེ, ཨཱཝུསོ, ཝཱཡཐཱཏི ཨཀཔྤིཡཝིཉྙཏྟིཡཱ ཝཱཡཱཔེཡྻཱ’’ཏི ཨཏྠཾ ཝཏྭཱ ཨངྒེསུཔི ‘‘ཨཀཔྤིཡཏནྟཝཱཡེན ཨཀཔྤིཡཝིཉྙཏྟིཡཱ ཝཱཡཱཔན’’ནྟི ཝིསེསེཏྭཱ ཝུཏྟཾ, ཏཐཱཝིདྷཾ པན ཝིསེསཝཙནཾ ནེཝ པཱལི༹ཡཾ, ན ཨཊྛཀཐཱཡཾ ཨུཔལབྦྷཏི། པཱལི༹ཡམྤི ‘‘ཉཱཏཀཱནཾ པཝཱརིཏཱན’’ནྟི ཨེཏྟཀམེཝ ཨནཱཔཏྟིཝཱརེ ཝུཏྟཾ, ཨཊྛཀཐཱཡཉྩ སུཏྟཏནྟཝཱཡཱནམེཝ ཀཔྤིཡཱཀཔྤིཡབྷཱཝེན བཧུདྷཱ ནཡོ དསྶིཏོ , ན ཀཔྤིཡཱཀཔྤིཡཝིཉྙཏྟིཝསེནཱཏི། ‘‘ཨཀཔྤིཡཝིཉྙཏྟིཡཱ ཝཱཡཱཔེཡྻཱ’’ཏི ཙ ཝིསེསེཏྭཱ ཝདནྟེན ཨཡཾ ནཱམ ཀཔྤིཡཝིཉྙཏྟཱིཏི ཝིསུཾ ན དསྶིཏཾ, ཏསྨཱ ཝཱིམཾསིཏྭཱ གཧེཏབྦཾ།
Mātikāṭṭhakathāyaṃ (kaṅkhā. aṭṭha. suttaviññattisikkhāpadavaṇṇanā) pana vāyāpeyyāti ettha ‘‘cīvaraṃ me, āvuso, vāyathāti akappiyaviññattiyā vāyāpeyyā’’ti atthaṃ vatvā aṅgesupi ‘‘akappiyatantavāyena akappiyaviññattiyā vāyāpana’’nti visesetvā vuttaṃ, tathāvidhaṃ pana visesavacanaṃ neva pāḷiyaṃ, na aṭṭhakathāyaṃ upalabbhati. Pāḷiyampi ‘‘ñātakānaṃ pavāritāna’’nti ettakameva anāpattivāre vuttaṃ, aṭṭhakathāyañca suttatantavāyānameva kappiyākappiyabhāvena bahudhā nayo dassito , na kappiyākappiyaviññattivasenāti. ‘‘Akappiyaviññattiyā vāyāpeyyā’’ti ca visesetvā vadantena ayaṃ nāma kappiyaviññattīti visuṃ na dassitaṃ, tasmā vīmaṃsitvā gahetabbaṃ.
སུཏྟཝིཉྙཏྟིསིཀྑཱཔདཝཎྞནཱ ནིཊྛིཏཱ།
Suttaviññattisikkhāpadavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / མཧཱཝིབྷངྒ • Mahāvibhaṅga / ༦. སུཏྟཝིཉྙཏྟིསིཀྑཱཔདཾ • 6. Suttaviññattisikkhāpadaṃ
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝིབྷངྒ-ཨཊྛཀཐཱ • Mahāvibhaṅga-aṭṭhakathā / ༦. སུཏྟཝིཉྙཏྟིསིཀྑཱཔདཝཎྞནཱ • 6. Suttaviññattisikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā / ༦. སུཏྟཝིཉྙཏྟིསིཀྑཱཔདཝཎྞནཱ • 6. Suttaviññattisikkhāpadavaṇṇanā
