೧. ತಜ್ಜನೀಯಕಮ್ಮಂ

1. Tajjanīyakammaṃ

೧. ತೇನ ಸಮಯೇನ ಬುದ್ಧೋ ಭಗವಾ ಸಾವತ್ಥಿಯಂ ವಿಹರತಿ ಜೇತವನೇ ಅನಾಥಪಿಣ್ಡಿಕಸ್ಸ ಆರಾಮೇ। ತೇನ ಖೋ ಪನ ಸಮಯೇನ ಪಣ್ಡುಕಲೋಹಿತಕಾ ಭಿಕ್ಖೂ ಅತ್ತನಾ ಭಣ್ಡನಕಾರಕಾ ಕಲಹಕಾರಕಾ ವಿವಾದಕಾರಕಾ ಭಸ್ಸಕಾರಕಾ ಸಙ್ಘೇ ಅಧಿಕರಣಕಾರಕಾ, ಯೇಪಿ ಚಞ್ಞೇ ಭಿಕ್ಖೂ ಭಣ್ಡನಕಾರಕಾ ಕಲಹಕಾರಕಾ ವಿವಾದಕಾರಕಾ ಭಸ್ಸಕಾರಕಾ ಸಙ್ಘೇ ಅಧಿಕರಣಕಾರಕಾ ತೇ ಉಪಸಙ್ಕಮಿತ್ವಾ ಏವಂ ವದನ್ತಿ – ‘‘ಮಾ ಖೋ ತುಮ್ಹೇ, ಆಯಸ್ಮನ್ತೋ, ಏಸೋ ಅಜೇಸಿ। ಬಲವಾಬಲವಂ ಪಟಿಮನ್ತೇಥ। ತುಮ್ಹೇ ತೇನ ಪಣ್ಡಿತತರಾ ಚ ಬ್ಯತ್ತತರಾ ಚ ಬಹುಸ್ಸುತತರಾ ಚ ಅಲಮತ್ತತರಾ ಚ ¹। ಮಾ ಚಸ್ಸ ಭಾಯಿತ್ಥ। ಮಯಮ್ಪಿ ತುಮ್ಹಾಕಂ ಪಕ್ಖಾ ಭವಿಸ್ಸಾಮಾ’’ತಿ। ತೇನ ಅನುಪ್ಪನ್ನಾನಿ ಚೇವ ಭಣ್ಡನಾನಿ ಉಪ್ಪಜ್ಜನ್ತಿ ಉಪ್ಪನ್ನಾನಿ ಚ ಭಣ್ಡನಾನಿ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತನ್ತಿ। ಯೇ ತೇ ಭಿಕ್ಖೂ ಅಪ್ಪಿಚ್ಛಾ…ಪೇ॰… ತೇ ಉಜ್ಝಾಯನ್ತಿ ಖಿಯ್ಯನ್ತಿ ವಿಪಾಚೇನ್ತಿ – ‘‘ಕಥಞ್ಹಿ ನಾಮ ಪಣ್ಡುಕಲೋಹಿತಕಾ ಭಿಕ್ಖೂ ಅತ್ತನಾ ಭಣ್ಡನಕಾರಕಾ ಕಲಹಕಾರಕಾ ವಿವಾದಕಾರಕಾ ಭಸ್ಸಕಾರಕಾ ಸಙ್ಘೇ ಅಧಿಕರಣಕಾರಕಾ, ಯೇಪಿ ಚಞ್ಞೇ ಭಿಕ್ಖೂ ಭಣ್ಡನಕಾರಕಾ ಕಲಹಕಾರಕಾ ವಿವಾದಕಾರಕಾ ಭಸ್ಸಕಾರಕಾ ಸಙ್ಘೇ ಅಧಿಕರಣಕಾರಕಾ ತೇ ಉಪಸಙ್ಕಮಿತ್ವಾ ಏವಂ ವಕ್ಖನ್ತಿ – ‘ಮಾ ಖೋ ತುಮ್ಹೇ, ಆಯಸ್ಮನ್ತೋ, ಏಸೋ ಅಜೇಸಿ। ಬಲವಾಬಲವಂ ಪಟಿಮನ್ತೇಥ। ತುಮ್ಹೇ ತೇನ ಪಣ್ಡಿತತರಾ ಚ ಬ್ಯತ್ತತರಾ ಚ ಬಹುಸ್ಸುತತರಾ ಚ ಅಲಮತ್ತತರಾ ಚ। ಮಾ ಚಸ್ಸ ಭಾಯಿತ್ಥ। ಮಯಮ್ಪಿ ತುಮ್ಹಾಕಂ ಪಕ್ಖಾ ಭವಿಸ್ಸಾಮಾ’ತಿ। ತೇನ ಅನುಪ್ಪನ್ನಾನಿ ಚೇವ ಭಣ್ಡನಾನಿ ಉಪ್ಪಜ್ಜನ್ತಿ ಉಪ್ಪನ್ನಾನಿ ಚ ಭಣ್ಡನಾನಿ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತನ್ತೀ’’ತಿ।

1. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena paṇḍukalohitakā bhikkhū attanā bhaṇḍanakārakā kalahakārakā vivādakārakā bhassakārakā saṅghe adhikaraṇakārakā, yepi caññe bhikkhū bhaṇḍanakārakā kalahakārakā vivādakārakā bhassakārakā saṅghe adhikaraṇakārakā te upasaṅkamitvā evaṃ vadanti – ‘‘mā kho tumhe, āyasmanto, eso ajesi. Balavābalavaṃ paṭimantetha. Tumhe tena paṇḍitatarā ca byattatarā ca bahussutatarā ca alamattatarā ca ². Mā cassa bhāyittha. Mayampi tumhākaṃ pakkhā bhavissāmā’’ti. Tena anuppannāni ceva bhaṇḍanāni uppajjanti uppannāni ca bhaṇḍanāni bhiyyobhāvāya vepullāya saṃvattanti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma paṇḍukalohitakā bhikkhū attanā bhaṇḍanakārakā kalahakārakā vivādakārakā bhassakārakā saṅghe adhikaraṇakārakā, yepi caññe bhikkhū bhaṇḍanakārakā kalahakārakā vivādakārakā bhassakārakā saṅghe adhikaraṇakārakā te upasaṅkamitvā evaṃ vakkhanti – ‘mā kho tumhe, āyasmanto, eso ajesi. Balavābalavaṃ paṭimantetha. Tumhe tena paṇḍitatarā ca byattatarā ca bahussutatarā ca alamattatarā ca. Mā cassa bhāyittha. Mayampi tumhākaṃ pakkhā bhavissāmā’ti. Tena anuppannāni ceva bhaṇḍanāni uppajjanti uppannāni ca bhaṇḍanāni bhiyyobhāvāya vepullāya saṃvattantī’’ti.

