| Library / Tipiṭaka / திபிடக • Tipiṭaka / சூளவக்³க³பாளி • Cūḷavaggapāḷi |
நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ
Namo tassa bhagavato arahato sammāsambuddhassa
வினயபிடகே
Vinayapiṭake
சூளவக்³க³பாளி
Cūḷavaggapāḷi
1. கம்மக்க²ந்த⁴கங்
1. Kammakkhandhakaṃ
1. தஜ்ஜனீயகம்மங்
1. Tajjanīyakammaṃ
1. தேன ஸமயேன பு³த்³தோ⁴ ப⁴க³வா ஸாவத்தி²யங் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன பண்டு³கலோஹிதகா பி⁴க்கூ² அத்தனா ப⁴ண்ட³னகாரகா கலஹகாரகா விவாத³காரகா ப⁴ஸ்ஸகாரகா ஸங்கே⁴ அதி⁴கரணகாரகா, யேபி சஞ்ஞே பி⁴க்கூ² ப⁴ண்ட³னகாரகா கலஹகாரகா விவாத³காரகா ப⁴ஸ்ஸகாரகா ஸங்கே⁴ அதி⁴கரணகாரகா தே உபஸங்கமித்வா ஏவங் வத³ந்தி – ‘‘மா கோ² தும்ஹே, ஆயஸ்மந்தோ, ஏஸோ அஜேஸி. ப³லவாப³லவங் படிமந்தேத². தும்ஹே தேன பண்டி³ததரா ச ப்³யத்ததரா ச ப³ஹுஸ்ஸுததரா ச அலமத்ததரா ச 1. மா சஸ்ஸ பா⁴யித்த². மயம்பி தும்ஹாகங் பக்கா² ப⁴விஸ்ஸாமா’’தி. தேன அனுப்பன்னானி சேவ ப⁴ண்ட³னானி உப்பஜ்ஜந்தி உப்பன்னானி ச ப⁴ண்ட³னானி பி⁴ய்யோபா⁴வாய வேபுல்லாய ஸங்வத்தந்தி. யே தே பி⁴க்கூ² அப்பிச்சா²…பே॰… தே உஜ்ஜா²யந்தி கி²ய்யந்தி விபாசெந்தி – ‘‘கத²ஞ்ஹி நாம பண்டு³கலோஹிதகா பி⁴க்கூ² அத்தனா ப⁴ண்ட³னகாரகா கலஹகாரகா விவாத³காரகா ப⁴ஸ்ஸகாரகா ஸங்கே⁴ அதி⁴கரணகாரகா, யேபி சஞ்ஞே பி⁴க்கூ² ப⁴ண்ட³னகாரகா கலஹகாரகா விவாத³காரகா ப⁴ஸ்ஸகாரகா ஸங்கே⁴ அதி⁴கரணகாரகா தே உபஸங்கமித்வா ஏவங் வக்க²ந்தி – ‘மா கோ² தும்ஹே, ஆயஸ்மந்தோ, ஏஸோ அஜேஸி. ப³லவாப³லவங் படிமந்தேத². தும்ஹே தேன பண்டி³ததரா ச ப்³யத்ததரா ச ப³ஹுஸ்ஸுததரா ச அலமத்ததரா ச. மா சஸ்ஸ பா⁴யித்த². மயம்பி தும்ஹாகங் பக்கா² ப⁴விஸ்ஸாமா’தி. தேன அனுப்பன்னானி சேவ ப⁴ண்ட³னானி உப்பஜ்ஜந்தி உப்பன்னானி ச ப⁴ண்ட³னானி பி⁴ய்யோபா⁴வாய வேபுல்லாய ஸங்வத்தந்தீ’’தி.
1. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena paṇḍukalohitakā bhikkhū attanā bhaṇḍanakārakā kalahakārakā vivādakārakā bhassakārakā saṅghe adhikaraṇakārakā, yepi caññe bhikkhū bhaṇḍanakārakā kalahakārakā vivādakārakā bhassakārakā saṅghe adhikaraṇakārakā te upasaṅkamitvā evaṃ vadanti – ‘‘mā kho tumhe, āyasmanto, eso ajesi. Balavābalavaṃ paṭimantetha. Tumhe tena paṇḍitatarā ca byattatarā ca bahussutatarā ca alamattatarā ca 2. Mā cassa bhāyittha. Mayampi tumhākaṃ pakkhā bhavissāmā’’ti. Tena anuppannāni ceva bhaṇḍanāni uppajjanti uppannāni ca bhaṇḍanāni bhiyyobhāvāya vepullāya saṃvattanti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma paṇḍukalohitakā bhikkhū attanā bhaṇḍanakārakā kalahakārakā vivādakārakā bhassakārakā saṅghe adhikaraṇakārakā, yepi caññe bhikkhū bhaṇḍanakārakā kalahakārakā vivādakārakā bhassakārakā saṅghe adhikaraṇakārakā te upasaṅkamitvā evaṃ vakkhanti – ‘mā kho tumhe, āyasmanto, eso ajesi. Balavābalavaṃ paṭimantetha. Tumhe tena paṇḍitatarā ca byattatarā ca bahussutatarā ca alamattatarā ca. Mā cassa bhāyittha. Mayampi tumhākaṃ pakkhā bhavissāmā’ti. Tena anuppannāni ceva bhaṇḍanāni uppajjanti uppannāni ca bhaṇḍanāni bhiyyobhāvāya vepullāya saṃvattantī’’ti.
2. அத² கோ² தே பி⁴க்கூ² ப⁴க³வதோ ஏதமத்த²ங் ஆரோசேஸுங். அத² கோ² ப⁴க³வா ஏதஸ்மிங் நிதா³னே ஏதஸ்மிங் பகரணே பி⁴க்கு²ஸங்க⁴ங் ஸன்னிபாதாபெத்வா பி⁴க்கூ² படிபுச்சி² – ‘‘ஸச்சங் கிர, பி⁴க்க²வே, பண்டு³கலோஹிதகா பி⁴க்கூ² அத்தனா ப⁴ண்ட³னகாரகா கலஹகாரகா விவாத³காரகா ப⁴ஸ்ஸகாரகா ஸங்கே⁴ அதி⁴கரணகாரகா, யேபி சஞ்ஞே பி⁴க்கூ² ப⁴ண்ட³னகாரகா கலஹகாரகா விவாத³காரகா ப⁴ஸ்ஸகாரகா ஸங்கே⁴ அதி⁴கரணகாரகா தே உபஸங்கமித்வா ஏவங் வத³ந்தி – ‘மா கோ² தும்ஹே, ஆயஸ்மந்தோ, ஏஸோ அஜேஸி. ப³லவாப³லவங் படிமந்தேத². தும்ஹே தேன பண்டி³ததரா ச ப்³யத்ததரா ச ப³ஹுஸ்ஸுததரா ச அலமத்ததரா ச. மா சஸ்ஸ பா⁴யித்த². மயம்பி தும்ஹாகங் பக்கா² ப⁴விஸ்ஸாமா’தி. தேன அனுப்பன்னானி சேவ ப⁴ண்ட³னானி உப்பஜ்ஜந்தி, உப்பன்னானி ச ப⁴ண்ட³னானி பி⁴ய்யோபா⁴வாய வேபுல்லாய ஸங்வத்தந்தீ’’தி? ‘‘ஸச்சங் ப⁴க³வா’’தி. விக³ரஹி பு³த்³தோ⁴ ப⁴க³வா – ‘‘அனநுச்ச²விகங், பி⁴க்க²வே, தேஸங் மோக⁴புரிஸானங் அனநுலோமிகங் அப்பதிரூபங் அஸ்ஸாமணகங் அகப்பியங் அகரணீயங். கத²ஞ்ஹி நாம தே, பி⁴க்க²வே, மோக⁴புரிஸா