၁. တဇ္ဇနီယကမ္မံ

1. Tajjanīyakammaṃ

၁. တေန သမယေန ဗုဒ္ဓော ဘဂဝာ သာဝတ္ထိယံ ဝိဟရတိ ဇေတဝနေ အနာထပိဏ္ဍိကသ္သ အာရာမေ။ တေန ခော ပန သမယေန ပဏ္ဍုကလောဟိတကာ ဘိက္ခူ အတ္တနာ ဘဏ္ဍနကာရကာ ကလဟကာရကာ ဝိဝာဒကာရကာ ဘသ္သကာရကာ သင္ဃေ အဓိကရဏကာရကာ, ယေပိ စညေ ဘိက္ခူ ဘဏ္ဍနကာရကာ ကလဟကာရကာ ဝိဝာဒကာရကာ ဘသ္သကာရကာ သင္ဃေ အဓိကရဏကာရကာ တေ ဥပသင္ကမိတ္ဝာ ဧဝံ ဝဒန္တိ – ‘‘မာ ခော တုမ္ဟေ, အာယသ္မန္တော, ဧသော အဇေသိ။ ဗလဝာဗလဝံ ပဋိမန္တေထ။ တုမ္ဟေ တေန ပဏ္ဍိတတရာ စ ဗ္ယတ္တတရာ စ ဗဟုသ္သုတတရာ စ အလမတ္တတရာ စ ¹။ မာ စသ္သ ဘာယိတ္ထ။ မယမ္ပိ တုမ္ဟာကံ ပက္ခာ ဘဝိသ္သာမာ’’တိ။ တေန အနုပ္ပန္နာနိ စေဝ ဘဏ္ဍနာနိ ဥပ္ပဇ္ဇန္တိ ဥပ္ပန္နာနိ စ ဘဏ္ဍနာနိ ဘိယ္ယောဘာဝာယ ဝေပုလ္လာယ သံဝတ္တန္တိ။ ယေ တေ ဘိက္ခူ အပ္ပိစ္ဆာ။ပေ.။ တေ ဥဇ္ဈာယန္တိ ခိယ္ယန္တိ ဝိပာစေန္တိ – ‘‘ကထဉ္ဟိ နာမ ပဏ္ဍုကလောဟိတကာ ဘိက္ခူ အတ္တနာ ဘဏ္ဍနကာရကာ ကလဟကာရကာ ဝိဝာဒကာရကာ ဘသ္သကာရကာ သင္ဃေ အဓိကရဏကာရကာ, ယေပိ စညေ ဘိက္ခူ ဘဏ္ဍနကာရကာ ကလဟကာရကာ ဝိဝာဒကာရကာ ဘသ္သကာရကာ သင္ဃေ အဓိကရဏကာရကာ တေ ဥပသင္ကမိတ္ဝာ ဧဝံ ဝက္ခန္တိ – ‘မာ ခော တုမ္ဟေ, အာယသ္မန္တော, ဧသော အဇေသိ။ ဗလဝာဗလဝံ ပဋိမန္တေထ။ တုမ္ဟေ တေန ပဏ္ဍိတတရာ စ ဗ္ယတ္တတရာ စ ဗဟုသ္သုတတရာ စ အလမတ္တတရာ စ။ မာ စသ္သ ဘာယိတ္ထ။ မယမ္ပိ တုမ္ဟာကံ ပက္ခာ ဘဝိသ္သာမာ’တိ။ တေန အနုပ္ပန္နာနိ စေဝ ဘဏ္ဍနာနိ ဥပ္ပဇ္ဇန္တိ ဥပ္ပန္နာနိ စ ဘဏ္ဍနာနိ ဘိယ္ယောဘာဝာယ ဝေပုလ္လာယ သံဝတ္တန္တီ’’တိ။

1. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena paṇḍukalohitakā bhikkhū attanā bhaṇḍanakārakā kalahakārakā vivādakārakā bhassakārakā saṅghe adhikaraṇakārakā, yepi caññe bhikkhū bhaṇḍanakārakā kalahakārakā vivādakārakā bhassakārakā saṅghe adhikaraṇakārakā te upasaṅkamitvā evaṃ vadanti – ‘‘mā kho tumhe, āyasmanto, eso ajesi. Balavābalavaṃ paṭimantetha. Tumhe tena paṇḍitatarā ca byattatarā ca bahussutatarā ca alamattatarā ca ². Mā cassa bhāyittha. Mayampi tumhākaṃ pakkhā bhavissāmā’’ti. Tena anuppannāni ceva bhaṇḍanāni uppajjanti uppannāni ca bhaṇḍanāni bhiyyobhāvāya vepullāya saṃvattanti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma paṇḍukalohitakā bhikkhū attanā bhaṇḍanakārakā kalahakārakā vivādakārakā bhassakārakā saṅghe adhikaraṇakārakā, yepi caññe bhikkhū bhaṇḍanakārakā kalahakārakā vivādakārakā bhassakārakā saṅghe adhikaraṇakārakā te upasaṅkamitvā evaṃ vakkhanti – ‘mā kho tumhe, āyasmanto, eso ajesi. Balavābalavaṃ paṭimantetha. Tumhe tena paṇḍitatarā ca byattatarā ca bahussutatarā ca alamattatarā ca. Mā cassa bhāyittha. Mayampi tumhākaṃ pakkhā bhavissāmā’ti. Tena anuppannāni ceva bhaṇḍanāni uppajjanti uppannāni ca bhaṇḍanāni bhiyyobhāvāya vepullāya saṃvattantī’’ti.

၂. အထ ခော တေ ဘိက္ခူ ဘဂဝတော ဧတမတ္ထံ အာရောစေသုံ။ အထ ခော ဘဂဝာ ဧတသ္မိံ နိဒာနေ ဧတသ္မိံ ပကရဏေ ဘိက္ခုသင္ဃံ သန္နိပာတာပေတ္ဝာ ဘိက္ခူ ပဋိပုစ္ဆိ – ‘‘သစ္စံ ကိရ, ဘိက္ခဝေ, ပဏ္ဍုကလောဟိတကာ ဘိက္ခူ အတ္တနာ ဘဏ္ဍနကာရကာ ကလဟကာရကာ ဝိဝာဒကာရကာ ဘသ္သကာရကာ သင္ဃေ အဓိကရဏကာရကာ, ယေပိ စညေ ဘိက္ခူ ဘဏ္ဍနကာရကာ ကလဟကာရကာ ဝိဝာဒကာရကာ ဘသ္သကာရကာ သင္ဃေ အဓိကရဏကာရကာ တေ ဥပသင္ကမိတ္ဝာ ဧဝံ ဝဒန္တိ – ‘မာ ခော တုမ္ဟေ, အာယသ္မန္တော, ဧသော အဇေသိ။ ဗလဝာဗလဝံ ပဋိမန္တေထ။ တုမ္ဟေ တေန ပဏ္ဍိတတရာ စ ဗ္ယတ္တတရာ စ ဗဟုသ္သုတတရာ စ အလမတ္တတရာ စ။ မာ စသ္သ ဘာယိတ္ထ။ မယမ္ပိ တုမ္ဟာကံ ပက္ခာ ဘဝိသ္သာမာ’တိ။ တေန အနုပ္ပန္နာနိ စေဝ ဘဏ္ဍနာနိ ဥပ္ပဇ္ဇန္တိ, ဥပ္ပန္နာနိ စ ဘဏ္ဍနာနိ ဘိယ္ယောဘာဝာယ ဝေပုလ္လာယ သံဝတ္တန္တီ’’တိ? ‘‘သစ္စံ ဘဂဝာ’’တိ။ ဝိဂရဟိ ဗုဒ္ဓော ဘဂဝာ – ‘‘အနနုစ္ဆဝိကံ, ဘိက္ခဝေ, တေသံ မောဃပုရိသာနံ အနနုလောမိကံ အပ္ပတိရူပံ အသ္သာမဏကံ အကပ္ပိယံ အကရဏီယံ။ ကထဉ္ဟိ နာမ တေ, ဘိက္ခဝေ, မောဃပုရိသာ အတ္တနာ ဘဏ္ဍနကာရကာ။ပေ.။ သင္ဃေ အဓိကရဏကာရကာ, ယေပိ စညေ ဘိက္ခူ ဘဏ္ဍနကာရကာ။ပေ.။ သင္ဃေ အဓိကရဏကာရကာ တေ ဥပသင္ကမိတ္ဝာ ဧဝံ ဝက္ခန္တိ – ‘မာ ခော တုမ္ဟေ, အာယသ္မန္တော, ဧသော အဇေသိ။ ဗလဝာဗလဝံ ပဋိမန္တေထ။ တုမ္ဟေ တေန ပဏ္ဍိတတရာ စ ဗ္ယတ္တတရာ စ ဗဟုသ္သုတတရာ စ အလမတ္တတရာ စ။ မာ စသ္သ ဘာယိတ္ထ။ မယမ္ပိ တုမ္ဟာကံ ပက္ခာ ဘဝိသ္သာမာ’တိ? တေန အနုပ္ပန္နာနိ စေဝ ဘဏ္ဍနာနိ ဥပ္ပဇ္ဇန္တိ, ဥပ္ပန္နာနိ စ ဘဏ္ဍနာနိ ဘိယ္ယောဘာဝာယ ဝေပုလ္လာယ သံဝတ္တန္တိ။ နေတံ, ဘိက္ခဝေ, အပ္ပသန္နာနံ ဝာ ပသာဒာယ ပသန္နာနံ ဝာ ဘိယ္ယောဘာဝာယ။ အထ ခ္ဝေတံ, ဘိက္ခဝေ, အပ္ပသန္နာနဉ္စေဝ အပ္ပသာဒာယ ပသန္နာနဉ္စ ဧကစ္စာနံ အညထတ္တာယာ’’တိ။

