| Library / Tipiṭaka / ਤਿਪਿਟਕ • Tipiṭaka / ਕਙ੍ਖਾવਿਤਰਣੀ-ਅਭਿਨવ-ਟੀਕਾ • Kaṅkhāvitaraṇī-abhinava-ṭīkā |
੬. ਸੁਤ੍ਤવਿਞ੍ਞਤ੍ਤਿਸਿਕ੍ਖਾਪਦવਣ੍ਣਨਾ
6. Suttaviññattisikkhāpadavaṇṇanā
ਛਬ੍ਬਿਧਂ ਖੋਮਸੁਤ੍ਤਾਦਿਨ੍ਤਿ ‘‘ਸੁਤ੍ਤਂ ਨਾਮ ਛ ਸੁਤ੍ਤਾਨਿ ਖੋਮਂ ਕਪ੍ਪਾਸਿਕਂ ਕੋਸੇਯ੍ਯਂ ਕਮ੍ਬਲਂ ਸਾਣਂ ਭਙ੍ਗ’’ਨ੍ਤਿ (ਪਾਰਾ॰ ੬੩੮) ਏવਂ વੁਤ੍ਤਂ ਛਬ੍ਬਿਧਂ ਖੋਮਸੁਤ੍ਤਾਦਿਂ। ਤਤ੍ਥ ਖੋਮਨ੍ਤਿ (ਪਾਰਾ॰ ਅਟ੍ਠ॰ ੨.੬੩੬-੩੮) ਖੋਮવਾਕੇਹਿ ਕਤਸੁਤ੍ਤਂ। ਕਪ੍ਪਾਸਿਕਨ੍ਤਿ ਕਪ੍ਪਾਸਤੋ ਨਿਬ੍ਬਤ੍ਤਂ। ਕੋਸੇਯ੍ਯਨ੍ਤਿ ਕੋਸਿਯਂਸੂਹਿ ਕਨ੍ਤਿਤ੍વਾ ਕਤਸੁਤ੍ਤਂ। ਕਮ੍ਬਲਨ੍ਤਿ ਏਲ਼ਕਲੋਮਸੁਤ੍ਤਂ। ਸਾਣਨ੍ਤਿ ਸਾਣવਾਕੇਨ ਕਤਸੁਤ੍ਤਂ। ਭਙ੍ਗਨ੍ਤਿ ਪਾਟੇਕ੍ਕਂ વਾਕਸੁਤ੍ਤਮੇવਾਤਿ ਏਕੇ। ਪਞ੍ਚਹਿਪਿ ਮਿਸ੍ਸੇਤ੍વਾ ਕਤਸੁਤ੍ਤਂ ਪਨ ‘‘ਭਙ੍ਗ’’ਨ੍ਤਿ વੇਦਿਤਬ੍ਬਂ। ਤੇਸਂ ਅਨੁਲੋਮਨ੍ਤਿ ਤੇਸਂ ਖੋਮਾਦੀਨਂ ਅਨੁਲੋਮਂ ਦੁਕੂਲਂ ਪਤ੍ਤੁਣ੍ਣਂ ਸੋਮਾਰਪਟ੍ਟਂ ਚੀਨਪਟ੍ਟਂ ਇਦ੍ਧਿਜਂ ਦੇવਦਿਨ੍ਨਨ੍ਤਿ ਛਬ੍ਬਿਧਂ ਸੁਤ੍ਤਂ।
Chabbidhaṃ khomasuttādinti ‘‘suttaṃ nāma cha suttāni khomaṃ kappāsikaṃ koseyyaṃ kambalaṃ sāṇaṃ bhaṅga’’nti (pārā. 638) evaṃ vuttaṃ chabbidhaṃ khomasuttādiṃ. Tattha khomanti (pārā. aṭṭha. 2.636-38) khomavākehi katasuttaṃ. Kappāsikanti kappāsato nibbattaṃ. Koseyyanti kosiyaṃsūhi kantitvā katasuttaṃ. Kambalanti eḷakalomasuttaṃ. Sāṇanti sāṇavākena katasuttaṃ. Bhaṅganti pāṭekkaṃ vākasuttamevāti eke. Pañcahipi missetvā katasuttaṃ pana ‘‘bhaṅga’’nti veditabbaṃ. Tesaṃ anulomanti tesaṃ khomādīnaṃ anulomaṃ dukūlaṃ pattuṇṇaṃ somārapaṭṭaṃ cīnapaṭṭaṃ iddhijaṃ devadinnanti chabbidhaṃ suttaṃ.
