| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
28. ஸுவண்ணபி³ப்³போ³ஹனவக்³கோ³
28. Suvaṇṇabibbohanavaggo
1-10. ஸுவண்ணபி³ப்³போ³ஹனியத்தே²ரஅபதா³னாதி³வண்ணனா
1-10. Suvaṇṇabibbohaniyattheraapadānādivaṇṇanā
அட்ட²வீஸதிமே வக்³கே³ பட²மாபதா³னங் உத்தானமேவ.
Aṭṭhavīsatime vagge paṭhamāpadānaṃ uttānameva.
5. து³தியாபதா³னே மனோமயேன காயேனாதி யதா² சித்தவஸேன பவத்தகாயேனாதி அத்தோ².
5. Dutiyāpadāne manomayena kāyenāti yathā cittavasena pavattakāyenāti attho.
10. ததியாபதா³னே மஹாஸமுத்³த³ங் நிஸ்ஸாயாதி மஹாஸாக³ராஸன்னே டி²தஸ்ஸ பப்³ப³தஸ்ஸ அந்தரே பப்³ப³தலேணேதி அத்தோ². ஸித்³த⁴த்தோ² ப⁴க³வா விவேககாமதாய வஸதி படிவஸதீதி அத்தோ². பச்சுக்³க³ந்த்வானகாஸஹந்தி அஹங் தஸ்ஸ ப⁴க³வதோ படிஉக்³க³ந்த்வா ஸமீபங் க³ந்த்வா வந்த³னாதி³புஞ்ஞங் அகாஸிந்தி அத்தோ². சங்கோடகமதா³ஸஹந்தி ஸித்³த⁴த்த²ஸ்ஸ ப⁴க³வதோ அஹங் புப்ப²ப⁴ரிதங் சங்கோடகங் கத³ம்ப³ங் அதா³ஸிங் பூஜேஸிந்தி அத்தோ².
10. Tatiyāpadāne mahāsamuddaṃ nissāyāti mahāsāgarāsanne ṭhitassa pabbatassa antare pabbataleṇeti attho. Siddhattho bhagavā vivekakāmatāya vasati paṭivasatīti attho. Paccuggantvānakāsahanti ahaṃ tassa bhagavato paṭiuggantvā samīpaṃ gantvā vandanādipuññaṃ akāsinti attho. Caṅkoṭakamadāsahanti siddhatthassa bhagavato ahaṃ pupphabharitaṃ caṅkoṭakaṃ kadambaṃ adāsiṃ pūjesinti attho.
14. சதுத்தா²பதா³னே அகக்கஸசித்தஸ்ஸாதா²தி அப²ருஸசித்தஸ்ஸ, அத²-ஸத்³தோ³ பத³பூரணே.
14. Catutthāpadāne akakkasacittassāthāti apharusacittassa, atha-saddo padapūraṇe.
19. பஞ்சமாபதா³னே உது³ம்ப³ரே வஸந்தஸ்ஸாதி உது³ம்ப³ரருக்க²மூலே ருக்க²ச்சா²யாய வஸந்தஸ்ஸ திஸ்ஸஸ்ஸ ப⁴க³வதோ. நியதே பண்ணஸந்த²ரேதி நியாமிதே படிப³த்³தே⁴ பண்ணஸந்த²ரே ஸாகா²ப⁴ங்கா³ஸனே நிஸின்னஸ்ஸ. வுத்தோ²காஸோ மயா தி³ன்னோதி விவித்தோகாஸே மண்ட³பத்³வாராதீ³ஹி பிஹிதோகாஸோ மயா தி³ன்னோ ஸம்பாதி³தோதி அத்தோ².
19. Pañcamāpadāne udumbare vasantassāti udumbararukkhamūle rukkhacchāyāya vasantassa tissassa bhagavato. Niyate paṇṇasanthareti niyāmite paṭibaddhe paṇṇasanthare sākhābhaṅgāsane nisinnassa. Vutthokāso mayā dinnoti vivittokāse maṇḍapadvārādīhi pihitokāso mayā dinno sampāditoti attho.
24. ச²ட்டா²பதா³னே பொத்த²தா³னங் மயா தி³ன்னந்தி பொத்த²வட்டிங் பொத்த²ச²ல்லிங் தாளெத்வா கதங் ஸாடகங் விஸமங் கோ³பா²ஸுகேன க⁴ங்ஸித்வா நிம்மிதங் ஸுத்தங் க³ஹெத்வா கந்தித்வா தேன ஸுத்தேன நிஸீத³னத்தா²ய வா பூ⁴மத்த²ரணத்தா²ய வா ஸாடகங் வாயாபெத்வா தங் ஸாடகங் மயா ரதனத்தயஸ்ஸ தி³ன்னந்தி அத்தோ².
24. Chaṭṭhāpadāne potthadānaṃ mayā dinnanti potthavaṭṭiṃ potthachalliṃ tāḷetvā kataṃ sāṭakaṃ visamaṃ gophāsukena ghaṃsitvā nimmitaṃ suttaṃ gahetvā kantitvā tena suttena nisīdanatthāya vā bhūmattharaṇatthāya vā sāṭakaṃ vāyāpetvā taṃ sāṭakaṃ mayā ratanattayassa dinnanti attho.
