| Library / Tipiṭaka / තිපිටක • Tipiṭaka / මහාවග්‌ගපාළි • Mahāvaggapāḷi |
263. තජ්‌ජනීයකම්‌මපටිප්‌පස්‌සද්‌ධිකථා
263. Tajjanīyakammapaṭippassaddhikathā
440. ඉධ පන, භික්‌ඛවෙ, භික්‌ඛු සඞ්‌ඝෙන තජ්‌ජනීයකම්‌මකතො සම්‌මා වත්‌තති, ලොමං පාතෙති, නෙත්‌ථාරං වත්‌තති, තජ්‌ජනීයස්‌ස කම්‌මස්‌ස පටිප්‌පස්‌සද්‌ධිං යාචති. තත්‍ර චෙ භික්‌ඛූනං එවං හොති – ‘‘අයං ඛො, ආවුසො, භික්‌ඛු සඞ්‌ඝෙන තජ්‌ජනීයකම්‌මකතො සම්‌මා වත්‌තති, ලොමං පාතෙති, නෙත්‌ථාරං වත්‌තති, තජ්‌ජනීයස්‌ස කම්‌මස්‌ස පටිප්‌පස්‌සද්‌ධිං යාචති. හන්‌දස්‌ස මයං තජ්‌ජනීයකම්‌මං පටිප්‌පස්‌සම්‌භෙමා’’ති. තෙ තස්‌ස තජ්‌ජනීයකම්‌මං පටිප්‌පස්‌සම්‌භෙන්‌ති – අධම්‌මෙන වග්‌ගා. තත්‍රට්‌ඨො සඞ්‌ඝො විවදති – ‘‘අධම්‌මෙන වග්‌ගකම්‌මං, අධම්‌මෙන සමග්‌ගකම්‌මං, ධම්‌මෙන වග්‌ගකම්‌මං, ධම්‌මපතිරූපකෙන වග්‌ගකම්‌මං, ධම්‌මපතිරූපකෙන සමග්‌ගකම්‌මං, අකතං කම්‌මං දුක්‌කටං කම්‌මං පුන කාතබ්‌බං කම්‌ම’’න්‌ති. තත්‍ර, භික්‌ඛවෙ, යෙ තෙ භික්‌ඛූ එවමාහංසු – ‘‘අධම්‌මෙන වග්‌ගකම්‌ම’’න්‌ති, යෙ ච තෙ භික්‌ඛූ එවමාහංසු – ‘‘අකතං කම්‌මං දුක්‌කටං කම්‌මං පුන කාතබ්‌බං කම්‌ම’’න්‌ති, ඉමෙ තත්‌ථ භික්‌ඛූ ධම්‌මවාදිනො.
440. Idha pana, bhikkhave, bhikkhu saṅghena tajjanīyakammakato sammā vattati, lomaṃ pāteti, netthāraṃ vattati, tajjanīyassa kammassa paṭippassaddhiṃ yācati. Tatra ce bhikkhūnaṃ evaṃ hoti – ‘‘ayaṃ kho, āvuso, bhikkhu saṅghena tajjanīyakammakato sammā vattati, lomaṃ pāteti, netthāraṃ vattati, tajjanīyassa kammassa paṭippassaddhiṃ yācati. Handassa mayaṃ tajjanīyakammaṃ paṭippassambhemā’’ti. Te tassa tajjanīyakammaṃ paṭippassambhenti – adhammena vaggā. Tatraṭṭho saṅgho vivadati – ‘‘adhammena vaggakammaṃ, adhammena samaggakammaṃ, dhammena vaggakammaṃ, dhammapatirūpakena vaggakammaṃ, dhammapatirūpakena samaggakammaṃ, akataṃ kammaṃ dukkaṭaṃ kammaṃ puna kātabbaṃ kamma’’nti. Tatra, bhikkhave, ye te bhikkhū evamāhaṃsu – ‘‘adhammena vaggakamma’’nti, ye ca te bhikkhū evamāhaṃsu – ‘‘akataṃ kammaṃ dukkaṭaṃ kammaṃ puna kātabbaṃ kamma’’nti, ime tattha bhikkhū dhammavādino.