அத்தனா ப⁴ண்ட³னகாரகா…பே॰… ஸங்கே⁴ அதி⁴கரணகாரகா, யேபி சஞ்ஞே பி⁴க்கூ² ப⁴ண்ட³னகாரகா…பே॰… ஸங்கே⁴ அதி⁴கரணகாரகா தே உபஸங்கமித்வா ஏவங் வக்க²ந்தி – ‘மா கோ² தும்ஹே, ஆயஸ்மந்தோ, ஏஸோ அஜேஸி. ப³லவாப³லவங் படிமந்தேத². தும்ஹே தேன பண்டி³ததரா ச ப்³யத்ததரா ச ப³ஹுஸ்ஸுததரா ச அலமத்ததரா ச. மா சஸ்ஸ பா⁴யித்த². மயம்பி தும்ஹாகங் பக்கா² ப⁴விஸ்ஸாமா’தி? தேன அனுப்பன்னானி சேவ ப⁴ண்ட³னானி உப்பஜ்ஜந்தி, உப்பன்னானி ச ப⁴ண்ட³னானி பி⁴ய்யோபா⁴வாய வேபுல்லாய ஸங்வத்தந்தி. நேதங், பி⁴க்க²வே, அப்பஸன்னானங் வா பஸாதா³ய பஸன்னானங் வா பி⁴ய்யோபா⁴வாய. அத² க்²வேதங், பி⁴க்க²வே, அப்பஸன்னானஞ்சேவ அப்பஸாதா³ய பஸன்னானஞ்ச ஏகச்சானங் அஞ்ஞத²த்தாயா’’தி.
2. Atha kho te bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā bhikkhū paṭipucchi – ‘‘saccaṃ kira, bhikkhave, paṇḍukalohitakā bhikkhū attanā bhaṇḍanakārakā kalahakārakā vivādakārakā bhassakārakā saṅghe adhikaraṇakārakā, yepi caññe bhikkhū bhaṇḍanakārakā kalahakārakā vivādakārakā bhassakārakā saṅghe adhikaraṇakārakā te upasaṅkamitvā evaṃ vadanti – ‘mā kho tumhe, āyasmanto, eso ajesi. Balavābalavaṃ paṭimantetha. Tumhe tena paṇḍitatarā ca byattatarā ca bahussutatarā ca alamattatarā ca. Mā cassa bhāyittha. Mayampi tumhākaṃ pakkhā bhavissāmā’ti. Tena anuppannāni ceva bhaṇḍanāni uppajjanti, uppannāni ca bhaṇḍanāni bhiyyobhāvāya vepullāya saṃvattantī’’ti? ‘‘Saccaṃ bhagavā’’ti. Vigarahi buddho bhagavā – ‘‘ananucchavikaṃ, bhikkhave, tesaṃ moghapurisānaṃ ananulomikaṃ appatirūpaṃ assāmaṇakaṃ akappiyaṃ akaraṇīyaṃ. Kathañhi nāma te, bhikkhave, moghapurisā attanā bhaṇḍanakārakā…pe… saṅghe adhikaraṇakārakā, yepi caññe bhikkhū bhaṇḍanakārakā…pe… saṅghe adhikaraṇakārakā te upasaṅkamitvā evaṃ vakkhanti – ‘mā kho tumhe, āyasmanto, eso ajesi. Balavābalavaṃ paṭimantetha. Tumhe tena paṇḍitatarā ca byattatarā ca bahussutatarā ca alamattatarā ca. Mā cassa bhāyittha. Mayampi tumhākaṃ pakkhā bhavissāmā’ti? Tena anuppannāni ceva bhaṇḍanāni uppajjanti, uppannāni ca bhaṇḍanāni bhiyyobhāvāya vepullāya saṃvattanti. Netaṃ, bhikkhave, appasannānaṃ vā pasādāya pasannānaṃ vā bhiyyobhāvāya. Atha khvetaṃ, bhikkhave, appasannānañceva appasādāya pasannānañca ekaccānaṃ aññathattāyā’’ti.