೨. ಅಥ ಖೋ ತೇ ಭಿಕ್ಖೂ ಭಗವತೋ ಏತಮತ್ಥಂ ಆರೋಚೇಸುಂ। ಅಥ ಖೋ ಭಗವಾ ಏತಸ್ಮಿಂ ನಿದಾನೇ ಏತಸ್ಮಿಂ ಪಕರಣೇ ಭಿಕ್ಖುಸಙ್ಘಂ ಸನ್ನಿಪಾತಾಪೇತ್ವಾ ಭಿಕ್ಖೂ ಪಟಿಪುಚ್ಛಿ – ‘‘ಸಚ್ಚಂ ಕಿರ, ಭಿಕ್ಖವೇ, ಪಣ್ಡುಕಲೋಹಿತಕಾ ಭಿಕ್ಖೂ ಅತ್ತನಾ ಭಣ್ಡನಕಾರಕಾ ಕಲಹಕಾರಕಾ ವಿವಾದಕಾರಕಾ ಭಸ್ಸಕಾರಕಾ ಸಙ್ಘೇ ಅಧಿಕರಣಕಾರಕಾ, ಯೇಪಿ ಚಞ್ಞೇ ಭಿಕ್ಖೂ ಭಣ್ಡನಕಾರಕಾ ಕಲಹಕಾರಕಾ ವಿವಾದಕಾರಕಾ ಭಸ್ಸಕಾರಕಾ ಸಙ್ಘೇ ಅಧಿಕರಣಕಾರಕಾ ತೇ ಉಪಸಙ್ಕಮಿತ್ವಾ ಏವಂ ವದನ್ತಿ – ‘ಮಾ ಖೋ ತುಮ್ಹೇ, ಆಯಸ್ಮನ್ತೋ, ಏಸೋ ಅಜೇಸಿ। ಬಲವಾಬಲವಂ ಪಟಿಮನ್ತೇಥ। ತುಮ್ಹೇ ತೇನ ಪಣ್ಡಿತತರಾ ಚ ಬ್ಯತ್ತತರಾ ಚ ಬಹುಸ್ಸುತತರಾ ಚ ಅಲಮತ್ತತರಾ ಚ। ಮಾ ಚಸ್ಸ ಭಾಯಿತ್ಥ। ಮಯಮ್ಪಿ ತುಮ್ಹಾಕಂ ಪಕ್ಖಾ ಭವಿಸ್ಸಾಮಾ’ತಿ। ತೇನ ಅನುಪ್ಪನ್ನಾನಿ ಚೇವ ಭಣ್ಡನಾನಿ ಉಪ್ಪಜ್ಜನ್ತಿ, ಉಪ್ಪನ್ನಾನಿ ಚ ಭಣ್ಡನಾನಿ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತನ್ತೀ’’ತಿ? ‘‘ಸಚ್ಚಂ ಭಗವಾ’’ತಿ। ವಿಗರಹಿ ಬುದ್ಧೋ ಭಗವಾ – ‘‘ಅನನುಚ್ಛವಿಕಂ, ಭಿಕ್ಖವೇ, ತೇಸಂ ಮೋಘಪುರಿಸಾನಂ ಅನನುಲೋಮಿಕಂ ಅಪ್ಪತಿರೂಪಂ ಅಸ್ಸಾಮಣಕಂ ಅಕಪ್ಪಿಯಂ ಅಕರಣೀಯಂ। ಕಥಞ್ಹಿ ನಾಮ ತೇ, ಭಿಕ್ಖವೇ, ಮೋಘಪುರಿಸಾ ಅತ್ತನಾ ಭಣ್ಡನಕಾರಕಾ…ಪೇ॰… ಸಙ್ಘೇ ಅಧಿಕರಣಕಾರಕಾ, ಯೇಪಿ ಚಞ್ಞೇ ಭಿಕ್ಖೂ ಭಣ್ಡನಕಾರಕಾ…ಪೇ॰… ಸಙ್ಘೇ ಅಧಿಕರಣಕಾರಕಾ ತೇ ಉಪಸಙ್ಕಮಿತ್ವಾ ಏವಂ ವಕ್ಖನ್ತಿ – ‘ಮಾ ಖೋ ತುಮ್ಹೇ, ಆಯಸ್ಮನ್ತೋ, ಏಸೋ ಅಜೇಸಿ। ಬಲವಾಬಲವಂ ಪಟಿಮನ್ತೇಥ। ತುಮ್ಹೇ ತೇನ ಪಣ್ಡಿತತರಾ ಚ ಬ್ಯತ್ತತರಾ ಚ ಬಹುಸ್ಸುತತರಾ ಚ ಅಲಮತ್ತತರಾ ಚ। ಮಾ ಚಸ್ಸ ಭಾಯಿತ್ಥ। ಮಯಮ್ಪಿ ತುಮ್ಹಾಕಂ ಪಕ್ಖಾ ಭವಿಸ್ಸಾಮಾ’ತಿ? ತೇನ ಅನುಪ್ಪನ್ನಾನಿ ಚೇವ ಭಣ್ಡನಾನಿ ಉಪ್ಪಜ್ಜನ್ತಿ, ಉಪ್ಪನ್ನಾನಿ ಚ ಭಣ್ಡನಾನಿ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತನ್ತಿ। ನೇತಂ, ಭಿಕ್ಖವೇ, ಅಪ್ಪಸನ್ನಾನಂ ವಾ ಪಸಾದಾಯ ಪಸನ್ನಾನಂ ವಾ ಭಿಯ್ಯೋಭಾವಾಯ। ಅಥ ಖ್ವೇತಂ, ಭಿಕ್ಖವೇ, ಅಪ್ಪಸನ್ನಾನಞ್ಚೇವ ಅಪ್ಪಸಾದಾಯ ಪಸನ್ನಾನಞ್ಚ ಏಕಚ್ಚಾನಂ ಅಞ್ಞಥತ್ತಾಯಾ’’ತಿ।

2. Atha kho te bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā bhikkhū paṭipucchi – ‘‘saccaṃ kira, bhikkhave, paṇḍukalohitakā bhikkhū attanā bhaṇḍanakārakā kalahakārakā vivādakārakā bhassakārakā saṅghe adhikaraṇakārakā, yepi caññe bhikkhū bhaṇḍanakārakā kalahakārakā vivādakārakā bhassakārakā saṅghe adhikaraṇakārakā te upasaṅkamitvā evaṃ vadanti – ‘mā kho tumhe, āyasmanto, eso ajesi. Balavābalavaṃ paṭimantetha. Tumhe tena paṇḍitatarā ca byattatarā ca bahussutatarā ca alamattatarā ca. Mā cassa bhāyittha. Mayampi tumhākaṃ pakkhā bhavissāmā’ti. Tena anuppannāni ceva bhaṇḍanāni uppajjanti, uppannāni ca bhaṇḍanāni bhiyyobhāvāya vepullāya saṃvattantī’’ti? ‘‘Saccaṃ bhagavā’’ti. Vigarahi buddho bhagavā – ‘‘ananucchavikaṃ, bhikkhave, tesaṃ moghapurisānaṃ ananulomikaṃ appatirūpaṃ assāmaṇakaṃ akappiyaṃ akaraṇīyaṃ. Kathañhi nāma te, bhikkhave, moghapurisā attanā bhaṇḍanakārakā…pe… saṅghe adhikaraṇakārakā, yepi caññe bhikkhū bhaṇḍanakārakā…pe… saṅghe adhikaraṇakārakā te upasaṅkamitvā evaṃ vakkhanti – ‘mā kho tumhe, āyasmanto, eso ajesi. Balavābalavaṃ paṭimantetha. Tumhe tena paṇḍitatarā ca byattatarā ca bahussutatarā ca alamattatarā ca. Mā cassa bhāyittha. Mayampi tumhākaṃ pakkhā bhavissāmā’ti? Tena anuppannāni ceva bhaṇḍanāni uppajjanti, uppannāni ca bhaṇḍanāni bhiyyobhāvāya vepullāya saṃvattanti. Netaṃ, bhikkhave, appasannānaṃ vā pasādāya pasannānaṃ vā bhiyyobhāvāya. Atha khvetaṃ, bhikkhave, appasannānañceva appasādāya pasannānañca ekaccānaṃ aññathattāyā’’ti.