441. ඉධ පන, භික්‌ඛවෙ, භික්‌ඛු සඞ්‌ඝෙන තජ්‌ජනීයකම්‌මකතො සම්‌මා වත්‌තති, ලොමං පාතෙති, නෙත්‌ථාරං වත්‌තති, තජ්‌ජනීයස්‌ස කම්‌මස්‌ස පටිප්‌පස්‌සද්‌ධිං යාචති. තත්‍ර චෙ භික්‌ඛූනං එවං හොති – ‘‘අයං ඛො, ආවුසො, භික්‌ඛු සඞ්‌ඝෙන තජ්‌ජනීයකම්‌මකතො සම්‌මා වත්‌තති, ලොමං පාතෙති, නෙත්‌ථාරං වත්‌තති, තජ්‌ජනීයස්‌ස කම්‌මස්‌ස පටිප්‌පස්‌සද්‌ධිං යාචති. හන්‌දස්‌ස මයං තජ්‌ජනීයකම්‌මං පටිප්‌පස්‌සම්‌භෙමා’’ති. තෙ තස්‌ස තජ්‌ජනීයකම්‌මං පටිප්‌පස්‌සම්‌භෙන්‌ති – අධම්‌මෙන සමග්‌ගා. තත්‍රට්‌ඨො සඞ්‌ඝො විවදති – ‘‘අධම්‌මෙන වග්‌ගකම්‌මං, අධම්‌මෙන සමග්‌ගකම්‌මං, ධම්‌මෙන වග්‌ගකම්‌මං, ධම්‌මපතිරූපකෙන වග්‌ගකම්‌මං, ධම්‌මපතිරූපකෙන සමග්‌ගකම්‌මං, අකතං කම්‌මං දුක්‌කටං කම්‌මං පුන කාතබ්‌බං කම්‌ම’’න්‌ති. තත්‍ර, භික්‌ඛවෙ, යෙ තෙ භික්‌ඛූ එවමාහංසු – ‘‘අධම්‌මෙන සමග්‌ගකම්‌ම’’න්‌ති, යෙ ච තෙ භික්‌ඛූ එවමාහංසු – ‘‘අකතං කම්‌මං දුක්‌කටං කම්‌මං පුන කාතබ්‌බං කම්‌ම’’න්‌ති, ඉමෙ තත්‌ථ භික්‌ඛූ ධම්‌මවාදිනො.
441. Idha pana, bhikkhave, bhikkhu saṅghena tajjanīyakammakato sammā vattati, lomaṃ pāteti, netthāraṃ vattati, tajjanīyassa kammassa paṭippassaddhiṃ yācati. Tatra ce bhikkhūnaṃ evaṃ hoti – ‘‘ayaṃ kho, āvuso, bhikkhu saṅghena tajjanīyakammakato sammā vattati, lomaṃ pāteti, netthāraṃ vattati, tajjanīyassa kammassa paṭippassaddhiṃ yācati. Handassa mayaṃ tajjanīyakammaṃ paṭippassambhemā’’ti. Te tassa tajjanīyakammaṃ paṭippassambhenti – adhammena samaggā. Tatraṭṭho saṅgho vivadati – ‘‘adhammena vaggakammaṃ, adhammena samaggakammaṃ, dhammena vaggakammaṃ, dhammapatirūpakena vaggakammaṃ, dhammapatirūpakena samaggakammaṃ, akataṃ kammaṃ dukkaṭaṃ kammaṃ puna kātabbaṃ kamma’’nti. Tatra, bhikkhave, ye te bhikkhū evamāhaṃsu – ‘‘adhammena samaggakamma’’nti, ye ca te bhikkhū evamāhaṃsu – ‘‘akataṃ kammaṃ dukkaṭaṃ kammaṃ puna kātabbaṃ kamma’’nti, ime tattha bhikkhū dhammavādino.
442. ඉධ පන, භික්‌ඛවෙ, භික්‌ඛු සඞ්‌ඝෙන තජ්‌ජනීයකම්‌මකතො සම්‌මා වත්‌තති, ලොමං පාතෙති, නෙත්‌ථාරං වත්‌තති, තජ්‌ජනීයස්‌ස කම්‌මස්‌ස පටිප්‌පස්‌සද්‌ධිං යාචති. තත්‍ර චෙ භික්‌ඛූනං එවං හොති – ‘‘අයං ඛො, ආවුසො , භික්‌ඛු සඞ්‌ඝෙන තජ්‌ජනීයකම්‌මකතො සම්‌මා වත්‌තති, ලොමං පාතෙති, නෙත්‌ථාරං වත්‌තති, තජ්‌ජනීයස්‌ස කම්‌මස්‌ස පටිප්‌පස්‌සද්‌ධිං යාචති. හන්‌දස්‌ස මයං තජ්‌ජනීයකම්‌මං පටිප්‌පස්‌සම්‌භෙමා’’ති. තෙ තස්‌ස තජ්‌ජනීයකම්‌මං පටිප්‌පස්‌සම්‌භෙන්‌ති – ධම්‌මෙන වග්‌ගා. තත්‍රට්‌ඨො සඞ්‌ඝො විවදති – ‘‘අධම්‌මෙන වග්‌ගකම්‌මං, අධම්‌මෙන සමග්‌ගකම්‌මං, ධම්‌මෙන වග්‌ගකම්‌මං, ධම්‌මපතිරූපකෙන වග්‌ගකම්‌මං, ධම්‌මපතිරූපකෙන සමග්‌ගකම්‌මං, අකතං කම්‌මං දුක්‌කටං කම්‌මං පුන කාතබ්‌බං කම්‌ම’’න්‌ති. තත්‍ර, භික්‌ඛවෙ, යෙ තෙ භික්‌ඛූ එවමාහංසු – ‘‘ධම්‌මෙන වග්‌ගකම්‌ම’’න්‌ති යෙ ච තෙ භික්‌ඛූ එවමාහංසු – ‘‘අකතං කම්‌මං දුක්‌කටං කම්‌මං පුන කාතබ්‌බං කම්‌ම’’න්‌ති, ඉමෙ තත්‌ථ භික්‌ඛූ ධම්‌මවාදිනො.
442. Idha pana, bhikkhave, bhikkhu saṅghena tajjanīyakammakato sammā vattati, lomaṃ pāteti, netthāraṃ vattati, tajjanīyassa kammassa paṭippassaddhiṃ yācati. Tatra ce bhikkhūnaṃ evaṃ hoti – ‘‘ayaṃ kho, āvuso , bhikkhu saṅghena tajjanīyakammakato sammā vattati, lomaṃ pāteti, netthāraṃ vattati, tajjanīyassa kammassa paṭippassaddhiṃ yācati. Handassa mayaṃ tajjanīyakammaṃ paṭippassambhemā’’ti. Te tassa tajjanīyakammaṃ paṭippassambhenti – dhammena vaggā. Tatraṭṭho saṅgho vivadati – ‘‘adhammena vaggakammaṃ, adhammena samaggakammaṃ, dhammena vaggakammaṃ, dhammapatirūpakena vaggakammaṃ, dhammapatirūpakena samaggakammaṃ, akataṃ kammaṃ dukkaṭaṃ kammaṃ puna kātabbaṃ kamma’’nti. Tatra, bhikkhave, ye te bhikkhū evamāhaṃsu – ‘‘dhammena vaggakamma’’nti ye ca te bhikkhū evamāhaṃsu – ‘‘akataṃ kammaṃ dukkaṭaṃ kammaṃ puna kātabbaṃ kamma’’nti, ime tattha bhikkhū dhammavādino.
