| Library / Tipiṭaka / តិបិដក • Tipiṭaka / ជាតកបាឡិ • Jātakapāḷi |
៣៨៩. សុវណ្ណកក្កដជាតកំ (៦-២-៤)
389. Suvaṇṇakakkaṭajātakaṃ (6-2-4)
៩៤.
94.
សិង្គីមិគោ អាយតចក្ខុនេត្តោ, អដ្ឋិត្តចោ វារិសយោ អលោមោ;
Siṅgīmigo āyatacakkhunetto, aṭṭhittaco vārisayo alomo;
តេនាភិភូតោ កបណំ រុទាមិ, ហរេ សខា កិស្ស នុ មំ ជហាសិ។
Tenābhibhūto kapaṇaṃ rudāmi, hare sakhā kissa nu maṃ jahāsi.
៩៥.
95.
សោ បស្សសន្តោ មហតា ផណេន, ភុជង្គមោ កក្កដមជ្ឈបត្តោ;
So passasanto mahatā phaṇena, bhujaṅgamo kakkaṭamajjhapatto;
សខា សខារំ បរិតាយមានោ, ភុជង្គមំ កក្កដកោ គហេសិ។
Sakhā sakhāraṃ paritāyamāno, bhujaṅgamaṃ kakkaṭako gahesi.
៩៦.
96.
ន វាយសំ នោ បន កណ្ហសប្បំ, ឃាសត្ថិកោ កក្កដកោ អទេយ្យ;
Na vāyasaṃ no pana kaṇhasappaṃ, ghāsatthiko kakkaṭako adeyya;
បុច្ឆាមិ តំ អាយតចក្ខុនេត្ត, អថ កិស្ស ហេតុម្ហ ឧភោ គហីតា។
Pucchāmi taṃ āyatacakkhunetta, atha kissa hetumha ubho gahītā.
៩៧.
97.
អយំ បុរិសោ មម អត្ថកាមោ, យោ មំ គហេត្វាន ទកាយ នេតិ;
Ayaṃ puriso mama atthakāmo, yo maṃ gahetvāna dakāya neti;
តស្មិំ មតេ ទុក្ខមនប្បកំ មេ, អហញ្ច ឯសោ ច ឧភោ ន ហោម។
Tasmiṃ mate dukkhamanappakaṃ me, ahañca eso ca ubho na homa.
៩៨.
98.
មមញ្ច ទិស្វាន បវទ្ធកាយំ, សព្ពោ ជនោ ហិំសិតុមេវ មិច្ឆេ;
Mamañca disvāna pavaddhakāyaṃ, sabbo jano hiṃsitumeva micche;
សាទុញ្ច ថូលញ្ច មុទុញ្ច មំសំ, កាកាបិ មំ ទិស្វាន 1 វិហេឋយេយ្យុំ។
Sāduñca thūlañca muduñca maṃsaṃ, kākāpi maṃ disvāna 2 viheṭhayeyyuṃ.
៩៩.
99.
សចេតស្ស ហេតុម្ហ ឧភោ គហីតា, ឧដ្ឋាតុ បោសោ វិសមាវមាមិ 3;
Sacetassa hetumha ubho gahītā, uṭṭhātu poso visamāvamāmi 4;
មមញ្ច កាកញ្ច បមុញ្ច ខិប្បំ, បុរេ វិសំ គាឡ្ហមុបេតិ មច្ចំ។
Mamañca kākañca pamuñca khippaṃ, pure visaṃ gāḷhamupeti maccaṃ.
១០០.
100.
បុរិសញ្ច ទិស្វាន សុខិំ អរោគំ, កាកំ បមោក្ខាមិ យថេវ សប្បំ។
Purisañca disvāna sukhiṃ arogaṃ, kākaṃ pamokkhāmi yatheva sappaṃ.
១០១.
101.
កាកោ តទា ទេវទត្តោ អហោសិ, មារោ បន កណ្ហសប្បោ អហោសិ;
Kāko tadā devadatto ahosi, māro pana kaṇhasappo ahosi;
អានន្ទភទ្ទោ កក្កដកោ អហោសិ, អហំ តទា ព្រាហ្មណោ ហោមិ សត្ថាតិ 9។
Ānandabhaddo kakkaṭako ahosi, ahaṃ tadā brāhmaṇo homi satthāti 10.
សុវណ្ណកក្កដជាតកំ ចតុត្ថំ។
Suvaṇṇakakkaṭajātakaṃ catutthaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ជាតក-អដ្ឋកថា • Jātaka-aṭṭhakathā / [៣៨៩] ៤. សុវណ្ណកក្កដកជាតកវណ្ណនា • [389] 4. Suvaṇṇakakkaṭakajātakavaṇṇanā
