| Library / Tipiṭaka / တိပိဋက • Tipiṭaka / မဟာဝဂ္ဂပာဠိ • Mahāvaggapāḷi |
၂၆၃. တဇ္ဇနီယကမ္မပဋိပ္ပသ္သဒ္ဓိကထာ
263. Tajjanīyakammapaṭippassaddhikathā
၄၄၀. ဣဓ ပန, ဘိက္ခဝေ, ဘိက္ခု သင္ဃေန တဇ္ဇနီယကမ္မကတော သမ္မာ ဝတ္တတိ, လောမံ ပာတေတိ, နေတ္ထာရံ ဝတ္တတိ, တဇ္ဇနီယသ္သ ကမ္မသ္သ ပဋိပ္ပသ္သဒ္ဓိံ ယာစတိ။ တတ္ရ စေ ဘိက္ခူနံ ဧဝံ ဟောတိ – ‘‘အယံ ခော, အာဝုသော, ဘိက္ခု သင္ဃေန တဇ္ဇနီယကမ္မကတော သမ္မာ ဝတ္တတိ, လောမံ ပာတေတိ, နေတ္ထာရံ ဝတ္တတိ, တဇ္ဇနီယသ္သ ကမ္မသ္သ ပဋိပ္ပသ္သဒ္ဓိံ ယာစတိ။ ဟန္ဒသ္သ မယံ တဇ္ဇနီယကမ္မံ ပဋိပ္ပသ္သမ္ဘေမာ’’တိ။ တေ တသ္သ တဇ္ဇနီယကမ္မံ ပဋိပ္ပသ္သမ္ဘေန္တိ – အဓမ္မေန ဝဂ္ဂာ။ တတ္ရဋ္ဌော သင္ဃော ဝိဝဒတိ – ‘‘အဓမ္မေန ဝဂ္ဂကမ္မံ, အဓမ္မေန သမဂ္ဂကမ္မံ, ဓမ္မေန ဝဂ္ဂကမ္မံ, ဓမ္မပတိရူပကေန ဝဂ္ဂကမ္မံ, ဓမ္မပတိရူပကေန သမဂ္ဂကမ္မံ, အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ။ တတ္ရ, ဘိက္ခဝေ, ယေ တေ ဘိက္ခူ ဧဝမာဟံသု – ‘‘အဓမ္မေန ဝဂ္ဂကမ္မ’’န္တိ, ယေ စ တေ ဘိက္ခူ ဧဝမာဟံသု – ‘‘အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ, ဣမေ တတ္ထ ဘိက္ခူ ဓမ္မဝာဒိနော။
440. Idha pana, bhikkhave, bhikkhu saṅghena tajjanīyakammakato sammā vattati, lomaṃ pāteti, netthāraṃ vattati, tajjanīyassa kammassa paṭippassaddhiṃ yācati. Tatra ce bhikkhūnaṃ evaṃ hoti – ‘‘ayaṃ kho, āvuso, bhikkhu saṅghena tajjanīyakammakato sammā vattati, lomaṃ pāteti, netthāraṃ vattati, tajjanīyassa kammassa paṭippassaddhiṃ yācati. Handassa mayaṃ tajjanīyakammaṃ paṭippassambhemā’’ti. Te tassa tajjanīyakammaṃ paṭippassambhenti – adhammena vaggā. Tatraṭṭho saṅgho vivadati – ‘‘adhammena vaggakammaṃ, adhammena samaggakammaṃ, dhammena vaggakammaṃ, dhammapatirūpakena vaggakammaṃ, dhammapatirūpakena samaggakammaṃ, akataṃ kammaṃ dukkaṭaṃ kammaṃ puna kātabbaṃ kamma’’nti. Tatra, bhikkhave, ye te bhikkhū evamāhaṃsu – ‘‘adhammena vaggakamma’’nti, ye ca te bhikkhū evamāhaṃsu – ‘‘akataṃ kammaṃ dukkaṭaṃ kammaṃ puna kātabbaṃ kamma’’nti, ime tattha bhikkhū dhammavādino.
၄၄၁. ဣဓ ပန, ဘိက္ခဝေ, ဘိက္ခု သင္ဃေန တဇ္ဇနီယကမ္မကတော သမ္မာ ဝတ္တတိ, လောမံ ပာတေတိ, နေတ္ထာရံ ဝတ္တတိ, တဇ္ဇနီယသ္သ ကမ္မသ္သ ပဋိပ္ပသ္သဒ္ဓိံ ယာစတိ။ တတ္ရ စေ ဘိက္ခူနံ ဧဝံ ဟောတိ – ‘‘အယံ ခော, အာဝုသော, ဘိက္ခု သင္ဃေန တဇ္ဇနီယကမ္မကတော သမ္မာ ဝတ္တတိ, လောမံ ပာတေတိ, နေတ္ထာရံ ဝတ္တတိ, တဇ္ဇနီယသ္သ ကမ္မသ္သ ပဋိပ္ပသ္သဒ္ဓိံ ယာစတိ။ ဟန္ဒသ္သ မယံ တဇ္ဇနီယကမ္မံ ပဋိပ္ပသ္သမ္ဘေမာ’’တိ။ တေ တသ္သ တဇ္ဇနီယကမ္မံ ပဋိပ္ပသ္သမ္ဘေန္တိ – အဓမ္မေန သမဂ္ဂာ။ တတ္ရဋ္ဌော သင္ဃော ဝိဝဒတိ – ‘‘အဓမ္မေန ဝဂ္ဂကမ္မံ, အဓမ္မေန သမဂ္ဂကမ္မံ, ဓမ္မေန ဝဂ္ဂကမ္မံ, ဓမ္မပတိရူပကေန ဝဂ္ဂကမ္မံ, ဓမ္မပတိရူပကေန သမဂ္ဂကမ္မံ, အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ။ တတ္ရ, ဘိက္ခဝေ, ယေ တေ ဘိက္ခူ ဧဝမာဟံသု – ‘‘အဓမ္မေန သမဂ္ဂကမ္မ’’န္တိ, ယေ စ တေ ဘိက္ခူ ဧဝမာဟံသု – ‘‘အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ, ဣမေ တတ္ထ ဘိက္ခူ ဓမ္မဝာဒိနော။
441. Idha pana, bhikkhave, bhikkhu saṅghena tajjanīyakammakato sammā vattati, lomaṃ pāteti, netthāraṃ vattati, tajjanīyassa kammassa paṭippassaddhiṃ yācati. Tatra ce bhikkhūnaṃ evaṃ hoti – ‘‘ayaṃ kho, āvuso, bhikkhu saṅghena tajjanīyakammakato sammā vattati, lomaṃ pāteti, netthāraṃ vattati, tajjanīyassa kammassa paṭippassaddhiṃ yācati. Handassa mayaṃ tajjanīyakammaṃ paṭippassambhemā’’ti. Te tassa tajjanīyakammaṃ paṭippassambhenti – adhammena samaggā. Tatraṭṭho saṅgho vivadati – ‘‘adhammena vaggakammaṃ, adhammena samaggakammaṃ, dhammena vaggakammaṃ, dhammapatirūpakena vaggakammaṃ, dhammapatirūpakena samaggakammaṃ, akataṃ kammaṃ dukkaṭaṃ kammaṃ puna kātabbaṃ kamma’’nti. Tatra, bhikkhave, ye te bhikkhū evamāhaṃsu – ‘‘adhammena samaggakamma’’nti, ye ca te bhikkhū evamāhaṃsu – ‘‘akataṃ kammaṃ dukkaṭaṃ kammaṃ puna kātabbaṃ kamma’’nti, ime tattha bhikkhū dhammavādino.
၄၄၂. ဣဓ ပန, ဘိက္ခဝေ, ဘိက္ခု သင္ဃေန တဇ္ဇနီယကမ္မကတော သမ္မာ ဝတ္တတိ, လောမံ ပာတေတိ, နေတ္ထာရံ ဝတ္တတိ, တဇ္ဇနီယသ္သ ကမ္မသ္သ ပဋိပ္ပသ္သဒ္ဓိံ ယာစတိ။ တတ္ရ စေ ဘိက္ခူနံ ဧဝံ ဟောတိ – ‘‘အယံ ခော, အာဝုသော , ဘိက္ခု သင္ဃေန တဇ္ဇနီယကမ္မကတော သမ္မာ ဝတ္တတိ, လောမံ ပာတေတိ, နေတ္ထာရံ ဝတ္တတိ, တဇ္ဇနီယသ္သ ကမ္မသ္သ ပဋိပ္ပသ္သဒ္ဓိံ ယာစတိ။ ဟန္ဒသ္သ မယံ တဇ္ဇနီယကမ္မံ ပဋိပ္ပသ္သမ္ဘေမာ’’တိ။ တေ တသ္သ တဇ္ဇနီယကမ္မံ ပဋိပ္ပသ္သမ္ဘေန္တိ – ဓမ္မေန ဝဂ္ဂာ။ တတ္ရဋ္ဌော သင္ဃော ဝိဝဒတိ – ‘‘အဓမ္မေန ဝဂ္ဂကမ္မံ, အဓမ္မေန သမဂ္ဂကမ္မံ, ဓမ္မေန ဝဂ္ဂကမ္မံ, ဓမ္မပတိရူပကေန ဝဂ္ဂကမ္မံ, ဓမ္မပတိရူပကေန သမဂ္ဂကမ္မံ, အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ။ တတ္ရ, ဘိက္ခဝေ, ယေ တေ ဘိက္ခူ ဧဝမာဟံသု – ‘‘ဓမ္မေန ဝဂ္ဂကမ္မ’’န္တိ ယေ စ တေ ဘိက္ခူ ဧဝမာဟံသု – ‘‘အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ, ဣမေ တတ္ထ ဘိက္ခူ ဓမ္မဝာဒိနော။
442. Idha pana, bhikkhave, bhikkhu saṅghena tajjanīyakammakato sammā vattati, lomaṃ pāteti, netthāraṃ vattati, tajjanīyassa kammassa paṭippassaddhiṃ yācati. Tatra ce bhikkhūnaṃ evaṃ hoti – ‘‘ayaṃ kho, āvuso , bhikkhu saṅghena tajjanīyakammakato sammā vattati, lomaṃ pāteti, netthāraṃ vattati, tajjanīyassa kammassa paṭippassaddhiṃ yācati. Handassa mayaṃ tajjanīyakammaṃ paṭippassambhemā’’ti. Te tassa tajjanīyakammaṃ paṭippassambhenti – dhammena vaggā. Tatraṭṭho saṅgho vivadati – ‘‘adhammena vaggakammaṃ, adhammena samaggakammaṃ, dhammena vaggakammaṃ, dhammapatirūpakena vaggakammaṃ, dhammapatirūpakena samaggakammaṃ, akataṃ kammaṃ dukkaṭaṃ kammaṃ puna kātabbaṃ kamma’’nti. Tatra, bhikkhave, ye te bhikkhū evamāhaṃsu – ‘‘dhammena vaggakamma’’nti ye ca te bhikkhū evamāhaṃsu – ‘‘akataṃ kammaṃ dukkaṭaṃ kammaṃ puna kātabbaṃ kamma’’nti, ime tattha bhikkhū dhammavādino.
၄၄၃. ဣဓ ပန, ဘိက္ခဝေ, ဘိက္ခု သင္ဃေန တဇ္ဇနီယကမ္မကတော သမ္မာ ဝတ္တတိ, လောမံ ပာတေတိ, နေတ္ထာရံ ဝတ္တတိ, တဇ္ဇနီယသ္သ ကမ္မသ္သ ပဋိပ္ပသ္သဒ္ဓိံ ယာစတိ။ တတ္ရ စေ ဘိက္ခူနံ ဧဝံ ဟောတိ – ‘‘အယံ ခော, အာဝုသော, ဘိက္ခု သင္ဃေန တဇ္ဇနီယကမ္မကတော သမ္မာ ဝတ္တတိ, လောမံ ပာတေတိ, နေတ္ထာရံ ဝတ္တတိ, တဇ္ဇနီယသ္သ ကမ္မသ္သ ပဋိပ္ပသ္သဒ္ဓိံ ယာစတိ။ ဟန္ဒသ္သ မယံ တဇ္ဇနီယကမ္မံ ပဋိပ္ပသ္သမ္ဘေမာ’’တိ။ တေ တသ္သ တဇ္ဇနီယကမ္မံ ပဋိပ္ပသ္သမ္ဘေန္တိ – ဓမ္မပတိရူပကေန ဝဂ္ဂာ။ တတ္ရဋ္ဌော သင္ဃော ဝိဝဒတိ – ‘‘အဓမ္မေန ဝဂ္ဂကမ္မံ, အဓမ္မေန သမဂ္ဂကမ္မံ, ဓမ္မေန ဝဂ္ဂကမ္မံ, ဓမ္မပတိရူပကေန ဝဂ္ဂကမ္မံ, ဓမ္မပတိရူပကေန သမဂ္ဂကမ္မံ, အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ။ တတ္ရ , ဘိက္ခဝေ, ယေ တေ ဘိက္ခူ ဧဝမာဟံသု – ‘‘ဓမ္မပတိရူပကေန ဝဂ္ဂကမ္မ’’န္တိ, ယေ စ တေ ဘိက္ခူ ဧဝမာဟံသု – ‘‘အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ, ဣမေ တတ္ထ ဘိက္ခူ ဓမ္မဝာဒိနော။
443. Idha pana, bhikkhave, bhikkhu saṅghena tajjanīyakammakato sammā vattati, lomaṃ pāteti, netthāraṃ vattati, tajjanīyassa kammassa paṭippassaddhiṃ yācati. Tatra ce bhikkhūnaṃ evaṃ hoti – ‘‘ayaṃ kho, āvuso, bhikkhu saṅghena tajjanīyakammakato sammā vattati, lomaṃ pāteti, netthāraṃ vattati, tajjanīyassa kammassa paṭippassaddhiṃ yācati. Handassa mayaṃ tajjanīyakammaṃ paṭippassambhemā’’ti. Te tassa tajjanīyakammaṃ paṭippassambhenti – dhammapatirūpakena vaggā. Tatraṭṭho saṅgho vivadati – ‘‘adhammena vaggakammaṃ, adhammena samaggakammaṃ, dhammena vaggakammaṃ, dhammapatirūpakena vaggakammaṃ, dhammapatirūpakena samaggakammaṃ, akataṃ kammaṃ dukkaṭaṃ kammaṃ puna kātabbaṃ kamma’’nti. Tatra , bhikkhave, ye te bhikkhū evamāhaṃsu – ‘‘dhammapatirūpakena vaggakamma’’nti, ye ca te bhikkhū evamāhaṃsu – ‘‘akataṃ kammaṃ dukkaṭaṃ kammaṃ puna kātabbaṃ kamma’’nti, ime tattha bhikkhū dhammavādino.
၄၄၄. ဣဓ ပန, ဘိက္ခဝေ, ဘိက္ခု သင္ဃေန တဇ္ဇနီယကမ္မကတော သမ္မာ ဝတ္တတိ, လောမံ ပာတေတိ, နေတ္ထာရံ ဝတ္တတိ, တဇ္ဇနီယသ္သ ကမ္မသ္သ ပဋိပ္ပသ္သဒ္ဓိံ ယာစတိ။ တတ္ရ စေ ဘိက္ခူနံ ဧဝံ ဟောတိ – ‘‘အယံ ခော, အာဝုသော, ဘိက္ခု သင္ဃေန တဇ္ဇနီယကမ္မကတော သမ္မာ ဝတ္တတိ, လောမံ ပာတေတိ, နေတ္ထာရံ ဝတ္တတိ, တဇ္ဇနီယသ္သ ကမ္မသ္သ ပဋိပ္ပသ္သဒ္ဓိံ ယာစတိ။ ဟန္ဒသ္သ မယံ တဇ္ဇနီယကမ္မံ ပဋိပ္ပသ္သမ္ဘေမာ’’တိ။ တေ တသ္သ တဇ္ဇနီယကမ္မံ ပဋိပ္ပသ္သမ္ဘေန္တိ – ဓမ္မပတိရူပကေန သမဂ္ဂာ။ တတ္ရဋ္ဌော သင္ဃော ဝိဝဒတိ – ‘‘အဓမ္မေန ဝဂ္ဂကမ္မံ, အဓမ္မေန သမဂ္ဂကမ္မံ, ဓမ္မေန ဝဂ္ဂကမ္မံ, ဓမ္မပတိရူပကေန ဝဂ္ဂကမ္မံ, ဓမ္မပတိရူပကေန သမဂ္ဂကမ္မံ, အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ။ တတ္ရ, ဘိက္ခဝေ, ယေ တေ ဘိက္ခူ ဧဝမာဟံသု – ‘‘ဓမ္မပတိရူပကေန သမဂ္ဂကမ္မ’’န္တိ, ယေ စ တေ ဘိက္ခူ ဧဝမာဟံသု – ‘‘အကတံ ကမ္မံ ဒုက္ကဋံ ကမ္မံ ပုန ကာတဗ္ဗံ ကမ္မ’’န္တိ, ဣမေ တတ္ထ ဘိက္ခူ ဓမ္မဝာဒိနော။
444. Idha pana, bhikkhave, bhikkhu saṅghena tajjanīyakammakato sammā vattati, lomaṃ pāteti, netthāraṃ vattati, tajjanīyassa kammassa paṭippassaddhiṃ yācati. Tatra ce bhikkhūnaṃ evaṃ hoti – ‘‘ayaṃ kho, āvuso, bhikkhu saṅghena tajjanīyakammakato sammā vattati, lomaṃ pāteti, netthāraṃ vattati, tajjanīyassa kammassa paṭippassaddhiṃ yācati. Handassa mayaṃ tajjanīyakammaṃ paṭippassambhemā’’ti. Te tassa tajjanīyakammaṃ paṭippassambhenti – dhammapatirūpakena samaggā. Tatraṭṭho saṅgho vivadati – ‘‘adhammena vaggakammaṃ, adhammena samaggakammaṃ, dhammena vaggakammaṃ, dhammapatirūpakena vaggakammaṃ, dhammapatirūpakena samaggakammaṃ, akataṃ kammaṃ dukkaṭaṃ kammaṃ puna kātabbaṃ kamma’’nti. Tatra, bhikkhave, ye te bhikkhū evamāhaṃsu – ‘‘dhammapatirūpakena samaggakamma’’nti, ye ca te bhikkhū evamāhaṃsu – ‘‘akataṃ kammaṃ dukkaṭaṃ kammaṃ puna kātabbaṃ kamma’’nti, ime tattha bhikkhū dhammavādino.
တဇ္ဇနီယကမ္မပဋိပ္ပသ္သဒ္ဓိကထာ နိဋ္ဌိတာ။
Tajjanīyakammapaṭippassaddhikathā niṭṭhitā.
