| Library / Tipiṭaka / तिपिटक • Tipiṭaka / जातकपाळि • Jātakapāḷi |
३८९. सुवण्णकक्कटजातकं (६-२-४)
389. Suvaṇṇakakkaṭajātakaṃ (6-2-4)
९४.
94.
सिङ्गीमिगो आयतचक्खुनेत्तो, अट्ठित्तचो वारिसयो अलोमो।
Siṅgīmigo āyatacakkhunetto, aṭṭhittaco vārisayo alomo;
तेनाभिभूतो कपणं रुदामि, हरे सखा किस्स नु मं जहासि॥
Tenābhibhūto kapaṇaṃ rudāmi, hare sakhā kissa nu maṃ jahāsi.
९५.
95.
सो पस्ससन्तो महता फणेन, भुजङ्गमो कक्कटमज्झपत्तो।
So passasanto mahatā phaṇena, bhujaṅgamo kakkaṭamajjhapatto;
सखा सखारं परितायमानो, भुजङ्गमं कक्कटको गहेसि॥
Sakhā sakhāraṃ paritāyamāno, bhujaṅgamaṃ kakkaṭako gahesi.
९६.
96.
न वायसं नो पन कण्हसप्पं, घासत्थिको कक्कटको अदेय्य।
Na vāyasaṃ no pana kaṇhasappaṃ, ghāsatthiko kakkaṭako adeyya;
पुच्छामि तं आयतचक्खुनेत्त, अथ किस्स हेतुम्ह उभो गहीता॥
Pucchāmi taṃ āyatacakkhunetta, atha kissa hetumha ubho gahītā.
९७.
97.
अयं पुरिसो मम अत्थकामो, यो मं गहेत्वान दकाय नेति।
Ayaṃ puriso mama atthakāmo, yo maṃ gahetvāna dakāya neti;
तस्मिं मते दुक्खमनप्पकं मे, अहञ्च एसो च उभो न होम॥
Tasmiṃ mate dukkhamanappakaṃ me, ahañca eso ca ubho na homa.
९८.
98.
ममञ्च दिस्वान पवद्धकायं, सब्बो जनो हिंसितुमेव मिच्छे।
Mamañca disvāna pavaddhakāyaṃ, sabbo jano hiṃsitumeva micche;
सादुञ्च थूलञ्च मुदुञ्च मंसं, काकापि मं दिस्वान 1 विहेठयेय्युं॥
Sāduñca thūlañca muduñca maṃsaṃ, kākāpi maṃ disvāna 2 viheṭhayeyyuṃ.
९९.
99.
सचेतस्स हेतुम्ह उभो गहीता, उट्ठातु पोसो विसमावमामि 3।
Sacetassa hetumha ubho gahītā, uṭṭhātu poso visamāvamāmi 4;
ममञ्च काकञ्च पमुञ्च खिप्पं, पुरे विसं गाळ्हमुपेति मच्चं॥
Mamañca kākañca pamuñca khippaṃ, pure visaṃ gāḷhamupeti maccaṃ.
१००.
100.
पुरिसञ्च दिस्वान सुखिं अरोगं, काकं पमोक्खामि यथेव सप्पं॥
Purisañca disvāna sukhiṃ arogaṃ, kākaṃ pamokkhāmi yatheva sappaṃ.
१०१.
101.
काको तदा देवदत्तो अहोसि, मारो पन कण्हसप्पो अहोसि।
Kāko tadā devadatto ahosi, māro pana kaṇhasappo ahosi;
आनन्दभद्दो कक्कटको अहोसि, अहं तदा ब्राह्मणो होमि सत्थाति 9॥
Ānandabhaddo kakkaṭako ahosi, ahaṃ tadā brāhmaṇo homi satthāti 10.
सुवण्णकक्कटजातकं चतुत्थं।
Suvaṇṇakakkaṭajātakaṃ catutthaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / जातक-अट्ठकथा • Jātaka-aṭṭhakathā / [३८९] ४. सुवण्णकक्कटकजातकवण्णना • [389] 4. Suvaṇṇakakkaṭakajātakavaṇṇanā