ಅಥ ಖೋ ಭಗವಾ ತೇ ³ ಭಿಕ್ಖೂ ಅನೇಕಪರಿಯಾಯೇನ ವಿಗರಹಿತ್ವಾ ದುಬ್ಭರತಾಯ ದುಪ್ಪೋಸತಾಯ ಮಹಿಚ್ಛತಾಯ ಅಸನ್ತುಟ್ಠಿತಾಯ ⁴ ಸಙ್ಗಣಿಕಾಯ ಕೋಸಜ್ಜಸ್ಸ ಅವಣ್ಣಂ ಭಾಸಿತ್ವಾ ಅನೇಕಪರಿಯಾಯೇನ ಸುಭರತಾಯ ಸುಪೋಸತಾಯ ಅಪ್ಪಿಚ್ಛಸ್ಸ ಸನ್ತುಟ್ಠಸ್ಸ ಸಲ್ಲೇಖಸ್ಸ ಧುತಸ್ಸ ಪಾಸಾದಿಕಸ್ಸ ಅಪಚಯಸ್ಸ ವೀರಿಯಾರಮ್ಭಸ್ಸ ⁵ ವಣ್ಣಂ ಭಾಸಿತ್ವಾ ಭಿಕ್ಖೂನಂ ತದನುಚ್ಛವಿಕಂ ತದನುಲೋಮಿಕಂ ಧಮ್ಮಿಂ ಕಥಂ ಕತ್ವಾ ಭಿಕ್ಖೂ ಆಮನ್ತೇಸಿ – ‘‘ತೇನ ಹಿ, ಭಿಕ್ಖವೇ, ಸಙ್ಘೋ ಪಣ್ಡುಕಲೋಹಿತಕಾನಂ ಭಿಕ್ಖೂನಂ ತಜ್ಜನೀಯಕಮ್ಮಂ ಕರೋತು। ಏವಞ್ಚ ಪನ, ಭಿಕ್ಖವೇ, ಕಾತಬ್ಬಂ। ಪಠಮಂ ಪಣ್ಡುಕಲೋಹಿತಕಾ ಭಿಕ್ಖೂ ಚೋದೇತಬ್ಬಾ, ಚೋದೇತ್ವಾ ಸಾರೇತಬ್ಬಾ, ಸಾರೇತ್ವಾ ಆಪತ್ತಿಂ ⁶ ಆರೋಪೇತಬ್ಬಾ, ಆಪತ್ತಿಂ ಆರೋಪೇತ್ವಾ ಬ್ಯತ್ತೇನ ಭಿಕ್ಖುನಾ ಪಟಿಬಲೇನ ಸಙ್ಘೋ ಞಾಪೇತಬ್ಬೋ –

Atha kho bhagavā te ⁷ bhikkhū anekapariyāyena vigarahitvā dubbharatāya dupposatāya mahicchatāya asantuṭṭhitāya ⁸ saṅgaṇikāya kosajjassa avaṇṇaṃ bhāsitvā anekapariyāyena subharatāya suposatāya appicchassa santuṭṭhassa sallekhassa dhutassa pāsādikassa apacayassa vīriyārambhassa ⁹ vaṇṇaṃ bhāsitvā bhikkhūnaṃ tadanucchavikaṃ tadanulomikaṃ dhammiṃ kathaṃ katvā bhikkhū āmantesi – ‘‘tena hi, bhikkhave, saṅgho paṇḍukalohitakānaṃ bhikkhūnaṃ tajjanīyakammaṃ karotu. Evañca pana, bhikkhave, kātabbaṃ. Paṭhamaṃ paṇḍukalohitakā bhikkhū codetabbā, codetvā sāretabbā, sāretvā āpattiṃ ¹⁰ āropetabbā, āpattiṃ āropetvā byattena bhikkhunā paṭibalena saṅgho ñāpetabbo –

