| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၁၁. သက္ကသံယုတ္တံ
11. Sakkasaṃyuttaṃ
၁. ပဌမဝဂ္ဂော
1. Paṭhamavaggo
၁. သုဝီရသုတ္တဝဏ္ဏနာ
1. Suvīrasuttavaṇṇanā
၂၄၇. အဘိယံသူတိ ယုဒ္ဓသဇ္ဇာဘိမုခာ ဟုတ္ဝာ ဂစ္ဆိံသု။ တတ္ရာတိ တသ္မိံ အသုရာနံ အဘိယာနေ အယံ ဒာနိ ဝုစ္စမာနာ အနုပုဗ္ဗတော ကထာ။ တေတ္တိံသ ပုရိသေ ဂဟေတ္ဝာတိ တေတ္တိံသ ပုရိသေ ပုညကိရိယာယ သဟာယဘူတေ ဂဟေတ္ဝာ။ ‘‘ယာဝဇီဝံ မာတာပိတုဘရော အသ္သ’’န္တိအာဒိနာ သမာဒိန္နာနိ သတ္တ ဝတပဒာနိ ပူရေတ္ဝာ။ အဓိဂဏ္ဟန္တံ အဘိဘဝန္တံ။ ပုတ္တဟတာယာတိ ဟတပုတ္တာယ။ သာ သုရာ န ဟောတိ, န သုရံ ပိဝိမ္ဟာတိ အဓိပ္ပာယော။ တတော ပဋ္ဌာယာတိ ‘‘န သုရာ’’တိ ဝုတ္တကာလတော ပဋ္ဌာယ။ ‘‘န သုရန္တိ န ဒိဗ္ဗန္တီတိ အသုရာ’’တိ ကေစိ။ ဟေဋ္ဌိမတလေ အန္တောဘူမိယံ အာယာမတော ဒသယောဇနသဟသ္သံ။
247.Abhiyaṃsūti yuddhasajjābhimukhā hutvā gacchiṃsu. Tatrāti tasmiṃ asurānaṃ abhiyāne ayaṃ dāni vuccamānā anupubbato kathā. Tettiṃsa purise gahetvāti tettiṃsa purise puññakiriyāya sahāyabhūte gahetvā. ‘‘Yāvajīvaṃ mātāpitubharo assa’’ntiādinā samādinnāni satta vatapadāni pūretvā. Adhigaṇhantaṃ abhibhavantaṃ. Puttahatāyāti hataputtāya. Sā surā na hoti, na suraṃ pivimhāti adhippāyo. Tato paṭṭhāyāti ‘‘na surā’’ti vuttakālato paṭṭhāya. ‘‘Na suranti na dibbantīti asurā’’ti keci. Heṭṭhimatale antobhūmiyaṃ āyāmato dasayojanasahassaṃ.
ဥရဂာဒိသဟစရိတာနိ ဌာနာနိ ဥရဂာဒီနီတိ အာဟ ‘‘ဥရဂာဒီသု ပဉ္စသု ဌာနေသူ’’တိ။ ပဌမာလိန္ဒေတိ ပဌမေ ပရိဘဏ္ဍေ။ ပဉ္စယောဇနသဟသ္သဝိတ္ထာရပုထုဗဟလာဟိ သိနေရုသ္သ စတူသုပိ ပသ္သေသု စတ္တာရော ပရိဘဏ္ဍာ။ သိနေရုသ္သ ဟိ တသ္မိံ တသ္မိံ ပသ္သေ ယုဂန္ဓရာဒီသု ပဉ္စသတပရိတ္တဒီပပရိဝာရေ မဟာဒီပေ စ လဘိတဗ္ဗသ္သ မဟတော အတ္ထသ္သ ဝသေန မဟတ္ထာ။ ကုပိတာဝိလစိတ္တာတိ ကုပိတေန ကောပေန အာကုလစိတ္တာ။ ယုဒ္ဓေသီတိ ယုဒ္ဓေသိနော။ သေသေသူတိ သေသေသု ပရိဘဏ္ဍေသု။ သေသာတိ သုပဏ္ဏာဒယော။
Uragādisahacaritāni ṭhānāni uragādīnīti āha ‘‘uragādīsu pañcasu ṭhānesū’’ti. Paṭhamālindeti paṭhame paribhaṇḍe. Pañcayojanasahassavitthāraputhubahalāhi sinerussa catūsupi passesu cattāro paribhaṇḍā. Sinerussa hi tasmiṃ tasmiṃ passe yugandharādīsu pañcasataparittadīpaparivāre mahādīpe ca labhitabbassa mahato atthassa vasena mahatthā. Kupitāvilacittāti kupitena kopena ākulacittā. Yuddhesīti yuddhesino. Sesesūti sesesu paribhaṇḍesu. Sesāti supaṇṇādayo.