ਤੁਰੀਤਿ વਾਯਨੂਪਕਰਣੋ ਏਕੋ ਦਣ੍ਡੋ, વੀਤવੀਤਟ੍ਠਾਨਂ ਯਤ੍ਥ ਸਂਹਰਿਤ੍વਾ ਠਪੇਨ੍ਤਿ। વੇਮਨ੍ਤਿ વਾਯਨੂਪਕਰਣੋ ਏਕੋ ਦਣ੍ਡੋ, ਸੁਤ੍ਤਂ ਪવੇਸੇਤ੍વਾ ਯੇਨ ਆਕੋਟੇਨ੍ਤੋ ਘਨਭਾવਂ ਸਮ੍ਪਾਦੇਨ੍ਤਿ। ਤਸ੍ਸ ਸਬ੍ਬਪ੍ਪਯੋਗੇਸੁ ਦੁਕ੍ਕਟਨ੍ਤਿ ਤਨ੍ਤવਾਯਸ੍ਸ ਯੇ ਤੇ ਤੁਰਿવੇਮਸਜ੍ਜਨਾਦਿਕਾ ਪਯੋਗਾ, ਤੇਸੁ ਸਬ੍ਬੇਸੁ ਪਯੋਗੇਸੁ ਭਿਕ੍ਖੁਸ੍ਸ ਦੁਕ੍ਕਟਂ, ਤਸ੍ਸ ਤਨ੍ਤવਾਯਸ੍ਸ ਪਯੋਗੇ ਪਯੋਗੇ ਭਿਕ੍ਖੁਸ੍ਸ ਦੁਕ੍ਕਟਨ੍ਤਿ વੁਤ੍ਤਂ ਹੋਤਿ। ਤੁਰਿਆਦੀਨਂ ਅਭਾવੇ ਤੇਸਂ ਕਰਣਤ੍ਥਂ વਾਸਿਫਰਸੁਆਦੀਨਂ ਮਗ੍ਗਨਨਿਸਾਨਰੁਕ੍ਖਚ੍ਛੇਦਨਾਦਿਸਬ੍ਬਪ੍ਪਯੋਗੇਪਿ ਏਸੇવ ਨਯੋ। ਤਨ੍ਤੂਨਂ ਅਤ੍ਤਨੋ ਸਨ੍ਤਕਤ੍ਤਾ વੀਤવੀਤਟ੍ਠਾਨਂ ਪਟਿਲਦ੍ਧਮੇવ ਹੋਤੀਤਿ ਆਹ ‘‘ਪਟਿਲਾਭੇਨ ਨਿਸ੍ਸਗ੍ਗਿਯਂ ਹੋਤੀ’’ਤਿ, વਿਕਪ੍ਪਨੁਪਗਪਚ੍ਛਿਮਚੀવਰਪ੍ਪਮਾਣੇ વੀਤੇ ਨਿਸ੍ਸਗ੍ਗਿਯਂ ਹੋਤੀਤਿ વੁਤ੍ਤਂ ਹੋਤਿ। ਤੇਨੇવ વਕ੍ਖਤਿ ‘‘ਦੀਘਤੋ વਿਦਤ੍ਥਿਮਤ੍ਤੇ, ਤਿਰਿਯਞ੍ਚ ਹਤ੍ਥਮਤ੍ਤੇ વੀਤੇ ਨਿਸ੍ਸਗ੍ਗਿਯਂ ਪਾਚਿਤ੍ਤਿਯ’’ਨ੍ਤਿ। ਏਤ੍ਥ ਚ ‘‘ਇਦਂ ਮੇ, ਭਨ੍ਤੇ, ਚੀવਰਂ ਸਾਮਂ ਸੁਤ੍ਤਂ વਿਞ੍ਞਾਪੇਤ੍વਾ ਤਨ੍ਤવਾਯੇਹਿ વਾਯਾਪਿਤਂ ਨਿਸ੍ਸਗ੍ਗਿਯ’’ਨ੍ਤਿ ਇਮਿਨਾ ਨਯੇਨ ਨਿਸ੍ਸਜ੍ਜਨવਿਧਾਨਂ વੇਦਿਤਬ੍ਬਂ।
Turīti vāyanūpakaraṇo eko daṇḍo, vītavītaṭṭhānaṃ yattha saṃharitvā ṭhapenti. Vemanti vāyanūpakaraṇo eko daṇḍo, suttaṃ pavesetvā yena ākoṭento ghanabhāvaṃ sampādenti. Tassa sabbappayogesu dukkaṭanti tantavāyassa ye te turivemasajjanādikā payogā, tesu sabbesu payogesu bhikkhussa dukkaṭaṃ, tassa tantavāyassa payoge payoge bhikkhussa dukkaṭanti vuttaṃ hoti. Turiādīnaṃ abhāve tesaṃ karaṇatthaṃ vāsipharasuādīnaṃ maggananisānarukkhacchedanādisabbappayogepi eseva nayo. Tantūnaṃ attano santakattā vītavītaṭṭhānaṃ paṭiladdhameva hotīti āha ‘‘paṭilābhena nissaggiyaṃ hotī’’ti, vikappanupagapacchimacīvarappamāṇe vīte nissaggiyaṃ hotīti vuttaṃ hoti. Teneva vakkhati ‘‘dīghato vidatthimatte, tiriyañca hatthamatte vīte nissaggiyaṃ pācittiya’’nti. Ettha ca ‘‘idaṃ me, bhante, cīvaraṃ sāmaṃ suttaṃ viññāpetvā tantavāyehi vāyāpitaṃ nissaggiya’’nti iminā nayena nissajjanavidhānaṃ veditabbaṃ.
