| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೨೮. ಸುವಣ್ಣಬಿಬ್ಬೋಹನವಗ್ಗೋ
28. Suvaṇṇabibbohanavaggo
೧-೧೦. ಸುವಣ್ಣಬಿಬ್ಬೋಹನಿಯತ್ಥೇರಅಪದಾನಾದಿವಣ್ಣನಾ
1-10. Suvaṇṇabibbohaniyattheraapadānādivaṇṇanā
ಅಟ್ಠವೀಸತಿಮೇ ವಗ್ಗೇ ಪಠಮಾಪದಾನಂ ಉತ್ತಾನಮೇವ।
Aṭṭhavīsatime vagge paṭhamāpadānaṃ uttānameva.
೫. ದುತಿಯಾಪದಾನೇ ಮನೋಮಯೇನ ಕಾಯೇನಾತಿ ಯಥಾ ಚಿತ್ತವಸೇನ ಪವತ್ತಕಾಯೇನಾತಿ ಅತ್ಥೋ।
5. Dutiyāpadāne manomayena kāyenāti yathā cittavasena pavattakāyenāti attho.
೧೦. ತತಿಯಾಪದಾನೇ ಮಹಾಸಮುದ್ದಂ ನಿಸ್ಸಾಯಾತಿ ಮಹಾಸಾಗರಾಸನ್ನೇ ಠಿತಸ್ಸ ಪಬ್ಬತಸ್ಸ ಅನ್ತರೇ ಪಬ್ಬತಲೇಣೇತಿ ಅತ್ಥೋ। ಸಿದ್ಧತ್ಥೋ ಭಗವಾ ವಿವೇಕಕಾಮತಾಯ ವಸತಿ ಪಟಿವಸತೀತಿ ಅತ್ಥೋ। ಪಚ್ಚುಗ್ಗನ್ತ್ವಾನಕಾಸಹನ್ತಿ ಅಹಂ ತಸ್ಸ ಭಗವತೋ ಪಟಿಉಗ್ಗನ್ತ್ವಾ ಸಮೀಪಂ ಗನ್ತ್ವಾ ವನ್ದನಾದಿಪುಞ್ಞಂ ಅಕಾಸಿನ್ತಿ ಅತ್ಥೋ। ಚಙ್ಕೋಟಕಮದಾಸಹನ್ತಿ ಸಿದ್ಧತ್ಥಸ್ಸ ಭಗವತೋ ಅಹಂ ಪುಪ್ಫಭರಿತಂ ಚಙ್ಕೋಟಕಂ ಕದಮ್ಬಂ ಅದಾಸಿಂ ಪೂಜೇಸಿನ್ತಿ ಅತ್ಥೋ।
10. Tatiyāpadāne mahāsamuddaṃ nissāyāti mahāsāgarāsanne ṭhitassa pabbatassa antare pabbataleṇeti attho. Siddhattho bhagavā vivekakāmatāya vasati paṭivasatīti attho. Paccuggantvānakāsahanti ahaṃ tassa bhagavato paṭiuggantvā samīpaṃ gantvā vandanādipuññaṃ akāsinti attho. Caṅkoṭakamadāsahanti siddhatthassa bhagavato ahaṃ pupphabharitaṃ caṅkoṭakaṃ kadambaṃ adāsiṃ pūjesinti attho.
