| Library / Tipiṭaka / ཏིཔིཊཀ • Tipiṭaka / མཧཱཝགྒཔཱལི༹ • Mahāvaggapāḷi |
༢༦༣. ཏཛྫནཱིཡཀམྨཔཊིཔྤསྶདྡྷིཀཐཱ
263. Tajjanīyakammapaṭippassaddhikathā
༤༤༠. ཨིདྷ པན, བྷིཀྑཝེ, བྷིཀྑུ སངྒྷེན ཏཛྫནཱིཡཀམྨཀཏོ སམྨཱ ཝཏྟཏི, ལོམཾ པཱཏེཏི, ནེཏྠཱརཾ ཝཏྟཏི, ཏཛྫནཱིཡསྶ ཀམྨསྶ པཊིཔྤསྶདྡྷིཾ ཡཱཙཏི། ཏཏྲ ཙེ བྷིཀྑཱུནཾ ཨེཝཾ ཧོཏི – ‘‘ཨཡཾ ཁོ, ཨཱཝུསོ, བྷིཀྑུ སངྒྷེན ཏཛྫནཱིཡཀམྨཀཏོ སམྨཱ ཝཏྟཏི, ལོམཾ པཱཏེཏི, ནེཏྠཱརཾ ཝཏྟཏི, ཏཛྫནཱིཡསྶ ཀམྨསྶ པཊིཔྤསྶདྡྷིཾ ཡཱཙཏི། ཧནྡསྶ མཡཾ ཏཛྫནཱིཡཀམྨཾ པཊིཔྤསྶམྦྷེམཱ’’ཏི། ཏེ ཏསྶ ཏཛྫནཱིཡཀམྨཾ པཊིཔྤསྶམྦྷེནྟི – ཨདྷམྨེན ཝགྒཱ། ཏཏྲཊྛོ སངྒྷོ ཝིཝདཏི – ‘‘ཨདྷམྨེན ཝགྒཀམྨཾ, ཨདྷམྨེན སམགྒཀམྨཾ, དྷམྨེན ཝགྒཀམྨཾ, དྷམྨཔཏིརཱུཔཀེན ཝགྒཀམྨཾ, དྷམྨཔཏིརཱུཔཀེན སམགྒཀམྨཾ, ཨཀཏཾ ཀམྨཾ དུཀྐཊཾ ཀམྨཾ པུན ཀཱཏབྦཾ ཀམྨ’’ནྟི། ཏཏྲ, བྷིཀྑཝེ, ཡེ ཏེ བྷིཀྑཱུ ཨེཝམཱཧཾསུ – ‘‘ཨདྷམྨེན ཝགྒཀམྨ’’ནྟི, ཡེ ཙ ཏེ བྷིཀྑཱུ ཨེཝམཱཧཾསུ – ‘‘ཨཀཏཾ ཀམྨཾ དུཀྐཊཾ ཀམྨཾ པུན ཀཱཏབྦཾ ཀམྨ’’ནྟི, ཨིམེ ཏཏྠ བྷིཀྑཱུ དྷམྨཝཱདིནོ།
440. Idha pana, bhikkhave, bhikkhu saṅghena tajjanīyakammakato sammā vattati, lomaṃ pāteti, netthāraṃ vattati, tajjanīyassa kammassa paṭippassaddhiṃ yācati. Tatra ce bhikkhūnaṃ evaṃ hoti – ‘‘ayaṃ kho, āvuso, bhikkhu saṅghena tajjanīyakammakato sammā vattati, lomaṃ pāteti, netthāraṃ vattati, tajjanīyassa kammassa paṭippassaddhiṃ yācati. Handassa mayaṃ tajjanīyakammaṃ paṭippassambhemā’’ti. Te tassa tajjanīyakammaṃ paṭippassambhenti – adhammena vaggā. Tatraṭṭho saṅgho vivadati – ‘‘adhammena vaggakammaṃ, adhammena samaggakammaṃ, dhammena vaggakammaṃ, dhammapatirūpakena vaggakammaṃ, dhammapatirūpakena samaggakammaṃ, akataṃ kammaṃ dukkaṭaṃ kammaṃ puna kātabbaṃ kamma’’nti. Tatra, bhikkhave, ye te bhikkhū evamāhaṃsu – ‘‘adhammena vaggakamma’’nti, ye ca te bhikkhū evamāhaṃsu – ‘‘akataṃ kammaṃ dukkaṭaṃ kammaṃ puna kātabbaṃ kamma’’nti, ime tattha bhikkhū dhammavādino.