அத² கோ² ப⁴க³வா தே 3 பி⁴க்கூ² அனேகபரியாயேன விக³ரஹித்வா து³ப்³ப⁴ரதாய து³ப்போஸதாய மஹிச்ச²தாய அஸந்துட்டி²தாய 4 ஸங்க³ணிகாய கோஸஜ்ஜஸ்ஸ அவண்ணங் பா⁴ஸித்வா அனேகபரியாயேன ஸுப⁴ரதாய ஸுபோஸதாய அப்பிச்ச²ஸ்ஸ ஸந்துட்ட²ஸ்ஸ ஸல்லேக²ஸ்ஸ து⁴தஸ்ஸ பாஸாதி³கஸ்ஸ அபசயஸ்ஸ வீரியாரம்ப⁴ஸ்ஸ 5 வண்ணங் பா⁴ஸித்வா பி⁴க்கூ²னங் தத³னுச்ச²விகங் தத³னுலோமிகங் த⁴ம்மிங் கத²ங் கத்வா பி⁴க்கூ² ஆமந்தேஸி – ‘‘தேன ஹி, பி⁴க்க²வே, ஸங்கோ⁴ பண்டு³கலோஹிதகானங் பி⁴க்கூ²னங் தஜ்ஜனீயகம்மங் கரோது. ஏவஞ்ச பன, பி⁴க்க²வே, காதப்³ப³ங். பட²மங் பண்டு³கலோஹிதகா பி⁴க்கூ² சோதே³தப்³பா³, சோதெ³த்வா ஸாரேதப்³பா³, ஸாரெத்வா ஆபத்திங் 6 ஆரோபேதப்³பா³, ஆபத்திங் ஆரோபெத்வா ப்³யத்தேன பி⁴க்கு²னா படிப³லேன ஸங்கோ⁴ ஞாபேதப்³போ³ –
Atha kho bhagavā te 7 bhikkhū anekapariyāyena vigarahitvā dubbharatāya dupposatāya mahicchatāya asantuṭṭhitāya 8 saṅgaṇikāya kosajjassa avaṇṇaṃ bhāsitvā anekapariyāyena subharatāya suposatāya appicchassa santuṭṭhassa sallekhassa dhutassa pāsādikassa apacayassa vīriyārambhassa 9 vaṇṇaṃ bhāsitvā bhikkhūnaṃ tadanucchavikaṃ tadanulomikaṃ dhammiṃ kathaṃ katvā bhikkhū āmantesi – ‘‘tena hi, bhikkhave, saṅgho paṇḍukalohitakānaṃ bhikkhūnaṃ tajjanīyakammaṃ karotu. Evañca pana, bhikkhave, kātabbaṃ. Paṭhamaṃ paṇḍukalohitakā bhikkhū codetabbā, codetvā sāretabbā, sāretvā āpattiṃ 10 āropetabbā, āpattiṃ āropetvā byattena bhikkhunā paṭibalena saṅgho ñāpetabbo –
3. ‘‘ஸுணாது மே, ப⁴ந்தே, ஸங்கோ⁴. இமே பண்டு³கலோஹிதகா பி⁴க்கூ² அத்தனா ப⁴ண்ட³னகாரகா கலஹகாரகா விவாத³காரகா ப⁴ஸ்ஸகாரகா ஸங்கே⁴ அதி⁴கரணகாரகா, யேபி சஞ்ஞே பி⁴க்கூ² ப⁴ண்ட³னகாரகா கலஹகாரகா விவாத³காரகா ப⁴ஸ்ஸகாரகா ஸங்கே⁴ அதி⁴கரணகாரகா தே உபஸங்கமித்வா ஏவங் வத³ந்தி – ‘மா கோ² தும்ஹே, ஆயஸ்மந்தோ, ஏஸோ அஜேஸி. ப³லவாப³லவங் படிமந்தேத². தும்ஹே தேன பண்டி³ததரா ச ப்³யத்ததரா ச ப³ஹுஸ்ஸுததரா ச அலமத்ததரா ச. மா சஸ்ஸ பா⁴யித்த². மயம்பி தும்ஹாகங் பக்கா² ப⁴விஸ்ஸாமா’தி. தேன அனுப்பன்னானி சேவ ப⁴ண்ட³னானி உப்பஜ்ஜந்தி, உப்பன்னானி ச ப⁴ண்ட³னானி பி⁴ய்யோபா⁴வாய வேபுல்லாய ஸங்வத்தந்தி. யதி³ ஸங்க⁴ஸ்ஸ பத்தகல்லங், ஸங்கோ⁴ பண்டு³கலோஹிதகானங் பி⁴க்கூ²னங் தஜ்ஜனீயகம்மங் கரெய்ய. ஏஸா ஞத்தி.
