| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၁၀. တစ္ဆကင္ဂပဉ္ဟော
10. Tacchakaṅgapañho
၁၀. ‘‘ဘန္တေ နာဂသေန, ‘တစ္ဆကသ္သ ဒ္ဝေ အင္ဂာနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ ဒ္ဝေ အင္ဂာနိ ဂဟေတဗ္ဗာနီ’’တိ? ‘‘ယထာ, မဟာရာဇ, တစ္ဆကော ကာဠသုတ္တံ အနုလောမေတ္ဝာ ရုက္ခံ တစ္ဆတိ, ဧဝမေဝ ခော, မဟာရာဇ, ယောဂိနာ ယောဂာဝစရေန ဇိနသာသနမနုလောမယိတ္ဝာ သီလပထဝိယံ ပတိဋ္ဌဟိတ္ဝာ သဒ္ဓာဟတ္ထေန ပညာဝာသိံ ဂဟေတ္ဝာ ကိလေသာ တစ္ဆေတဗ္ဗာ။ ဣဒံ, မဟာရာဇ, တစ္ဆကသ္သ ပဌမံ အင္ဂံ ဂဟေတဗ္ဗံ။
10. ‘‘Bhante nāgasena, ‘tacchakassa dve aṅgāni gahetabbānī’ti yaṃ vadesi, katamāni tāni dve aṅgāni gahetabbānī’’ti? ‘‘Yathā, mahārāja, tacchako kāḷasuttaṃ anulometvā rukkhaṃ tacchati, evameva kho, mahārāja, yoginā yogāvacarena jinasāsanamanulomayitvā sīlapathaviyaṃ patiṭṭhahitvā saddhāhatthena paññāvāsiṃ gahetvā kilesā tacchetabbā. Idaṃ, mahārāja, tacchakassa paṭhamaṃ aṅgaṃ gahetabbaṃ.
‘‘ပုန စပရံ, မဟာရာဇ, တစ္ဆကော ဖေဂ္ဂုံ အပဟရိတ္ဝာ သာရမာဒိယတိ, ဧဝမေဝ ခော, မဟာရာဇ, ယောဂိနာ ယောဂာဝစရေန သသ္သတံ ဥစ္ဆေဒံ တံ ဇီဝံ တံ သရီရံ အညံ ဇီဝံ အညံ သရီရံ တဒုတ္တမံ အညဒုတ္တမံ အကတမဘဗ္ဗံ အပုရိသကာရံ အဗ္ရဟ္မစရိယဝာသံ သတ္တဝိနာသံ နဝသတ္တပာတုဘာဝံ သင္ခာရသသ္သတဘာဝံ ယော ကရောတိ, သော ပဋိသံဝေဒေတိ, အညော ကရောတိ, အညော ပဋိသံဝေဒေတိ, ကမ္မဖလဒသ္သနာ စ ကိရိယဖလဒိဋ္ဌိ စ ဣတိ ဧဝရူပာနိ စေဝ အညာနိ စ ဝိဝာဒပထာနိ အပနေတ္ဝာ သင္ခာရာနံ သဘာဝံ ပရမသုညတံ နိရီဟနိဇ္ဇီဝတံ 1 အစ္စန္တံ သုညတံ အာဒိယိတဗ္ဗံ။ ဣဒံ, မဟာရာဇ, တစ္ဆကသ္သ ဒုတိယံ အင္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဒေဝာတိဒေဝေန သုတ္တနိပာတေ –
‘‘Puna caparaṃ, mahārāja, tacchako phegguṃ apaharitvā sāramādiyati, evameva kho, mahārāja, yoginā yogāvacarena sassataṃ ucchedaṃ taṃ jīvaṃ taṃ sarīraṃ aññaṃ jīvaṃ aññaṃ sarīraṃ taduttamaṃ aññaduttamaṃ akatamabhabbaṃ apurisakāraṃ abrahmacariyavāsaṃ sattavināsaṃ navasattapātubhāvaṃ saṅkhārasassatabhāvaṃ yo karoti, so paṭisaṃvedeti, añño karoti, añño paṭisaṃvedeti, kammaphaladassanā ca kiriyaphaladiṭṭhi ca iti evarūpāni ceva aññāni ca vivādapathāni apanetvā saṅkhārānaṃ sabhāvaṃ paramasuññataṃ nirīhanijjīvataṃ 2 accantaṃ suññataṃ ādiyitabbaṃ. Idaṃ, mahārāja, tacchakassa dutiyaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena suttanipāte –
‘‘‘ကာရဏ္ဍဝံ နိဒ္ဓမထ၊ ကသမ္ဗုံ အပကသ္သထ။
‘‘‘Kāraṇḍavaṃ niddhamatha, kasambuṃ apakassatha;
တတော ပလာပေ ဝာဟေထ၊ အသ္သမဏေ သမဏမာနိနေ။
Tato palāpe vāhetha, assamaṇe samaṇamānine.
‘‘‘နိဒ္ဓမိတ္ဝာန ပာပိစ္ဆေ၊ ပာပအာစာရဂောစရေ။
‘‘‘Niddhamitvāna pāpicche, pāpaācāragocare;
သုဒ္ဓာ သုဒ္ဓေဟိ သံဝာသံ၊ ကပ္ပယဝ္ဟော ပတိသ္သတာ။
Suddhā suddhehi saṃvāsaṃ, kappayavho patissatā;
တတော သမဂ္ဂာ နိပကာ၊ ဒုက္ခသ္သန္တံ ကရိသ္သထာ’’’တိ။
Tato samaggā nipakā, dukkhassantaṃ karissathā’’’ti.
တစ္ဆကင္ဂပဉ္ဟော ဒသမော။
Tacchakaṅgapañho dasamo.
မက္ကဋကဝဂ္ဂော ဆဋ္ဌော။
Makkaṭakavaggo chaṭṭho.
တသ္သုဒ္ဒာနံ –
Tassuddānaṃ –
မက္ကဋော ဒာရကော ကုမ္မော၊ ဝနံ ရုက္ခော စ ပဉ္စမော။
Makkaṭo dārako kummo, vanaṃ rukkho ca pañcamo;
မေဃော မဏိ မာဂဝိကော၊ ဗာဠိသီ တစ္ဆကေန စာတိ။
Megho maṇi māgaviko, bāḷisī tacchakena cāti.
Footnotes:
