| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
11. ஸக்கஸங்யுத்தங்
11. Sakkasaṃyuttaṃ
1. பட²மவக்³கோ³
1. Paṭhamavaggo
1. ஸுவீரஸுத்தவண்ணனா
1. Suvīrasuttavaṇṇanā
247. ஸக்கஸங்யுத்தஸ்ஸ பட²மே அபி⁴யங்ஸூதி கதா³ அபி⁴யங்ஸு? யதா³ ப³லவந்தோ அஹேஸுங், ததா³. தத்ராயங் அனுபுப்³பி³கதா² – ஸக்கோ கிர மக³த⁴ரட்டே² மசலகா³மகே மகோ⁴ நாம மாணவோ ஹுத்வா தெத்திங்ஸ புரிஸே க³ஹெத்வா கல்யாணகம்மங் கரொந்தோ ஸத்த வதபதா³னி பூரெத்வா தத்த² காலங்கதோ தே³வலோகே நிப்³ப³த்தி. தங் ப³லவகம்மானுபா⁴வேன ஸபரிஸங் ஸேஸதே³வதா த³ஸஹி டா²னேஹி அதி⁴க³ண்ஹந்தங் தி³ஸ்வா ‘‘ஆக³ந்துகதே³வபுத்தா ஆக³தா’’தி நேவாஸிகா க³ந்த⁴பானங் ஸஜ்ஜயிங்ஸு. ஸக்கோ ஸகபரிஸாய ஸஞ்ஞங் அதா³ஸி – ‘‘மாரிஸா மா க³ந்த⁴பானங் பிவித்த², பிவனாகாரமத்தமேவ த³ஸ்ஸேதா²’’தி. தே தத்த² அகங்ஸு. நேவாஸிகதே³வதா ஸுவண்ணஸரகேஹி உபனீதங் க³ந்த⁴பானங் யாவத³த்த²ங் பிவித்வா மத்தா தத்த² தத்த² ஸுவண்ணபத²வியங் பதித்வா ஸயிங்ஸு. ஸக்கோ ‘‘க³ண்ஹத² புத்தஹதாய புத்தே’’தி தே பாதே³ஸு க³ஹெத்வா ஸினேருபாதே³ கி²பாபேஸி. ஸக்கஸ்ஸ புஞ்ஞதேஜேன தத³னுவத்தகாபி ஸப்³பே³ தத்தே²வ பதிங்ஸு. தே ஸினேருவேமஜ்ஜ²காலே ஸஞ்ஞங் லபி⁴த்வா, ‘‘தாதா ந ஸுரங் பிவிம்ஹ, ந ஸுரங் பிவிம்ஹா’’தி ஆஹங்ஸு. ததோ பட்டா²ய அஸுரா நாம ஜாதா. அத² நேஸங் கம்மபச்சயஉதுஸமுட்டா²னங் ஸினேருஸ்ஸ ஹெட்டி²மதலே த³ஸயோஜனஸஹஸ்ஸங் அஸுரப⁴வனங் நிப்³ப³த்தி. ஸக்கோ தேஸங் நிவத்தெத்வா அனாக³மனத்தா²ய ஆரக்க²ங் ட²பேஸி, யங் ஸந்தா⁴ய வுத்தங் –
247. Sakkasaṃyuttassa paṭhame abhiyaṃsūti kadā abhiyaṃsu? Yadā balavanto ahesuṃ, tadā. Tatrāyaṃ anupubbikathā – sakko kira magadharaṭṭhe macalagāmake magho nāma māṇavo hutvā tettiṃsa purise gahetvā kalyāṇakammaṃ karonto satta vatapadāni pūretvā tattha kālaṅkato devaloke nibbatti. Taṃ balavakammānubhāvena saparisaṃ sesadevatā dasahi ṭhānehi adhigaṇhantaṃ disvā ‘‘āgantukadevaputtā āgatā’’ti nevāsikā gandhapānaṃ sajjayiṃsu. Sakko sakaparisāya saññaṃ adāsi – ‘‘mārisā mā gandhapānaṃ pivittha, pivanākāramattameva dassethā’’ti. Te tattha akaṃsu. Nevāsikadevatā suvaṇṇasarakehi upanītaṃ gandhapānaṃ yāvadatthaṃ pivitvā mattā tattha tattha suvaṇṇapathaviyaṃ patitvā sayiṃsu. Sakko ‘‘gaṇhatha puttahatāya putte’’ti te pādesu gahetvā sinerupāde khipāpesi. Sakkassa puññatejena tadanuvattakāpi sabbe tattheva patiṃsu. Te sineruvemajjhakāle saññaṃ labhitvā, ‘‘tātā na suraṃ pivimha, na suraṃ pivimhā’’ti āhaṃsu. Tato paṭṭhāya asurā nāma jātā. Atha nesaṃ kammapaccayautusamuṭṭhānaṃ sinerussa heṭṭhimatale dasayojanasahassaṃ asurabhavanaṃ nibbatti. Sakko tesaṃ nivattetvā anāgamanatthāya ārakkhaṃ ṭhapesi, yaṃ sandhāya vuttaṃ –
‘‘அந்தரா த்³வின்னங் அயுஜ்ஜ²புரானங்,
‘‘Antarā dvinnaṃ ayujjhapurānaṃ,
பஞ்சவிதா⁴ ட²பிதா அபி⁴ரக்கா²;
Pañcavidhā ṭhapitā abhirakkhā;
உத³கங் கரோடி-பயஸ்ஸ ச ஹாரீ,
Udakaṃ karoṭi-payassa ca hārī,
மத³னயுதா சதுரோ ச மஹத்தா²’’தி.
Madanayutā caturo ca mahatthā’’ti.
த்³வே நக³ரானி ஹி யுத்³தே⁴ன க³ஹேதுங் அஸக்குணெய்யதாய அயுஜ்ஜ²புரானி நாம ஜாதானி தே³வனக³ரஞ்ச அஸுரனக³ரஞ்ச. யதா³ ஹி அஸுரா ப³லவந்தோ ஹொந்தி, அத² தே³வேஹி பலாயித்வா தே³வனக³ரங் பவிஸித்வா த்³வாரே பித³ஹிதே அஸுரானங் ஸதஸஹஸ்ஸம்பி கிஞ்சி காதுங் ந ஸக்கோதி. யதா³ தே³வா ப³லவந்தோ ஹொந்தி, அதா²ஸுரேஹி பலாயித்வா அஸுரனக³ரஸ்ஸ த்³வாரே பித³ஹிதே ஸக்கானங் ஸதஸஹஸ்ஸம்பி கிஞ்சி காதுங் ந ஸக்கோதி. இதி இமானி த்³வே நக³ரானி அயுஜ்ஜ²புரானி நாம. நேஸங் அந்தரா ஏதேஸு உத³காதீ³ஸு பஞ்சஸு டா²னேஸு ஸக்கேன ஆரக்கா² ட²பிதா. தத்த² உத³கஸத்³தே³ன நாகா³ க³ஹிதா. தே ஹி உத³கே ப³லவந்தோ ஹொந்தி. தஸ்மா ஸினேருஸ்ஸ பட²மாலிந்தே³ தேஸங் ஆரக்கா². கரோடிஸத்³தே³ன ஸுபண்ணா க³ஹிதா. தேஸங் கிர கரோடி நாம பானபோ⁴ஜனங், தேன தங் நாமங் லபி⁴ங்ஸு. து³தியாலிந்தே³ தேஸங் ஆரக்கா². பயஸ்ஸஹாரீஸத்³தே³ன கும்ப⁴ண்டா³ க³ஹிதா. தா³னவரக்க²ஸா கிர தே. ததியாலிந்தே³ தேஸங் ஆரக்கா². மத³னயுதஸத்³தே³ன யக்கா² க³ஹிதா. விஸமசாரினோ கிரதே யுஜ்ஜ²ஸொண்டா³. சதுத்தா²லிந்தே³ தேஸங் ஆரக்கா². சதுரோ ச மஹந்தாதி சத்தாரோ மஹாராஜானோ வுத்தா. பஞ்சமாலிந்தே³ தேஸங் ஆரக்கா². தஸ்மா யதி³ அஸுரா குபிதாவிலசித்தா தே³வபுரங் உபயந்தி யுத்³தே⁴ஸூ, யங் கி³ரினோ பட²மங் பரிப⁴ண்ட³ங், தங் உரகா³ படிபா³ஹந்தி ஏவங் ஸேஸேஸு ஸேஸா.
Dve nagarāni hi yuddhena gahetuṃ asakkuṇeyyatāya ayujjhapurāni nāma jātāni devanagarañca asuranagarañca. Yadā hi asurā balavanto honti, atha devehi palāyitvā devanagaraṃ pavisitvā dvāre pidahite asurānaṃ satasahassampi kiñci kātuṃ na sakkoti. Yadā devā balavanto honti, athāsurehi palāyitvā asuranagarassa dvāre pidahite sakkānaṃ satasahassampi kiñci kātuṃ na sakkoti. Iti imāni dve nagarāni ayujjhapurāni nāma. Nesaṃ antarā etesu udakādīsu pañcasu ṭhānesu sakkena ārakkhā ṭhapitā. Tattha udakasaddena nāgā gahitā. Te hi udake balavanto honti. Tasmā sinerussa paṭhamālinde tesaṃ ārakkhā. Karoṭisaddena supaṇṇā gahitā. Tesaṃ kira karoṭi nāma pānabhojanaṃ, tena taṃ nāmaṃ labhiṃsu. Dutiyālinde tesaṃ ārakkhā. Payassahārīsaddena kumbhaṇḍā gahitā. Dānavarakkhasā kira te. Tatiyālinde tesaṃ ārakkhā. Madanayutasaddena yakkhā gahitā. Visamacārino kirate yujjhasoṇḍā. Catutthālinde tesaṃ ārakkhā. Caturo ca mahantāti cattāro mahārājāno vuttā. Pañcamālinde tesaṃ ārakkhā. Tasmā yadi asurā kupitāvilacittā devapuraṃ upayanti yuddhesū, yaṃ girino paṭhamaṃ paribhaṇḍaṃ, taṃ uragā paṭibāhanti evaṃ sesesu sesā.
தே பன அஸுரா ஆயுவண்ணரஸஇஸ்ஸரியஸம்பத்தீஹி தாவதிங்ஸஸதி³ஸாவ. தஸ்மா அந்தரா அத்தானங் அஜானித்வா பாடலியா புப்பி²தாய, ‘‘ந இத³ங் தே³வனக³ரங், தத்த² பாரிச்ச²த்தகோ புப்ப²தி, இத⁴ பன சித்தபாடலீ, ஜரஸக்கேனாம்ஹாகங் ஸுரங் பாயெத்வா வஞ்சிதா, தே³வனக³ரஞ்ச நோ க³ஹிதங், க³ச்சா²ம தேன ஸத்³தி⁴ங் யுஜ்ஜி²ஸ்ஸாமா’’தி ஹத்தி²அஸ்ஸரதே² ஆருய்ஹ ஸுவண்ணரஜதமணிப²லகானி க³ஹெத்வா, யுத்³த⁴ஸஜ்ஜா ஹுத்வா, அஸுரபே⁴ரியோ வாதெ³ந்தா மஹாஸமுத்³தே³ உத³கங் த்³விதா⁴ பெ⁴த்வா உட்ட²ஹந்தி. தே தே³வே வுட்டே² வம்மிகமக்கி²கா வம்மிகங் விய ஸினேருங் அபி⁴ருஹிது ஆரப⁴ந்தி. அத² நேஸங் பட²மங் நாகே³ஹி ஸத்³தி⁴ங் யுத்³த⁴ங் ஹோதி. தஸ்மிங் கோ² பன யுத்³தே⁴ ந கஸ்ஸசி ச²வி வா சம்மங் வா சி²ஜ்ஜதி, ந லோஹிதங் உப்பஜ்ஜதி, கேவலங் குமாரகானங் தா³ருமெண்ட³கயுத்³த⁴ங் விய அஞ்ஞமஞ்ஞங் ஸந்தாஸனமத்தமேவ ஹோதி. கோடிஸதாபி கோடிஸஹஸ்ஸாபி நாகா³ தேஹி ஸத்³தி⁴ங் யுஜ்ஜி²த்வா தே அஸுரபுரங்யேவ பவேஸெத்வா நிவத்தந்தி.
Te pana asurā āyuvaṇṇarasaissariyasampattīhi tāvatiṃsasadisāva. Tasmā antarā attānaṃ ajānitvā pāṭaliyā pupphitāya, ‘‘na idaṃ devanagaraṃ, tattha pāricchattako pupphati, idha pana cittapāṭalī, jarasakkenāmhākaṃ suraṃ pāyetvā vañcitā, devanagarañca no gahitaṃ, gacchāma tena saddhiṃ yujjhissāmā’’ti hatthiassarathe āruyha suvaṇṇarajatamaṇiphalakāni gahetvā, yuddhasajjā hutvā, asurabheriyo vādentā mahāsamudde udakaṃ dvidhā bhetvā uṭṭhahanti. Te deve vuṭṭhe vammikamakkhikā vammikaṃ viya sineruṃ abhiruhitu ārabhanti. Atha nesaṃ paṭhamaṃ nāgehi saddhiṃ yuddhaṃ hoti. Tasmiṃ kho pana yuddhe na kassaci chavi vā cammaṃ vā chijjati, na lohitaṃ uppajjati, kevalaṃ kumārakānaṃ dārumeṇḍakayuddhaṃ viya aññamaññaṃ santāsanamattameva hoti. Koṭisatāpi koṭisahassāpi nāgā tehi saddhiṃ yujjhitvā te asurapuraṃyeva pavesetvā nivattanti.
யதா³ பன அஸுரா ப³லவந்தோ ஹொந்தி, அத² நாகா³ ஓஸக்கித்வா து³தியே ஆலிந்தே³ ஸுபண்ணேஹி ஸத்³தி⁴ங் ஏகதோவ ஹுத்வா யுஜ்ஜ²ந்தி. ஏஸ நயோ ஸுபண்ணாதீ³ஸூபி. யதா³ பன தானி பஞ்சபி டா²னானி அஸுரா மத்³த³ந்தி, ததா³ ஏகதோ ஸம்பிண்டி³தானிபி பஞ்ச ப³லானி ஓஸக்கந்தி. அத² சத்தாரோ மஹாராஜானோ க³ந்த்வா ஸக்கஸ்ஸ தங் பவத்திங் ஆரோசெந்தி. ஸக்கோ தேஸங் வசனங் ஸுத்வா தி³யட்³ட⁴யோஜனஸதிகங் வேஜயந்தரத²ங் ஆருய்ஹ ஸயங் வா நிக்க²மதி, ஏகங் வா புத்தங் பேஸேதி. இமஸ்மிங் பன காலே புத்தங் பேஸேதுகாமோ, தாத ஸுவீராதிஆதி³மாஹ.
Yadā pana asurā balavanto honti, atha nāgā osakkitvā dutiye ālinde supaṇṇehi saddhiṃ ekatova hutvā yujjhanti. Esa nayo supaṇṇādīsūpi. Yadā pana tāni pañcapi ṭhānāni asurā maddanti, tadā ekato sampiṇḍitānipi pañca balāni osakkanti. Atha cattāro mahārājāno gantvā sakkassa taṃ pavattiṃ ārocenti. Sakko tesaṃ vacanaṃ sutvā diyaḍḍhayojanasatikaṃ vejayantarathaṃ āruyha sayaṃ vā nikkhamati, ekaṃ vā puttaṃ peseti. Imasmiṃ pana kāle puttaṃ pesetukāmo, tāta suvīrātiādimāha.
ஏவங் ப⁴த்³த³ந்தவாதி கோ²தி ஏவங் ஹோது ப⁴த்³த³ங் தவ இதி கோ². பமாத³ங் ஆபாதே³ஸீதி பமாத³ங் அகாஸி. அச்ச²ராஸங்க⁴பரிவுதோ ஸட்டி²யோஜனங் வித்தா²ரேன ஸுவண்ணமஹாவீதி²ங் ஓதரித்வா நக்க²த்தங் கீளந்தோ நந்த³னவனாதீ³ஸு விசரதீதி அத்தோ².
Evaṃ bhaddantavāti khoti evaṃ hotu bhaddaṃ tava iti kho. Pamādaṃ āpādesīti pamādaṃ akāsi. Accharāsaṅghaparivuto saṭṭhiyojanaṃ vitthārena suvaṇṇamahāvīthiṃ otaritvā nakkhattaṃ kīḷanto nandanavanādīsu vicaratīti attho.
அனுட்ட²ஹந்தி அனுட்ட²ஹந்தோ. அவாயாமந்தி அவாயமந்தோ. அலஸ்வஸ்ஸாதி அலஸோ அஸ்ஸ. ந ச கிச்சானி காரயேதி கிஞ்சி கிச்சங் நாம ந கரெய்ய. ஸப்³ப³காமஸமித்³த⁴ஸ்ஸாதி ஸப்³ப³காமேஹி ஸமித்³தோ⁴ அஸ்ஸ. தங் மே, ஸக்க, வரங் தி³ஸாதி, ஸக்க தே³வஸெட்ட², தங் மே வரங் உத்தமங் டா²னங் ஓகாஸங் தி³ஸங் ஆசிக்க² கதே²ஹீதி வத³தி. நிப்³பா³னஸ்ஸ ஹி ஸோ மக்³கோ³தி கம்மங் அகத்வா ஜீவிதட்டா²னங் நாம நிப்³பா³னஸ்ஸ மக்³கோ³. பட²மங்.
Anuṭṭhahanti anuṭṭhahanto. Avāyāmanti avāyamanto. Alasvassāti alaso assa. Na ca kiccāni kārayeti kiñci kiccaṃ nāma na kareyya. Sabbakāmasamiddhassāti sabbakāmehi samiddho assa. Taṃ me, sakka, varaṃ disāti, sakka devaseṭṭha, taṃ me varaṃ uttamaṃ ṭhānaṃ okāsaṃ disaṃ ācikkha kathehīti vadati. Nibbānassa hi so maggoti kammaṃ akatvā jīvitaṭṭhānaṃ nāma nibbānassa maggo. Paṭhamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. ஸுவீரஸுத்தங் • 1. Suvīrasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1. ஸுவீரஸுத்தவண்ணனா • 1. Suvīrasuttavaṇṇanā
