| Library / Tipiṭaka / តិបិដក • Tipiṭaka / ជាតកបាឡិ • Jātakapāḷi |
៤៤៦. តក្កលជាតកំ (៨)
446. Takkalajātakaṃ (8)
៨២.
82.
ន តក្កលា សន្តិ ន អាលុវានិ 1, ន ពិឡាលិយោ ន កឡម្ពានិ តាត;
Na takkalā santi na āluvāni 2, na biḷāliyo na kaḷambāni tāta;
ឯកោ អរញ្ញម្ហិ សុសានមជ្ឈេ, កិមត្ថិកោ តាត ខណាសិ កាសុំ។
Eko araññamhi susānamajjhe, kimatthiko tāta khaṇāsi kāsuṃ.
៨៣.
83.
បិតាមហោ តាត សុទុព្ពលោ តេ, អនេកព្យាធីហិ ទុខេន ផុដ្ឋោ;
Pitāmaho tāta sudubbalo te, anekabyādhīhi dukhena phuṭṭho;
តមជ្ជហំ និខណិស្សាមិ សោព្ភេ, ន ហិស្ស តំ ជីវិតំ រោចយាមិ។
Tamajjahaṃ nikhaṇissāmi sobbhe, na hissa taṃ jīvitaṃ rocayāmi.
៨៤.
84.
សង្កប្បមេតំ បដិលទ្ធ បាបកំ, អច្ចាហិតំ កម្ម ករោសិ លុទ្ទំ;
Saṅkappametaṃ paṭiladdha pāpakaṃ, accāhitaṃ kamma karosi luddaṃ;
មយាបិ តាត បដិលច្ឆសេ តុវំ, ឯតាទិសំ កម្ម ជរូបនីតោ;
Mayāpi tāta paṭilacchase tuvaṃ, etādisaṃ kamma jarūpanīto;
តំ កុល្លវត្តំ អនុវត្តមានោ, អហម្បិ តំ និខណិស្សាមិ សោព្ភេ។
Taṃ kullavattaṃ anuvattamāno, ahampi taṃ nikhaṇissāmi sobbhe.
៨៥.
85.
ផរុសាហិ វាចាហិ បកុព្ពមានោ, អាសជ្ជ មំ ត្វំ វទសេ កុមារ;
Pharusāhi vācāhi pakubbamāno, āsajja maṃ tvaṃ vadase kumāra;
បុត្តោ មមំ ឱរសកោ សមានោ, អហិតានុកម្បី មម ត្វំសិ បុត្ត។
Putto mamaṃ orasako samāno, ahitānukampī mama tvaṃsi putta.
៨៦.
86.
បាបញ្ច តំ កម្ម បកុព្ពមានំ, អរហាមិ នោ វារយិតុំ តតោ។
Pāpañca taṃ kamma pakubbamānaṃ, arahāmi no vārayituṃ tato.
៨៧.
87.
យោ មាតរំ វា បិតរំ សវិដ្ឋ 7, អទូសកេ ហិំសតិ បាបធម្មោ;
Yo mātaraṃ vā pitaraṃ saviṭṭha 8, adūsake hiṃsati pāpadhammo;
កាយស្ស ភេទា អភិសម្បរាយំ, អសំសយំ សោ និរយំ ឧបេតិ 9។
Kāyassa bhedā abhisamparāyaṃ, asaṃsayaṃ so nirayaṃ upeti 10.
៨៨.
88.
យោ មាតរំ វា បិតរំ សវិដ្ឋ, អន្នេន បានេន ឧបដ្ឋហាតិ;
Yo mātaraṃ vā pitaraṃ saviṭṭha, annena pānena upaṭṭhahāti;
កាយស្ស ភេទា អភិសម្បរាយំ, អសំសយំ សោ សុគតិំ ឧបេតិ។
Kāyassa bhedā abhisamparāyaṃ, asaṃsayaṃ so sugatiṃ upeti.
៨៩.
89.
ន មេ ត្វំ បុត្ត អហិតានុកម្បី, ហិតានុកម្បី មេ 11 ត្វំសិ បុត្ត;
Na me tvaṃ putta ahitānukampī, hitānukampī me 12 tvaṃsi putta;
អហញ្ច តំ មាតរា វុច្ចមានោ, ឯតាទិសំ កម្ម ករោមិ លុទ្ទំ។
Ahañca taṃ mātarā vuccamāno, etādisaṃ kamma karomi luddaṃ.
៩០.
90.
យា តេ សា ភរិយា អនរិយរូបា, មាតា មមេសា សកិយា ជនេត្តិ;
Yā te sā bhariyā anariyarūpā, mātā mamesā sakiyā janetti;
និទ្ធាបយេ 13 តញ្ច សកា អគារា, អញ្ញម្បិ តេ សា ទុខមាវហេយ្យ។
Niddhāpaye 14 tañca sakā agārā, aññampi te sā dukhamāvaheyya.
៩១.
91.
យា តេ សា ភរិយា អនរិយរូបា, មាតា មមេសា សកិយា ជនេត្តិ;
Yā te sā bhariyā anariyarūpā, mātā mamesā sakiyā janetti;
ទន្តា ករេណូវ វសូបនីតា, សា បាបធម្មា បុនរាវជាតូតិ។
Dantā kareṇūva vasūpanītā, sā pāpadhammā punarāvajātūti.
តក្កលជាតកំ អដ្ឋមំ។
Takkalajātakaṃ aṭṭhamaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ជាតក-អដ្ឋកថា • Jātaka-aṭṭhakathā / [៤៤៦] ៨. តក្កលជាតកវណ្ណនា • [446] 8. Takkalajātakavaṇṇanā