೩. ‘‘ಸುಣಾತು ಮೇ, ಭನ್ತೇ, ಸಙ್ಘೋ। ಇಮೇ ಪಣ್ಡುಕಲೋಹಿತಕಾ ಭಿಕ್ಖೂ ಅತ್ತನಾ ಭಣ್ಡನಕಾರಕಾ ಕಲಹಕಾರಕಾ ವಿವಾದಕಾರಕಾ ಭಸ್ಸಕಾರಕಾ ಸಙ್ಘೇ ಅಧಿಕರಣಕಾರಕಾ, ಯೇಪಿ ಚಞ್ಞೇ ಭಿಕ್ಖೂ ಭಣ್ಡನಕಾರಕಾ ಕಲಹಕಾರಕಾ ವಿವಾದಕಾರಕಾ ಭಸ್ಸಕಾರಕಾ ಸಙ್ಘೇ ಅಧಿಕರಣಕಾರಕಾ ತೇ ಉಪಸಙ್ಕಮಿತ್ವಾ ಏವಂ ವದನ್ತಿ – ‘ಮಾ ಖೋ ತುಮ್ಹೇ, ಆಯಸ್ಮನ್ತೋ, ಏಸೋ ಅಜೇಸಿ। ಬಲವಾಬಲವಂ ಪಟಿಮನ್ತೇಥ। ತುಮ್ಹೇ ತೇನ ಪಣ್ಡಿತತರಾ ಚ ಬ್ಯತ್ತತರಾ ಚ ಬಹುಸ್ಸುತತರಾ ಚ ಅಲಮತ್ತತರಾ ಚ। ಮಾ ಚಸ್ಸ ಭಾಯಿತ್ಥ। ಮಯಮ್ಪಿ ತುಮ್ಹಾಕಂ ಪಕ್ಖಾ ಭವಿಸ್ಸಾಮಾ’ತಿ। ತೇನ ಅನುಪ್ಪನ್ನಾನಿ ಚೇವ ಭಣ್ಡನಾನಿ ಉಪ್ಪಜ್ಜನ್ತಿ, ಉಪ್ಪನ್ನಾನಿ ಚ ಭಣ್ಡನಾನಿ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತನ್ತಿ। ಯದಿ ಸಙ್ಘಸ್ಸ ಪತ್ತಕಲ್ಲಂ, ಸಙ್ಘೋ ಪಣ್ಡುಕಲೋಹಿತಕಾನಂ ಭಿಕ್ಖೂನಂ ತಜ್ಜನೀಯಕಮ್ಮಂ ಕರೇಯ್ಯ। ಏಸಾ ಞತ್ತಿ।

3. ‘‘Suṇātu me, bhante, saṅgho. Ime paṇḍukalohitakā bhikkhū attanā bhaṇḍanakārakā kalahakārakā vivādakārakā bhassakārakā saṅghe adhikaraṇakārakā, yepi caññe bhikkhū bhaṇḍanakārakā kalahakārakā vivādakārakā bhassakārakā saṅghe adhikaraṇakārakā te upasaṅkamitvā evaṃ vadanti – ‘mā kho tumhe, āyasmanto, eso ajesi. Balavābalavaṃ paṭimantetha. Tumhe tena paṇḍitatarā ca byattatarā ca bahussutatarā ca alamattatarā ca. Mā cassa bhāyittha. Mayampi tumhākaṃ pakkhā bhavissāmā’ti. Tena anuppannāni ceva bhaṇḍanāni uppajjanti, uppannāni ca bhaṇḍanāni bhiyyobhāvāya vepullāya saṃvattanti. Yadi saṅghassa pattakallaṃ, saṅgho paṇḍukalohitakānaṃ bhikkhūnaṃ tajjanīyakammaṃ kareyya. Esā ñatti.

‘‘ಸುಣಾತು ಮೇ, ಭನ್ತೇ, ಸಙ್ಘೋ। ಇಮೇ ಪಣ್ಡುಕಲೋಹಿತಕಾ ಭಿಕ್ಖೂ ಅತ್ತನಾ ಭಣ್ಡನಕಾರಕಾ…ಪೇ॰… ಸಙ್ಘೇ ಅಧಿಕರಣಕಾರಕಾ, ಯೇಪಿ ಚಞ್ಞೇ ಭಿಕ್ಖೂ ಭಣ್ಡನಕಾರಕಾ…ಪೇ॰… ಸಙ್ಘೇ ಅಧಿಕರಣಕಾರಕಾ ತೇ ಉಪಸಙ್ಕಮಿತ್ವಾ ಏವಂ ವದನ್ತಿ – ‘ಮಾ ಖೋ ತುಮ್ಹೇ, ಆಯಸ್ಮನ್ತೋ, ಏಸೋ ಅಜೇಸಿ। ಬಲವಾಬಲವಂ ಪಟಿಮನ್ತೇಥ। ತುಮ್ಹೇ ತೇನ ಪಣ್ಡಿತತರಾ ಚ ಬ್ಯತ್ತತರಾ ಚ ಬಹುಸ್ಸುತತರಾ ಚ ಅಲಮತ್ತತರಾ ಚ। ಮಾ ಚಸ್ಸ ಭಾಯಿತ್ಥ। ಮಯಮ್ಪಿ ತುಮ್ಹಾಕಂ ಪಕ್ಖಾ ಭವಿಸ್ಸಾಮಾ’ತಿ। ತೇನ ಅನುಪ್ಪನ್ನಾನಿ ಚೇವ ಭಣ್ಡನಾನಿ ಉಪ್ಪಜ್ಜನ್ತಿ, ಉಪ್ಪನ್ನಾನಿ ಚ ಭಣ್ಡನಾನಿ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತನ್ತಿ। ಸಙ್ಘೋ ಪಣ್ಡುಕಲೋಹಿತಕಾನಂ ಭಿಕ್ಖೂನಂ ತಜ್ಜನೀಯಕಮ್ಮಂ ಕರೋತಿ। ಯಸ್ಸಾಯಸ್ಮತೋ ಖಮತಿ ಪಣ್ಡುಕಲೋಹಿತಕಾನಂ ಭಿಕ್ಖೂನಂ ತಜ್ಜನೀಯಸ್ಸ ಕಮ್ಮಸ್ಸ ಕರಣಂ, ಸೋ ತುಣ್ಹಸ್ಸ; ಯಸ್ಸ ನಕ್ಖಮತಿ, ಸೋ ಭಾಸೇಯ್ಯ।

‘‘Suṇātu me, bhante, saṅgho. Ime paṇḍukalohitakā bhikkhū attanā bhaṇḍanakārakā…pe… saṅghe adhikaraṇakārakā, yepi caññe bhikkhū bhaṇḍanakārakā…pe… saṅghe adhikaraṇakārakā te upasaṅkamitvā evaṃ vadanti – ‘mā kho tumhe, āyasmanto, eso ajesi. Balavābalavaṃ paṭimantetha. Tumhe tena paṇḍitatarā ca byattatarā ca bahussutatarā ca alamattatarā ca. Mā cassa bhāyittha. Mayampi tumhākaṃ pakkhā bhavissāmā’ti. Tena anuppannāni ceva bhaṇḍanāni uppajjanti, uppannāni ca bhaṇḍanāni bhiyyobhāvāya vepullāya saṃvattanti. Saṅgho paṇḍukalohitakānaṃ bhikkhūnaṃ tajjanīyakammaṃ karoti. Yassāyasmato khamati paṇḍukalohitakānaṃ bhikkhūnaṃ tajjanīyassa kammassa karaṇaṃ, so tuṇhassa; yassa nakkhamati, so bhāseyya.

‘‘ದುತಿಯಮ್ಪಿ ಏತಮತ್ಥಂ ವದಾಮಿ – ಸುಣಾತು ಮೇ, ಭನ್ತೇ, ಸಙ್ಘೋ। ಇಮೇ ಪಣ್ಡುಕಲೋಹಿತಕಾ ಭಿಕ್ಖೂ ಅತ್ತನಾ ಭಣ್ಡನಕಾರಕಾ…ಪೇ॰… ಸಙ್ಘೇ ಅಧಿಕರಣಕಾರಕಾ, ಯೇಪಿ ಚಞ್ಞೇ ಭಿಕ್ಖೂ ಭಣ್ಡನಕಾರಕಾ…ಪೇ॰… ಸಙ್ಘೇ ಅಧಿಕರಣಕಾರಕಾ ತೇ ಉಪಸಙ್ಕಮಿತ್ವಾ ಏವಂ ವದನ್ತಿ – ‘ಮಾ ಖೋ ತುಮ್ಹೇ , ಆಯಸ್ಮನ್ತೋ, ಏಸೋ ಅಜೇಸಿ। ಬಲವಾಬಲವಂ ಪಟಿಮನ್ತೇಥ। ತುಮ್ಹೇ ತೇನ ಪಣ್ಡಿತತರಾ ಚ ಬ್ಯತ್ತತರಾ ಚ ಬಹುಸ್ಸುತತರಾ ಚ ಅಲಮತ್ತತರಾ ಚ। ಮಾ ಚಸ್ಸ ಭಾಯಿತ್ಥ। ಮಯಮ್ಪಿ ತುಮ್ಹಾಕಂ ಪಕ್ಖಾ ಭವಿಸ್ಸಾಮಾ’ತಿ। ತೇನ ಅನುಪ್ಪನ್ನಾನಿ ಚೇವ ಭಣ್ಡನಾನಿ ಉಪ್ಪಜ್ಜನ್ತಿ, ಉಪ್ಪನ್ನಾನಿ ಚ ಭಣ್ಡನಾನಿ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತನ್ತಿ। ಸಙ್ಘೋ ಪಣ್ಡುಕಲೋಹಿತಕಾನಂ ಭಿಕ್ಖೂನಂ ತಜ್ಜನೀಯಕಮ್ಮಂ ಕರೋತಿ। ಯಸ್ಸಾಯಸ್ಮತೋ ಖಮತಿ ಪಣ್ಡುಕಲೋಹಿತಕಾನಂ ಭಿಕ್ಖೂನಂ ತಜ್ಜನೀಯಸ್ಸ ಕಮ್ಮಸ್ಸ ಕರಣಂ, ಸೋ ತುಣ್ಹಸ್ಸ; ಯಸ್ಸ ನಕ್ಖಮತಿ, ಸೋ ಭಾಸೇಯ್ಯ।

‘‘Dutiyampi etamatthaṃ vadāmi – suṇātu me, bhante, saṅgho. Ime paṇḍukalohitakā bhikkhū attanā bhaṇḍanakārakā…pe… saṅghe adhikaraṇakārakā, yepi caññe bhikkhū bhaṇḍanakārakā…pe… saṅghe adhikaraṇakārakā te upasaṅkamitvā evaṃ vadanti – ‘mā kho tumhe , āyasmanto, eso ajesi. Balavābalavaṃ paṭimantetha. Tumhe tena paṇḍitatarā ca byattatarā ca bahussutatarā ca alamattatarā ca. Mā cassa bhāyittha. Mayampi tumhākaṃ pakkhā bhavissāmā’ti. Tena anuppannāni ceva bhaṇḍanāni uppajjanti, uppannāni ca bhaṇḍanāni bhiyyobhāvāya vepullāya saṃvattanti. Saṅgho paṇḍukalohitakānaṃ bhikkhūnaṃ tajjanīyakammaṃ karoti. Yassāyasmato khamati paṇḍukalohitakānaṃ bhikkhūnaṃ tajjanīyassa kammassa karaṇaṃ, so tuṇhassa; yassa nakkhamati, so bhāseyya.

‘‘ತತಿಯಮ್ಪಿ ಏತಮತ್ಥಂ ವದಾಮಿ – ಸುಣಾತು ಮೇ, ಭನ್ತೇ, ಸಙ್ಘೋ । ಇಮೇ ಪಣ್ಡುಕಲೋಹಿತಕಾ ಭಿಕ್ಖೂ ಅತ್ತನಾ ಭಣ್ಡನಕಾರಕಾ…ಪೇ॰… ಸಙ್ಘೇ ಅಧಿಕರಣಕಾರಕಾ, ಯೇಪಿ ಚಞ್ಞೇ ಭಿಕ್ಖೂ ಭಣ್ಡನಕಾರಕಾ…ಪೇ॰… ಸಙ್ಘೇ ಅಧಿಕರಣಕಾರಕಾ ತೇ ಉಪಸಙ್ಕಮಿತ್ವಾ ಏವಂ ವದನ್ತಿ – ‘ಮಾ ಖೋ ತುಮ್ಹೇ, ಆಯಸ್ಮನ್ತೋ, ಏಸೋ ಅಜೇಸಿ। ಬಲವಾಬಲವಂ ಪಟಿಮನ್ತೇಥ। ತುಮ್ಹೇ ತೇನ ಪಣ್ಡಿತತರಾ ಚ ಬ್ಯತ್ತತರಾ ಚ ಬಹುಸ್ಸುತತರಾ ಚ ಅಲಮತ್ತತರಾ ಚ। ಮಾ ಚಸ್ಸ ಭಾಯಿತ್ಥ। ಮಯಮ್ಪಿ ತುಮ್ಹಾಕಂ ಪಕ್ಖಾ ಭವಿಸ್ಸಾಮಾ’ತಿ। ತೇನ ಅನುಪ್ಪನ್ನಾನಿ ಚೇವ ಭಣ್ಡನಾನಿ ಉಪ್ಪಜ್ಜನ್ತಿ, ಉಪ್ಪನ್ನಾನಿ ಚ ಭಣ್ಡನಾನಿ ಭಿಯ್ಯೋಭಾವಾಯ ವೇಪುಲ್ಲಾಯ ಸಂವತ್ತನ್ತಿ। ಸಙ್ಘೋ ಪಣ್ಡುಕಲೋಹಿತಕಾನಂ ಭಿಕ್ಖೂನಂ ತಜ್ಜನೀಯಕಮ್ಮಂ ಕರೋತಿ। ಯಸ್ಸಾಯಸ್ಮತೋ ಖಮತಿ ಪಣ್ಡುಕಲೋಹಿತಕಾನಂ ಭಿಕ್ಖೂನಂ ತಜ್ಜನೀಯಸ್ಸ ಕಮ್ಮಸ್ಸ ಕರಣಂ, ಸೋ ತುಣ್ಹಸ್ಸ; ಯಸ್ಸ ನಕ್ಖಮತಿ, ಸೋ ಭಾಸೇಯ್ಯ।

‘‘Tatiyampi etamatthaṃ vadāmi – suṇātu me, bhante, saṅgho . Ime paṇḍukalohitakā bhikkhū attanā bhaṇḍanakārakā…pe… saṅghe adhikaraṇakārakā, yepi caññe bhikkhū bhaṇḍanakārakā…pe… saṅghe adhikaraṇakārakā te upasaṅkamitvā evaṃ vadanti – ‘mā kho tumhe, āyasmanto, eso ajesi. Balavābalavaṃ paṭimantetha. Tumhe tena paṇḍitatarā ca byattatarā ca bahussutatarā ca alamattatarā ca. Mā cassa bhāyittha. Mayampi tumhākaṃ pakkhā bhavissāmā’ti. Tena anuppannāni ceva bhaṇḍanāni uppajjanti, uppannāni ca bhaṇḍanāni bhiyyobhāvāya vepullāya saṃvattanti. Saṅgho paṇḍukalohitakānaṃ bhikkhūnaṃ tajjanīyakammaṃ karoti. Yassāyasmato khamati paṇḍukalohitakānaṃ bhikkhūnaṃ tajjanīyassa kammassa karaṇaṃ, so tuṇhassa; yassa nakkhamati, so bhāseyya.

‘‘ಕತಂ ಸಙ್ಘೇನ ಪಣ್ಡುಕಲೋಹಿತಕಾನಂ ಭಿಕ್ಖೂನಂ ತಜ್ಜನೀಯಕಮ್ಮಂ। ಖಮತಿ ಸಙ್ಘಸ್ಸ, ತಸ್ಮಾ ತುಣ್ಹೀ, ಏವಮೇತಂ ಧಾರಯಾಮೀ’’ತಿ।

‘‘Kataṃ saṅghena paṇḍukalohitakānaṃ bhikkhūnaṃ tajjanīyakammaṃ. Khamati saṅghassa, tasmā tuṇhī, evametaṃ dhārayāmī’’ti.

Next: ಅಧಮ್ಮಕಮ್ಮದ್ವಾದಸಕಂ • Adhammakammadvādasakaṃ

Footnotes:

1. ಅಲಮತ್ಥತರಾ ಚ (ಸ್ಯಾ॰ ಕ॰)

2. alamatthatarā ca (syā. ka.)

3. ಪಣ್ಡುಕಲೋಹಿತಕೇ (ಸ್ಯಾ॰)

4. ಅಸನ್ತುಟ್ಠತಾಯ (ಸ್ಯಾ॰), ಅಸನ್ತುಟ್ಠಿಯಾ (ಸೀ॰)

5. ವಿರಿಯಾರಮ್ಭಸ್ಸ (ಸೀ॰), ವೀರಿಯಾರಬ್ಭಸ್ಸ (ಕ॰)

6. ಆಪತ್ತಿ (ಸೀ॰ ಸ್ಯಾ॰)

7. paṇḍukalohitake (syā.)

8. asantuṭṭhatāya (syā.), asantuṭṭhiyā (sī.)

9. viriyārambhassa (sī.), vīriyārabbhassa (ka.)

10. āpatti (sī. syā.)

Related texts:

ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಚೂಳವಗ್ಗ-ಅಟ್ಠಕಥಾ • Cūḷavagga-aṭṭhakathā / ತಜ್ಜನೀಯಕಮ್ಮಕಥಾ • Tajjanīyakammakathā

ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ತಜ್ಜನೀಯಕಮ್ಮಕಥಾವಣ್ಣನಾ • Tajjanīyakammakathāvaṇṇanā

ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ತಜ್ಜನೀಯಕಮ್ಮಕಥಾವಣ್ಣನಾ • Tajjanīyakammakathāvaṇṇanā

ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ೧. ತಜ್ಜನೀಯಕಮ್ಮಕಥಾ • 1. Tajjanīyakammakathā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact