| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
១១. សក្កសំយុត្តំ
11. Sakkasaṃyuttaṃ
១. បឋមវគ្គោ
1. Paṭhamavaggo
១. សុវីរសុត្តវណ្ណនា
1. Suvīrasuttavaṇṇanā
២៤៧. អភិយំសូតិ យុទ្ធសជ្ជាភិមុខា ហុត្វា គច្ឆិំសុ។ តត្រាតិ តស្មិំ អសុរានំ អភិយានេ អយំ ទានិ វុច្ចមានា អនុបុព្ពតោ កថា។ តេត្តិំស បុរិសេ គហេត្វាតិ តេត្តិំស បុរិសេ បុញ្ញកិរិយាយ សហាយភូតេ គហេត្វា។ ‘‘យាវជីវំ មាតាបិតុភរោ អស្ស’’ន្តិអាទិនា សមាទិន្នានិ សត្ត វតបទានិ បូរេត្វា។ អធិគណ្ហន្តំ អភិភវន្តំ។ បុត្តហតាយាតិ ហតបុត្តាយ។ សា សុរា ន ហោតិ, ន សុរំ បិវិម្ហាតិ អធិប្បាយោ។ តតោ បដ្ឋាយាតិ ‘‘ន សុរា’’តិ វុត្តកាលតោ បដ្ឋាយ។ ‘‘ន សុរន្តិ ន ទិព្ពន្តីតិ អសុរា’’តិ កេចិ។ ហេដ្ឋិមតលេ អន្តោភូមិយំ អាយាមតោ ទសយោជនសហស្សំ។
247.Abhiyaṃsūti yuddhasajjābhimukhā hutvā gacchiṃsu. Tatrāti tasmiṃ asurānaṃ abhiyāne ayaṃ dāni vuccamānā anupubbato kathā. Tettiṃsa purise gahetvāti tettiṃsa purise puññakiriyāya sahāyabhūte gahetvā. ‘‘Yāvajīvaṃ mātāpitubharo assa’’ntiādinā samādinnāni satta vatapadāni pūretvā. Adhigaṇhantaṃ abhibhavantaṃ. Puttahatāyāti hataputtāya. Sā surā na hoti, na suraṃ pivimhāti adhippāyo. Tato paṭṭhāyāti ‘‘na surā’’ti vuttakālato paṭṭhāya. ‘‘Na suranti na dibbantīti asurā’’ti keci. Heṭṭhimatale antobhūmiyaṃ āyāmato dasayojanasahassaṃ.
ឧរគាទិសហចរិតានិ ឋានានិ ឧរគាទីនីតិ អាហ ‘‘ឧរគាទីសុ បញ្ចសុ ឋានេសូ’’តិ។ បឋមាលិន្ទេតិ បឋមេ បរិភណ្ឌេ។ បញ្ចយោជនសហស្សវិត្ថារបុថុពហលាហិ សិនេរុស្ស ចតូសុបិ បស្សេសុ ចត្តារោ បរិភណ្ឌា។ សិនេរុស្ស ហិ តស្មិំ តស្មិំ បស្សេ យុគន្ធរាទីសុ បញ្ចសតបរិត្តទីបបរិវារេ មហាទីបេ ច លភិតព្ពស្ស មហតោ អត្ថស្ស វសេន មហត្ថា។ កុបិតាវិលចិត្តាតិ កុបិតេន កោបេន អាកុលចិត្តា។ យុទ្ធេសីតិ យុទ្ធេសិនោ។ សេសេសូតិ សេសេសុ បរិភណ្ឌេសុ។ សេសាតិ សុបណ្ណាទយោ។
Uragādisahacaritāni ṭhānāni uragādīnīti āha ‘‘uragādīsu pañcasu ṭhānesū’’ti. Paṭhamālindeti paṭhame paribhaṇḍe. Pañcayojanasahassavitthāraputhubahalāhi sinerussa catūsupi passesu cattāro paribhaṇḍā. Sinerussa hi tasmiṃ tasmiṃ passe yugandharādīsu pañcasataparittadīpaparivāre mahādīpe ca labhitabbassa mahato atthassa vasena mahatthā. Kupitāvilacittāti kupitena kopena ākulacittā. Yuddhesīti yuddhesino. Sesesūti sesesu paribhaṇḍesu. Sesāti supaṇṇādayo.
វម្មិកមក្ខិកាតិ សបក្ខិកឧបចិកា។ ឱសក្កិត្វាតិ បិដ្ឋិភាគេន និវត្តិត្វា។
Vammikamakkhikāti sapakkhikaupacikā. Osakkitvāti piṭṭhibhāgena nivattitvā.
បមាទំ អាបាទេសីតិ សក្កស្ស អាណាយ បមាទំ អាបជ្ជិ។ សដ្ឋិយោជនំ វិត្ថារេន។ សុវណ្ណមហាវីថិន្តិ សុវណ្ណមយភូមិជគតិវីថិំ។
Pamādaṃ āpādesīti sakkassa āṇāya pamādaṃ āpajji. Saṭṭhiyojanaṃ vitthārena. Suvaṇṇamahāvīthinti suvaṇṇamayabhūmijagativīthiṃ.
អនុដ្ឋហន្តោតិ ឧដ្ឋានំ កាយិកវីរិយំ អករោន្តោ។ អវាយមន្តោតិ វាយាមំ ចេតសិកវីរិយំ អករោន្តោ។ កិញ្ចិ កិច្ចន្តិ កសិវាណិជ្ជាទិភេទំ អញ្ញតរំ កិច្ចំ កត្តព្ពកម្មំ។ វរន្តិ បវរំ។ តេនាហ ‘‘ឧត្តម’’ន្តិ។ តញ្ច ខោ កសិតព្ពដ្ឋានំ អធិប្បេតន្តិ អាហ ‘‘ឱកាស’’ន្តិ។ កម្មំ អកត្វាតិ កិញ្ចិបិ ជីវិតហេតុភូតំ កម្មំ អកត្វា។ ជីវិតដ្ឋានំ នាមាតិ តស្ស ជីវិតស្ស ហេតុ នាម។ និព្ពានស្ស មគ្គោតិ និព្ពានស្ស អធិគមុបាយភូតោ មគ្គោ។
Anuṭṭhahantoti uṭṭhānaṃ kāyikavīriyaṃ akaronto. Avāyamantoti vāyāmaṃ cetasikavīriyaṃ akaronto. Kiñci kiccanti kasivāṇijjādibhedaṃ aññataraṃ kiccaṃ kattabbakammaṃ. Varanti pavaraṃ. Tenāha ‘‘uttama’’nti. Tañca kho kasitabbaṭṭhānaṃ adhippetanti āha ‘‘okāsa’’nti. Kammaṃ akatvāti kiñcipi jīvitahetubhūtaṃ kammaṃ akatvā. Jīvitaṭṭhānaṃ nāmāti tassa jīvitassa hetu nāma. Nibbānassa maggoti nibbānassa adhigamupāyabhūto maggo.
សុវីរសុត្តវណ្ណនា និដ្ឋិតា។
Suvīrasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ១. សុវីរសុត្តំ • 1. Suvīrasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ១. សុវីរសុត្តវណ្ណនា • 1. Suvīrasuttavaṇṇanā