3. ‘‘Suṇātu me, bhante, saṅgho. Ime paṇḍukalohitakā bhikkhū attanā bhaṇḍanakārakā kalahakārakā vivādakārakā bhassakārakā saṅghe adhikaraṇakārakā, yepi caññe bhikkhū bhaṇḍanakārakā kalahakārakā vivādakārakā bhassakārakā saṅghe adhikaraṇakārakā te upasaṅkamitvā evaṃ vadanti – ‘mā kho tumhe, āyasmanto, eso ajesi. Balavābalavaṃ paṭimantetha. Tumhe tena paṇḍitatarā ca byattatarā ca bahussutatarā ca alamattatarā ca. Mā cassa bhāyittha. Mayampi tumhākaṃ pakkhā bhavissāmā’ti. Tena anuppannāni ceva bhaṇḍanāni uppajjanti, uppannāni ca bhaṇḍanāni bhiyyobhāvāya vepullāya saṃvattanti. Yadi saṅghassa pattakallaṃ, saṅgho paṇḍukalohitakānaṃ bhikkhūnaṃ tajjanīyakammaṃ kareyya. Esā ñatti.
‘‘ஸுணாது மே, ப⁴ந்தே, ஸங்கோ⁴. இமே பண்டு³கலோஹிதகா பி⁴க்கூ² அத்தனா ப⁴ண்ட³னகாரகா…பே॰… ஸங்கே⁴ அதி⁴கரணகாரகா, யேபி சஞ்ஞே பி⁴க்கூ² ப⁴ண்ட³னகாரகா…பே॰… ஸங்கே⁴ அதி⁴கரணகாரகா தே உபஸங்கமித்வா ஏவங் வத³ந்தி – ‘மா கோ² தும்ஹே, ஆயஸ்மந்தோ, ஏஸோ அஜேஸி. ப³லவாப³லவங் படிமந்தேத². தும்ஹே தேன பண்டி³ததரா ச ப்³யத்ததரா ச ப³ஹுஸ்ஸுததரா ச அலமத்ததரா ச. மா சஸ்ஸ பா⁴யித்த². மயம்பி தும்ஹாகங் பக்கா² ப⁴விஸ்ஸாமா’தி. தேன அனுப்பன்னானி சேவ ப⁴ண்ட³னானி உப்பஜ்ஜந்தி, உப்பன்னானி ச ப⁴ண்ட³னானி பி⁴ய்யோபா⁴வாய வேபுல்லாய ஸங்வத்தந்தி. ஸங்கோ⁴ பண்டு³கலோஹிதகானங் பி⁴க்கூ²னங் தஜ்ஜனீயகம்மங் கரோதி. யஸ்ஸாயஸ்மதோ க²மதி பண்டு³கலோஹிதகானங் பி⁴க்கூ²னங் தஜ்ஜனீயஸ்ஸ கம்மஸ்ஸ கரணங், ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.
