๑. สุวีรสุตฺตํ

1. Suvīrasuttaṃ

๒๔๗. เอวํ เม สุตํ – เอกํ สมยํ ภควา สาวตฺถิยํ วิหรติ เชตวเน อนาถปิณฺฑิกสฺส อาราเมฯ ตตฺร โข ภควา ภิกฺขู อามเนฺตสิ – ‘‘ภิกฺขโว’’ติฯ ‘‘ภทเนฺต’’ติ เต ภิกฺขู ภควโต ปจฺจโสฺสสุํฯ ภควา เอตทโวจ –

247. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –

‘‘ภูตปุพฺพํ, ภิกฺขเว, อสุรา เทเว อภิยํสุฯ อถ โข, ภิกฺขเว, สโกฺก เทวานมิโนฺท สุวีรํ เทวปุตฺตํ อามเนฺตสิ – ‘เอเต, ตาต สุวีร, อสุรา เทเว อภิยนฺติฯ คจฺฉ, ตาต สุวีร, อสุเร ปจฺจุยฺยาหี’ติฯ ‘เอวํ ภทฺทนฺตวา’ติ โข, ภิกฺขเว, สุวีโร เทวปุโตฺต สกฺกสฺส เทวานมินฺทสฺส ปฎิสฺสุตฺวา ปมาทํ อาปาเทสิ ¹ฯ ทุติยมฺปิ โข, ภิกฺขเว, สโกฺก เทวานมิโนฺท สุวีรํ เทวปุตฺตํ อามเนฺตสิ – ‘เอเต, ตาต สุวีร, อสุรา เทเว อภิยนฺติฯ คจฺฉ, ตาต สุวีร, อสุเร ปจฺจุยฺยาหี’ติฯ ‘เอวํ ภทฺทนฺตวา’ติ โข, ภิกฺขเว, สุวีโร เทวปุโตฺต สกฺกสฺส เทวานมินฺทสฺส ปฎิสฺสุตฺวา ทุติยมฺปิ ปมาทํ อาปาเทสิฯ ตติยมฺปิ โข, ภิกฺขเว, สโกฺก เทวานมิโนฺท สุวีรํ เทวปุตฺตํ อามเนฺตสิ – ‘เอเต, ตาต สุวีร, อสุรา เทเว อภิยนฺติฯ คจฺฉ, ตาต สุวีร, อสุเร ปจฺจุยฺยาหี’ติ ฯ ‘เอวํ ภทฺทนฺตวา’ติ โข, ภิกฺขเว, สุวีโร เทวปุโตฺต สกฺกสฺส เทวานมินฺทสฺส ปฎิสฺสุตฺวา ตติยมฺปิ ปมาทํ อาปาเทสิฯ อถ โข, ภิกฺขเว, สโกฺก เทวานมิโนฺท สุวีรํ เทวปุตฺตํ คาถาย อชฺฌภาสิ –

‘‘Bhūtapubbaṃ, bhikkhave, asurā deve abhiyaṃsu. Atha kho, bhikkhave, sakko devānamindo suvīraṃ devaputtaṃ āmantesi – ‘ete, tāta suvīra, asurā deve abhiyanti. Gaccha, tāta suvīra, asure paccuyyāhī’ti. ‘Evaṃ bhaddantavā’ti kho, bhikkhave, suvīro devaputto sakkassa devānamindassa paṭissutvā pamādaṃ āpādesi ². Dutiyampi kho, bhikkhave, sakko devānamindo suvīraṃ devaputtaṃ āmantesi – ‘ete, tāta suvīra, asurā deve abhiyanti. Gaccha, tāta suvīra, asure paccuyyāhī’ti. ‘Evaṃ bhaddantavā’ti kho, bhikkhave, suvīro devaputto sakkassa devānamindassa paṭissutvā dutiyampi pamādaṃ āpādesi. Tatiyampi kho, bhikkhave, sakko devānamindo suvīraṃ devaputtaṃ āmantesi – ‘ete, tāta suvīra, asurā deve abhiyanti. Gaccha, tāta suvīra, asure paccuyyāhī’ti . ‘Evaṃ bhaddantavā’ti kho, bhikkhave, suvīro devaputto sakkassa devānamindassa paṭissutvā tatiyampi pamādaṃ āpādesi. Atha kho, bhikkhave, sakko devānamindo suvīraṃ devaputtaṃ gāthāya ajjhabhāsi –

‘‘อนุฎฺฐหํ อวายามํ, สุขํ ยตฺราธิคจฺฉติ;

‘‘Anuṭṭhahaṃ avāyāmaṃ, sukhaṃ yatrādhigacchati;

สุวีร ตตฺถ คจฺฉาหิ, มญฺจ ตเตฺถว ปาปยา’’ติฯ

Suvīra tattha gacchāhi, mañca tattheva pāpayā’’ti.

‘‘อลสฺวสฺส ³ อนุฎฺฐาตา, น จ กิจฺจานิ การเย;

‘‘Alasvassa ⁴ anuṭṭhātā, na ca kiccāni kāraye;

สพฺพกามสมิทฺธสฺส, ตํ เม สกฺก วรํ ทิสา’’ติฯ

Sabbakāmasamiddhassa, taṃ me sakka varaṃ disā’’ti.

‘‘ยตฺถาลโส อนุฎฺฐาตา, อจฺจนฺตํ สุขเมธติ;

‘‘Yatthālaso anuṭṭhātā, accantaṃ sukhamedhati;

สุวีร ตตฺถ คจฺฉาหิ, มญฺจ ตเตฺถว ปาปยา’’ติฯ

Suvīra tattha gacchāhi, mañca tattheva pāpayā’’ti.

‘‘อกมฺมุนา ⁵ เทวเสฎฺฐ, สกฺก วิเนฺทมุ ยํ สุขํ;

‘‘Akammunā ⁶ devaseṭṭha, sakka vindemu yaṃ sukhaṃ;

อโสกํ อนุปายาสํ, ตํ เม สกฺก วรํ ทิสา’’ติฯ

Asokaṃ anupāyāsaṃ, taṃ me sakka varaṃ disā’’ti.

‘‘สเจ อตฺถิ อกเมฺมน, โกจิ กฺวจิ น ชีวติ;

‘‘Sace atthi akammena, koci kvaci na jīvati;

นิพฺพานสฺส หิ โส มโคฺค, สุวีร ตตฺถ คจฺฉาหิ;

Nibbānassa hi so maggo, suvīra tattha gacchāhi;

มญฺจ ตเตฺถว ปาปยา’’ติฯ

Mañca tattheva pāpayā’’ti.

‘‘โส หิ นาม, ภิกฺขเว, สโกฺก เทวานมิโนฺท สกํ ปุญฺญผลํ อุปชีวมาโน เทวานํ ตาวติํสานํ อิสฺสริยาธิปจฺจํ รชฺชํ กาเรโนฺต อุฎฺฐานวีริยสฺส วณฺณวาที ภวิสฺสติฯ อิธ โข ตํ, ภิกฺขเว, โสเภถ, ยํ ตุเมฺห เอวํ สฺวากฺขาเต ธมฺมวินเย ปพฺพชิตา สมานา อุฎฺฐเหยฺยาถ ฆเฎยฺยาถ วายเมยฺยาถ อปฺปตฺตสฺส ปตฺติยา อนธิคตสฺส อธิคมาย, อสจฺฉิกตสฺส สจฺฉิกิริยายา’’ติฯ

‘‘So hi nāma, bhikkhave, sakko devānamindo sakaṃ puññaphalaṃ upajīvamāno devānaṃ tāvatiṃsānaṃ issariyādhipaccaṃ rajjaṃ kārento uṭṭhānavīriyassa vaṇṇavādī bhavissati. Idha kho taṃ, bhikkhave, sobhetha, yaṃ tumhe evaṃ svākkhāte dhammavinaye pabbajitā samānā uṭṭhaheyyātha ghaṭeyyātha vāyameyyātha appattassa pattiyā anadhigatassa adhigamāya, asacchikatassa sacchikiriyāyā’’ti.

Next: ๒. สุสีมสุตฺตํ • 2. Susīmasuttaṃ

Footnotes:

1. อาหเรสิ (กตฺถจิ) นวงฺคุตฺตเร สีหนาทสุเตฺตปิ

2. āharesi (katthaci) navaṅguttare sīhanādasuttepi

3. อลส’สฺส (สี. ปี.), อลสฺวายํ (สฺยา. กํ.)

4. alasa’ssa (sī. pī.), alasvāyaṃ (syā. kaṃ.)

5. อกมฺมนา (สี. ปี.)

6. akammanā (sī. pī.)

Related texts:

อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๑. สุวีรสุตฺตวณฺณนา • 1. Suvīrasuttavaṇṇanā

ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / สํยุตฺตนิกาย (ฎีกา) • Saṃyuttanikāya (ṭīkā) / ๑. สุวีรสุตฺตวณฺณนา • 1. Suvīrasuttavaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact