| Library / Tipiṭaka / තිපිටක • Tipiṭaka / චූළවග්‌ගපාළි • Cūḷavaggapāḷi |
නමො තස්‌ස භගවතො අරහතො සම්‌මාසම්‌බුද්‌ධස්‌ස
Namo tassa bhagavato arahato sammāsambuddhassa
විනයපිටකෙ
Vinayapiṭake
චූළවග්‌ගපාළි
Cūḷavaggapāḷi
1. කම්‌මක්‌ඛන්‌ධකං
1. Kammakkhandhakaṃ
1. තජ්‌ජනීයකම්‌මං
1. Tajjanīyakammaṃ
1. තෙන සමයෙන බුද්‌ධො භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තෙන ඛො පන සමයෙන පණ්‌ඩුකලොහිතකා භික්‌ඛූ අත්‌තනා භණ්‌ඩනකාරකා කලහකාරකා විවාදකාරකා භස්‌සකාරකා සඞ්‌ඝෙ අධිකරණකාරකා, යෙපි චඤ්‌ඤෙ භික්‌ඛූ භණ්‌ඩනකාරකා කලහකාරකා විවාදකාරකා භස්‌සකාරකා සඞ්‌ඝෙ අධිකරණකාරකා තෙ උපසඞ්‌කමිත්‌වා එවං වදන්‌ති – ‘‘මා ඛො තුම්‌හෙ, ආයස්‌මන්‌තො, එසො අජෙසි. බලවාබලවං පටිමන්‌තෙථ. තුම්‌හෙ තෙන පණ්‌ඩිතතරා ච බ්‍යත්‌තතරා ච බහුස්‌සුතතරා ච අලමත්‌තතරා ච 1. මා චස්‌ස භායිත්‌ථ. මයම්‌පි තුම්‌හාකං පක්‌ඛා භවිස්‌සාමා’’ති. තෙන අනුප්‌පන්‌නානි චෙව භණ්‌ඩනානි උප්‌පජ්‌ජන්‌ති උප්‌පන්‌නානි ච භණ්‌ඩනානි භිය්‍යොභාවාය වෙපුල්‌ලාය සංවත්‌තන්‌ති. යෙ තෙ භික්‌ඛූ අප්‌පිච්‌ඡා…පෙ.… තෙ උජ්‌ඣායන්‌ති ඛිය්‍යන්‌ති විපාචෙන්‌ති – ‘‘කථඤ්‌හි නාම පණ්‌ඩුකලොහිතකා භික්‌ඛූ අත්‌තනා භණ්‌ඩනකාරකා කලහකාරකා විවාදකාරකා භස්‌සකාරකා සඞ්‌ඝෙ අධිකරණකාරකා, යෙපි චඤ්‌ඤෙ භික්‌ඛූ භණ්‌ඩනකාරකා කලහකාරකා විවාදකාරකා භස්‌සකාරකා සඞ්‌ඝෙ අධිකරණකාරකා තෙ උපසඞ්‌කමිත්‌වා එවං වක්‌ඛන්‌ති – ‘මා ඛො තුම්‌හෙ, ආයස්‌මන්‌තො, එසො අජෙසි. බලවාබලවං පටිමන්‌තෙථ. තුම්‌හෙ තෙන පණ්‌ඩිතතරා ච බ්‍යත්‌තතරා ච බහුස්‌සුතතරා ච අලමත්‌තතරා ච. මා චස්‌ස භායිත්‌ථ. මයම්‌පි තුම්‌හාකං පක්‌ඛා භවිස්‌සාමා’ති. තෙන අනුප්‌පන්‌නානි චෙව භණ්‌ඩනානි උප්‌පජ්‌ජන්‌ති උප්‌පන්‌නානි ච භණ්‌ඩනානි භිය්‍යොභාවාය වෙපුල්‌ලාය සංවත්‌තන්‌තී’’ති.
1. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena paṇḍukalohitakā bhikkhū attanā bhaṇḍanakārakā kalahakārakā vivādakārakā bhassakārakā saṅghe adhikaraṇakārakā, yepi caññe bhikkhū bhaṇḍanakārakā kalahakārakā vivādakārakā bhassakārakā saṅghe adhikaraṇakārakā te upasaṅkamitvā evaṃ vadanti – ‘‘mā kho tumhe, āyasmanto, eso ajesi. Balavābalavaṃ paṭimantetha. Tumhe tena paṇḍitatarā ca byattatarā ca bahussutatarā ca alamattatarā ca 2. Mā cassa bhāyittha. Mayampi tumhākaṃ pakkhā bhavissāmā’’ti. Tena anuppannāni ceva bhaṇḍanāni uppajjanti uppannāni ca bhaṇḍanāni bhiyyobhāvāya vepullāya saṃvattanti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma paṇḍukalohitakā bhikkhū attanā bhaṇḍanakārakā kalahakārakā vivādakārakā bhassakārakā saṅghe adhikaraṇakārakā, yepi caññe bhikkhū bhaṇḍanakārakā kalahakārakā vivādakārakā bhassakārakā saṅghe adhikaraṇakārakā te upasaṅkamitvā evaṃ vakkhanti – ‘mā kho tumhe, āyasmanto, eso ajesi. Balavābalavaṃ paṭimantetha. Tumhe tena paṇḍitatarā ca byattatarā ca bahussutatarā ca alamattatarā ca. Mā cassa bhāyittha. Mayampi tumhākaṃ pakkhā bhavissāmā’ti. Tena anuppannāni ceva bhaṇḍanāni uppajjanti uppannāni ca bhaṇḍanāni bhiyyobhāvāya vepullāya saṃvattantī’’ti.
2. අථ ඛො තෙ භික්‌ඛූ භගවතො එතමත්‌ථං ආරොචෙසුං. අථ ඛො භගවා එතස්‌මිං නිදානෙ එතස්‌මිං පකරණෙ භික්‌ඛුසඞ්‌ඝං සන්‌නිපාතාපෙත්‌වා භික්‌ඛූ පටිපුච්‌ඡි – ‘‘සච්‌චං කිර, භික්‌ඛවෙ, පණ්‌ඩුකලොහිතකා භික්‌ඛූ අත්‌තනා භණ්‌ඩනකාරකා කලහකාරකා විවාදකාරකා භස්‌සකාරකා සඞ්‌ඝෙ අධිකරණකාරකා, යෙපි චඤ්‌ඤෙ භික්‌ඛූ භණ්‌ඩනකාරකා කලහකාරකා විවාදකාරකා භස්‌සකාරකා සඞ්‌ඝෙ අධිකරණකාරකා තෙ උපසඞ්‌කමිත්‌වා එවං වදන්‌ති – ‘මා ඛො තුම්‌හෙ, ආයස්‌මන්‌තො, එසො අජෙසි. බලවාබලවං පටිමන්‌තෙථ. තුම්‌හෙ තෙන පණ්‌ඩිතතරා ච බ්‍යත්‌තතරා ච බහුස්‌සුතතරා ච අලමත්‌තතරා ච. මා චස්‌ස භායිත්‌ථ. මයම්‌පි තුම්‌හාකං පක්‌ඛා භවිස්‌සාමා’ති. තෙන අනුප්‌පන්‌නානි චෙව භණ්‌ඩනානි උප්‌පජ්‌ජන්‌ති, උප්‌පන්‌නානි ච භණ්‌ඩනානි භිය්‍යොභාවාය වෙපුල්‌ලාය සංවත්‌තන්‌තී’’ති? ‘‘සච්‌චං භගවා’’ති. විගරහි බුද්‌ධො භගවා – ‘‘අනනුච්‌ඡවිකං, භික්‌ඛවෙ, තෙසං මොඝපුරිසානං අනනුලොමිකං අප්‌පතිරූපං අස්‌සාමණකං අකප්‌පියං අකරණීයං. කථඤ්‌හි නාම තෙ, භික්‌ඛවෙ, මොඝපුරිසා අත්‌තනා භණ්‌ඩනකාරකා…පෙ.