2. Atha kho te bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā bhikkhū paṭipucchi – ‘‘saccaṃ kira, bhikkhave, paṇḍukalohitakā bhikkhū attanā bhaṇḍanakārakā kalahakārakā vivādakārakā bhassakārakā saṅghe adhikaraṇakārakā, yepi caññe bhikkhū bhaṇḍanakārakā kalahakārakā vivādakārakā bhassakārakā saṅghe adhikaraṇakārakā te upasaṅkamitvā evaṃ vadanti – ‘mā kho tumhe, āyasmanto, eso ajesi. Balavābalavaṃ paṭimantetha. Tumhe tena paṇḍitatarā ca byattatarā ca bahussutatarā ca alamattatarā ca. Mā cassa bhāyittha. Mayampi tumhākaṃ pakkhā bhavissāmā’ti. Tena anuppannāni ceva bhaṇḍanāni uppajjanti, uppannāni ca bhaṇḍanāni bhiyyobhāvāya vepullāya saṃvattantī’’ti? ‘‘Saccaṃ bhagavā’’ti. Vigarahi buddho bhagavā – ‘‘ananucchavikaṃ, bhikkhave, tesaṃ moghapurisānaṃ ananulomikaṃ appatirūpaṃ assāmaṇakaṃ akappiyaṃ akaraṇīyaṃ. Kathañhi nāma te, bhikkhave, moghapurisā attanā bhaṇḍanakārakā…pe… saṅghe adhikaraṇakārakā, yepi caññe bhikkhū bhaṇḍanakārakā…pe… saṅghe adhikaraṇakārakā te upasaṅkamitvā evaṃ vakkhanti – ‘mā kho tumhe, āyasmanto, eso ajesi. Balavābalavaṃ paṭimantetha. Tumhe tena paṇḍitatarā ca byattatarā ca bahussutatarā ca alamattatarā ca. Mā cassa bhāyittha. Mayampi tumhākaṃ pakkhā bhavissāmā’ti? Tena anuppannāni ceva bhaṇḍanāni uppajjanti, uppannāni ca bhaṇḍanāni bhiyyobhāvāya vepullāya saṃvattanti. Netaṃ, bhikkhave, appasannānaṃ vā pasādāya pasannānaṃ vā bhiyyobhāvāya. Atha khvetaṃ, bhikkhave, appasannānañceva appasādāya pasannānañca ekaccānaṃ aññathattāyā’’ti.

အထ ခော ဘဂဝာ တေ ³ ဘိက္ခူ အနေကပရိယာယေန ဝိဂရဟိတ္ဝာ ဒုဗ္ဘရတာယ ဒုပ္ပောသတာယ မဟိစ္ဆတာယ အသန္တုဋ္ဌိတာယ ⁴ သင္ဂဏိကာယ ကောသဇ္ဇသ္သ အဝဏ္ဏံ ဘာသိတ္ဝာ အနေကပရိယာယေန သုဘရတာယ သုပောသတာယ အပ္ပိစ္ဆသ္သ သန္တုဋ္ဌသ္သ သလ္လေခသ္သ ဓုတသ္သ ပာသာဒိကသ္သ အပစယသ္သ ဝီရိယာရမ္ဘသ္သ ⁵ ဝဏ္ဏံ ဘာသိတ္ဝာ ဘိက္ခူနံ တဒနုစ္ဆဝိကံ တဒနုလောမိကံ ဓမ္မိံ ကထံ ကတ္ဝာ ဘိက္ခူ အာမန္တေသိ – ‘‘တေန ဟိ, ဘိက္ခဝေ, သင္ဃော ပဏ္ဍုကလောဟိတကာနံ ဘိက္ခူနံ တဇ္ဇနီယကမ္မံ ကရောတု။ ဧဝဉ္စ ပန, ဘိက္ခဝေ, ကာတဗ္ဗံ။ ပဌမံ ပဏ္ဍုကလောဟိတကာ ဘိက္ခူ စောဒေတဗ္ဗာ, စောဒေတ္ဝာ သာရေတဗ္ဗာ, သာရေတ္ဝာ အာပတ္တိံ ⁶ အာရောပေတဗ္ဗာ, အာပတ္တိံ အာရောပေတ္ဝာ ဗ္ယတ္တေန ဘိက္ခုနာ ပဋိဗလေန သင္ဃော ဉာပေတဗ္ဗော –

Atha kho bhagavā te ⁷ bhikkhū anekapariyāyena vigarahitvā dubbharatāya dupposatāya mahicchatāya asantuṭṭhitāya ⁸ saṅgaṇikāya kosajjassa avaṇṇaṃ bhāsitvā anekapariyāyena subharatāya suposatāya appicchassa santuṭṭhassa sallekhassa dhutassa pāsādikassa apacayassa vīriyārambhassa ⁹ vaṇṇaṃ bhāsitvā bhikkhūnaṃ tadanucchavikaṃ tadanulomikaṃ dhammiṃ kathaṃ katvā bhikkhū āmantesi – ‘‘tena hi, bhikkhave, saṅgho paṇḍukalohitakānaṃ bhikkhūnaṃ tajjanīyakammaṃ karotu. Evañca pana, bhikkhave, kātabbaṃ. Paṭhamaṃ paṇḍukalohitakā bhikkhū codetabbā, codetvā sāretabbā, sāretvā āpattiṃ ¹⁰ āropetabbā, āpattiṃ āropetvā byattena bhikkhunā paṭibalena saṅgho ñāpetabbo –

၃. ‘‘သုဏာတု မေ, ဘန္တေ, သင္ဃော။ ဣမေ ပဏ္ဍုကလောဟိတကာ ဘိက္ခူ အတ္တနာ ဘဏ္ဍနကာရကာ ကလဟကာရကာ ဝိဝာဒကာရကာ ဘသ္သကာရကာ သင္ဃေ အဓိကရဏကာရကာ, ယေပိ စညေ ဘိက္ခူ ဘဏ္ဍနကာရကာ ကလဟကာရကာ ဝိဝာဒကာရကာ ဘသ္သကာရကာ သင္ဃေ အဓိကရဏကာရကာ တေ ဥပသင္ကမိတ္ဝာ ဧဝံ ဝဒန္တိ – ‘မာ ခော တုမ္ဟေ, အာယသ္မန္တော, ဧသော အဇေသိ။ ဗလဝာဗလဝံ ပဋိမန္တေထ။ တုမ္ဟေ တေန ပဏ္ဍိတတရာ စ ဗ္ယတ္တတရာ စ ဗဟုသ္သုတတရာ စ အလမတ္တတရာ စ။ မာ စသ္သ ဘာယိတ္ထ။ မယမ္ပိ တုမ္ဟာကံ ပက္ခာ ဘဝိသ္သာမာ’တိ။ တေန အနုပ္ပန္နာနိ စေဝ ဘဏ္ဍနာနိ ဥပ္ပဇ္ဇန္တိ, ဥပ္ပန္နာနိ စ ဘဏ္ဍနာနိ ဘိယ္ယောဘာဝာယ ဝေပုလ္လာယ သံဝတ္တန္တိ။ ယဒိ သင္ဃသ္သ ပတ္တကလ္လံ, သင္ဃော ပဏ္ဍုကလောဟိတကာနံ ဘိက္ခူနံ တဇ္ဇနီယကမ္မံ ကရေယ္ယ။ ဧသာ ဉတ္တိ။

3. ‘‘Suṇātu me, bhante, saṅgho. Ime paṇḍukalohitakā bhikkhū attanā bhaṇḍanakārakā kalahakārakā vivādakārakā bhassakārakā saṅghe adhikaraṇakārakā, yepi caññe bhikkhū bhaṇḍanakārakā kalahakārakā vivādakārakā bhassakārakā saṅghe adhikaraṇakārakā te upasaṅkamitvā evaṃ vadanti – ‘mā kho tumhe, āyasmanto, eso ajesi. Balavābalavaṃ paṭimantetha. Tumhe tena paṇḍitatarā ca byattatarā ca bahussutatarā ca alamattatarā ca. Mā cassa bhāyittha. Mayampi tumhākaṃ pakkhā bhavissāmā’ti. Tena anuppannāni ceva bhaṇḍanāni uppajjanti, uppannāni ca bhaṇḍanāni bhiyyobhāvāya vepullāya saṃvattanti. Yadi saṅghassa pattakallaṃ, saṅgho paṇḍukalohitakānaṃ bhikkhūnaṃ tajjanīyakammaṃ kareyya. Esā ñatti.

‘‘သုဏာတု မေ, ဘန္တေ, သင္ဃော။ ဣမေ ပဏ္ဍုကလောဟိတကာ ဘိက္ခူ အတ္တနာ ဘဏ္ဍနကာရကာ။ပေ.။ သင္ဃေ အဓိကရဏကာရကာ, ယေပိ စညေ ဘိက္ခူ ဘဏ္ဍနကာရကာ။ပေ.။ သင္ဃေ အဓိကရဏကာရကာ တေ ဥပသင္ကမိတ္ဝာ ဧဝံ ဝဒန္တိ – ‘မာ ခော တုမ္ဟေ, အာယသ္မန္တော, ဧသော အဇေသိ။ ဗလဝာဗလဝံ ပဋိမန္တေထ။ တုမ္ဟေ တေန ပဏ္ဍိတတရာ စ ဗ္ယတ္တတရာ စ ဗဟုသ္သုတတရာ စ အလမတ္တတရာ စ။ မာ စသ္သ ဘာယိတ္ထ။ မယမ္ပိ တုမ္ဟာကံ ပက္ခာ ဘဝိသ္သာမာ’တိ။ တေန အနုပ္ပန္နာနိ စေဝ ဘဏ္ဍနာနိ ဥပ္ပဇ္ဇန္တိ, ဥပ္ပန္နာနိ စ ဘဏ္ဍနာနိ ဘိယ္ယောဘာဝာယ ဝေပုလ္လာယ သံဝတ္တန္တိ။ သင္ဃော ပဏ္ဍုကလောဟိတကာနံ ဘိက္ခူနံ တဇ္ဇနီယကမ္မံ ကရောတိ။ ယသ္သာယသ္မတော ခမတိ ပဏ္ဍုကလောဟိတကာနံ ဘိက္ခူနံ တဇ္ဇနီယသ္သ ကမ္မသ္သ ကရဏံ, သော တုဏ္ဟသ္သ; ယသ္သ နက္ခမတိ, သော ဘာသေယ္ယ။

‘‘Suṇātu me, bhante, saṅgho. Ime paṇḍukalohitakā bhikkhū attanā bhaṇḍanakārakā…pe… saṅghe adhikaraṇakārakā, yepi caññe bhikkhū bhaṇḍanakārakā…pe… saṅghe adhikaraṇakārakā te upasaṅkamitvā evaṃ vadanti – ‘mā kho tumhe, āyasmanto, eso ajesi. Balavābalavaṃ paṭimantetha. Tumhe tena paṇḍitatarā ca byattatarā ca bahussutatarā ca alamattatarā ca. Mā cassa bhāyittha. Mayampi tumhākaṃ pakkhā bhavissāmā’ti. Tena anuppannāni ceva bhaṇḍanāni uppajjanti, uppannāni ca bhaṇḍanāni bhiyyobhāvāya vepullāya saṃvattanti. Saṅgho paṇḍukalohitakānaṃ bhikkhūnaṃ tajjanīyakammaṃ karoti. Yassāyasmato khamati paṇḍukalohitakānaṃ bhikkhūnaṃ tajjanīyassa kammassa karaṇaṃ, so tuṇhassa; yassa nakkhamati, so bhāseyya.

