| Library / Tipiṭaka / तिपिटक • Tipiṭaka / जातकपाळि • Jātakapāḷi |
४४६. तक्कलजातकं (८)
446. Takkalajātakaṃ (8)
८२.
82.
न तक्कला सन्ति न आलुवानि 1, न बिळालियो न कळम्बानि तात।
Na takkalā santi na āluvāni 2, na biḷāliyo na kaḷambāni tāta;
एको अरञ्ञम्हि सुसानमज्झे, किमत्थिको तात खणासि कासुं॥
Eko araññamhi susānamajjhe, kimatthiko tāta khaṇāsi kāsuṃ.
८३.
83.
पितामहो तात सुदुब्बलो ते, अनेकब्याधीहि दुखेन फुट्ठो।
Pitāmaho tāta sudubbalo te, anekabyādhīhi dukhena phuṭṭho;
तमज्जहं निखणिस्सामि सोब्भे, न हिस्स तं जीवितं रोचयामि॥
Tamajjahaṃ nikhaṇissāmi sobbhe, na hissa taṃ jīvitaṃ rocayāmi.
८४.
84.
सङ्कप्पमेतं पटिलद्ध पापकं, अच्चाहितं कम्म करोसि लुद्दं।
Saṅkappametaṃ paṭiladdha pāpakaṃ, accāhitaṃ kamma karosi luddaṃ;
मयापि तात पटिलच्छसे तुवं, एतादिसं कम्म जरूपनीतो।
Mayāpi tāta paṭilacchase tuvaṃ, etādisaṃ kamma jarūpanīto;
तं कुल्लवत्तं अनुवत्तमानो, अहम्पि तं निखणिस्सामि सोब्भे॥
Taṃ kullavattaṃ anuvattamāno, ahampi taṃ nikhaṇissāmi sobbhe.
८५.
85.
फरुसाहि वाचाहि पकुब्बमानो, आसज्ज मं त्वं वदसे कुमार।
Pharusāhi vācāhi pakubbamāno, āsajja maṃ tvaṃ vadase kumāra;
पुत्तो ममं ओरसको समानो, अहितानुकम्पी मम त्वंसि पुत्त॥
Putto mamaṃ orasako samāno, ahitānukampī mama tvaṃsi putta.
८६.
86.
पापञ्च तं कम्म पकुब्बमानं, अरहामि नो वारयितुं ततो॥
Pāpañca taṃ kamma pakubbamānaṃ, arahāmi no vārayituṃ tato.
८७.
87.
यो मातरं वा पितरं सविट्ठ 7, अदूसके हिंसति पापधम्मो।
Yo mātaraṃ vā pitaraṃ saviṭṭha 8, adūsake hiṃsati pāpadhammo;
कायस्स भेदा अभिसम्परायं, असंसयं सो निरयं उपेति 9॥
Kāyassa bhedā abhisamparāyaṃ, asaṃsayaṃ so nirayaṃ upeti 10.
८८.
88.
यो मातरं वा पितरं सविट्ठ, अन्नेन पानेन उपट्ठहाति।
Yo mātaraṃ vā pitaraṃ saviṭṭha, annena pānena upaṭṭhahāti;
कायस्स भेदा अभिसम्परायं, असंसयं सो सुगतिं उपेति॥
Kāyassa bhedā abhisamparāyaṃ, asaṃsayaṃ so sugatiṃ upeti.
८९.
89.
न मे त्वं पुत्त अहितानुकम्पी, हितानुकम्पी मे 11 त्वंसि पुत्त।
Na me tvaṃ putta ahitānukampī, hitānukampī me 12 tvaṃsi putta;
अहञ्च तं मातरा वुच्चमानो, एतादिसं कम्म करोमि लुद्दं॥
Ahañca taṃ mātarā vuccamāno, etādisaṃ kamma karomi luddaṃ.
९०.
90.
या ते सा भरिया अनरियरूपा, माता ममेसा सकिया जनेत्ति।
Yā te sā bhariyā anariyarūpā, mātā mamesā sakiyā janetti;
निद्धापये 13 तञ्च सका अगारा, अञ्ञम्पि ते सा दुखमावहेय्य॥
Niddhāpaye 14 tañca sakā agārā, aññampi te sā dukhamāvaheyya.
९१.
91.
या ते सा भरिया अनरियरूपा, माता ममेसा सकिया जनेत्ति।
Yā te sā bhariyā anariyarūpā, mātā mamesā sakiyā janetti;
दन्ता करेणूव वसूपनीता, सा पापधम्मा पुनरावजातूति॥
Dantā kareṇūva vasūpanītā, sā pāpadhammā punarāvajātūti.
तक्कलजातकं अट्ठमं।
Takkalajātakaṃ aṭṭhamaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / जातक-अट्ठकथा • Jātaka-aṭṭhakathā / [४४६] ८. तक्कलजातकवण्णना • [446] 8. Takkalajātakavaṇṇanā
