| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
28. සුවණ්‌ණබිබ්‌බොහනවග්‌ගො
28. Suvaṇṇabibbohanavaggo
1-10. සුවණ්‌ණබිබ්‌බොහනියත්‌ථෙරඅපදානාදිවණ්‌ණනා
1-10. Suvaṇṇabibbohaniyattheraapadānādivaṇṇanā
අට්‌ඨවීසතිමෙ වග්‌ගෙ පඨමාපදානං උත්‌තානමෙව.
Aṭṭhavīsatime vagge paṭhamāpadānaṃ uttānameva.
5. දුතියාපදානෙ මනොමයෙන කායෙනාති යථා චිත්‌තවසෙන පවත්‌තකායෙනාති අත්‌ථො.
5. Dutiyāpadāne manomayena kāyenāti yathā cittavasena pavattakāyenāti attho.
10. තතියාපදානෙ මහාසමුද්‌දං නිස්‌සායාති මහාසාගරාසන්‌නෙ ඨිතස්‌ස පබ්‌බතස්‌ස අන්‌තරෙ පබ්‌බතලෙණෙති අත්‌ථො. සිද්‌ධත්‌ථො භගවා විවෙකකාමතාය වසති පටිවසතීති අත්‌ථො. පච්‌චුග්‌ගන්‌ත්‌වානකාසහන්‌ති අහං තස්‌ස භගවතො පටිඋග්‌ගන්‌ත්‌වා සමීපං ගන්‌ත්‌වා වන්‌දනාදිපුඤ්‌ඤං අකාසින්‌ති අත්‌ථො. චඞ්‌කොටකමදාසහන්‌ති සිද්‌ධත්‌ථස්‌ස භගවතො අහං පුප්‌ඵභරිතං චඞ්‌කොටකං කදම්‌බං අදාසිං පූජෙසින්‌ති අත්‌ථො.
10. Tatiyāpadāne mahāsamuddaṃ nissāyāti mahāsāgarāsanne ṭhitassa pabbatassa antare pabbataleṇeti attho. Siddhattho bhagavā vivekakāmatāya vasati paṭivasatīti attho. Paccuggantvānakāsahanti ahaṃ tassa bhagavato paṭiuggantvā samīpaṃ gantvā vandanādipuññaṃ akāsinti attho. Caṅkoṭakamadāsahanti siddhatthassa bhagavato ahaṃ pupphabharitaṃ caṅkoṭakaṃ kadambaṃ adāsiṃ pūjesinti attho.
14. චතුත්‌ථාපදානෙ අකක්‌කසචිත්‌තස්‌සාථාති අඵරුසචිත්‌තස්‌ස, අථ-සද්‌දො පදපූරණෙ.
14. Catutthāpadāne akakkasacittassāthāti apharusacittassa, atha-saddo padapūraṇe.
19. පඤ්‌චමාපදානෙ උදුම්‌බරෙ වසන්‌තස්‌සාති උදුම්‌බරරුක්‌ඛමූලෙ රුක්‌ඛච්‌ඡායාය වසන්‌තස්‌ස තිස්‌සස්‌ස භගවතො. නියතෙ පණ්‌ණසන්‌ථරෙති නියාමිතෙ පටිබද්‌ධෙ පණ්‌ණසන්‌ථරෙ සාඛාභඞ්‌ගාසනෙ නිසින්‌නස්‌ස. වුත්‌ථොකාසො මයා දින්‌නොති විවිත්‌තොකාසෙ මණ්‌ඩපද්‌වාරාදීහි පිහිතොකාසො මයා දින්‌නො සම්‌පාදිතොති අත්‌ථො.
19. Pañcamāpadāne udumbare vasantassāti udumbararukkhamūle rukkhacchāyāya vasantassa tissassa bhagavato. Niyate paṇṇasanthareti niyāmite paṭibaddhe paṇṇasanthare sākhābhaṅgāsane nisinnassa. Vutthokāso mayā dinnoti vivittokāse maṇḍapadvārādīhi pihitokāso mayā dinno sampāditoti attho.
24. ඡට්‌ඨාපදානෙ පොත්‌ථදානං මයා දින්‌නන්‌ති පොත්‌ථවට්‌ටිං පොත්‌ථඡල්‌ලිං තාළෙත්‌වා කතං සාටකං විසමං ගොඵාසුකෙන ඝංසිත්‌වා නිම්‌මිතං සුත්‌තං ගහෙත්‌වා කන්‌තිත්‌වා තෙන සුත්‌තෙන නිසීදනත්‌ථාය වා භූමත්‌ථරණත්‌ථාය වා සාටකං වායාපෙත්‌වා තං සාටකං මයා රතනත්‌තයස්‌ස දින්‌නන්‌ති අත්‌ථො.
