| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
১১. সক্কসংযুত্তং
11. Sakkasaṃyuttaṃ
১. পঠমৰগ্গো
1. Paṭhamavaggo
১. সুৰীরসুত্তৰণ্ণনা
1. Suvīrasuttavaṇṇanā
২৪৭. অভিযংসূতি যুদ্ধসজ্জাভিমুখা হুত্ৰা গচ্ছিংসু। তত্রাতি তস্মিং অসুরানং অভিযানে অযং দানি ৰুচ্চমানা অনুপুব্বতো কথা। তেত্তিংস পুরিসে গহেত্ৰাতি তেত্তিংস পুরিসে পুঞ্ঞকিরিযায সহাযভূতে গহেত্ৰা। ‘‘যাৰজীৰং মাতাপিতুভরো অস্স’’ন্তিআদিনা সমাদিন্নানি সত্ত ৰতপদানি পূরেত্ৰা। অধিগণ্হন্তং অভিভৰন্তং। পুত্তহতাযাতি হতপুত্তায। সা সুরা ন হোতি, ন সুরং পিৰিম্হাতি অধিপ্পাযো। ততো পট্ঠাযাতি ‘‘ন সুরা’’তি ৰুত্তকালতো পট্ঠায। ‘‘ন সুরন্তি ন দিব্বন্তীতি অসুরা’’তি কেচি। হেট্ঠিমতলে অন্তোভূমিযং আযামতো দসযোজনসহস্সং।
247.Abhiyaṃsūti yuddhasajjābhimukhā hutvā gacchiṃsu. Tatrāti tasmiṃ asurānaṃ abhiyāne ayaṃ dāni vuccamānā anupubbato kathā. Tettiṃsa purise gahetvāti tettiṃsa purise puññakiriyāya sahāyabhūte gahetvā. ‘‘Yāvajīvaṃ mātāpitubharo assa’’ntiādinā samādinnāni satta vatapadāni pūretvā. Adhigaṇhantaṃ abhibhavantaṃ. Puttahatāyāti hataputtāya. Sā surā na hoti, na suraṃ pivimhāti adhippāyo. Tato paṭṭhāyāti ‘‘na surā’’ti vuttakālato paṭṭhāya. ‘‘Na suranti na dibbantīti asurā’’ti keci. Heṭṭhimatale antobhūmiyaṃ āyāmato dasayojanasahassaṃ.
উরগাদিসহচরিতানি ঠানানি উরগাদীনীতি আহ ‘‘উরগাদীসু পঞ্চসু ঠানেসূ’’তি। পঠমালিন্দেতি পঠমে পরিভণ্ডে। পঞ্চযোজনসহস্সৰিত্থারপুথুবহলাহি সিনেরুস্স চতূসুপি পস্সেসু চত্তারো পরিভণ্ডা। সিনেরুস্স হি তস্মিং তস্মিং পস্সে যুগন্ধরাদীসু পঞ্চসতপরিত্তদীপপরিৰারে মহাদীপে চ লভিতব্বস্স মহতো অত্থস্স ৰসেন মহত্থা। কুপিতাৰিলচিত্তাতি কুপিতেন কোপেন আকুলচিত্তা। যুদ্ধেসীতি যুদ্ধেসিনো। সেসেসূতি সেসেসু পরিভণ্ডেসু। সেসাতি সুপণ্ণাদযো।
Uragādisahacaritāni ṭhānāni uragādīnīti āha ‘‘uragādīsu pañcasu ṭhānesū’’ti. Paṭhamālindeti paṭhame paribhaṇḍe. Pañcayojanasahassavitthāraputhubahalāhi sinerussa catūsupi passesu cattāro paribhaṇḍā. Sinerussa hi tasmiṃ tasmiṃ passe yugandharādīsu pañcasataparittadīpaparivāre mahādīpe ca labhitabbassa mahato atthassa vasena mahatthā. Kupitāvilacittāti kupitena kopena ākulacittā. Yuddhesīti yuddhesino. Sesesūti sesesu paribhaṇḍesu. Sesāti supaṇṇādayo.
ৰম্মিকমক্খিকাতি সপক্খিকউপচিকা। ওসক্কিত্ৰাতি পিট্ঠিভাগেন নিৰত্তিত্ৰা।
Vammikamakkhikāti sapakkhikaupacikā. Osakkitvāti piṭṭhibhāgena nivattitvā.
পমাদং আপাদেসীতি সক্কস্স আণায পমাদং আপজ্জি। সট্ঠিযোজনং ৰিত্থারেন। সুৰণ্ণমহাৰীথিন্তি সুৰণ্ণমযভূমিজগতিৰীথিং।
Pamādaṃ āpādesīti sakkassa āṇāya pamādaṃ āpajji. Saṭṭhiyojanaṃ vitthārena. Suvaṇṇamahāvīthinti suvaṇṇamayabhūmijagativīthiṃ.
অনুট্ঠহন্তোতি উট্ঠানং কাযিকৰীরিযং অকরোন্তো। অৰাযমন্তোতি ৰাযামং চেতসিকৰীরিযং অকরোন্তো। কিঞ্চি কিচ্চন্তি কসিৰাণিজ্জাদিভেদং অঞ্ঞতরং কিচ্চং কত্তব্বকম্মং। ৰরন্তি পৰরং। তেনাহ ‘‘উত্তম’’ন্তি। তঞ্চ খো কসিতব্বট্ঠানং অধিপ্পেতন্তি আহ ‘‘ওকাস’’ন্তি। কম্মং অকত্ৰাতি কিঞ্চিপি জীৰিতহেতুভূতং কম্মং অকত্ৰা। জীৰিতট্ঠানং নামাতি তস্স জীৰিতস্স হেতু নাম। নিব্বানস্স মগ্গোতি নিব্বানস্স অধিগমুপাযভূতো মগ্গো।
Anuṭṭhahantoti uṭṭhānaṃ kāyikavīriyaṃ akaronto. Avāyamantoti vāyāmaṃ cetasikavīriyaṃ akaronto. Kiñci kiccanti kasivāṇijjādibhedaṃ aññataraṃ kiccaṃ kattabbakammaṃ. Varanti pavaraṃ. Tenāha ‘‘uttama’’nti. Tañca kho kasitabbaṭṭhānaṃ adhippetanti āha ‘‘okāsa’’nti. Kammaṃ akatvāti kiñcipi jīvitahetubhūtaṃ kammaṃ akatvā. Jīvitaṭṭhānaṃ nāmāti tassa jīvitassa hetu nāma. Nibbānassa maggoti nibbānassa adhigamupāyabhūto maggo.
সুৰীরসুত্তৰণ্ণনা নিট্ঠিতা।
Suvīrasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১. সুৰীরসুত্তং • 1. Suvīrasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১. সুৰীরসুত্তৰণ্ণনা • 1. Suvīrasuttavaṇṇanā