… සඞ්‌ඝෙ අධිකරණකාරකා, යෙපි චඤ්‌ඤෙ භික්‌ඛූ භණ්‌ඩනකාරකා…පෙ.… සඞ්‌ඝෙ අධිකරණකාරකා තෙ උපසඞ්‌කමිත්‌වා එවං වක්‌ඛන්‌ති – ‘මා ඛො තුම්‌හෙ, ආයස්‌මන්‌තො, එසො අජෙසි. බලවාබලවං පටිමන්‌තෙථ. තුම්‌හෙ තෙන පණ්‌ඩිතතරා ච බ්‍යත්‌තතරා ච බහුස්‌සුතතරා ච අලමත්‌තතරා ච. මා චස්‌ස භායිත්‌ථ. මයම්‌පි තුම්‌හාකං පක්‌ඛා භවිස්‌සාමා’ති? තෙන අනුප්‌පන්‌නානි චෙව භණ්‌ඩනානි උප්‌පජ්‌ජන්‌ති, උප්‌පන්‌නානි ච භණ්‌ඩනානි භිය්‍යොභාවාය වෙපුල්‌ලාය සංවත්‌තන්‌ති. නෙතං, භික්‌ඛවෙ, අප්‌පසන්‌නානං වා පසාදාය පසන්‌නානං වා භිය්‍යොභාවාය. අථ ඛ්‌වෙතං, භික්‌ඛවෙ, අප්‌පසන්‌නානඤ්‌චෙව අප්‌පසාදාය පසන්‌නානඤ්‌ච එකච්‌චානං අඤ්‌ඤථත්‌තායා’’ති.
2. Atha kho te bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā bhikkhū paṭipucchi – ‘‘saccaṃ kira, bhikkhave, paṇḍukalohitakā bhikkhū attanā bhaṇḍanakārakā kalahakārakā vivādakārakā bhassakārakā saṅghe adhikaraṇakārakā, yepi caññe bhikkhū bhaṇḍanakārakā kalahakārakā vivādakārakā bhassakārakā saṅghe adhikaraṇakārakā te upasaṅkamitvā evaṃ vadanti – ‘mā kho tumhe, āyasmanto, eso ajesi. Balavābalavaṃ paṭimantetha. Tumhe tena paṇḍitatarā ca byattatarā ca bahussutatarā ca alamattatarā ca. Mā cassa bhāyittha. Mayampi tumhākaṃ pakkhā bhavissāmā’ti. Tena anuppannāni ceva bhaṇḍanāni uppajjanti, uppannāni ca bhaṇḍanāni bhiyyobhāvāya vepullāya saṃvattantī’’ti? ‘‘Saccaṃ bhagavā’’ti. Vigarahi buddho bhagavā – ‘‘ananucchavikaṃ, bhikkhave, tesaṃ moghapurisānaṃ ananulomikaṃ appatirūpaṃ assāmaṇakaṃ akappiyaṃ akaraṇīyaṃ. Kathañhi nāma te, bhikkhave, moghapurisā attanā bhaṇḍanakārakā…pe… saṅghe adhikaraṇakārakā, yepi caññe bhikkhū bhaṇḍanakārakā…pe… saṅghe adhikaraṇakārakā te upasaṅkamitvā evaṃ vakkhanti – ‘mā kho tumhe, āyasmanto, eso ajesi. Balavābalavaṃ paṭimantetha. Tumhe tena paṇḍitatarā ca byattatarā ca bahussutatarā ca alamattatarā ca. Mā cassa bhāyittha. Mayampi tumhākaṃ pakkhā bhavissāmā’ti? Tena anuppannāni ceva bhaṇḍanāni uppajjanti, uppannāni ca bhaṇḍanāni bhiyyobhāvāya vepullāya saṃvattanti. Netaṃ, bhikkhave, appasannānaṃ vā pasādāya pasannānaṃ vā bhiyyobhāvāya. Atha khvetaṃ, bhikkhave, appasannānañceva appasādāya pasannānañca ekaccānaṃ aññathattāyā’’ti.
අථ ඛො භගවා තෙ 3 භික්‌ඛූ අනෙකපරියායෙන විගරහිත්‌වා දුබ්‌භරතාය දුප්‌පොසතාය මහිච්‌ඡතාය අසන්‌තුට්‌ඨිතාය 4 සඞ්‌ගණිකාය කොසජ්‌ජස්‌ස අවණ්‌ණං භාසිත්‌වා අනෙකපරියායෙන සුභරතාය සුපොසතාය අප්‌පිච්‌ඡස්‌ස සන්‌තුට්‌ඨස්‌ස සල්‌ලෙඛස්‌ස ධුතස්‌ස පාසාදිකස්‌ස අපචයස්‌ස වීරියාරම්‌භස්‌ස 5 වණ්‌ණං භාසිත්‌වා භික්‌ඛූනං තදනුච්‌ඡවිකං තදනුලොමිකං ධම්‌මිං කථං කත්‌වා භික්‌ඛූ ආමන්‌තෙසි – ‘‘තෙන හි, භික්‌ඛවෙ, සඞ්‌ඝො පණ්‌ඩුකලොහිතකානං භික්‌ඛූනං තජ්‌ජනීයකම්‌මං කරොතු. එවඤ්‌ච පන, භික්‌ඛවෙ, කාතබ්‌බං. පඨමං පණ්‌ඩුකලොහිතකා භික්‌ඛූ චොදෙතබ්‌බා, චොදෙත්‌වා සාරෙතබ්‌බා, සාරෙත්‌වා ආපත්‌තිං 6 ආරොපෙතබ්‌බා, ආපත්‌තිං ආරොපෙත්‌වා බ්‍යත්‌තෙන භික්‌ඛුනා පටිබලෙන සඞ්‌ඝො ඤාපෙතබ්‌බො –
Atha kho bhagavā te 7 bhikkhū anekapariyāyena vigarahitvā dubbharatāya dupposatāya mahicchatāya asantuṭṭhitāya 8 saṅgaṇikāya kosajjassa avaṇṇaṃ bhāsitvā anekapariyāyena subharatāya suposatāya appicchassa santuṭṭhassa sallekhassa dhutassa pāsādikassa apacayassa vīriyārambhassa 9 vaṇṇaṃ bhāsitvā bhikkhūnaṃ tadanucchavikaṃ tadanulomikaṃ dhammiṃ kathaṃ katvā bhikkhū āmantesi – ‘‘tena hi, bhikkhave, saṅgho paṇḍukalohitakānaṃ bhikkhūnaṃ tajjanīyakammaṃ karotu. Evañca pana, bhikkhave, kātabbaṃ. Paṭhamaṃ paṇḍukalohitakā bhikkhū codetabbā, codetvā sāretabbā, sāretvā āpattiṃ 10 āropetabbā, āpattiṃ āropetvā byattena bhikkhunā paṭibalena saṅgho ñāpetabbo –
3. ‘‘සුණාතු මෙ, භන්‌තෙ, සඞ්‌ඝො. ඉමෙ පණ්‌ඩුකලොහිතකා භික්‌ඛූ අත්‌තනා භණ්‌ඩනකාරකා කලහකාරකා විවාදකාරකා භස්‌සකාරකා සඞ්‌ඝෙ අධිකරණකාරකා, යෙපි චඤ්‌ඤෙ භික්‌ඛූ භණ්‌ඩනකාරකා කලහකාරකා විවාදකාරකා භස්‌සකාරකා සඞ්‌ඝෙ අධිකරණකාරකා තෙ උපසඞ්‌කමිත්‌වා එවං වදන්‌ති – ‘මා ඛො තුම්‌හෙ, ආයස්‌මන්‌තො, එසො අජෙසි. බලවාබලවං පටිමන්‌තෙථ. තුම්‌හෙ තෙන පණ්‌ඩිතතරා ච බ්‍යත්‌තතරා ච බහුස්‌සුතතරා ච අලමත්‌තතරා ච. මා චස්‌ස භායිත්‌ථ. මයම්‌පි තුම්‌හාකං පක්‌ඛා භවිස්‌සාමා’ති. තෙන අනුප්‌පන්‌නානි චෙව භණ්‌ඩනානි උප්‌පජ්‌ජන්‌ති, උප්‌පන්‌නානි ච භණ්‌ඩනානි භිය්‍යොභාවාය වෙපුල්‌ලාය සංවත්‌තන්‌ති. යදි සඞ්‌ඝස්‌ස පත්‌තකල්‌ලං, සඞ්‌ඝො පණ්‌ඩුකලොහිතකානං භික්‌ඛූනං තජ්‌ජනීයකම්‌මං කරෙය්‍ය. එසා ඤත්‌ති.
