| Library / Tipiṭaka / ತಿಪಿಟಕ • Tipiṭaka / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi |
॥ ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ॥
Namo tassa bhagavato arahato sammāsambuddhassa
ಪಾಚಿತ್ಯಾದಿಯೋಜನಾ
Pācityādiyojanā
ಚೂಳವಗ್ಗಯೋಜನಾ
Cūḷavaggayojanā
ಮಹಾವಗ್ಗಖನ್ಧಕಸ್ಸೇವಂ , ಕತ್ವಾನ ಯೋಜನಾನಯಂ।
Mahāvaggakhandhakassevaṃ , katvāna yojanānayaṃ;
ಅಧುನಾ ಚೂಳವಗ್ಗಸ್ಸ, ಕರಿಸ್ಸಂ ಯೋಜನಾನಯಂ॥
Adhunā cūḷavaggassa, karissaṃ yojanānayaṃ.
೧. ಕಮ್ಮಕ್ಖನ್ಧಕಂ
1. Kammakkhandhakaṃ
೧. ತಜ್ಜನೀಯಕಮ್ಮಕಥಾ
1. Tajjanīyakammakathā
೧. ಚೂಳವಗ್ಗಸ್ಸ ಪಠಮೇ ಕಮ್ಮಕ್ಖನ್ಧಕೇ ಏವಮತ್ಥೋ ವೇದಿತಬ್ಬೋತಿ ಯೋಜನಾ। ‘‘ಚೂಳವಗ್ಗಸ್ಸಾ’’ತಿ ಪದಂ ‘‘ಕಮ್ಮಕ್ಖನ್ಧಕೇ’’ತಿ ಪದೇ ಅವಯವಿಸಮ್ಬನ್ಧೋ। ತಾವಾತಿ ಪಾರಿವಾಸಿಕಕ್ಖನ್ಧಕಾದಿತೋ , ಪಾರಿವಾಸಿಕ್ಖನ್ಧಕಾದೀನಂ ವಾ ಪಠಮಂ। ಚೇವಸದ್ದೋ ಚ ಚಸದ್ದೋ ಚ ‘‘ಪಣ್ಡುಕಲೋಹಿತಕಾ’’ತಿ ಪದಸ್ಸ ಅಸಮಾಹಾರದ್ವನ್ದವಾಕ್ಯಂ ದೀಪೇನ್ತಿ। ನಿಸ್ಸಯಾನಂ ನಾಮಂ ನಿಸ್ಸಿತೇಸು ಉಪಚಾರವಸೇನ ತೇಸಂ ಸದ್ಧಿವಿಹಾರಿಕಅನ್ತೇವಾಸಿಕಾಪಿ ಪಣ್ಡುಕಲೋಹಿತಕನಾಮಾಯೇವ ಹೋನ್ತೀತಿ ದಸ್ಸೇನ್ತೋ ಆಹ ‘‘ತೇಸಂ ನಿಸ್ಸಿತಕಾಪೀ’’ತಿಆದಿ। ಪಿಸದ್ದೇನ ಉಪಚಾರತ್ಥಂ ಸಮ್ಪಿಣ್ಡೇತಿ। ‘‘ಸುಟ್ಠು ಬಲವ’’ನ್ತಿ ಇಮಿನಾ ಬಲವಾಬಲವನ್ತಿ ದ್ವಿನ್ನಂ ಸದ್ದಾನಂ ಪರಿಯಾಯಭಾವೇನ ವುತ್ತತ್ತಾ ಅತಿಸಯತ್ಥೋತಿ ದಸ್ಸೇತಿ। ‘‘ಬಲವಬಲವ’’ನ್ತಿ ವತ್ತಬ್ಬೇ ವಾಚಾಸಿಲಿಟ್ಠವಸೇನ ದೀಘಂ ಕತ್ವಾ ಏವಂ ವುತ್ತಂ। ಪಟಿವದಥಾತಿ ಪಟಿಚ್ಛನ್ನಟ್ಠಾನೇ ಕಥೇಥ। ಇಮಿನಾ ಪಟಿಮನ್ತೇಥಾತಿ ಏತ್ಥ ಮನ್ತಧಾತುಯಾ ಗುತ್ತಭಾಸನತ್ಥಂ ದಸ್ಸೇತಿ। ಅತ್ಥೇಸು ಕರಣಭಾಸನಕಿಚ್ಚೇಸು ಅಲಂ ಸಮತ್ಥಾತಿ ಅಲಮತ್ಥಾ, ತೇಸಂ ವಿಸೇಸೇನಾತಿ ಅಲಮತ್ಥತರಾತಿ ದಸ್ಸೇನ್ತೋ ಆಹ ‘‘ಸಮತ್ಥತರಾ’’ತಿ।
1. Cūḷavaggassa paṭhame kammakkhandhake evamattho veditabboti yojanā. ‘‘Cūḷavaggassā’’ti padaṃ ‘‘kammakkhandhake’’ti pade avayavisambandho. Tāvāti pārivāsikakkhandhakādito , pārivāsikkhandhakādīnaṃ vā paṭhamaṃ. Cevasaddo ca casaddo ca ‘‘paṇḍukalohitakā’’ti padassa asamāhāradvandavākyaṃ dīpenti. Nissayānaṃ nāmaṃ nissitesu upacāravasena tesaṃ saddhivihārikaantevāsikāpi paṇḍukalohitakanāmāyeva hontīti dassento āha ‘‘tesaṃ nissitakāpī’’tiādi. Pisaddena upacāratthaṃ sampiṇḍeti. ‘‘Suṭṭhu balava’’nti iminā balavābalavanti dvinnaṃ saddānaṃ pariyāyabhāvena vuttattā atisayatthoti dasseti. ‘‘Balavabalava’’nti vattabbe vācāsiliṭṭhavasena dīghaṃ katvā evaṃ vuttaṃ. Paṭivadathāti paṭicchannaṭṭhāne kathetha. Iminā paṭimantethāti ettha mantadhātuyā guttabhāsanatthaṃ dasseti. Atthesu karaṇabhāsanakiccesu alaṃ samatthāti alamatthā, tesaṃ visesenāti alamatthatarāti dassento āha ‘‘samatthatarā’’ti.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಚೂಳವಗ್ಗಪಾಳಿ • Cūḷavaggapāḷi / ೧. ತಜ್ಜನೀಯಕಮ್ಮಂ • 1. Tajjanīyakammaṃ
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಚೂಳವಗ್ಗ-ಅಟ್ಠಕಥಾ • Cūḷavagga-aṭṭhakathā / ತಜ್ಜನೀಯಕಮ್ಮಕಥಾ • Tajjanīyakammakathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ತಜ್ಜನೀಯಕಮ್ಮಕಥಾವಣ್ಣನಾ • Tajjanīyakammakathāvaṇṇanā