༤༤༡. ཨིདྷ པན, བྷིཀྑཝེ, བྷིཀྑུ སངྒྷེན ཏཛྫནཱིཡཀམྨཀཏོ སམྨཱ ཝཏྟཏི, ལོམཾ པཱཏེཏི, ནེཏྠཱརཾ ཝཏྟཏི, ཏཛྫནཱིཡསྶ ཀམྨསྶ པཊིཔྤསྶདྡྷིཾ ཡཱཙཏི། ཏཏྲ ཙེ བྷིཀྑཱུནཾ ཨེཝཾ ཧོཏི – ‘‘ཨཡཾ ཁོ, ཨཱཝུསོ, བྷིཀྑུ སངྒྷེན ཏཛྫནཱིཡཀམྨཀཏོ སམྨཱ ཝཏྟཏི, ལོམཾ པཱཏེཏི, ནེཏྠཱརཾ ཝཏྟཏི, ཏཛྫནཱིཡསྶ ཀམྨསྶ པཊིཔྤསྶདྡྷིཾ ཡཱཙཏི། ཧནྡསྶ མཡཾ ཏཛྫནཱིཡཀམྨཾ པཊིཔྤསྶམྦྷེམཱ’’ཏི། ཏེ ཏསྶ ཏཛྫནཱིཡཀམྨཾ པཊིཔྤསྶམྦྷེནྟི – ཨདྷམྨེན སམགྒཱ། ཏཏྲཊྛོ སངྒྷོ ཝིཝདཏི – ‘‘ཨདྷམྨེན ཝགྒཀམྨཾ, ཨདྷམྨེན སམགྒཀམྨཾ, དྷམྨེན ཝགྒཀམྨཾ, དྷམྨཔཏིརཱུཔཀེན ཝགྒཀམྨཾ, དྷམྨཔཏིརཱུཔཀེན སམགྒཀམྨཾ, ཨཀཏཾ ཀམྨཾ དུཀྐཊཾ ཀམྨཾ པུན ཀཱཏབྦཾ ཀམྨ’’ནྟི། ཏཏྲ, བྷིཀྑཝེ, ཡེ ཏེ བྷིཀྑཱུ ཨེཝམཱཧཾསུ – ‘‘ཨདྷམྨེན སམགྒཀམྨ’’ནྟི, ཡེ ཙ ཏེ བྷིཀྑཱུ ཨེཝམཱཧཾསུ – ‘‘ཨཀཏཾ ཀམྨཾ དུཀྐཊཾ ཀམྨཾ པུན ཀཱཏབྦཾ ཀམྨ’’ནྟི, ཨིམེ ཏཏྠ བྷིཀྑཱུ དྷམྨཝཱདིནོ།
441. Idha pana, bhikkhave, bhikkhu saṅghena tajjanīyakammakato sammā vattati, lomaṃ pāteti, netthāraṃ vattati, tajjanīyassa kammassa paṭippassaddhiṃ yācati. Tatra ce bhikkhūnaṃ evaṃ hoti – ‘‘ayaṃ kho, āvuso, bhikkhu saṅghena tajjanīyakammakato sammā vattati, lomaṃ pāteti, netthāraṃ vattati, tajjanīyassa kammassa paṭippassaddhiṃ yācati. Handassa mayaṃ tajjanīyakammaṃ paṭippassambhemā’’ti. Te tassa tajjanīyakammaṃ paṭippassambhenti – adhammena samaggā. Tatraṭṭho saṅgho vivadati – ‘‘adhammena vaggakammaṃ, adhammena samaggakammaṃ, dhammena vaggakammaṃ, dhammapatirūpakena vaggakammaṃ, dhammapatirūpakena samaggakammaṃ, akataṃ kammaṃ dukkaṭaṃ kammaṃ puna kātabbaṃ kamma’’nti. Tatra, bhikkhave, ye te bhikkhū evamāhaṃsu – ‘‘adhammena samaggakamma’’nti, ye ca te bhikkhū evamāhaṃsu – ‘‘akataṃ kammaṃ dukkaṭaṃ kammaṃ puna kātabbaṃ kamma’’nti, ime tattha bhikkhū dhammavādino.
༤༤༢. ཨིདྷ པན, བྷིཀྑཝེ, བྷིཀྑུ སངྒྷེན ཏཛྫནཱིཡཀམྨཀཏོ སམྨཱ ཝཏྟཏི, ལོམཾ པཱཏེཏི, ནེཏྠཱརཾ ཝཏྟཏི, ཏཛྫནཱིཡསྶ ཀམྨསྶ པཊིཔྤསྶདྡྷིཾ ཡཱཙཏི། ཏཏྲ ཙེ བྷིཀྑཱུནཾ ཨེཝཾ ཧོཏི – ‘‘ཨཡཾ ཁོ, ཨཱཝུསོ , བྷིཀྑུ སངྒྷེན ཏཛྫནཱིཡཀམྨཀཏོ སམྨཱ ཝཏྟཏི, ལོམཾ པཱཏེཏི, ནེཏྠཱརཾ ཝཏྟཏི, ཏཛྫནཱིཡསྶ ཀམྨསྶ པཊིཔྤསྶདྡྷིཾ ཡཱཙཏི། ཧནྡསྶ མཡཾ ཏཛྫནཱིཡཀམྨཾ པཊིཔྤསྶམྦྷེམཱ’’ཏི། ཏེ ཏསྶ ཏཛྫནཱིཡཀམྨཾ པཊིཔྤསྶམྦྷེནྟི – དྷམྨེན ཝགྒཱ། ཏཏྲཊྛོ སངྒྷོ ཝིཝདཏི – ‘‘ཨདྷམྨེན ཝགྒཀམྨཾ, ཨདྷམྨེན སམགྒཀམྨཾ, དྷམྨེན ཝགྒཀམྨཾ, དྷམྨཔཏིརཱུཔཀེན ཝགྒཀམྨཾ, དྷམྨཔཏིརཱུཔཀེན སམགྒཀམྨཾ, ཨཀཏཾ ཀམྨཾ དུཀྐཊཾ ཀམྨཾ པུན ཀཱཏབྦཾ ཀམྨ’’ནྟི། ཏཏྲ, བྷིཀྑཝེ, ཡེ ཏེ བྷིཀྑཱུ ཨེཝམཱཧཾསུ – ‘‘དྷམྨེན ཝགྒཀམྨ’’ནྟི ཡེ ཙ ཏེ བྷིཀྑཱུ ཨེཝམཱཧཾསུ – ‘‘ཨཀཏཾ ཀམྨཾ དུཀྐཊཾ ཀམྨཾ པུན ཀཱཏབྦཾ ཀམྨ’’ནྟི, ཨིམེ ཏཏྠ བྷིཀྑཱུ དྷམྨཝཱདིནོ།
442. Idha pana, bhikkhave, bhikkhu saṅghena tajjanīyakammakato sammā vattati, lomaṃ pāteti, netthāraṃ vattati, tajjanīyassa kammassa paṭippassaddhiṃ yācati. Tatra ce bhikkhūnaṃ evaṃ hoti – ‘‘ayaṃ kho, āvuso , bhikkhu saṅghena tajjanīyakammakato sammā vattati, lomaṃ pāteti, netthāraṃ vattati, tajjanīyassa kammassa paṭippassaddhiṃ yācati. Handassa mayaṃ tajjanīyakammaṃ paṭippassambhemā’’ti. Te tassa tajjanīyakammaṃ paṭippassambhenti – dhammena vaggā. Tatraṭṭho saṅgho vivadati – ‘‘adhammena vaggakammaṃ, adhammena samaggakammaṃ, dhammena vaggakammaṃ, dhammapatirūpakena vaggakammaṃ, dhammapatirūpakena samaggakammaṃ, akataṃ kammaṃ dukkaṭaṃ kammaṃ puna kātabbaṃ kamma’’nti. Tatra, bhikkhave, ye te bhikkhū evamāhaṃsu – ‘‘dhammena vaggakamma’’nti ye ca te bhikkhū evamāhaṃsu – ‘‘akataṃ kammaṃ dukkaṭaṃ kammaṃ puna kātabbaṃ kamma’’nti, ime tattha bhikkhū dhammavādino.
༤༤༣. ཨིདྷ པན, བྷིཀྑཝེ, བྷིཀྑུ སངྒྷེན ཏཛྫནཱིཡཀམྨཀཏོ སམྨཱ ཝཏྟཏི, ལོམཾ པཱཏེཏི, ནེཏྠཱརཾ ཝཏྟཏི, ཏཛྫནཱིཡསྶ ཀམྨསྶ པཊིཔྤསྶདྡྷིཾ ཡཱཙཏི། ཏཏྲ ཙེ བྷིཀྑཱུནཾ ཨེཝཾ ཧོཏི – ‘‘ཨཡཾ ཁོ, ཨཱཝུསོ, བྷིཀྑུ སངྒྷེན ཏཛྫནཱིཡཀམྨཀཏོ སམྨཱ ཝཏྟཏི, ལོམཾ པཱཏེཏི, ནེཏྠཱརཾ ཝཏྟཏི, ཏཛྫནཱིཡསྶ ཀམྨསྶ པཊིཔྤསྶདྡྷིཾ ཡཱཙཏི། ཧནྡསྶ མཡཾ ཏཛྫནཱིཡཀམྨཾ པཊིཔྤསྶམྦྷེམཱ’’ཏི། ཏེ ཏསྶ ཏཛྫནཱིཡཀམྨཾ པཊིཔྤསྶམྦྷེནྟི – དྷམྨཔཏིརཱུཔཀེན ཝགྒཱ། ཏཏྲཊྛོ སངྒྷོ ཝིཝདཏི – ‘‘ཨདྷམྨེན ཝགྒཀམྨཾ, ཨདྷམྨེན སམགྒཀམྨཾ, དྷམྨེན ཝགྒཀམྨཾ, དྷམྨཔཏིརཱུཔཀེན ཝགྒཀམྨཾ, དྷམྨཔཏིརཱུཔཀེན སམགྒཀམྨཾ, ཨཀཏཾ ཀམྨཾ དུཀྐཊཾ ཀམྨཾ པུན ཀཱཏབྦཾ ཀམྨ’’ནྟི། ཏཏྲ , བྷིཀྑཝེ, ཡེ ཏེ བྷིཀྑཱུ ཨེཝམཱཧཾསུ – ‘‘དྷམྨཔཏིརཱུཔཀེན ཝགྒཀམྨ’’ནྟི, ཡེ ཙ ཏེ བྷིཀྑཱུ ཨེཝམཱཧཾསུ – ‘‘ཨཀཏཾ ཀམྨཾ དུཀྐཊཾ ཀམྨཾ པུན ཀཱཏབྦཾ ཀམྨ’’ནྟི, ཨིམེ ཏཏྠ བྷིཀྑཱུ དྷམྨཝཱདིནོ།
443. Idha pana, bhikkhave, bhikkhu saṅghena tajjanīyakammakato sammā vattati, lomaṃ pāteti, netthāraṃ vattati, tajjanīyassa kammassa paṭippassaddhiṃ yācati. Tatra ce bhikkhūnaṃ evaṃ hoti – ‘‘ayaṃ kho, āvuso, bhikkhu saṅghena tajjanīyakammakato sammā vattati, lomaṃ pāteti, netthāraṃ vattati, tajjanīyassa kammassa paṭippassaddhiṃ yācati. Handassa mayaṃ tajjanīyakammaṃ paṭippassambhemā’’ti. Te tassa tajjanīyakammaṃ paṭippassambhenti – dhammapatirūpakena vaggā. Tatraṭṭho saṅgho vivadati – ‘‘adhammena vaggakammaṃ, adhammena samaggakammaṃ, dhammena vaggakammaṃ, dhammapatirūpakena vaggakammaṃ, dhammapatirūpakena samaggakammaṃ, akataṃ kammaṃ dukkaṭaṃ kammaṃ puna kātabbaṃ kamma’’nti. Tatra , bhikkhave, ye te bhikkhū evamāhaṃsu – ‘‘dhammapatirūpakena vaggakamma’’nti, ye ca te bhikkhū evamāhaṃsu – ‘‘akataṃ kammaṃ dukkaṭaṃ kammaṃ puna kātabbaṃ kamma’’nti, ime tattha bhikkhū dhammavādino.
༤༤༤. ཨིདྷ པན, བྷིཀྑཝེ, བྷིཀྑུ སངྒྷེན ཏཛྫནཱིཡཀམྨཀཏོ སམྨཱ ཝཏྟཏི, ལོམཾ པཱཏེཏི, ནེཏྠཱརཾ ཝཏྟཏི, ཏཛྫནཱིཡསྶ ཀམྨསྶ པཊིཔྤསྶདྡྷིཾ ཡཱཙཏི། ཏཏྲ ཙེ བྷིཀྑཱུནཾ ཨེཝཾ ཧོཏི – ‘‘ཨཡཾ ཁོ, ཨཱཝུསོ, བྷིཀྑུ སངྒྷེན ཏཛྫནཱིཡཀམྨཀཏོ སམྨཱ ཝཏྟཏི, ལོམཾ པཱཏེཏི, ནེཏྠཱརཾ ཝཏྟཏི, ཏཛྫནཱིཡསྶ ཀམྨསྶ པཊིཔྤསྶདྡྷིཾ ཡཱཙཏི། ཧནྡསྶ མཡཾ ཏཛྫནཱིཡཀམྨཾ པཊིཔྤསྶམྦྷེམཱ’’ཏི། ཏེ ཏསྶ ཏཛྫནཱིཡཀམྨཾ པཊིཔྤསྶམྦྷེནྟི – དྷམྨཔཏིརཱུཔཀེན སམགྒཱ། ཏཏྲཊྛོ སངྒྷོ ཝིཝདཏི – ‘‘ཨདྷམྨེན ཝགྒཀམྨཾ, ཨདྷམྨེན སམགྒཀམྨཾ, དྷམྨེན ཝགྒཀམྨཾ, དྷམྨཔཏིརཱུཔཀེན ཝགྒཀམྨཾ, དྷམྨཔཏིརཱུཔཀེན སམགྒཀམྨཾ, ཨཀཏཾ ཀམྨཾ དུཀྐཊཾ ཀམྨཾ པུན ཀཱཏབྦཾ ཀམྨ’’ནྟི། ཏཏྲ, བྷིཀྑཝེ, ཡེ ཏེ བྷིཀྑཱུ ཨེཝམཱཧཾསུ – ‘‘དྷམྨཔཏིརཱུཔཀེན སམགྒཀམྨ’’ནྟི, ཡེ ཙ ཏེ བྷིཀྑཱུ ཨེཝམཱཧཾསུ – ‘‘ཨཀཏཾ ཀམྨཾ དུཀྐཊཾ ཀམྨཾ པུན ཀཱཏབྦཾ ཀམྨ’’ནྟི, ཨིམེ ཏཏྠ བྷིཀྑཱུ དྷམྨཝཱདིནོ།
444. Idha pana, bhikkhave, bhikkhu saṅghena tajjanīyakammakato sammā vattati, lomaṃ pāteti, netthāraṃ vattati, tajjanīyassa kammassa paṭippassaddhiṃ yācati. Tatra ce bhikkhūnaṃ evaṃ hoti – ‘‘ayaṃ kho, āvuso, bhikkhu saṅghena tajjanīyakammakato sammā vattati, lomaṃ pāteti, netthāraṃ vattati, tajjanīyassa kammassa paṭippassaddhiṃ yācati. Handassa mayaṃ tajjanīyakammaṃ paṭippassambhemā’’ti. Te tassa tajjanīyakammaṃ paṭippassambhenti – dhammapatirūpakena samaggā. Tatraṭṭho saṅgho vivadati – ‘‘adhammena vaggakammaṃ, adhammena samaggakammaṃ, dhammena vaggakammaṃ, dhammapatirūpakena vaggakammaṃ, dhammapatirūpakena samaggakammaṃ, akataṃ kammaṃ dukkaṭaṃ kammaṃ puna kātabbaṃ kamma’’nti. Tatra, bhikkhave, ye te bhikkhū evamāhaṃsu – ‘‘dhammapatirūpakena samaggakamma’’nti, ye ca te bhikkhū evamāhaṃsu – ‘‘akataṃ kammaṃ dukkaṭaṃ kammaṃ puna kātabbaṃ kamma’’nti, ime tattha bhikkhū dhammavādino.
ཏཛྫནཱིཡཀམྨཔཊིཔྤསྶདྡྷིཀཐཱ ནིཊྛིཏཱ།
Tajjanīyakammapaṭippassaddhikathā niṭṭhitā.