ਤੇਨੇવਾਤਿ વਿਞ੍ਞਾਪਿਤਤਨ੍ਤવਾਯੇਨੇવ। ਏવਂ ਇਧ ਦੁਕ੍ਕਟਨ੍ਤਿ ਇਧਾਪਿ ਤਨ੍ਤવਾਯੇਨੇવ ਦੀਘਤੋ વਿਦਤ੍ਥਿਮਤ੍ਤੇ, ਤਿਰਿਯਂ ਹਤ੍ਥਮਤ੍ਤੇ વੀਤੇ ਦੁਕ੍ਕਟਨ੍ਤਿ ਅਤ੍ਥੋ। ਅਕਪ੍ਪਿਯਸੁਤ੍ਤਮਯੇਤਿ વਿਞ੍ਞਾਪਿਤਸੁਤ੍ਤਮਯੇ। ਇਤਰਸ੍ਮਿਨ੍ਤਿ ਅવਿਞ੍ਞਤ੍ਤਿਸੁਤ੍ਤਮਯੇ ਪਰਿਚ੍ਛੇਦੇ। ਤਤੋ ਚੇ ਊਨਤਰਾਤਿ વੁਤ੍ਤਪ੍ਪਮਾਣਤੋ ਚੇ ਊਨਤਰਾ, ਅਨ੍ਤਮਸੋ (ਪਾਰਾ॰ ਅਟ੍ਠ॰ ੨.੬੩੬-੬੩੮) ਅਚ੍ਛਿਮਣ੍ਡਲਪ੍ਪਮਾਣਾਪੀਤਿ ਅਧਿਪ੍ਪਾਯੋ। ਕਪ੍ਪਿਯਤਨ੍ਤવਾਯੇਨਪਿ ਅਕਪ੍ਪਿਯਸੁਤ੍ਤਂ વਾਯਾਪੇਨ੍ਤਸ੍ਸ ਯਥਾ ਪੁਬ੍ਬੇ ਨਿਸ੍ਸਗ੍ਗਿਯਂ, ਏવਮਿਧ ਦੁਕ੍ਕਟਂ। ਤੇਨੇવ ਕਪ੍ਪਿਯਞ੍ਚ ਅਕਪ੍ਪਿਯਞ੍ਚ ਸੁਤ੍ਤਂ વਾਯਾਪੇਨ੍ਤਸ੍ਸ ਸਚੇ ਪਚ੍ਛਿਮਚੀવਰਪ੍ਪਮਾਣਾ વਾ ਊਨਕਾ વਾ ਅਕਪ੍ਪਿਯਸੁਤ੍ਤਪਰਿਚ੍ਛੇਦਾ ਹੋਨ੍ਤਿ, ਤੇਸੁ ਪਰਿਚ੍ਛੇਦਗਣਨਾਯ ਦੁਕ੍ਕਟਂ। ਕਪ੍ਪਿਯਸੁਤ੍ਤਪਰਿਚ੍ਛੇਦੇਸੁ ਅਨਾਪਤ੍ਤਿ। ਅਥ ਏਕਨ੍ਤਰਿਕੇਨ વਾ ਸੁਤ੍ਤੇਨ, ਦੀਘਤੋ વਾ ਕਪ੍ਪਿਯਂ ਤਿਰਿਯਂ ਅਕਪ੍ਪਿਯਂ ਕਤ੍વਾ વੀਤਂ ਹੋਤਿ, ਪਮਾਣਯੁਤ੍ਤੇ ਪਰਿਚ੍ਛੇਦੇ ਪਰਿਚ੍ਛੇਦੇ ਦੁਕ੍ਕਟਂ।
Tenevāti viññāpitatantavāyeneva. Evaṃ idha dukkaṭanti idhāpi tantavāyeneva dīghato vidatthimatte, tiriyaṃ hatthamatte vīte dukkaṭanti attho. Akappiyasuttamayeti viññāpitasuttamaye. Itarasminti aviññattisuttamaye paricchede. Tato ce ūnatarāti vuttappamāṇato ce ūnatarā, antamaso (pārā. aṭṭha. 2.636-638) acchimaṇḍalappamāṇāpīti adhippāyo. Kappiyatantavāyenapi akappiyasuttaṃ vāyāpentassa yathā pubbe nissaggiyaṃ, evamidha dukkaṭaṃ. Teneva kappiyañca akappiyañca suttaṃ vāyāpentassa sace pacchimacīvarappamāṇā vā ūnakā