‘‘ဒုတိယမ္ပိ ဧတမတ္ထံ ဝဒာမိ – သုဏာတု မေ, ဘန္တေ, သင္ဃော။ ဣမေ ပဏ္ဍုကလောဟိတကာ ဘိက္ခူ အတ္တနာ ဘဏ္ဍနကာရကာ။ပေ.။ သင္ဃေ အဓိကရဏကာရကာ, ယေပိ စညေ ဘိက္ခူ ဘဏ္ဍနကာရကာ။ပေ.။ သင္ဃေ အဓိကရဏကာရကာ တေ ဥပသင္ကမိတ္ဝာ ဧဝံ ဝဒန္တိ – ‘မာ ခော တုမ္ဟေ , အာယသ္မန္တော, ဧသော အဇေသိ။ ဗလဝာဗလဝံ ပဋိမန္တေထ။ တုမ္ဟေ တေန ပဏ္ဍိတတရာ စ ဗ္ယတ္တတရာ စ ဗဟုသ္သုတတရာ စ အလမတ္တတရာ စ။ မာ စသ္သ ဘာယိတ္ထ။ မယမ္ပိ တုမ္ဟာကံ ပက္ခာ ဘဝိသ္သာမာ’တိ။ တေန အနုပ္ပန္နာနိ စေဝ ဘဏ္ဍနာနိ ဥပ္ပဇ္ဇန္တိ, ဥပ္ပန္နာနိ စ ဘဏ္ဍနာနိ ဘိယ္ယောဘာဝာယ ဝေပုလ္လာယ သံဝတ္တန္တိ။ သင္ဃော ပဏ္ဍုကလောဟိတကာနံ ဘိက္ခူနံ တဇ္ဇနီယကမ္မံ ကရောတိ။ ယသ္သာယသ္မတော ခမတိ ပဏ္ဍုကလောဟိတကာနံ ဘိက္ခူနံ တဇ္ဇနီယသ္သ ကမ္မသ္သ ကရဏံ, သော တုဏ္ဟသ္သ; ယသ္သ နက္ခမတိ, သော ဘာသေယ္ယ။

‘‘Dutiyampi etamatthaṃ vadāmi – suṇātu me, bhante, saṅgho. Ime paṇḍukalohitakā bhikkhū attanā bhaṇḍanakārakā…pe… saṅghe adhikaraṇakārakā, yepi caññe bhikkhū bhaṇḍanakārakā…pe… saṅghe adhikaraṇakārakā te upasaṅkamitvā evaṃ vadanti – ‘mā kho tumhe , āyasmanto, eso ajesi. Balavābalavaṃ paṭimantetha. Tumhe tena paṇḍitatarā ca byattatarā ca bahussutatarā ca alamattatarā ca. Mā cassa bhāyittha. Mayampi tumhākaṃ pakkhā bhavissāmā’ti. Tena anuppannāni ceva bhaṇḍanāni uppajjanti, uppannāni ca bhaṇḍanāni bhiyyobhāvāya vepullāya saṃvattanti. Saṅgho paṇḍukalohitakānaṃ bhikkhūnaṃ tajjanīyakammaṃ karoti. Yassāyasmato khamati paṇḍukalohitakānaṃ bhikkhūnaṃ tajjanīyassa kammassa karaṇaṃ, so tuṇhassa; yassa nakkhamati, so bhāseyya.

‘‘တတိယမ္ပိ ဧတမတ္ထံ ဝဒာမိ – သုဏာတု မေ, ဘန္တေ, သင္ဃော ။ ဣမေ ပဏ္ဍုကလောဟိတကာ ဘိက္ခူ အတ္တနာ ဘဏ္ဍနကာရကာ။ပေ.။ သင္ဃေ အဓိကရဏကာရကာ, ယေပိ စညေ ဘိက္ခူ ဘဏ္ဍနကာရကာ။ပေ.။ သင္ဃေ အဓိကရဏကာရကာ တေ ဥပသင္ကမိတ္ဝာ ဧဝံ ဝဒန္တိ – ‘မာ ခော တုမ္ဟေ, အာယသ္မန္တော, ဧသော အဇေသိ။ ဗလဝာဗလဝံ ပဋိမန္တေထ။ တုမ္ဟေ တေန ပဏ္ဍိတတရာ စ ဗ္ယတ္တတရာ စ ဗဟုသ္သုတတရာ စ အလမတ္တတရာ စ။ မာ စသ္သ ဘာယိတ္ထ။ မယမ္ပိ တုမ္ဟာကံ ပက္ခာ ဘဝိသ္သာမာ’တိ။ တေန အနုပ္ပန္နာနိ စေဝ ဘဏ္ဍနာနိ ဥပ္ပဇ္ဇန္တိ, ဥပ္ပန္နာနိ စ ဘဏ္ဍနာနိ ဘိယ္ယောဘာဝာယ ဝေပုလ္လာယ သံဝတ္တန္တိ။ သင္ဃော ပဏ္ဍုကလောဟိတကာနံ ဘိက္ခူနံ တဇ္ဇနီယကမ္မံ ကရောတိ။ ယသ္သာယသ္မတော ခမတိ ပဏ္ဍုကလောဟိတကာနံ ဘိက္ခူနံ တဇ္ဇနီယသ္သ ကမ္မသ္သ ကရဏံ, သော တုဏ္ဟသ္သ; ယသ္သ နက္ခမတိ, သော ဘာသေယ္ယ။