‘‘Suṇātu me, bhante, saṅgho. Ime paṇḍukalohitakā bhikkhū attanā bhaṇḍanakārakā…pe… saṅghe adhikaraṇakārakā, yepi caññe bhikkhū bhaṇḍanakārakā…pe… saṅghe adhikaraṇakārakā te upasaṅkamitvā evaṃ vadanti – ‘mā kho tumhe, āyasmanto, eso ajesi. Balavābalavaṃ paṭimantetha. Tumhe tena paṇḍitatarā ca byattatarā ca bahussutatarā ca alamattatarā ca. Mā cassa bhāyittha. Mayampi tumhākaṃ pakkhā bhavissāmā’ti. Tena anuppannāni ceva bhaṇḍanāni uppajjanti, uppannāni ca bhaṇḍanāni bhiyyobhāvāya vepullāya saṃvattanti. Saṅgho paṇḍukalohitakānaṃ bhikkhūnaṃ tajjanīyakammaṃ karoti. Yassāyasmato khamati paṇḍukalohitakānaṃ bhikkhūnaṃ tajjanīyassa kammassa karaṇaṃ, so tuṇhassa; yassa nakkhamati, so bhāseyya.
‘‘து³தியம்பி ஏதமத்த²ங் வதா³மி – ஸுணாது மே, ப⁴ந்தே, ஸங்கோ⁴. இமே பண்டு³கலோஹிதகா பி⁴க்கூ² அத்தனா ப⁴ண்ட³னகாரகா…பே॰… ஸங்கே⁴ அதி⁴கரணகாரகா, யேபி சஞ்ஞே பி⁴க்கூ² ப⁴ண்ட³னகாரகா…பே॰… ஸங்கே⁴ அதி⁴கரணகாரகா தே உபஸங்கமித்வா ஏவங் வத³ந்தி – ‘மா கோ² தும்ஹே , ஆயஸ்மந்தோ, ஏஸோ அஜேஸி. ப³லவாப³லவங் படிமந்தேத². தும்ஹே தேன பண்டி³ததரா ச ப்³யத்ததரா ச ப³ஹுஸ்ஸுததரா ச அலமத்ததரா ச. மா சஸ்ஸ பா⁴யித்த². மயம்பி தும்ஹாகங் பக்கா² ப⁴விஸ்ஸாமா’தி. தேன அனுப்பன்னானி சேவ ப⁴ண்ட³னானி உப்பஜ்ஜந்தி, உப்பன்னானி ச ப⁴ண்ட³னானி பி⁴ய்யோபா⁴வாய வேபுல்லாய ஸங்வத்தந்தி. ஸங்கோ⁴ பண்டு³கலோஹிதகானங் பி⁴க்கூ²னங் தஜ்ஜனீயகம்மங் கரோதி. யஸ்ஸாயஸ்மதோ க²மதி பண்டு³கலோஹிதகானங் பி⁴க்கூ²னங் தஜ்ஜனீயஸ்ஸ கம்மஸ்ஸ கரணங், ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.
‘‘Dutiyampi etamatthaṃ vadāmi – suṇātu me, bhante, saṅgho. Ime paṇḍukalohitakā bhikkhū attanā bhaṇḍanakārakā…pe… saṅghe adhikaraṇakārakā, yepi caññe bhikkhū bhaṇḍanakārakā…pe… saṅghe adhikaraṇakārakā te upasaṅkamitvā evaṃ vadanti – ‘mā kho tumhe , āyasmanto, eso ajesi. Balavābalavaṃ paṭimantetha. Tumhe tena paṇḍitatarā ca byattatarā ca bahussutatarā ca alamattatarā ca. Mā cassa bhāyittha. Mayampi tumhākaṃ pakkhā bhavissāmā’ti. Tena anuppannāni ceva bhaṇḍanāni uppajjanti, uppannāni ca bhaṇḍanāni bhiyyobhāvāya vepullāya saṃvattanti. Saṅgho paṇḍukalohitakānaṃ bhikkhūnaṃ tajjanīyakammaṃ karoti. Yassāyasmato khamati paṇḍukalohitakānaṃ bhikkhūnaṃ tajjanīyassa kammassa karaṇaṃ, so tuṇhassa; yassa nakkhamati, so bhāseyya.