vā akappiyasuttaparicchedā honti, tesu paricchedagaṇanāya dukkaṭaṃ. Kappiyasuttaparicchedesu anāpatti. Atha ekantarikena vā suttena, dīghato vā kappiyaṃ tiriyaṃ akappiyaṃ katvā vītaṃ hoti, pamāṇayutte paricchede paricchede dukkaṭaṃ.
ਯਦਿ ਪਨ (ਪਾਰਾ॰ ਅਟ੍ਠ॰ ੨.੬੩੬-੬੩੮) ਦ੍વੇ ਤਨ੍ਤવਾਯਾ ਹੋਨ੍ਤਿ ਏਕੋ ਕਪ੍ਪਿਯੋ ਏਕੋ ਅਕਪ੍ਪਿਯੋ, ਸੁਤ੍ਤਞ੍ਚ ਅਕਪ੍ਪਿਯਂ, ਤੇ ਚੇ વਾਰੇਨ વਿਨਨ੍ਤਿ, ਅਕਪ੍ਪਿਯਤਨ੍ਤવਾਯੇਨ વੀਤੇ ਪਮਾਣਯੁਤ੍ਤੇ ਪਰਿਚ੍ਛੇਦੇ ਪਰਿਚ੍ਛੇਦੇ ਪਾਚਿਤ੍ਤਿਯਂ, ਊਨਤਰੇ ਦੁਕ੍ਕਟਂ। ਇਤਰੇਨ વੀਤੇ ਉਭਯਤ੍ਥ ਦੁਕ੍ਕਟਂ। ਸਚੇ ਦ੍વੇਪਿ વੇਮਂ ਗਹੇਤ੍વਾ ਏਕਤੋ વਿਨਨ੍ਤਿ, ਪਮਾਣਯੁਤ੍ਤੇ ਪਰਿਚ੍ਛੇਦੇ ਪਰਿਚ੍ਛੇਦੇ ਪਾਚਿਤ੍ਤਿਯਂ। ਅਥ ਸੁਤ੍ਤਂ ਕਪ੍ਪਿਯਂ, ਚੀવਰਞ੍ਚ ਕੇਦਾਰਬਦ੍ਧਾਦੀਹਿ ਸਪਰਿਚ੍ਛੇਦਂ, ਅਕਪ੍ਪਿਯਤਨ੍ਤવਾਯੇਨ વੀਤੇ ਪਰਿਚ੍ਛੇਦੇ ਪਰਿਚ੍ਛੇਦੇ ਦੁਕ੍ਕਟਂ, ਇਤਰੇਨ વੀਤੇ ਅਨਾਪਤ੍ਤਿ। ਸਚੇ ਦ੍વੇਪਿ ਏਕਤੋ વਿਨਨ੍ਤਿ, ਪਮਾਣਯੁਤ੍ਤੇ ਪਰਿਚ੍ਛੇਦੇ ਪਰਿਚ੍ਛੇਦੇ ਦੁਕ੍ਕਟਂ। ਅਥ ਸੁਤ੍ਤਮ੍ਪਿ ਕਪ੍ਪਿਯਞ੍ਚ ਅਕਪ੍ਪਿਯਞ੍ਚ, ਤੇ ਚੇ વਾਰੇਨ વਿਨਨ੍ਤਿ, ਅਕਪ੍ਪਿਯਤਨ੍ਤવਾਯੇਨ ਅਕਪ੍ਪਿਯਸੁਤ੍ਤਮਯੇਸੁ ਪਚ੍ਛਿਮਚੀવਰਪ੍ਪਮਾਣੇਸੁ ਪਰਿਚ੍ਛੇਦੇਸੁ વੀਤੇਸੁ ਪਰਿਚ੍ਛੇਦਗਣਨਾਯ ਪਾਚਿਤ੍ਤਿਯਂ, ਊਨਤਰੇਸੁ ਕਪ੍ਪਿਯਸੁਤ੍ਤਮਯੇਸੁ ਚ ਦੁਕ੍ਕਟਂ। ਕਪ੍ਪਿਯਤਨ੍ਤવਾਯੇਨ ਅਕਪ੍ਪਿਯਸੁਤ੍ਤਮਯੇਸੁ ਪਮਾਣਯੁਤ੍ਤੇਸੁ વਾ ਊਨਕੇਸੁ વਾ ਦੁਕ੍ਕਟਮੇવ, ਕਪ੍ਪਿਯਸੁਤ੍ਤਮਯੇਸੁ ਅਨਾਪਤ੍ਤਿ।