3. ‘‘Suṇātu me, bhante, saṅgho. Ime paṇḍukalohitakā bhikkhū attanā bhaṇḍanakārakā kalahakārakā vivādakārakā bhassakārakā saṅghe adhikaraṇakārakā, yepi caññe bhikkhū bhaṇḍanakārakā kalahakārakā vivādakārakā bhassakārakā saṅghe adhikaraṇakārakā te upasaṅkamitvā evaṃ vadanti – ‘mā kho tumhe, āyasmanto, eso ajesi. Balavābalavaṃ paṭimantetha. Tumhe tena paṇḍitatarā ca byattatarā ca bahussutatarā ca alamattatarā ca. Mā cassa bhāyittha. Mayampi tumhākaṃ pakkhā bhavissāmā’ti. Tena anuppannāni ceva bhaṇḍanāni uppajjanti, uppannāni ca bhaṇḍanāni bhiyyobhāvāya vepullāya saṃvattanti. Yadi saṅghassa pattakallaṃ, saṅgho paṇḍukalohitakānaṃ bhikkhūnaṃ tajjanīyakammaṃ kareyya. Esā ñatti.
‘‘සුණාතු මෙ, භන්‌තෙ, සඞ්‌ඝො. ඉමෙ පණ්‌ඩුකලොහිතකා භික්‌ඛූ අත්‌තනා භණ්‌ඩනකාරකා…පෙ.… සඞ්‌ඝෙ අධිකරණකාරකා, යෙපි චඤ්‌ඤෙ භික්‌ඛූ භණ්‌ඩනකාරකා…පෙ.… සඞ්‌ඝෙ අධිකරණකාරකා තෙ උපසඞ්‌කමිත්‌වා එවං වදන්‌ති – ‘මා ඛො තුම්‌හෙ, ආයස්‌මන්‌තො, එසො අජෙසි. බලවාබලවං පටිමන්‌තෙථ. තුම්‌හෙ තෙන පණ්‌ඩිතතරා ච බ්‍යත්‌තතරා ච බහුස්‌සුතතරා ච අලමත්‌තතරා ච. මා චස්‌ස භායිත්‌ථ. මයම්‌පි තුම්‌හාකං පක්‌ඛා භවිස්‌සාමා’ති. තෙන අනුප්‌පන්‌නානි චෙව භණ්‌ඩනානි උප්‌පජ්‌ජන්‌ති, උප්‌පන්‌නානි ච භණ්‌ඩනානි භිය්‍යොභාවාය වෙපුල්‌ලාය සංවත්‌තන්‌ති. සඞ්‌ඝො පණ්‌ඩුකලොහිතකානං භික්‌ඛූනං තජ්‌ජනීයකම්‌මං කරොති. යස්‌සායස්‌මතො ඛමති පණ්‌ඩුකලොහිතකානං භික්‌ඛූනං තජ්‌ජනීයස්‌ස කම්‌මස්‌ස කරණං, සො තුණ්‌හස්‌ස; යස්‌ස නක්‌ඛමති, සො භාසෙය්‍ය.
‘‘Suṇātu me, bhante, saṅgho. Ime paṇḍukalohitakā bhikkhū attanā bhaṇḍanakārakā…pe… saṅghe adhikaraṇakārakā, yepi caññe bhikkhū bhaṇḍanakārakā…pe… saṅghe adhikaraṇakārakā te upasaṅkamitvā evaṃ vadanti – ‘mā kho tumhe, āyasmanto, eso ajesi. Balavābalavaṃ paṭimantetha. Tumhe tena paṇḍitatarā ca byattatarā ca bahussutatarā ca alamattatarā ca. Mā cassa bhāyittha. Mayampi tumhākaṃ pakkhā bhavissāmā’ti. Tena anuppannāni ceva bhaṇḍanāni uppajjanti, uppannāni ca bhaṇḍanāni bhiyyobhāvāya vepullāya saṃvattanti. Saṅgho paṇḍukalohitakānaṃ bhikkhūnaṃ tajjanīyakammaṃ karoti. Yassāyasmato khamati paṇḍukalohitakānaṃ bhikkhūnaṃ tajjanīyassa kammassa karaṇaṃ, so tuṇhassa; yassa nakkhamati, so bhāseyya.
‘‘දුතියම්‌පි එතමත්‌ථං වදාමි – සුණාතු මෙ, භන්‌තෙ, සඞ්‌ඝො. ඉමෙ පණ්‌ඩුකලොහිතකා භික්‌ඛූ අත්‌තනා භණ්‌ඩනකාරකා…පෙ.… සඞ්‌ඝෙ අධිකරණකාරකා, යෙපි චඤ්‌ඤෙ භික්‌ඛූ භණ්‌ඩනකාරකා…පෙ.… සඞ්‌ඝෙ අධිකරණකාරකා තෙ උපසඞ්‌කමිත්‌වා එවං වදන්‌ති – ‘මා ඛො තුම්‌හෙ , ආයස්‌මන්‌තො, එසො අජෙසි. බලවාබලවං පටිමන්‌තෙථ. තුම්‌හෙ තෙන පණ්‌ඩිතතරා ච බ්‍යත්‌තතරා ච බහුස්‌සුතතරා ච අලමත්‌තතරා ච. මා චස්‌ස භායිත්‌ථ. මයම්‌පි තුම්‌හාකං පක්‌ඛා භවිස්‌සාමා’ති. තෙන අනුප්‌පන්‌නානි චෙව භණ්‌ඩනානි උප්‌පජ්‌ජන්‌ති, උප්‌පන්‌නානි ච භණ්‌ඩනානි භිය්‍යොභාවාය වෙපුල්‌ලාය සංවත්‌තන්‌ති. සඞ්‌ඝො පණ්‌ඩුකලොහිතකානං භික්‌ඛූනං තජ්‌ජනීයකම්‌මං කරොති. යස්‌සායස්‌මතො ඛමති පණ්‌ඩුකලොහිතකානං භික්‌ඛූනං තජ්‌ජනීයස්‌ස කම්‌මස්‌ස කරණං, සො තුණ්‌හස්‌ස; යස්‌ස නක්‌ඛමති, සො භාසෙය්‍ය.
‘‘Dutiyampi etamatthaṃ vadāmi – suṇātu me, bhante, saṅgho. Ime paṇḍukalohitakā bhikkhū attanā bhaṇḍanakārakā…pe… saṅghe adhikaraṇakārakā, yepi caññe bhikkhū bhaṇḍanakārakā…pe… saṅghe adhikaraṇakārakā te upasaṅkamitvā evaṃ vadanti – ‘mā kho tumhe , āyasmanto, eso ajesi. Balavābalavaṃ paṭimantetha. Tumhe tena paṇḍitatarā ca byattatarā ca bahussutatarā ca alamattatarā ca. Mā cassa bhāyittha. Mayampi tumhākaṃ pakkhā bhavissāmā’ti. Tena anuppannāni ceva bhaṇḍanāni uppajjanti, uppannāni ca bhaṇḍanāni bhiyyobhāvāya vepullāya saṃvattanti. Saṅgho paṇḍukalohitakānaṃ bhikkhūnaṃ tajjanīyakammaṃ karoti. Yassāyasmato khamati paṇḍukalohitakānaṃ bhikkhūnaṃ tajjanīyassa kammassa karaṇaṃ, so tuṇhassa; yassa nakkhamati, so bhāseyya.
‘‘තතියම්‌පි එතමත්‌ථං වදාමි – සුණාතු මෙ, භන්‌තෙ, සඞ්‌ඝො . ඉමෙ පණ්‌ඩුකලොහිතකා භික්‌ඛූ අත්‌තනා භණ්‌ඩනකාරකා…පෙ.… සඞ්‌ඝෙ අධිකරණකාරකා, යෙපි චඤ්‌ඤෙ භික්‌ඛූ භණ්‌ඩනකාරකා…පෙ.… සඞ්‌ඝෙ අධිකරණකාරකා තෙ උපසඞ්‌කමිත්‌වා එවං වදන්‌ති – ‘මා ඛො තුම්‌හෙ, ආයස්‌මන්‌තො, එසො අජෙසි. බලවාබලවං පටිමන්‌තෙථ. තුම්‌හෙ තෙන පණ්‌ඩිතතරා ච බ්‍යත්‌තතරා ච බහුස්‌සුතතරා ච අලමත්‌තතරා ච. මා චස්‌ස භායිත්‌ථ. මයම්‌පි තුම්‌හාකං පක්‌ඛා භවිස්‌සාමා’ති. තෙන අනුප්‌පන්‌නානි චෙව භණ්‌ඩනානි උප්‌පජ්‌ජන්‌ති, උප්‌පන්‌නානි ච භණ්‌ඩනානි භිය්‍යොභාවාය වෙපුල්‌ලාය සංවත්‌තන්‌ති. සඞ්‌ඝො පණ්‌ඩුකලොහිතකානං භික්‌ඛූනං තජ්‌ජනීයකම්‌මං කරොති. යස්‌සායස්‌මතො ඛමති පණ්‌ඩුකලොහිතකානං භික්‌ඛූනං තජ්‌ජනීයස්‌ස කම්‌මස්‌ස කරණං, සො තුණ්‌හස්‌ස; යස්‌ස නක්‌ඛමති, සො භාසෙය්‍ය.
‘‘Tatiyampi etamatthaṃ vadāmi – suṇātu me, bhante, saṅgho . Ime paṇḍukalohitakā bhikkhū attanā bhaṇḍanakārakā…pe… saṅghe adhikaraṇakārakā, yepi caññe bhikkhū bhaṇḍanakārakā…pe… saṅghe adhikaraṇakārakā te upasaṅkamitvā evaṃ vadanti – ‘mā kho tumhe, āyasmanto, eso ajesi. Balavābalavaṃ paṭimantetha. Tumhe tena paṇḍitatarā ca byattatarā ca bahussutatarā ca alamattatarā ca. Mā cassa bhāyittha. Mayampi tumhākaṃ pakkhā bhavissāmā’ti. Tena anuppannāni ceva bhaṇḍanāni uppajjanti, uppannāni ca bhaṇḍanāni bhiyyobhāvāya vepullāya saṃvattanti. Saṅgho paṇḍukalohitakānaṃ bhikkhūnaṃ tajjanīyakammaṃ karoti. Yassāyasmato khamati paṇḍukalohitakānaṃ bhikkhūnaṃ tajjanīyassa kammassa karaṇaṃ, so tuṇhassa; yassa nakkhamati, so bhāseyya.
‘‘කතං සඞ්‌ඝෙන පණ්‌ඩුකලොහිතකානං භික්‌ඛූනං තජ්‌ජනීයකම්‌මං. ඛමති සඞ්‌ඝස්‌ස, තස්‌මා තුණ්‌හී, එවමෙතං ධාරයාමී’’ති.
‘‘Kataṃ saṅghena paṇḍukalohitakānaṃ bhikkhūnaṃ tajjanīyakammaṃ. Khamati saṅghassa, tasmā tuṇhī, evametaṃ dhārayāmī’’ti.
Footnotes:
Related texts:
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / චූළවග්‌ග-අට්‌ඨකථා • Cūḷavagga-aṭṭhakathā / තජ්‌ජනීයකම්‌මකථා • Tajjanīyakammakathā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / තජ්‌ජනීයකම්‌මකථාවණ්‌ණනා • Tajjanīyakammakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / විමතිවිනොදනී-ටීකා • Vimativinodanī-ṭīkā / තජ්‌ජනීයකම්‌මකථාවණ්‌ණනා • Tajjanīyakammakathāvaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 1. තජ්‌ජනීයකම්‌මකථා • 1. Tajjanīyakammakathā
