| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೧೧. ಸಕ್ಕಸಂಯುತ್ತಂ
11. Sakkasaṃyuttaṃ
೧. ಪಠಮವಗ್ಗೋ
1. Paṭhamavaggo
೧. ಸುವೀರಸುತ್ತವಣ್ಣನಾ
1. Suvīrasuttavaṇṇanā
೨೪೭. ಅಭಿಯಂಸೂತಿ ಯುದ್ಧಸಜ್ಜಾಭಿಮುಖಾ ಹುತ್ವಾ ಗಚ್ಛಿಂಸು। ತತ್ರಾತಿ ತಸ್ಮಿಂ ಅಸುರಾನಂ ಅಭಿಯಾನೇ ಅಯಂ ದಾನಿ ವುಚ್ಚಮಾನಾ ಅನುಪುಬ್ಬತೋ ಕಥಾ। ತೇತ್ತಿಂಸ ಪುರಿಸೇ ಗಹೇತ್ವಾತಿ ತೇತ್ತಿಂಸ ಪುರಿಸೇ ಪುಞ್ಞಕಿರಿಯಾಯ ಸಹಾಯಭೂತೇ ಗಹೇತ್ವಾ। ‘‘ಯಾವಜೀವಂ ಮಾತಾಪಿತುಭರೋ ಅಸ್ಸ’’ನ್ತಿಆದಿನಾ ಸಮಾದಿನ್ನಾನಿ ಸತ್ತ ವತಪದಾನಿ ಪೂರೇತ್ವಾ। ಅಧಿಗಣ್ಹನ್ತಂ ಅಭಿಭವನ್ತಂ। ಪುತ್ತಹತಾಯಾತಿ ಹತಪುತ್ತಾಯ। ಸಾ ಸುರಾ ನ ಹೋತಿ, ನ ಸುರಂ ಪಿವಿಮ್ಹಾತಿ ಅಧಿಪ್ಪಾಯೋ। ತತೋ ಪಟ್ಠಾಯಾತಿ ‘‘ನ ಸುರಾ’’ತಿ ವುತ್ತಕಾಲತೋ ಪಟ್ಠಾಯ। ‘‘ನ ಸುರನ್ತಿ ನ ದಿಬ್ಬನ್ತೀತಿ ಅಸುರಾ’’ತಿ ಕೇಚಿ। ಹೇಟ್ಠಿಮತಲೇ ಅನ್ತೋಭೂಮಿಯಂ ಆಯಾಮತೋ ದಸಯೋಜನಸಹಸ್ಸಂ।
247.Abhiyaṃsūti yuddhasajjābhimukhā hutvā gacchiṃsu. Tatrāti tasmiṃ asurānaṃ abhiyāne ayaṃ dāni vuccamānā anupubbato kathā. Tettiṃsa purise gahetvāti tettiṃsa purise puññakiriyāya sahāyabhūte gahetvā. ‘‘Yāvajīvaṃ mātāpitubharo assa’’ntiādinā samādinnāni satta vatapadāni pūretvā. Adhigaṇhantaṃ abhibhavantaṃ. Puttahatāyāti hataputtāya. Sā surā na hoti, na suraṃ pivimhāti adhippāyo. Tato paṭṭhāyāti ‘‘na surā’’ti vuttakālato paṭṭhāya. ‘‘Na suranti na dibbantīti asurā’’ti keci. Heṭṭhimatale antobhūmiyaṃ āyāmato dasayojanasahassaṃ.
ಉರಗಾದಿಸಹಚರಿತಾನಿ ಠಾನಾನಿ ಉರಗಾದೀನೀತಿ ಆಹ ‘‘ಉರಗಾದೀಸು ಪಞ್ಚಸು ಠಾನೇಸೂ’’ತಿ। ಪಠಮಾಲಿನ್ದೇತಿ ಪಠಮೇ ಪರಿಭಣ್ಡೇ। ಪಞ್ಚಯೋಜನಸಹಸ್ಸವಿತ್ಥಾರಪುಥುಬಹಲಾಹಿ ಸಿನೇರುಸ್ಸ ಚತೂಸುಪಿ ಪಸ್ಸೇಸು ಚತ್ತಾರೋ ಪರಿಭಣ್ಡಾ। ಸಿನೇರುಸ್ಸ ಹಿ ತಸ್ಮಿಂ ತಸ್ಮಿಂ ಪಸ್ಸೇ ಯುಗನ್ಧರಾದೀಸು ಪಞ್ಚಸತಪರಿತ್ತದೀಪಪರಿವಾರೇ ಮಹಾದೀಪೇ ಚ ಲಭಿತಬ್ಬಸ್ಸ ಮಹತೋ ಅತ್ಥಸ್ಸ ವಸೇನ ಮಹತ್ಥಾ। ಕುಪಿತಾವಿಲಚಿತ್ತಾತಿ ಕುಪಿತೇನ ಕೋಪೇನ ಆಕುಲಚಿತ್ತಾ। ಯುದ್ಧೇಸೀತಿ ಯುದ್ಧೇಸಿನೋ। ಸೇಸೇಸೂತಿ ಸೇಸೇಸು ಪರಿಭಣ್ಡೇಸು। ಸೇಸಾತಿ ಸುಪಣ್ಣಾದಯೋ।
Uragādisahacaritāni ṭhānāni uragādīnīti āha ‘‘uragādīsu pañcasu ṭhānesū’’ti. Paṭhamālindeti paṭhame paribhaṇḍe. Pañcayojanasahassavitthāraputhubahalāhi sinerussa catūsupi passesu cattāro paribhaṇḍā. Sinerussa hi tasmiṃ tasmiṃ passe yugandharādīsu pañcasataparittadīpaparivāre mahādīpe ca labhitabbassa mahato atthassa vasena mahatthā. Kupitāvilacittāti kupitena kopena ākulacittā. Yuddhesīti yuddhesino. Sesesūti sesesu paribhaṇḍesu. Sesāti supaṇṇādayo.