ဝမ္မိကမက္ခိကာတိ သပက္ခိကဥပစိကာ။ ဩသက္ကိတ္ဝာတိ ပိဋ္ဌိဘာဂေန နိဝတ္တိတ္ဝာ။
Vammikamakkhikāti sapakkhikaupacikā. Osakkitvāti piṭṭhibhāgena nivattitvā.
ပမာဒံ အာပာဒေသီတိ သက္ကသ္သ အာဏာယ ပမာဒံ အာပဇ္ဇိ။ သဋ္ဌိယောဇနံ ဝိတ္ထာရေန။ သုဝဏ္ဏမဟာဝီထိန္တိ သုဝဏ္ဏမယဘူမိဇဂတိဝီထိံ။
Pamādaṃ āpādesīti sakkassa āṇāya pamādaṃ āpajji. Saṭṭhiyojanaṃ vitthārena. Suvaṇṇamahāvīthinti suvaṇṇamayabhūmijagativīthiṃ.
အနုဋ္ဌဟန္တောတိ ဥဋ္ဌာနံ ကာယိကဝီရိယံ အကရောန္တော။ အဝာယမန္တောတိ ဝာယာမံ စေတသိကဝီရိယံ အကရောန္တော။ ကိဉ္စိ ကိစ္စန္တိ ကသိဝာဏိဇ္ဇာဒိဘေဒံ အညတရံ ကိစ္စံ ကတ္တဗ္ဗကမ္မံ။ ဝရန္တိ ပဝရံ။ တေနာဟ ‘‘ဥတ္တမ’’န္တိ။ တဉ္စ ခော ကသိတဗ္ဗဋ္ဌာနံ အဓိပ္ပေတန္တိ အာဟ ‘‘ဩကာသ’’န္တိ။ ကမ္မံ အကတ္ဝာတိ ကိဉ္စိပိ ဇီဝိတဟေတုဘူတံ ကမ္မံ အကတ္ဝာ။ ဇီဝိတဋ္ဌာနံ နာမာတိ တသ္သ ဇီဝိတသ္သ ဟေတု နာမ။ နိဗ္ဗာနသ္သ မဂ္ဂောတိ နိဗ္ဗာနသ္သ အဓိဂမုပာယဘူတော မဂ္ဂော။
Anuṭṭhahantoti uṭṭhānaṃ kāyikavīriyaṃ akaronto. Avāyamantoti vāyāmaṃ cetasikavīriyaṃ akaronto. Kiñci kiccanti kasivāṇijjādibhedaṃ aññataraṃ kiccaṃ kattabbakammaṃ. Varanti pavaraṃ. Tenāha ‘‘uttama’’nti. Tañca kho kasitabbaṭṭhānaṃ adhippetanti āha ‘‘okāsa’’nti. Kammaṃ akatvāti kiñcipi jīvitahetubhūtaṃ kammaṃ akatvā. Jīvitaṭṭhānaṃ nāmāti tassa jīvitassa hetu nāma. Nibbānassa maggoti nibbānassa adhigamupāyabhūto maggo.
သုဝီရသုတ္တဝဏ္ဏနာ နိဋ္ဌိတာ။
Suvīrasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၁. သုဝီရသုတ္တံ • 1. Suvīrasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၁. သုဝီရသုတ္တဝဏ္ဏနာ • 1. Suvīrasuttavaṇṇanā