೧೪. ಚತುತ್ಥಾಪದಾನೇ ಅಕಕ್ಕಸಚಿತ್ತಸ್ಸಾಥಾತಿ ಅಫರುಸಚಿತ್ತಸ್ಸ, ಅಥ-ಸದ್ದೋ ಪದಪೂರಣೇ।
14. Catutthāpadāne akakkasacittassāthāti apharusacittassa, atha-saddo padapūraṇe.
೧೯. ಪಞ್ಚಮಾಪದಾನೇ ಉದುಮ್ಬರೇ ವಸನ್ತಸ್ಸಾತಿ ಉದುಮ್ಬರರುಕ್ಖಮೂಲೇ ರುಕ್ಖಚ್ಛಾಯಾಯ ವಸನ್ತಸ್ಸ ತಿಸ್ಸಸ್ಸ ಭಗವತೋ। ನಿಯತೇ ಪಣ್ಣಸನ್ಥರೇತಿ ನಿಯಾಮಿತೇ ಪಟಿಬದ್ಧೇ ಪಣ್ಣಸನ್ಥರೇ ಸಾಖಾಭಙ್ಗಾಸನೇ ನಿಸಿನ್ನಸ್ಸ। ವುತ್ಥೋಕಾಸೋ ಮಯಾ ದಿನ್ನೋತಿ ವಿವಿತ್ತೋಕಾಸೇ ಮಣ್ಡಪದ್ವಾರಾದೀಹಿ ಪಿಹಿತೋಕಾಸೋ ಮಯಾ ದಿನ್ನೋ ಸಮ್ಪಾದಿತೋತಿ ಅತ್ಥೋ।
19. Pañcamāpadāne udumbare vasantassāti udumbararukkhamūle rukkhacchāyāya vasantassa tissassa bhagavato. Niyate paṇṇasanthareti niyāmite paṭibaddhe paṇṇasanthare sākhābhaṅgāsane nisinnassa. Vutthokāso mayā dinnoti vivittokāse maṇḍapadvārādīhi pihitokāso mayā dinno sampāditoti attho.
೨೪. ಛಟ್ಠಾಪದಾನೇ ಪೋತ್ಥದಾನಂ ಮಯಾ ದಿನ್ನನ್ತಿ ಪೋತ್ಥವಟ್ಟಿಂ ಪೋತ್ಥಛಲ್ಲಿಂ ತಾಳೇತ್ವಾ ಕತಂ ಸಾಟಕಂ ವಿಸಮಂ ಗೋಫಾಸುಕೇನ ಘಂಸಿತ್ವಾ ನಿಮ್ಮಿತಂ ಸುತ್ತಂ ಗಹೇತ್ವಾ ಕನ್ತಿತ್ವಾ ತೇನ ಸುತ್ತೇನ ನಿಸೀದನತ್ಥಾಯ ವಾ ಭೂಮತ್ಥರಣತ್ಥಾಯ ವಾ ಸಾಟಕಂ ವಾಯಾಪೇತ್ವಾ ತಂ ಸಾಟಕಂ ಮಯಾ ರತನತ್ತಯಸ್ಸ ದಿನ್ನನ್ತಿ ಅತ್ಥೋ।
24. Chaṭṭhāpadāne potthadānaṃ mayā dinnanti potthavaṭṭiṃ potthachalliṃ tāḷetvā kataṃ sāṭakaṃ visamaṃ gophāsukena ghaṃsitvā nimmitaṃ suttaṃ gahetvā kantitvā tena suttena nisīdanatthāya vā bhūmattharaṇatthāya vā sāṭakaṃ vāyāpetvā taṃ sāṭakaṃ mayā ratanattayassa dinnanti attho.
೨೭. ಸತ್ತಮಾಪದಾನೇ ಚನ್ದಭಾಗಾನದೀತೀರೇತಿ ಚನ್ದಭಾಗಾಯ ನಾಮ ನದಿಯಾ ತೀರತೋ, ನಿಸ್ಸಕ್ಕೇ ಭುಮ್ಮವಚನಂ । ಅನುಸೋತನ್ತಿ ಸೋತಸ್ಸ ಅನು ಹೇಟ್ಠಾಗಙ್ಗಂ ವಜಾಮಿ ಗಚ್ಛಾಮಿ ಅಹನ್ತಿ ಅತ್ಥೋ। ಸತ್ತ ಮಾಲುವಪುಪ್ಫಾನಿ, ಚಿತಮಾರೋಪಯಿಂ ಅಹನ್ತಿ ಅಹಂ ಮಾಲುವಪುಪ್ಫಾನಿ ಸತ್ತ ಪತ್ತಾನಿ ಗಹೇತ್ವಾ ಚಿತಕೇ ವಾಲುಕರಾಸಿಮ್ಹಿ ವಾಲುಕಾಹಿ ಥೂಪಂ ಕತ್ವಾ ಪೂಜೇಸಿನ್ತಿ ಅತ್ಥೋ।
27. Sattamāpadāne candabhāgānadītīreti candabhāgāya nāma nadiyā tīrato, nissakke bhummavacanaṃ . Anusotanti sotassa anu heṭṭhāgaṅgaṃ vajāmi gacchāmi ahanti attho. Satta māluvapupphāni, citamāropayiṃ ahanti ahaṃ māluvapupphāni satta pattāni gahetvā citake vālukarāsimhi vālukāhi thūpaṃ katvā pūjesinti attho.
೩೧-೩೨. ಅಟ್ಠಮಾಪದಾನೇ ಮಹಾಸಿನ್ಧು ಸುದಸ್ಸನಾತಿ ಸುನ್ದರದಸ್ಸನಸುನ್ದರೋದಕಧವಲಪುಲಿನೋಪಸೋಭಿತತ್ತಾ ಸುಟ್ಠು ಮನೋಹರಾ ಮಹಾಸಿನ್ಧು ನಾಮ ವಾರಿನದೀ ಅಹೋಸಿ। ತತ್ಥ ತಿಸ್ಸಂ ಸಿನ್ಧುವಾರಿನದಿಯಂ ಸಪ್ಪಭಾಸಂ ಪಭಾಯ ಸಹಿತಂ ಸುದಸ್ಸನಂ ಸುನ್ದರರೂಪಂ ಪರಮೋಪಸಮೇ ಯುತ್ತಂ ಉತ್ತಮೇ ಉಪಸಮೇ ಯುತ್ತಂ ಸಮಙ್ಗೀಭೂತಂ ವೀತರಾಗಂ ಅಹಂ ಅದ್ದಸನ್ತಿ ಅತ್ಥೋ। ದಿಸ್ವಾಹಂ ವಿಮ್ಹಿತಾಸಯೋತಿ ‘‘ಏವರೂಪಂ ಭಯಾನಕಂ ಹಿಮವನ್ತಂ ಕಥಂ ಸಮ್ಪತ್ತೋ’’ತಿ ವಿಮ್ಹಿತಅಜ್ಝಾಸಯೋ ಅಚ್ಛರಿಯಬ್ಭುತಚಿತ್ತೋತಿ ಅತ್ಥೋ। ಆಲುವಂ ತಸ್ಸ ಪಾದಾಸಿನ್ತಿ ತಸ್ಸ ಅರಹತೋ ಅಹಂ ಪಸನ್ನಮಾನಸೋ ಆಲುವಕನ್ದಂ ಪಾದಾಸಿಂ ಆದರೇನ ಅದಾಸಿನ್ತಿ ಅತ್ಥೋ।
31-32. Aṭṭhamāpadāne mahāsindhu sudassanāti sundaradassanasundarodakadhavalapulinopasobhitattā suṭṭhu manoharā mahāsindhu nāma vārinadī ahosi. Tattha tissaṃ sindhuvārinadiyaṃ sappabhāsaṃ pabhāya sahitaṃ sudassanaṃ sundararūpaṃ paramopasame yuttaṃ uttame upasame yuttaṃ samaṅgībhūtaṃ vītarāgaṃ ahaṃ addasanti attho. Disvāhaṃ vimhitāsayoti ‘‘evarūpaṃ bhayānakaṃ himavantaṃ kathaṃ sampatto’’ti vimhitaajjhāsayo acchariyabbhutacittoti attho. Āluvaṃ tassa pādāsinti tassa arahato ahaṃ pasannamānaso āluvakandaṃ pādāsiṃ ādarena adāsinti attho.
ನವಮದಸಮಾಪದಾನಾನಿ ಉತ್ತಾನಾನೇವಾತಿ।
Navamadasamāpadānāni uttānānevāti.
ಅಟ್ಠವೀಸತಿಮವಗ್ಗವಣ್ಣನಾ ಸಮತ್ತಾ।
Aṭṭhavīsatimavaggavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi
೨. ತಿಲಮುಟ್ಠಿದಾಯಕತ್ಥೇರಅಪದಾನಂ • 2. Tilamuṭṭhidāyakattheraapadānaṃ
೩. ಚಙ್ಕೋಟಕಿಯತ್ಥೇರಅಪದಾನಂ • 3. Caṅkoṭakiyattheraapadānaṃ
೪. ಅಬ್ಭಞ್ಜನದಾಯಕತ್ಥೇರಅಪದಾನಂ • 4. Abbhañjanadāyakattheraapadānaṃ
೫. ಏಕಞ್ಜಲಿಕತ್ಥೇರಅಪದಾನಂ • 5. Ekañjalikattheraapadānaṃ
೬. ಪೋತ್ಥಕದಾಯಕತ್ಥೇರಅಪದಾನಂ • 6. Potthakadāyakattheraapadānaṃ
೭. ಚಿತಕಪೂಜಕತ್ಥೇರಅಪದಾನಂ • 7. Citakapūjakattheraapadānaṃ
೮. ಆಲುವದಾಯಕತ್ಥೇರಅಪದಾನಂ • 8. Āluvadāyakattheraapadānaṃ