443. ඉධ පන, භික්‌ඛවෙ, භික්‌ඛු සඞ්‌ඝෙන තජ්‌ජනීයකම්‌මකතො සම්‌මා වත්‌තති, ලොමං පාතෙති, නෙත්‌ථාරං වත්‌තති, තජ්‌ජනීයස්‌ස කම්‌මස්‌ස පටිප්‌පස්‌සද්‌ධිං යාචති. තත්‍ර චෙ භික්‌ඛූනං එවං හොති – ‘‘අයං ඛො, ආවුසො, භික්‌ඛු සඞ්‌ඝෙන තජ්‌ජනීයකම්‌මකතො සම්‌මා වත්‌තති, ලොමං පාතෙති, නෙත්‌ථාරං වත්‌තති, තජ්‌ජනීයස්‌ස කම්‌මස්‌ස පටිප්‌පස්‌සද්‌ධිං යාචති. හන්‌දස්‌ස මයං තජ්‌ජනීයකම්‌මං පටිප්‌පස්‌සම්‌භෙමා’’ති. තෙ තස්‌ස තජ්‌ජනීයකම්‌මං පටිප්‌පස්‌සම්‌භෙන්‌ති – ධම්‌මපතිරූපකෙන වග්‌ගා. තත්‍රට්‌ඨො සඞ්‌ඝො විවදති – ‘‘අධම්‌මෙන වග්‌ගකම්‌මං, අධම්‌මෙන සමග්‌ගකම්‌මං, ධම්‌මෙන වග්‌ගකම්‌මං, ධම්‌මපතිරූපකෙන වග්‌ගකම්‌මං, ධම්‌මපතිරූපකෙන සමග්‌ගකම්‌මං, අකතං කම්‌මං දුක්‌කටං කම්‌මං පුන කාතබ්‌බං කම්‌ම’’න්‌ති. තත්‍ර , භික්‌ඛවෙ, යෙ තෙ භික්‌ඛූ එවමාහංසු – ‘‘ධම්‌මපතිරූපකෙන වග්‌ගකම්‌ම’’න්‌ති, යෙ ච තෙ භික්‌ඛූ එවමාහංසු – ‘‘අකතං කම්‌මං දුක්‌කටං කම්‌මං පුන කාතබ්‌බං කම්‌ම’’න්‌ති, ඉමෙ තත්‌ථ භික්‌ඛූ ධම්‌මවාදිනො.
443. Idha pana, bhikkhave, bhikkhu saṅghena tajjanīyakammakato sammā vattati, lomaṃ pāteti, netthāraṃ vattati, tajjanīyassa kammassa paṭippassaddhiṃ yācati. Tatra ce bhikkhūnaṃ evaṃ hoti – ‘‘ayaṃ kho, āvuso, bhikkhu saṅghena tajjanīyakammakato sammā vattati, lomaṃ pāteti, netthāraṃ vattati, tajjanīyassa kammassa paṭippassaddhiṃ yācati. Handassa mayaṃ tajjanīyakammaṃ paṭippassambhemā’’ti. Te tassa tajjanīyakammaṃ paṭippassambhenti – dhammapatirūpakena vaggā. Tatraṭṭho saṅgho vivadati – ‘‘adhammena vaggakammaṃ, adhammena samaggakammaṃ, dhammena vaggakammaṃ, dhammapatirūpakena vaggakammaṃ, dhammapatirūpakena samaggakammaṃ, akataṃ kammaṃ dukkaṭaṃ kammaṃ puna kātabbaṃ kamma’’nti. Tatra , bhikkhave, ye te bhikkhū evamāhaṃsu – ‘‘dhammapatirūpakena vaggakamma’’nti, ye ca te bhikkhū evamāhaṃsu – ‘‘akataṃ kammaṃ dukkaṭaṃ kammaṃ puna kātabbaṃ kamma’’nti, ime tattha bhikkhū dhammavādino.
