| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
১১. সক্কসংযুত্তং
11. Sakkasaṃyuttaṃ
১. পঠমৰগ্গো
1. Paṭhamavaggo
১. সুৰীরসুত্তং
1. Suvīrasuttaṃ
২৪৭. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তত্র খো ভগৰা ভিক্খূ আমন্তেসি – ‘‘ভিক্খৰো’’তি। ‘‘ভদন্তে’’তি তে ভিক্খূ ভগৰতো পচ্চস্সোসুং। ভগৰা এতদৰোচ –
247. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –
‘‘ভূতপুব্বং, ভিক্খৰে, অসুরা দেৰে অভিযংসু। অথ খো, ভিক্খৰে, সক্কো দেৰানমিন্দো সুৰীরং দেৰপুত্তং আমন্তেসি – ‘এতে, তাত সুৰীর, অসুরা দেৰে অভিযন্তি। গচ্ছ, তাত সুৰীর, অসুরে পচ্চুয্যাহী’তি। ‘এৰং ভদ্দন্তৰা’তি খো, ভিক্খৰে, সুৰীরো দেৰপুত্তো সক্কস্স দেৰানমিন্দস্স পটিস্সুত্ৰা পমাদং আপাদেসি 1। দুতিযম্পি খো, ভিক্খৰে, সক্কো দেৰানমিন্দো সুৰীরং দেৰপুত্তং আমন্তেসি – ‘এতে, তাত সুৰীর, অসুরা দেৰে অভিযন্তি। গচ্ছ, তাত সুৰীর, অসুরে পচ্চুয্যাহী’তি। ‘এৰং ভদ্দন্তৰা’তি খো, ভিক্খৰে, সুৰীরো দেৰপুত্তো সক্কস্স দেৰানমিন্দস্স পটিস্সুত্ৰা দুতিযম্পি পমাদং আপাদেসি। ততিযম্পি খো, ভিক্খৰে, সক্কো দেৰানমিন্দো সুৰীরং দেৰপুত্তং আমন্তেসি – ‘এতে, তাত সুৰীর, অসুরা দেৰে অভিযন্তি। গচ্ছ, তাত সুৰীর, অসুরে পচ্চুয্যাহী’তি । ‘এৰং ভদ্দন্তৰা’তি খো, ভিক্খৰে, সুৰীরো দেৰপুত্তো সক্কস্স দেৰানমিন্দস্স পটিস্সুত্ৰা ততিযম্পি পমাদং আপাদেসি। অথ খো, ভিক্খৰে, সক্কো দেৰানমিন্দো সুৰীরং দেৰপুত্তং গাথায অজ্ঝভাসি –
‘‘Bhūtapubbaṃ, bhikkhave, asurā deve abhiyaṃsu. Atha kho, bhikkhave, sakko devānamindo suvīraṃ devaputtaṃ āmantesi – ‘ete, tāta suvīra, asurā deve abhiyanti. Gaccha, tāta suvīra, asure paccuyyāhī’ti. ‘Evaṃ bhaddantavā’ti kho, bhikkhave, suvīro devaputto sakkassa devānamindassa paṭissutvā pamādaṃ āpādesi 2. Dutiyampi kho, bhikkhave, sakko devānamindo suvīraṃ devaputtaṃ āmantesi – ‘ete, tāta suvīra, asurā deve abhiyanti. Gaccha, tāta suvīra, asure paccuyyāhī’ti. ‘Evaṃ bhaddantavā’ti kho, bhikkhave, suvīro devaputto sakkassa devānamindassa paṭissutvā dutiyampi pamādaṃ āpādesi. Tatiyampi kho, bhikkhave, sakko devānamindo suvīraṃ devaputtaṃ āmantesi – ‘ete, tāta suvīra, asurā deve abhiyanti. Gaccha, tāta suvīra, asure paccuyyāhī’ti . ‘Evaṃ bhaddantavā’ti kho, bhikkhave, suvīro devaputto sakkassa devānamindassa paṭissutvā tatiyampi pamādaṃ āpādesi. Atha kho, bhikkhave, sakko devānamindo suvīraṃ devaputtaṃ gāthāya ajjhabhāsi –
‘‘অনুট্ঠহং অৰাযামং, সুখং যত্রাধিগচ্ছতি।
‘‘Anuṭṭhahaṃ avāyāmaṃ, sukhaṃ yatrādhigacchati;
সুৰীর তত্থ গচ্ছাহি, মঞ্চ তত্থেৰ পাপযা’’তি॥
Suvīra tattha gacchāhi, mañca tattheva pāpayā’’ti.
সব্বকামসমিদ্ধস্স, তং মে সক্ক ৰরং দিসা’’তি॥
Sabbakāmasamiddhassa, taṃ me sakka varaṃ disā’’ti.
‘‘যত্থালসো অনুট্ঠাতা, অচ্চন্তং সুখমেধতি।
‘‘Yatthālaso anuṭṭhātā, accantaṃ sukhamedhati;
সুৰীর তত্থ গচ্ছাহি, মঞ্চ তত্থেৰ পাপযা’’তি॥
Suvīra tattha gacchāhi, mañca tattheva pāpayā’’ti.
অসোকং অনুপাযাসং, তং মে সক্ক ৰরং দিসা’’তি॥
Asokaṃ anupāyāsaṃ, taṃ me sakka varaṃ disā’’ti.
‘‘সচে অত্থি অকম্মেন, কোচি ক্ৰচি ন জীৰতি।
‘‘Sace atthi akammena, koci kvaci na jīvati;
নিব্বানস্স হি সো মগ্গো, সুৰীর তত্থ গচ্ছাহি।
Nibbānassa hi so maggo, suvīra tattha gacchāhi;
মঞ্চ তত্থেৰ পাপযা’’তি॥
Mañca tattheva pāpayā’’ti.
‘‘সো হি নাম, ভিক্খৰে, সক্কো দেৰানমিন্দো সকং পুঞ্ঞফলং উপজীৰমানো দেৰানং তাৰতিংসানং ইস্সরিযাধিপচ্চং রজ্জং কারেন্তো উট্ঠানৰীরিযস্স ৰণ্ণৰাদী ভৰিস্সতি। ইধ খো তং, ভিক্খৰে, সোভেথ, যং তুম্হে এৰং স্ৰাক্খাতে ধম্মৰিনযে পব্বজিতা সমানা উট্ঠহেয্যাথ ঘটেয্যাথ ৰাযমেয্যাথ অপ্পত্তস্স পত্তিযা অনধিগতস্স অধিগমায, অসচ্ছিকতস্স সচ্ছিকিরিযাযা’’তি।
‘‘So hi nāma, bhikkhave, sakko devānamindo sakaṃ puññaphalaṃ upajīvamāno devānaṃ tāvatiṃsānaṃ issariyādhipaccaṃ rajjaṃ kārento uṭṭhānavīriyassa vaṇṇavādī bhavissati. Idha kho taṃ, bhikkhave, sobhetha, yaṃ tumhe evaṃ svākkhāte dhammavinaye pabbajitā samānā uṭṭhaheyyātha ghaṭeyyātha vāyameyyātha appattassa pattiyā anadhigatassa adhigamāya, asacchikatassa sacchikiriyāyā’’ti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১. সুৰীরসুত্তৰণ্ণনা • 1. Suvīrasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১. সুৰীরসুত্তৰণ্ণনা • 1. Suvīrasuttavaṇṇanā
