| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
5. සුවණ්‌ණපුප්‌ඵියත්‌ථෙරඅපදානවණ්‌ණනා
5. Suvaṇṇapupphiyattheraapadānavaṇṇanā
විපස්‌සී නාම භගවාතිආදිකං ආයස්‌මතො සුවණ්‌ණපුප්‌ඵියත්‌ථෙරස්‌ස අපදානං. අයම්‌පි පුරිමජිනවරෙසු කතාධිකාරො තත්‌ථ තත්‌ථ භවෙ විවට්‌ටූපනිස්‌සයානි පුඤ්‌ඤානි උපචිනන්‌තො විපස්‌සිස්‌ස භගවතො කාලෙ එකස්‌මිං ඨානෙ භූමට්‌ඨකදෙවපුත්‌තො හුත්‌වා නිබ්‌බත්‌තො තස්‌ස භගවතො ධම්‌මං සුත්‌වා පසන්‌නමානසො චතූහි සුවණ්‌ණපුප්‌ඵෙහි පූජෙසි. තානි පුප්‌ඵානි ආකාසෙ සුවණ්‌ණවිතානං හුත්‌වා ඡාදෙසුං, සුවණ්‌ණපභා ච බුද්‌ධස්‌ස සරීරපභා ච එකතො හුත්‌වා මහාඔභාසො අහොසි. සො අතිරෙකතරං පසන්‌නො සකභවනං ගතොපි සරතියෙව. සො තෙන පුඤ්‌ඤකම්‌මෙන තුසිතභවනාදිසුගතීසුයෙව සංසරන්‌තො දිබ්‌බසම්‌පත්‌තිං අනුභවිත්‌වා ඉමස්‌මිං බුද්‌ධුප්‌පාදෙ කුලගෙහෙ නිබ්‌බත්‌තො විඤ්‌ඤුතං පත්‌තො සත්‌ථු ධම්‌මදෙසනං සුත්‌වා සාසනෙ උරං දත්‌වා පබ්‌බජිතො නචිරස්‌සෙව අරහා අහොසි.
Vipassīnāma bhagavātiādikaṃ āyasmato suvaṇṇapupphiyattherassa apadānaṃ. Ayampi purimajinavaresu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle ekasmiṃ ṭhāne bhūmaṭṭhakadevaputto hutvā nibbatto tassa bhagavato dhammaṃ sutvā pasannamānaso catūhi suvaṇṇapupphehi pūjesi. Tāni pupphāni ākāse suvaṇṇavitānaṃ hutvā chādesuṃ, suvaṇṇapabhā ca buddhassa sarīrapabhā ca ekato hutvā mahāobhāso ahosi. So atirekataraṃ pasanno sakabhavanaṃ gatopi saratiyeva. So tena puññakammena tusitabhavanādisugatīsuyeva saṃsaranto dibbasampattiṃ anubhavitvā imasmiṃ buddhuppāde kulagehe nibbatto viññutaṃ patto satthu dhammadesanaṃ sutvā sāsane uraṃ datvā pabbajito nacirasseva arahā ahosi.
40. සො අපරභාගෙ පුබ්‌බකම්‌මං සරිත්‌වා සොමනස්‌සජාතො අත්‌තනො පුබ්‌බචරිතාපදානං පකාසෙන්‌තො විපස්‌සී නාම භගවාතිආදිමාහ. තං හෙට්‌ඨා වුත්‌තත්‌ථමෙව.
40. So aparabhāge pubbakammaṃ saritvā somanassajāto attano pubbacaritāpadānaṃ pakāsento vipassī nāma bhagavātiādimāha. Taṃ heṭṭhā vuttatthameva.
44. පාමොජ්‌ජං ජනයිත්‌වානාති බලවපීතිං උප්‌පාදෙත්‌වා ‘‘පාමොජ්‌ජං ආමොදනා පමොදනා හාසො පහාසො විත්‌ති ඔදග්‍යං අත්‌තමනතා චිත්‌තස්‌සා’’තිආදීසු (ධ. ස. 9, 86; මහානි. 1) විය අත්‌තමනතා සකභාවං උප්‌පාදෙත්‌වාති අත්‌ථො. සෙසං සබ්‌බත්‌ථ උත්‌තානමෙවාති.
44.Pāmojjaṃ janayitvānāti balavapītiṃ uppādetvā ‘‘pāmojjaṃ āmodanā pamodanā hāso pahāso vitti odagyaṃ attamanatā cittassā’’tiādīsu (dha. sa. 9, 86; mahāni. 1) viya attamanatā sakabhāvaṃ uppādetvāti attho. Sesaṃ sabbattha uttānamevāti.
සුවණ්‌ණපුප්‌ඵියත්‌ථෙරඅපදානවණ්‌ණනා සමත්‌තා.
Suvaṇṇapupphiyattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 5. සුවණ්‌ණපුප්‌ඵියත්‌ථෙරඅපදානං • 5. Suvaṇṇapupphiyattheraapadānaṃ