Yadi pana (pārā. aṭṭha. 2.636-638) dve tantavāyā honti eko kappiyo eko akappiyo, suttañca akappiyaṃ, te ce vārena vinanti, akappiyatantavāyena vīte pamāṇayutte paricchede paricchede pācittiyaṃ, ūnatare dukkaṭaṃ. Itarena vīte ubhayattha dukkaṭaṃ. Sace dvepi vemaṃ gahetvā ekato vinanti, pamāṇayutte paricchede paricchede pācittiyaṃ. Atha suttaṃ kappiyaṃ, cīvarañca kedārabaddhādīhi saparicchedaṃ, akappiyatantavāyena vīte paricchede paricchede dukkaṭaṃ, itarena vīte anāpatti. Sace dvepi ekato vinanti, pamāṇayutte paricchede paricchede dukkaṭaṃ. Atha suttampi kappiyañca akappiyañca, te ce vārena vinanti, akappiyatantavāyena akappiyasuttamayesu pacchimacīvarappamāṇesu paricchedesu vītesu paricchedagaṇanāya pācittiyaṃ, ūnataresu kappiyasuttamayesu ca dukkaṭaṃ. Kappiyatantavāyena akappiyasuttamayesu pamāṇayuttesu vā ūnakesu vā dukkaṭameva, kappiyasuttamayesu anāpatti.
ਅਥ ਏਕਨ੍ਤਰਿਕੇਨ વਾ ਸੁਤ੍ਤੇਨ, ਦੀਘਤੋ વਾ ਅਕਪ੍ਪਿਯਂ ਤਿਰਿਯਂ ਅਕਪ੍ਪਿਯਂ ਕਤ੍વਾ વਿਨਨ੍ਤਿ, ਉਭੋਪਿ વਾ ਤੇ વੇਮਂ ਗਹੇਤ੍વਾ ਏਕਤੋ વਿਨਨ੍ਤਿ, ਅਪਰਿਚ੍ਛੇਦੇ ਚੀવਰੇ ਪਮਾਣਯੁਤ੍ਤੇ ਪਰਿਚ੍ਛੇਦੇ ਪਰਿਚ੍ਛੇਦੇ ਦੁਕ੍ਕਟਂ, ਸਪਰਿਚ੍ਛੇਦੇ ਪਰਿਚ੍ਛੇਦવਸੇਨ ਦੁਕ੍ਕਟਾਨਿ। ਤੇਨਾਹ ‘‘ਏਤੇਨੇવ ਉਪਾਯੇਨਾ’’ਤਿਆਦਿ।
Atha ekantarikena vā suttena, dīghato vā akappiyaṃ tiriyaṃ akappiyaṃ katvā vinanti, ubhopi vā te vemaṃ gahetvā ekato vinanti, aparicchede cīvare pamāṇayutte paricchede paricchede dukkaṭaṃ, saparicchede paricchedavasena dukkaṭāni. Tenāha ‘‘eteneva upāyenā’’tiādi.
