| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
॥ নমো তস্স ভগৰতো অরহতো সম্মাসম্বুদ্ধস্স॥
Namo tassa bhagavato arahato sammāsambuddhassa
পাচিত্যাদিযোজনা
Pācityādiyojanā
চূল়ৰগ্গযোজনা
Cūḷavaggayojanā
মহাৰগ্গখন্ধকস্সেৰং , কত্ৰান যোজনানযং।
Mahāvaggakhandhakassevaṃ , katvāna yojanānayaṃ;
অধুনা চূল়ৰগ্গস্স, করিস্সং যোজনানযং॥
Adhunā cūḷavaggassa, karissaṃ yojanānayaṃ.
১. কম্মক্খন্ধকং
1. Kammakkhandhakaṃ
১. তজ্জনীযকম্মকথা
1. Tajjanīyakammakathā
১. চূল়ৰগ্গস্স পঠমে কম্মক্খন্ধকে এৰমত্থো ৰেদিতব্বোতি যোজনা। ‘‘চূল়ৰগ্গস্সা’’তি পদং ‘‘কম্মক্খন্ধকে’’তি পদে অৰযৰিসম্বন্ধো। তাৰাতি পারিৰাসিকক্খন্ধকাদিতো , পারিৰাসিক্খন্ধকাদীনং ৰা পঠমং। চেৰসদ্দো চ চসদ্দো চ ‘‘পণ্ডুকলোহিতকা’’তি পদস্স অসমাহারদ্ৰন্দৰাক্যং দীপেন্তি। নিস্সযানং নামং নিস্সিতেসু উপচারৰসেন তেসং সদ্ধিৰিহারিকঅন্তেৰাসিকাপি পণ্ডুকলোহিতকনামাযেৰ হোন্তীতি দস্সেন্তো আহ ‘‘তেসং নিস্সিতকাপী’’তিআদি। পিসদ্দেন উপচারত্থং সম্পিণ্ডেতি। ‘‘সুট্ঠু বলৰ’’ন্তি ইমিনা বলৰাবলৰন্তি দ্ৰিন্নং সদ্দানং পরিযাযভাৰেন ৰুত্তত্তা অতিসযত্থোতি দস্সেতি। ‘‘বলৰবলৰ’’ন্তি ৰত্তব্বে ৰাচাসিলিট্ঠৰসেন দীঘং কত্ৰা এৰং ৰুত্তং। পটিৰদথাতি পটিচ্ছন্নট্ঠানে কথেথ। ইমিনা পটিমন্তেথাতি এত্থ মন্তধাতুযা গুত্তভাসনত্থং দস্সেতি। অত্থেসু করণভাসনকিচ্চেসু অলং সমত্থাতি অলমত্থা, তেসং ৰিসেসেনাতি অলমত্থতরাতি দস্সেন্তো আহ ‘‘সমত্থতরা’’তি।
1. Cūḷavaggassa paṭhame kammakkhandhake evamattho veditabboti yojanā. ‘‘Cūḷavaggassā’’ti padaṃ ‘‘kammakkhandhake’’ti pade avayavisambandho. Tāvāti pārivāsikakkhandhakādito , pārivāsikkhandhakādīnaṃ vā paṭhamaṃ. Cevasaddo ca casaddo ca ‘‘paṇḍukalohitakā’’ti padassa asamāhāradvandavākyaṃ dīpenti. Nissayānaṃ nāmaṃ nissitesu upacāravasena tesaṃ saddhivihārikaantevāsikāpi paṇḍukalohitakanāmāyeva hontīti dassento āha ‘‘tesaṃ nissitakāpī’’tiādi. Pisaddena upacāratthaṃ sampiṇḍeti. ‘‘Suṭṭhu balava’’nti iminā balavābalavanti dvinnaṃ saddānaṃ pariyāyabhāvena vuttattā atisayatthoti dasseti. ‘‘Balavabalava’’nti vattabbe vācāsiliṭṭhavasena dīghaṃ katvā evaṃ vuttaṃ. Paṭivadathāti paṭicchannaṭṭhāne kathetha. Iminā paṭimantethāti ettha mantadhātuyā guttabhāsanatthaṃ dasseti. Atthesu karaṇabhāsanakiccesu alaṃ samatthāti alamatthā, tesaṃ visesenāti alamatthatarāti dassento āha ‘‘samatthatarā’’ti.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / চূল়ৰগ্গপাল়ি • Cūḷavaggapāḷi / ১. তজ্জনীযকম্মং • 1. Tajjanīyakammaṃ
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / চূল়ৰগ্গ-অট্ঠকথা • Cūḷavagga-aṭṭhakathā / তজ্জনীযকম্মকথা • Tajjanīyakammakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / তজ্জনীযকম্মকথাৰণ্ণনা • Tajjanīyakammakathāvaṇṇanā