27. ஸத்தமாபதா³னே சந்த³பா⁴கா³னதீ³தீரேதி சந்த³பா⁴கா³ய நாம நதி³யா தீரதோ, நிஸ்ஸக்கே பு⁴ம்மவசனங் . அனுஸோதந்தி ஸோதஸ்ஸ அனு ஹெட்டா²க³ங்க³ங் வஜாமி க³ச்சா²மி அஹந்தி அத்தோ². ஸத்த மாலுவபுப்பா²னி, சிதமாரோபயிங் அஹந்தி அஹங் மாலுவபுப்பா²னி ஸத்த பத்தானி க³ஹெத்வா சிதகே வாலுகராஸிம்ஹி வாலுகாஹி தூ²பங் கத்வா பூஜேஸிந்தி அத்தோ².
27. Sattamāpadāne candabhāgānadītīreti candabhāgāya nāma nadiyā tīrato, nissakke bhummavacanaṃ . Anusotanti sotassa anu heṭṭhāgaṅgaṃ vajāmi gacchāmi ahanti attho. Satta māluvapupphāni, citamāropayiṃ ahanti ahaṃ māluvapupphāni satta pattāni gahetvā citake vālukarāsimhi vālukāhi thūpaṃ katvā pūjesinti attho.
31-32. அட்ட²மாபதா³னே மஹாஸிந்து⁴ ஸுத³ஸ்ஸனாதி ஸுந்த³ரத³ஸ்ஸனஸுந்த³ரோத³கத⁴வலபுலினோபஸோபி⁴தத்தா ஸுட்டு² மனோஹரா மஹாஸிந்து⁴ நாம வாரினதீ³ அஹோஸி. தத்த² திஸ்ஸங் ஸிந்து⁴வாரினதி³யங் ஸப்பபா⁴ஸங் பபா⁴ய ஸஹிதங் ஸுத³ஸ்ஸனங் ஸுந்த³ரரூபங் பரமோபஸமே யுத்தங் உத்தமே உபஸமே யுத்தங் ஸமங்கீ³பூ⁴தங் வீதராக³ங் அஹங் அத்³த³ஸந்தி அத்தோ². தி³ஸ்வாஹங் விம்ஹிதாஸயோதி ‘‘ஏவரூபங் ப⁴யானகங் ஹிமவந்தங் கத²ங் ஸம்பத்தோ’’தி விம்ஹிதஅஜ்ஜா²ஸயோ அச்ச²ரியப்³பு⁴தசித்தோதி அத்தோ². ஆலுவங் தஸ்ஸ பாதா³ஸிந்தி தஸ்ஸ அரஹதோ அஹங் பஸன்னமானஸோ ஆலுவகந்த³ங் பாதா³ஸிங் ஆத³ரேன அதா³ஸிந்தி அத்தோ².
31-32. Aṭṭhamāpadāne mahāsindhu sudassanāti sundaradassanasundarodakadhavalapulinopasobhitattā suṭṭhu manoharā mahāsindhu nāma vārinadī ahosi. Tattha tissaṃ sindhuvārinadiyaṃ sappabhāsaṃ pabhāya sahitaṃ sudassanaṃ sundararūpaṃ paramopasame yuttaṃ uttame upasame yuttaṃ samaṅgībhūtaṃ vītarāgaṃ ahaṃ addasanti attho. Disvāhaṃ vimhitāsayoti ‘‘evarūpaṃ bhayānakaṃ himavantaṃ kathaṃ sampatto’’ti vimhitaajjhāsayo acchariyabbhutacittoti attho. Āluvaṃ tassa pādāsinti tassa arahato ahaṃ pasannamānaso āluvakandaṃ pādāsiṃ ādarena adāsinti attho.
நவமத³ஸமாபதா³னானி உத்தானானேவாதி.
Navamadasamāpadānāni uttānānevāti.
அட்ட²வீஸதிமவக்³க³வண்ணனா ஸமத்தா.
Aṭṭhavīsatimavaggavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi
2. திலமுட்டி²தா³யகத்தே²ரஅபதா³னங் • 2. Tilamuṭṭhidāyakattheraapadānaṃ
3. சங்கோடகியத்தே²ரஅபதா³னங் • 3. Caṅkoṭakiyattheraapadānaṃ
4. அப்³ப⁴ஞ்ஜனதா³யகத்தே²ரஅபதா³னங் • 4. Abbhañjanadāyakattheraapadānaṃ
5. ஏகஞ்ஜலிகத்தே²ரஅபதா³னங் • 5. Ekañjalikattheraapadānaṃ
6. பொத்த²கதா³யகத்தே²ரஅபதா³னங் • 6. Potthakadāyakattheraapadānaṃ
7. சிதகபூஜகத்தே²ரஅபதா³னங் • 7. Citakapūjakattheraapadānaṃ
8. ஆலுவதா³யகத்தே²ரஅபதா³னங் • 8. Āluvadāyakattheraapadānaṃ
