| Library / Tipiṭaka / ติปิฎก • Tipiṭaka / สํยุตฺตนิกาย (ฎีกา) • Saṃyuttanikāya (ṭīkā) |
๑๑. สกฺกสํยุตฺตํ
11. Sakkasaṃyuttaṃ
๑. ปฐมวโคฺค
1. Paṭhamavaggo
๑. สุวีรสุตฺตวณฺณนา
1. Suvīrasuttavaṇṇanā
๒๔๗. อภิยํสูติ ยุทฺธสชฺชาภิมุขา หุตฺวา คจฺฉิํสุฯ ตตฺราติ ตสฺมิํ อสุรานํ อภิยาเน อยํ ทานิ วุจฺจมานา อนุปุพฺพโต กถาฯ เตตฺติํส ปุริเส คเหตฺวาติ เตตฺติํส ปุริเส ปุญฺญกิริยาย สหายภูเต คเหตฺวาฯ ‘‘ยาวชีวํ มาตาปิตุภโร อสฺส’’นฺติอาทินา สมาทินฺนานิ สตฺต วตปทานิ ปูเรตฺวาฯ อธิคณฺหนฺตํ อภิภวนฺตํฯ ปุตฺตหตายาติ หตปุตฺตายฯ สา สุรา น โหติ, น สุรํ ปิวิมฺหาติ อธิปฺปาโยฯ ตโต ปฎฺฐายาติ ‘‘น สุรา’’ติ วุตฺตกาลโต ปฎฺฐายฯ ‘‘น สุรนฺติ น ทิพฺพนฺตีติ อสุรา’’ติ เกจิฯ เหฎฺฐิมตเล อโนฺตภูมิยํ อายามโต ทสโยชนสหสฺสํฯ
247.Abhiyaṃsūti yuddhasajjābhimukhā hutvā gacchiṃsu. Tatrāti tasmiṃ asurānaṃ abhiyāne ayaṃ dāni vuccamānā anupubbato kathā. Tettiṃsa purise gahetvāti tettiṃsa purise puññakiriyāya sahāyabhūte gahetvā. ‘‘Yāvajīvaṃ mātāpitubharo assa’’ntiādinā samādinnāni satta vatapadāni pūretvā. Adhigaṇhantaṃ abhibhavantaṃ. Puttahatāyāti hataputtāya. Sā surā na hoti, na suraṃ pivimhāti adhippāyo. Tato paṭṭhāyāti ‘‘na surā’’ti vuttakālato paṭṭhāya. ‘‘Na suranti na dibbantīti asurā’’ti keci. Heṭṭhimatale antobhūmiyaṃ āyāmato dasayojanasahassaṃ.
อุรคาทิสหจริตานิ ฐานานิ อุรคาทีนีติ อาห ‘‘อุรคาทีสุ ปญฺจสุ ฐาเนสู’’ติฯ ปฐมาลิเนฺทติ ปฐเม ปริภเณฺฑฯ ปญฺจโยชนสหสฺสวิตฺถารปุถุพหลาหิ สิเนรุสฺส จตูสุปิ ปเสฺสสุ จตฺตาโร ปริภณฺฑาฯ สิเนรุสฺส หิ ตสฺมิํ ตสฺมิํ ปเสฺส ยุคนฺธราทีสุ ปญฺจสตปริตฺตทีปปริวาเร มหาทีเป จ ลภิตพฺพสฺส มหโต อตฺถสฺส วเสน มหตฺถาฯ กุปิตาวิลจิตฺตาติ กุปิเตน โกเปน อากุลจิตฺตาฯ ยุเทฺธสีติ ยุเทฺธสิโนฯ เสเสสูติ เสเสสุ ปริภเณฺฑสุฯ เสสาติ สุปณฺณาทโยฯ
Uragādisahacaritāni ṭhānāni uragādīnīti āha ‘‘uragādīsu pañcasu ṭhānesū’’ti. Paṭhamālindeti paṭhame paribhaṇḍe. Pañcayojanasahassavitthāraputhubahalāhi sinerussa catūsupi passesu cattāro paribhaṇḍā. Sinerussa hi tasmiṃ tasmiṃ passe yugandharādīsu pañcasataparittadīpaparivāre mahādīpe ca labhitabbassa mahato atthassa vasena mahatthā. Kupitāvilacittāti kupitena kopena ākulacittā. Yuddhesīti yuddhesino. Sesesūti sesesu paribhaṇḍesu. Sesāti supaṇṇādayo.
วมฺมิกมกฺขิกาติ สปกฺขิกอุปจิกาฯ โอสกฺกิตฺวาติ ปิฎฺฐิภาเคน นิวตฺติตฺวาฯ
Vammikamakkhikāti sapakkhikaupacikā. Osakkitvāti piṭṭhibhāgena nivattitvā.
ปมาทํ อาปาเทสีติ สกฺกสฺส อาณาย ปมาทํ อาปชฺชิฯ สฎฺฐิโยชนํ วิตฺถาเรนฯ สุวณฺณมหาวีถินฺติ สุวณฺณมยภูมิชคติวีถิํฯ
Pamādaṃ āpādesīti sakkassa āṇāya pamādaṃ āpajji. Saṭṭhiyojanaṃ vitthārena. Suvaṇṇamahāvīthinti suvaṇṇamayabhūmijagativīthiṃ.
อนุฎฺฐหโนฺตติ อุฎฺฐานํ กายิกวีริยํ อกโรโนฺตฯ อวายมโนฺตติ วายามํ เจตสิกวีริยํ อกโรโนฺตฯ กิญฺจิ กิจฺจนฺติ กสิวาณิชฺชาทิเภทํ อญฺญตรํ กิจฺจํ กตฺตพฺพกมฺมํฯ วรนฺติ ปวรํฯ เตนาห ‘‘อุตฺตม’’นฺติฯ ตญฺจ โข กสิตพฺพฎฺฐานํ อธิเปฺปตนฺติ อาห ‘‘โอกาส’’นฺติฯ กมฺมํ อกตฺวาติ กิญฺจิปิ ชีวิตเหตุภูตํ กมฺมํ อกตฺวาฯ ชีวิตฎฺฐานํ นามาติ ตสฺส ชีวิตสฺส เหตุ นามฯ นิพฺพานสฺส มโคฺคติ นิพฺพานสฺส อธิคมุปายภูโต มโคฺคฯ
Anuṭṭhahantoti uṭṭhānaṃ kāyikavīriyaṃ akaronto. Avāyamantoti vāyāmaṃ cetasikavīriyaṃ akaronto. Kiñci kiccanti kasivāṇijjādibhedaṃ aññataraṃ kiccaṃ kattabbakammaṃ. Varanti pavaraṃ. Tenāha ‘‘uttama’’nti. Tañca kho kasitabbaṭṭhānaṃ adhippetanti āha ‘‘okāsa’’nti. Kammaṃ akatvāti kiñcipi jīvitahetubhūtaṃ kammaṃ akatvā. Jīvitaṭṭhānaṃ nāmāti tassa jīvitassa hetu nāma. Nibbānassa maggoti nibbānassa adhigamupāyabhūto maggo.
สุวีรสุตฺตวณฺณนา นิฎฺฐิตาฯ
Suvīrasuttavaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / สํยุตฺตนิกาย • Saṃyuttanikāya / ๑. สุวีรสุตฺตํ • 1. Suvīrasuttaṃ
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๑. สุวีรสุตฺตวณฺณนา • 1. Suvīrasuttavaṇṇanā
