| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
২৮. সুৰণ্ণবিব্বোহনৰগ্গো
28. Suvaṇṇabibbohanavaggo
১-১০. সুৰণ্ণবিব্বোহনিযত্থেরঅপদানাদিৰণ্ণনা
1-10. Suvaṇṇabibbohaniyattheraapadānādivaṇṇanā
অট্ঠৰীসতিমে ৰগ্গে পঠমাপদানং উত্তানমেৰ।
Aṭṭhavīsatime vagge paṭhamāpadānaṃ uttānameva.
৫. দুতিযাপদানে মনোমযেন কাযেনাতি যথা চিত্তৰসেন পৰত্তকাযেনাতি অত্থো।
5. Dutiyāpadāne manomayena kāyenāti yathā cittavasena pavattakāyenāti attho.
১০. ততিযাপদানে মহাসমুদ্দং নিস্সাযাতি মহাসাগরাসন্নে ঠিতস্স পব্বতস্স অন্তরে পব্বতলেণেতি অত্থো। সিদ্ধত্থো ভগৰা ৰিৰেককামতায ৰসতি পটিৰসতীতি অত্থো। পচ্চুগ্গন্ত্ৰানকাসহন্তি অহং তস্স ভগৰতো পটিউগ্গন্ত্ৰা সমীপং গন্ত্ৰা ৰন্দনাদিপুঞ্ঞং অকাসিন্তি অত্থো। চঙ্কোটকমদাসহন্তি সিদ্ধত্থস্স ভগৰতো অহং পুপ্ফভরিতং চঙ্কোটকং কদম্বং অদাসিং পূজেসিন্তি অত্থো।
10. Tatiyāpadāne mahāsamuddaṃ nissāyāti mahāsāgarāsanne ṭhitassa pabbatassa antare pabbataleṇeti attho. Siddhattho bhagavā vivekakāmatāya vasati paṭivasatīti attho. Paccuggantvānakāsahanti ahaṃ tassa bhagavato paṭiuggantvā samīpaṃ gantvā vandanādipuññaṃ akāsinti attho. Caṅkoṭakamadāsahanti siddhatthassa bhagavato ahaṃ pupphabharitaṃ caṅkoṭakaṃ kadambaṃ adāsiṃ pūjesinti attho.
১৪. চতুত্থাপদানে অকক্কসচিত্তস্সাথাতি অফরুসচিত্তস্স, অথ-সদ্দো পদপূরণে।
14. Catutthāpadāne akakkasacittassāthāti apharusacittassa, atha-saddo padapūraṇe.
১৯. পঞ্চমাপদানে উদুম্বরে ৰসন্তস্সাতি উদুম্বররুক্খমূলে রুক্খচ্ছাযায ৰসন্তস্স তিস্সস্স ভগৰতো। নিযতে পণ্ণসন্থরেতি নিযামিতে পটিবদ্ধে পণ্ণসন্থরে সাখাভঙ্গাসনে নিসিন্নস্স। ৰুত্থোকাসো মযা দিন্নোতি ৰিৰিত্তোকাসে মণ্ডপদ্ৰারাদীহি পিহিতোকাসো মযা দিন্নো সম্পাদিতোতি অত্থো।
19. Pañcamāpadāne udumbare vasantassāti udumbararukkhamūle rukkhacchāyāya vasantassa tissassa bhagavato. Niyate paṇṇasanthareti niyāmite paṭibaddhe paṇṇasanthare sākhābhaṅgāsane nisinnassa. Vutthokāso mayā dinnoti vivittokāse maṇḍapadvārādīhi pihitokāso mayā dinno sampāditoti attho.
২৪. ছট্ঠাপদানে পোত্থদানং মযা দিন্নন্তি পোত্থৰট্টিং পোত্থছল্লিং তাল়েত্ৰা কতং সাটকং ৰিসমং গোফাসুকেন ঘংসিত্ৰা নিম্মিতং সুত্তং গহেত্ৰা কন্তিত্ৰা তেন সুত্তেন নিসীদনত্থায ৰা ভূমত্থরণত্থায ৰা সাটকং ৰাযাপেত্ৰা তং সাটকং মযা রতনত্তযস্স দিন্নন্তি অত্থো।
24. Chaṭṭhāpadāne potthadānaṃ mayā dinnanti potthavaṭṭiṃ potthachalliṃ tāḷetvā kataṃ sāṭakaṃ visamaṃ gophāsukena ghaṃsitvā nimmitaṃ suttaṃ gahetvā kantitvā tena suttena nisīdanatthāya vā bhūmattharaṇatthāya vā sāṭakaṃ vāyāpetvā taṃ sāṭakaṃ mayā ratanattayassa dinnanti attho.