ਏਤ੍ਥ ਚ ਤਨ੍ਤવਾਯੋ ਤਾવ ਅਞ੍ਞਾਤਕਅਪ੍ਪવਾਰਿਤਤੋ વਿਞ੍ਞਤ੍ਤਿਯਾ ਲਦ੍ਧੋ ਅਕਪ੍ਪਿਯੋ, ਸੇਸੋ ਕਪ੍ਪਿਯੋ। ਸੁਤ੍ਤਮ੍ਪਿ ਸਾਮਂ વਿਞ੍ਞਾਪਿਤਂ ਅਕਪ੍ਪਿਯਂ, ਸੇਸਂ, ਞਾਤਕਾਦਿવਸੇਨ ਉਪ੍ਪਨ੍ਨਞ੍ਚ ਕਪ੍ਪਿਯਨ੍ਤਿ વੇਦਿਤਬ੍ਬਂ। ਤਿਕਪਾਚਿਤ੍ਤਿਯਨ੍ਤਿ વਾਯਾਪਿਤੇ વਾਯਾਪਿਤਸਞ੍ਞਿવੇਮਤਿਕਅવਾਯਾਪਿਤਸਞ੍ਞੀਨਂ વਸੇਨ ਤੀਣਿ ਪਾਚਿਤ੍ਤਿਯਾਨਿ। ਚੀવਰਤ੍ਥਾਯ વਿਞ੍ਞਾਪਿਤਸੁਤ੍ਤਨ੍ਤਿ ਸਾਮਂ વਾ ਅਞ੍ਞੇਨ વਾ ਚੀવਰਤ੍ਥਾਯ વਿਞ੍ਞਾਪਿਤਸੁਤ੍ਤਂ । ਕਿਞ੍ਚਾਪਿ ਪਾਲ਼ਿਯਂ ‘‘ਸਾਮਂ ਸੁਤ੍ਤਂ વਿਞ੍ਞਾਪੇਤ੍વਾ’’ਤਿ વੁਤ੍ਤਂ, ਤਥਾਪਿ ਇਧ ‘‘ਚੀવਰਤ੍ਥਾਯ ਸਾਮਂ વਿਞ੍ਞਾਪਿਤਸੁਤ੍ਤ’’ਨ੍ਤਿ ਅવਤ੍વਾ ਕੇવਲਂ ‘‘ਚੀવਰਤ੍ਥਾਯ વਿਞ੍ਞਾਪਿਤਸੁਤ੍ਤ’’ਨ੍ਤਿ ਅਙ੍ਗੇਸੁ વੁਤ੍ਤਤ੍ਤਾ ਅਞ੍ਞੇਨ ਚੀવਰਤ੍ਥਾਯ વਿਞ੍ਞਾਪਿਤਸੁਤ੍ਤਮ੍ਪਿ ਸਙ੍ਗਹਂ ਗਚ੍ਛਤੀਤਿ વੇਦਿਤਬ੍ਬਂ। ਅਕਪ੍ਪਿਯવਿਞ੍ਞਤ੍ਤਿਯਾਤਿ ‘‘ਚੀવਰਂ ਮੇ, ਆવੁਸੋ, વਾਯਥਾ’’ਤਿ ਏવਂਭੂਤਾਯ ਅਕਪ੍ਪਿਯવਿਞ੍ਞਤ੍ਤਿਯਾ।
Ettha ca tantavāyo tāva aññātakaappavāritato viññattiyā laddho akappiyo, seso kappiyo. Suttampi sāmaṃ viññāpitaṃ akappiyaṃ, sesaṃ, ñātakādivasena uppannañca kappiyanti veditabbaṃ. Tikapācittiyanti vāyāpite vāyāpitasaññivematikaavāyāpitasaññīnaṃ vasena tīṇi pācittiyāni. Cīvaratthāya viññāpitasuttanti sāmaṃ vā aññena vā cīvaratthāya viññāpitasuttaṃ . Kiñcāpi pāḷiyaṃ ‘‘sāmaṃ suttaṃ viññāpetvā’’ti vuttaṃ, tathāpi idha ‘‘cīvaratthāya sāmaṃ viññāpitasutta’’nti avatvā kevalaṃ ‘‘cīvaratthāya viññāpitasutta’’nti aṅgesu vuttattā aññena cīvaratthāya viññāpitasuttampi saṅgahaṃ gacchatīti veditabbaṃ. Akappiyaviññattiyāti ‘‘cīvaraṃ me, āvuso, vāyathā’’ti evaṃbhūtāya akappiyaviññattiyā.
ਸੁਤ੍ਤવਿਞ੍ਞਤ੍ਤਿਸਿਕ੍ਖਾਪਦવਣ੍ਣਨਾ ਨਿਟ੍ਠਿਤਾ।
Suttaviññattisikkhāpadavaṇṇanā niṭṭhitā.