444. ඉධ පන, භික්‌ඛවෙ, භික්‌ඛු සඞ්‌ඝෙන තජ්‌ජනීයකම්‌මකතො සම්‌මා වත්‌තති, ලොමං පාතෙති, නෙත්‌ථාරං වත්‌තති, තජ්‌ජනීයස්‌ස කම්‌මස්‌ස පටිප්‌පස්‌සද්‌ධිං යාචති. තත්‍ර චෙ භික්‌ඛූනං එවං හොති – ‘‘අයං ඛො, ආවුසො, භික්‌ඛු සඞ්‌ඝෙන තජ්‌ජනීයකම්‌මකතො සම්‌මා වත්‌තති, ලොමං පාතෙති, නෙත්‌ථාරං වත්‌තති, තජ්‌ජනීයස්‌ස කම්‌මස්‌ස පටිප්‌පස්‌සද්‌ධිං යාචති. හන්‌දස්‌ස මයං තජ්‌ජනීයකම්‌මං පටිප්‌පස්‌සම්‌භෙමා’’ති. තෙ තස්‌ස තජ්‌ජනීයකම්‌මං පටිප්‌පස්‌සම්‌භෙන්‌ති – ධම්‌මපතිරූපකෙන සමග්‌ගා. තත්‍රට්‌ඨො සඞ්‌ඝො විවදති – ‘‘අධම්‌මෙන වග්‌ගකම්‌මං, අධම්‌මෙන සමග්‌ගකම්‌මං, ධම්‌මෙන වග්‌ගකම්‌මං, ධම්‌මපතිරූපකෙන වග්‌ගකම්‌මං, ධම්‌මපතිරූපකෙන සමග්‌ගකම්‌මං, අකතං කම්‌මං දුක්‌කටං කම්‌මං පුන කාතබ්‌බං කම්‌ම’’න්‌ති. තත්‍ර, භික්‌ඛවෙ, යෙ තෙ භික්‌ඛූ එවමාහංසු – ‘‘ධම්‌මපතිරූපකෙන සමග්‌ගකම්‌ම’’න්‌ති, යෙ ච තෙ භික්‌ඛූ එවමාහංසු – ‘‘අකතං කම්‌මං දුක්‌කටං කම්‌මං පුන කාතබ්‌බං කම්‌ම’’න්‌ති, ඉමෙ තත්‌ථ භික්‌ඛූ ධම්‌මවාදිනො.
444. Idha pana, bhikkhave, bhikkhu saṅghena tajjanīyakammakato sammā vattati, lomaṃ pāteti, netthāraṃ vattati, tajjanīyassa kammassa paṭippassaddhiṃ yācati. Tatra ce bhikkhūnaṃ evaṃ hoti – ‘‘ayaṃ kho, āvuso, bhikkhu saṅghena tajjanīyakammakato sammā vattati, lomaṃ pāteti, netthāraṃ vattati, tajjanīyassa kammassa paṭippassaddhiṃ yācati. Handassa mayaṃ tajjanīyakammaṃ paṭippassambhemā’’ti. Te tassa tajjanīyakammaṃ paṭippassambhenti – dhammapatirūpakena samaggā. Tatraṭṭho saṅgho vivadati – ‘‘adhammena vaggakammaṃ, adhammena samaggakammaṃ, dhammena vaggakammaṃ, dhammapatirūpakena vaggakammaṃ, dhammapatirūpakena samaggakammaṃ, akataṃ kammaṃ dukkaṭaṃ kammaṃ puna kātabbaṃ kamma’’nti. Tatra, bhikkhave, ye te bhikkhū evamāhaṃsu – ‘‘dhammapatirūpakena samaggakamma’’nti, ye ca te bhikkhū evamāhaṃsu – ‘‘akataṃ kammaṃ dukkaṭaṃ kammaṃ puna kātabbaṃ kamma’’nti, ime tattha bhikkhū dhammavādino.
තජ්‌ජනීයකම්‌මපටිප්‌පස්‌සද්‌ධිකථා නිට්‌ඨිතා.
Tajjanīyakammapaṭippassaddhikathā niṭṭhitā.