২৭. সত্তমাপদানে চন্দভাগানদীতীরেতি চন্দভাগায নাম নদিযা তীরতো, নিস্সক্কে ভুম্মৰচনং । অনুসোতন্তি সোতস্স অনু হেট্ঠাগঙ্গং ৰজামি গচ্ছামি অহন্তি অত্থো। সত্ত মালুৰপুপ্ফানি, চিতমারোপযিং অহন্তি অহং মালুৰপুপ্ফানি সত্ত পত্তানি গহেত্ৰা চিতকে ৰালুকরাসিম্হি ৰালুকাহি থূপং কত্ৰা পূজেসিন্তি অত্থো।
27. Sattamāpadāne candabhāgānadītīreti candabhāgāya nāma nadiyā tīrato, nissakke bhummavacanaṃ . Anusotanti sotassa anu heṭṭhāgaṅgaṃ vajāmi gacchāmi ahanti attho. Satta māluvapupphāni, citamāropayiṃ ahanti ahaṃ māluvapupphāni satta pattāni gahetvā citake vālukarāsimhi vālukāhi thūpaṃ katvā pūjesinti attho.
৩১-৩২. অট্ঠমাপদানে মহাসিন্ধু সুদস্সনাতি সুন্দরদস্সনসুন্দরোদকধৰলপুলিনোপসোভিতত্তা সুট্ঠু মনোহরা মহাসিন্ধু নাম ৰারিনদী অহোসি। তত্থ তিস্সং সিন্ধুৰারিনদিযং সপ্পভাসং পভায সহিতং সুদস্সনং সুন্দররূপং পরমোপসমে যুত্তং উত্তমে উপসমে যুত্তং সমঙ্গীভূতং ৰীতরাগং অহং অদ্দসন্তি অত্থো। দিস্ৰাহং ৰিম্হিতাসযোতি ‘‘এৰরূপং ভযানকং হিমৰন্তং কথং সম্পত্তো’’তি ৰিম্হিতঅজ্ঝাসযো অচ্ছরিযব্ভুতচিত্তোতি অত্থো। আলুৰং তস্স পাদাসিন্তি তস্স অরহতো অহং পসন্নমানসো আলুৰকন্দং পাদাসিং আদরেন অদাসিন্তি অত্থো।
31-32. Aṭṭhamāpadāne mahāsindhu sudassanāti sundaradassanasundarodakadhavalapulinopasobhitattā suṭṭhu manoharā mahāsindhu nāma vārinadī ahosi. Tattha tissaṃ sindhuvārinadiyaṃ sappabhāsaṃ pabhāya sahitaṃ sudassanaṃ sundararūpaṃ paramopasame yuttaṃ uttame upasame yuttaṃ samaṅgībhūtaṃ vītarāgaṃ ahaṃ addasanti attho. Disvāhaṃ vimhitāsayoti ‘‘evarūpaṃ bhayānakaṃ himavantaṃ kathaṃ sampatto’’ti vimhitaajjhāsayo acchariyabbhutacittoti attho. Āluvaṃ tassa pādāsinti tassa arahato ahaṃ pasannamānaso āluvakandaṃ pādāsiṃ ādarena adāsinti attho.
নৰমদসমাপদানানি উত্তানানেৰাতি।
Navamadasamāpadānāni uttānānevāti.
অট্ঠৰীসতিমৰগ্গৰণ্ণনা সমত্তা।
Aṭṭhavīsatimavaggavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi
২. তিলমুট্ঠিদাযকত্থেরঅপদানং • 2. Tilamuṭṭhidāyakattheraapadānaṃ
৩. চঙ্কোটকিযত্থেরঅপদানং • 3. Caṅkoṭakiyattheraapadānaṃ
৪. অব্ভঞ্জনদাযকত্থেরঅপদানং • 4. Abbhañjanadāyakattheraapadānaṃ
৫. একঞ্জলিকত্থেরঅপদানং • 5. Ekañjalikattheraapadānaṃ
৬. পোত্থকদাযকত্থেরঅপদানং • 6. Potthakadāyakattheraapadānaṃ
৭. চিতকপূজকত্থেরঅপদানং • 7. Citakapūjakattheraapadānaṃ
৮. আলুৰদাযকত্থেরঅপদানং • 8. Āluvadāyakattheraapadānaṃ