ವಮ್ಮಿಕಮಕ್ಖಿಕಾತಿ ಸಪಕ್ಖಿಕಉಪಚಿಕಾ। ಓಸಕ್ಕಿತ್ವಾತಿ ಪಿಟ್ಠಿಭಾಗೇನ ನಿವತ್ತಿತ್ವಾ।
Vammikamakkhikāti sapakkhikaupacikā. Osakkitvāti piṭṭhibhāgena nivattitvā.
ಪಮಾದಂ ಆಪಾದೇಸೀತಿ ಸಕ್ಕಸ್ಸ ಆಣಾಯ ಪಮಾದಂ ಆಪಜ್ಜಿ। ಸಟ್ಠಿಯೋಜನಂ ವಿತ್ಥಾರೇನ। ಸುವಣ್ಣಮಹಾವೀಥಿನ್ತಿ ಸುವಣ್ಣಮಯಭೂಮಿಜಗತಿವೀಥಿಂ।
Pamādaṃ āpādesīti sakkassa āṇāya pamādaṃ āpajji. Saṭṭhiyojanaṃ vitthārena. Suvaṇṇamahāvīthinti suvaṇṇamayabhūmijagativīthiṃ.
ಅನುಟ್ಠಹನ್ತೋತಿ ಉಟ್ಠಾನಂ ಕಾಯಿಕವೀರಿಯಂ ಅಕರೋನ್ತೋ। ಅವಾಯಮನ್ತೋತಿ ವಾಯಾಮಂ ಚೇತಸಿಕವೀರಿಯಂ ಅಕರೋನ್ತೋ। ಕಿಞ್ಚಿ ಕಿಚ್ಚನ್ತಿ ಕಸಿವಾಣಿಜ್ಜಾದಿಭೇದಂ ಅಞ್ಞತರಂ ಕಿಚ್ಚಂ ಕತ್ತಬ್ಬಕಮ್ಮಂ। ವರನ್ತಿ ಪವರಂ। ತೇನಾಹ ‘‘ಉತ್ತಮ’’ನ್ತಿ। ತಞ್ಚ ಖೋ ಕಸಿತಬ್ಬಟ್ಠಾನಂ ಅಧಿಪ್ಪೇತನ್ತಿ ಆಹ ‘‘ಓಕಾಸ’’ನ್ತಿ। ಕಮ್ಮಂ ಅಕತ್ವಾತಿ ಕಿಞ್ಚಿಪಿ ಜೀವಿತಹೇತುಭೂತಂ ಕಮ್ಮಂ ಅಕತ್ವಾ। ಜೀವಿತಟ್ಠಾನಂ ನಾಮಾತಿ ತಸ್ಸ ಜೀವಿತಸ್ಸ ಹೇತು ನಾಮ। ನಿಬ್ಬಾನಸ್ಸ ಮಗ್ಗೋತಿ ನಿಬ್ಬಾನಸ್ಸ ಅಧಿಗಮುಪಾಯಭೂತೋ ಮಗ್ಗೋ।
Anuṭṭhahantoti uṭṭhānaṃ kāyikavīriyaṃ akaronto. Avāyamantoti vāyāmaṃ cetasikavīriyaṃ akaronto. Kiñci kiccanti kasivāṇijjādibhedaṃ aññataraṃ kiccaṃ kattabbakammaṃ. Varanti pavaraṃ. Tenāha ‘‘uttama’’nti. Tañca kho kasitabbaṭṭhānaṃ adhippetanti āha ‘‘okāsa’’nti. Kammaṃ akatvāti kiñcipi jīvitahetubhūtaṃ kammaṃ akatvā. Jīvitaṭṭhānaṃ nāmāti tassa jīvitassa hetu nāma. Nibbānassa maggoti nibbānassa adhigamupāyabhūto maggo.
ಸುವೀರಸುತ್ತವಣ್ಣನಾ ನಿಟ್ಠಿತಾ।
Suvīrasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೧. ಸುವೀರಸುತ್ತಂ • 1. Suvīrasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೧. ಸುವೀರಸುತ್ತವಣ್ಣನಾ • 1. Suvīrasuttavaṇṇanā