‘‘ததியம்பி ஏதமத்த²ங் வதா³மி – ஸுணாது மே, ப⁴ந்தே, ஸங்கோ⁴ . இமே பண்டு³கலோஹிதகா பி⁴க்கூ² அத்தனா ப⁴ண்ட³னகாரகா…பே॰… ஸங்கே⁴ அதி⁴கரணகாரகா, யேபி சஞ்ஞே பி⁴க்கூ² ப⁴ண்ட³னகாரகா…பே॰… ஸங்கே⁴ அதி⁴கரணகாரகா தே உபஸங்கமித்வா ஏவங் வத³ந்தி – ‘மா கோ² தும்ஹே, ஆயஸ்மந்தோ, ஏஸோ அஜேஸி. ப³லவாப³லவங் படிமந்தேத². தும்ஹே தேன பண்டி³ததரா ச ப்³யத்ததரா ச ப³ஹுஸ்ஸுததரா ச அலமத்ததரா ச. மா சஸ்ஸ பா⁴யித்த². மயம்பி தும்ஹாகங் பக்கா² ப⁴விஸ்ஸாமா’தி. தேன அனுப்பன்னானி சேவ ப⁴ண்ட³னானி உப்பஜ்ஜந்தி, உப்பன்னானி ச ப⁴ண்ட³னானி பி⁴ய்யோபா⁴வாய வேபுல்லாய ஸங்வத்தந்தி. ஸங்கோ⁴ பண்டு³கலோஹிதகானங் பி⁴க்கூ²னங் தஜ்ஜனீயகம்மங் கரோதி. யஸ்ஸாயஸ்மதோ க²மதி பண்டு³கலோஹிதகானங் பி⁴க்கூ²னங் தஜ்ஜனீயஸ்ஸ கம்மஸ்ஸ கரணங், ஸோ துண்ஹஸ்ஸ; யஸ்ஸ நக்க²மதி, ஸோ பா⁴ஸெய்ய.
‘‘Tatiyampi etamatthaṃ vadāmi – suṇātu me, bhante, saṅgho . Ime paṇḍukalohitakā bhikkhū attanā bhaṇḍanakārakā…pe… saṅghe adhikaraṇakārakā, yepi caññe bhikkhū bhaṇḍanakārakā…pe… saṅghe adhikaraṇakārakā te upasaṅkamitvā evaṃ vadanti – ‘mā kho tumhe, āyasmanto, eso ajesi. Balavābalavaṃ paṭimantetha. Tumhe tena paṇḍitatarā ca byattatarā ca bahussutatarā ca alamattatarā ca. Mā cassa bhāyittha. Mayampi tumhākaṃ pakkhā bhavissāmā’ti. Tena anuppannāni ceva bhaṇḍanāni uppajjanti, uppannāni ca bhaṇḍanāni bhiyyobhāvāya vepullāya saṃvattanti. Saṅgho paṇḍukalohitakānaṃ bhikkhūnaṃ tajjanīyakammaṃ karoti. Yassāyasmato khamati paṇḍukalohitakānaṃ bhikkhūnaṃ tajjanīyassa kammassa karaṇaṃ, so tuṇhassa; yassa nakkhamati, so bhāseyya.
‘‘கதங் ஸங்கே⁴ன பண்டு³கலோஹிதகானங் பி⁴க்கூ²னங் தஜ்ஜனீயகம்மங். க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி.
‘‘Kataṃ saṅghena paṇḍukalohitakānaṃ bhikkhūnaṃ tajjanīyakammaṃ. Khamati saṅghassa, tasmā tuṇhī, evametaṃ dhārayāmī’’ti.
Footnotes:
Related texts:
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / சூளவக்³க³-அட்ட²கதா² • Cūḷavagga-aṭṭhakathā / தஜ்ஜனீயகம்மகதா² • Tajjanīyakammakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / தஜ்ஜனீயகம்மகதா²வண்ணனா • Tajjanīyakammakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / தஜ்ஜனீயகம்மகதா²வண்ணனா • Tajjanīyakammakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 1. தஜ்ஜனீயகம்மகதா² • 1. Tajjanīyakammakathā