24. Chaṭṭhāpadāne potthadānaṃ mayā dinnanti potthavaṭṭiṃ potthachalliṃ tāḷetvā kataṃ sāṭakaṃ visamaṃ gophāsukena ghaṃsitvā nimmitaṃ suttaṃ gahetvā kantitvā tena suttena nisīdanatthāya vā bhūmattharaṇatthāya vā sāṭakaṃ vāyāpetvā taṃ sāṭakaṃ mayā ratanattayassa dinnanti attho.
27. සත්‌තමාපදානෙ චන්‌දභාගානදීතීරෙති චන්‌දභාගාය නාම නදියා තීරතො, නිස්‌සක්‌කෙ භුම්‌මවචනං . අනුසොතන්‌ති සොතස්‌ස අනු හෙට්‌ඨාගඞ්‌ගං වජාමි ගච්‌ඡාමි අහන්‌ති අත්‌ථො. සත්‌ත මාලුවපුප්‌ඵානි, චිතමාරොපයිං අහන්‌ති අහං මාලුවපුප්‌ඵානි සත්‌ත පත්‌තානි ගහෙත්‌වා චිතකෙ වාලුකරාසිම්‌හි වාලුකාහි ථූපං කත්‌වා පූජෙසින්‌ති අත්‌ථො.
27. Sattamāpadāne candabhāgānadītīreti candabhāgāya nāma nadiyā tīrato, nissakke bhummavacanaṃ . Anusotanti sotassa anu heṭṭhāgaṅgaṃ vajāmi gacchāmi ahanti attho. Satta māluvapupphāni, citamāropayiṃ ahanti ahaṃ māluvapupphāni satta pattāni gahetvā citake vālukarāsimhi vālukāhi thūpaṃ katvā pūjesinti attho.
31-32. අට්‌ඨමාපදානෙ මහාසින්‌ධු සුදස්‌සනාති සුන්‌දරදස්‌සනසුන්‌දරොදකධවලපුලිනොපසොභිතත්‌තා සුට්‌ඨු මනොහරා මහාසින්‌ධු නාම වාරිනදී අහොසි. තත්‌ථ තිස්‌සං සින්‌ධුවාරිනදියං සප්‌පභාසං පභාය සහිතං සුදස්‌සනං සුන්‌දරරූපං පරමොපසමෙ යුත්‌තං උත්‌තමෙ උපසමෙ යුත්‌තං සමඞ්‌ගීභූතං වීතරාගං අහං අද්‌දසන්‌ති අත්‌ථො. දිස්‌වාහං විම්‌හිතාසයොති ‘‘එවරූපං භයානකං හිමවන්‌තං කථං සම්‌පත්‌තො’’ති විම්‌හිතඅජ්‌ඣාසයො අච්‌ඡරියබ්‌භුතචිත්‌තොති අත්‌ථො. ආලුවං තස්‌ස පාදාසින්‌ති තස්‌ස අරහතො අහං පසන්‌නමානසො ආලුවකන්‌දං පාදාසිං ආදරෙන අදාසින්‌ති අත්‌ථො.
31-32. Aṭṭhamāpadāne mahāsindhu sudassanāti sundaradassanasundarodakadhavalapulinopasobhitattā suṭṭhu manoharā mahāsindhu nāma vārinadī ahosi. Tattha tissaṃ sindhuvārinadiyaṃ sappabhāsaṃ pabhāya sahitaṃ sudassanaṃ sundararūpaṃ paramopasame yuttaṃ uttame upasame yuttaṃ samaṅgībhūtaṃ vītarāgaṃ ahaṃ addasanti attho. Disvāhaṃ vimhitāsayoti ‘‘evarūpaṃ bhayānakaṃ himavantaṃ kathaṃ sampatto’’ti vimhitaajjhāsayo acchariyabbhutacittoti attho. Āluvaṃ tassa pādāsinti tassa arahato ahaṃ pasannamānaso āluvakandaṃ pādāsiṃ ādarena adāsinti attho.
නවමදසමාපදානානි උත්‌තානානෙවාති.
Navamadasamāpadānāni uttānānevāti.
අට්‌ඨවීසතිමවග්‌ගවණ්‌ණනා සමත්‌තා.
Aṭṭhavīsatimavaggavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi
2. තිලමුට්‌ඨිදායකත්‌ථෙරඅපදානං • 2. Tilamuṭṭhidāyakattheraapadānaṃ
3. චඞ්‌කොටකියත්‌ථෙරඅපදානං • 3. Caṅkoṭakiyattheraapadānaṃ
4. අබ්‌භඤ්‌ජනදායකත්‌ථෙරඅපදානං • 4. Abbhañjanadāyakattheraapadānaṃ
5. එකඤ්‌ජලිකත්‌ථෙරඅපදානං • 5. Ekañjalikattheraapadānaṃ
6. පොත්‌ථකදායකත්‌ථෙරඅපදානං • 6. Potthakadāyakattheraapadānaṃ
7. චිතකපූජකත්‌ථෙරඅපදානං • 7. Citakapūjakattheraapadānaṃ
8. ආලුවදායකත්‌ථෙරඅපදානං • 8. Āluvadāyakattheraapadānaṃ