‘‘Tatiyampi etamatthaṃ vadāmi – suṇātu me, bhante, saṅgho . Ime paṇḍukalohitakā bhikkhū attanā bhaṇḍanakārakā…pe… saṅghe adhikaraṇakārakā, yepi caññe bhikkhū bhaṇḍanakārakā…pe… saṅghe adhikaraṇakārakā te upasaṅkamitvā evaṃ vadanti – ‘mā kho tumhe, āyasmanto, eso ajesi. Balavābalavaṃ paṭimantetha. Tumhe tena paṇḍitatarā ca byattatarā ca bahussutatarā ca alamattatarā ca. Mā cassa bhāyittha. Mayampi tumhākaṃ pakkhā bhavissāmā’ti. Tena anuppannāni ceva bhaṇḍanāni uppajjanti, uppannāni ca bhaṇḍanāni bhiyyobhāvāya vepullāya saṃvattanti. Saṅgho paṇḍukalohitakānaṃ bhikkhūnaṃ tajjanīyakammaṃ karoti. Yassāyasmato khamati paṇḍukalohitakānaṃ bhikkhūnaṃ tajjanīyassa kammassa karaṇaṃ, so tuṇhassa; yassa nakkhamati, so bhāseyya.

‘‘ကတံ သင္ဃေန ပဏ္ဍုကလောဟိတကာနံ ဘိက္ခူနံ တဇ္ဇနီယကမ္မံ။ ခမတိ သင္ဃသ္သ, တသ္မာ တုဏ္ဟီ, ဧဝမေတံ ဓာရယာမီ’’တိ။

‘‘Kataṃ saṅghena paṇḍukalohitakānaṃ bhikkhūnaṃ tajjanīyakammaṃ. Khamati saṅghassa, tasmā tuṇhī, evametaṃ dhārayāmī’’ti.

Next: အဓမ္မကမ္မဒ္ဝာဒသကံ • Adhammakammadvādasakaṃ

Footnotes:

1. အလမတ္ထတရာ စ (သ္ယာ. က.)

2. alamatthatarā ca (syā. ka.)

3. ပဏ္ဍုကလောဟိတကေ (သ္ယာ.)

4. အသန္တုဋ္ဌတာယ (သ္ယာ.), အသန္တုဋ္ဌိယာ (သီ.)

5. ဝိရိယာရမ္ဘသ္သ (သီ.), ဝီရိယာရဗ္ဘသ္သ (က.)

6. အာပတ္တိ (သီ. သ္ယာ.)

7. paṇḍukalohitake (syā.)

8. asantuṭṭhatāya (syā.), asantuṭṭhiyā (sī.)

9. viriyārambhassa (sī.), vīriyārabbhassa (ka.)

10. āpatti (sī. syā.)

Related texts:

အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / စူဠဝဂ္ဂ-အဋ္ဌကထာ • Cūḷavagga-aṭṭhakathā / တဇ္ဇနီယကမ္မကထာ • Tajjanīyakammakathā

ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / တဇ္ဇနီယကမ္မကထာဝဏ္ဏနာ • Tajjanīyakammakathāvaṇṇanā

ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ဝိမတိဝိနောဒနီ-ဋီကာ • Vimativinodanī-ṭīkā / တဇ္ဇနီယကမ္မကထာဝဏ္ဏနာ • Tajjanīyakammakathāvaṇṇanā

ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၁. တဇ္ဇနီယကမ္မကထာ • 1. Tajjanīyakammakathā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact