| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
2. தாலபுடஸுத்தங்
2. Tālapuṭasuttaṃ
354. ஏகங் ஸமயங் ப⁴க³வா ராஜக³ஹே விஹரதி வேளுவனே கலந்த³கனிவாபே. அத² கோ² தாலபுடோ 1 நடகா³மணி யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² தாலபுடோ நடகா³மணி ப⁴க³வந்தங் ஏதத³வோச – ‘‘ஸுதங் மேதங், ப⁴ந்தே, புப்³ப³கானங் ஆசரியபாசரியானங் நடானங் பா⁴ஸமானானங் – ‘யோ ஸோ நடோ ரங்க³மஜ்ஜே² ஸமஜ்ஜமஜ்ஜே² ஸச்சாலிகேன ஜனங் ஹாஸேதி ரமேதி, ஸோ காயஸ்ஸ பே⁴தா³ பரங் மரணா பஹாஸானங் தே³வானங் ஸஹப்³யதங் உபபஜ்ஜதீ’தி. இத⁴ ப⁴க³வா கிமாஹா’’தி? ‘‘அலங், கா³மணி, திட்ட²தேதங். மா மங் ஏதங் புச்சீ²’’தி. து³தியம்பி கோ² தாலபுடோ நடகா³மணி ப⁴க³வந்தங் ஏதத³வோச – ‘‘ஸுதங் மேதங், ப⁴ந்தே, புப்³ப³கானங் ஆசரியபாசரியானங் நடானங் பா⁴ஸமானானங் – ‘யோ ஸோ நடோ ரங்க³மஜ்ஜே² ஸமஜ்ஜமஜ்ஜே² ஸச்சாலிகேன ஜனங் ஹாஸேதி ரமேதி, ஸோ காயஸ்ஸ பே⁴தா³ பரங் மரணா பஹாஸானங் தே³வானங் ஸஹப்³யதங் உபபஜ்ஜதீ’தி. இத⁴ ப⁴க³வா கிமாஹா’’தி? ‘‘அலங், கா³மணி, திட்ட²தேதங். மா மங் ஏதங் புச்சீ²’’தி. ததியம்பி கோ² தாலபுடோ நடகா³மணி ப⁴க³வந்தங் ஏதத³வோச – ‘‘ஸுதங் மேதங், ப⁴ந்தே, புப்³ப³கானங் ஆசரியபாசரியானங் நடானங் பா⁴ஸமானானங் – ‘யோ ஸோ நடோ ரங்க³மஜ்ஜே² ஸமஜ்ஜமஜ்ஜே² ஸச்சாலிகேன ஜனங் ஹாஸேதி ரமேதி, ஸோ காயஸ்ஸ பே⁴தா³ பரங் மரணா பஹாஸானங் தே³வானங் ஸஹப்³யதங் உபபஜ்ஜதீ’தி. இத⁴ ப⁴க³வா கிமாஹா’’தி?
354. Ekaṃ samayaṃ bhagavā rājagahe viharati veḷuvane kalandakanivāpe. Atha kho tālapuṭo 2 naṭagāmaṇi yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho tālapuṭo naṭagāmaṇi bhagavantaṃ etadavoca – ‘‘sutaṃ metaṃ, bhante, pubbakānaṃ ācariyapācariyānaṃ naṭānaṃ bhāsamānānaṃ – ‘yo so naṭo raṅgamajjhe samajjamajjhe saccālikena janaṃ hāseti rameti, so kāyassa bhedā paraṃ maraṇā pahāsānaṃ devānaṃ sahabyataṃ upapajjatī’ti. Idha bhagavā kimāhā’’ti? ‘‘Alaṃ, gāmaṇi, tiṭṭhatetaṃ. Mā maṃ etaṃ pucchī’’ti. Dutiyampi kho tālapuṭo naṭagāmaṇi bhagavantaṃ etadavoca – ‘‘sutaṃ metaṃ, bhante, pubbakānaṃ ācariyapācariyānaṃ naṭānaṃ bhāsamānānaṃ – ‘yo so naṭo raṅgamajjhe samajjamajjhe saccālikena janaṃ hāseti rameti, so kāyassa bhedā paraṃ maraṇā pahāsānaṃ devānaṃ sahabyataṃ upapajjatī’ti. Idha bhagavā kimāhā’’ti? ‘‘Alaṃ, gāmaṇi, tiṭṭhatetaṃ. Mā maṃ etaṃ pucchī’’ti. Tatiyampi kho tālapuṭo naṭagāmaṇi bhagavantaṃ etadavoca – ‘‘sutaṃ metaṃ, bhante, pubbakānaṃ ācariyapācariyānaṃ naṭānaṃ bhāsamānānaṃ – ‘yo so naṭo raṅgamajjhe samajjamajjhe saccālikena janaṃ hāseti rameti, so kāyassa bhedā paraṃ maraṇā pahāsānaṃ devānaṃ sahabyataṃ upapajjatī’ti. Idha bhagavā kimāhā’’ti?
‘‘அத்³தா⁴ கோ² த்யாஹங், கா³மணி, ந லபா⁴மி 3 – ‘அலங், கா³மணி, திட்ட²தேதங், மா மங் ஏதங் புச்சீ²’தி. அபி ச த்யாஹங் ப்³யாகரிஸ்ஸாமி. புப்³பே³ கோ², கா³மணி, ஸத்தா அவீதராகா³ ராக³ப³ந்த⁴னப³த்³தா⁴. தேஸங் நடோ ரங்க³மஜ்ஜே² ஸமஜ்ஜமஜ்ஜே² யே த⁴ம்மா ரஜனீயா தே உபஸங்ஹரதி பி⁴ய்யோஸோமத்தாய. புப்³பே³ கோ², கா³மணி, ஸத்தா அவீததோ³ஸா தோ³ஸப³ந்த⁴னப³த்³தா⁴. தேஸங் நடோ ரங்க³மஜ்ஜே² ஸமஜ்ஜமஜ்ஜே² யே த⁴ம்மா தோ³ஸனீயா தே உபஸங்ஹரதி பி⁴ய்யோஸோமத்தாய. புப்³பே³ கோ², கா³மணி , ஸத்தா அவீதமோஹா மோஹப³ந்த⁴னப³த்³தா⁴. தேஸங் நடோ ரங்க³மஜ்ஜே² ஸமஜ்ஜமஜ்ஜே² யே த⁴ம்மா மோஹனீயா தே உபஸங்ஹரதி பி⁴ய்யோஸோமத்தாய. ஸோ அத்தனா மத்தோ பமத்தோ பரே மதெ³த்வா பமாதெ³த்வா காயஸ்ஸ பே⁴தா³ பரங் மரணா பஹாஸோ நாம நிரயோ தத்த² உபபஜ்ஜதி. ஸசே கோ² பனஸ்ஸ ஏவங்தி³ட்டி² ஹோதி – ‘யோ ஸோ நடோ ரங்க³மஜ்ஜே² ஸமஜ்ஜமஜ்ஜே² ஸச்சாலிகேன ஜனங் ஹாஸேதி ரமேதி, ஸோ காயஸ்ஸ பே⁴தா³ பரங் மரணா பஹாஸானங் தே³வானங் ஸஹப்³யதங் உபபஜ்ஜதீ’தி, ஸாஸ்ஸ ஹோதி மிச்சா²தி³ட்டி². மிச்சா²தி³ட்டி²கஸ்ஸ கோ² பனாஹங், கா³மணி, புரிஸபுக்³க³லஸ்ஸ த்³வின்னங் க³தீனங் அஞ்ஞதரங் க³திங் வதா³மி – நிரயங் வா திரச்சா²னயோனிங் வா’’தி.
‘‘Addhā kho tyāhaṃ, gāmaṇi, na labhāmi 4 – ‘alaṃ, gāmaṇi, tiṭṭhatetaṃ, mā maṃ etaṃ pucchī’ti. Api ca tyāhaṃ byākarissāmi. Pubbe kho, gāmaṇi, sattā avītarāgā rāgabandhanabaddhā. Tesaṃ naṭo raṅgamajjhe samajjamajjhe ye dhammā rajanīyā te upasaṃharati bhiyyosomattāya. Pubbe kho, gāmaṇi, sattā avītadosā dosabandhanabaddhā. Tesaṃ naṭo raṅgamajjhe samajjamajjhe ye dhammā dosanīyā te upasaṃharati bhiyyosomattāya. Pubbe kho, gāmaṇi , sattā avītamohā mohabandhanabaddhā. Tesaṃ naṭo raṅgamajjhe samajjamajjhe ye dhammā mohanīyā te upasaṃharati bhiyyosomattāya. So attanā matto pamatto pare madetvā pamādetvā kāyassa bhedā paraṃ maraṇā pahāso nāma nirayo tattha upapajjati. Sace kho panassa evaṃdiṭṭhi hoti – ‘yo so naṭo raṅgamajjhe samajjamajjhe saccālikena janaṃ hāseti rameti, so kāyassa bhedā paraṃ maraṇā pahāsānaṃ devānaṃ sahabyataṃ upapajjatī’ti, sāssa hoti micchādiṭṭhi. Micchādiṭṭhikassa kho panāhaṃ, gāmaṇi, purisapuggalassa dvinnaṃ gatīnaṃ aññataraṃ gatiṃ vadāmi – nirayaṃ vā tiracchānayoniṃ vā’’ti.
ஏவங் வுத்தே, தாலபுடோ நடகா³மணி, பரோதி³, அஸ்ஸூனி பவத்தேஸி. ‘‘ஏதங் கோ² த்யாஹங், கா³மணி, நாலத்த²ங் – ‘அலங், கா³மணி, திட்ட²தேதங்; மா மங் ஏதங் புச்சீ²’’’தி. ‘‘நாஹங், ப⁴ந்தே, ஏதங் ரோதா³மி யங் மங் ப⁴க³வா ஏவமாஹ; அபி சாஹங், ப⁴ந்தே, புப்³ப³கேஹி ஆசரியபாசரியேஹி நடேஹி தீ³க⁴ரத்தங் நிகதோ வஞ்சிதோ பலுத்³தோ⁴ – ‘யோ ஸோ நடோ ரங்க³மஜ்ஜே² ஸமஜ்ஜமஜ்ஜே² ஸச்சாலிகேன ஜனங் ஹாஸேதி ரமேதி ஸோ காயஸ்ஸ பே⁴தா³ பரங் மரணா பஹாஸானங் தே³வானங் ஸஹப்³யதங் உபபஜ்ஜதீ’’’தி. ‘‘அபி⁴க்கந்தங், ப⁴ந்தே, அபி⁴க்கந்தங், ப⁴ந்தே! ஸெய்யதா²பி, ப⁴ந்தே, நிக்குஜ்ஜிதங் வா உக்குஜ்ஜெய்ய, படிச்ச²ன்னங் வா விவரெய்ய, மூள்ஹஸ்ஸ வா மக்³க³ங் ஆசிக்கெ²ய்ய, அந்த⁴காரே வா தேலபஜ்ஜோதங் தா⁴ரெய்ய – சக்கு²மந்தோ ரூபானி த³க்க²ந்தீதி; ஏவமேவங் ப⁴க³வதா அனேகபரியாயேன த⁴ம்மோ பகாஸிதோ. ஏஸாஹங், ப⁴ந்தே, ப⁴க³வந்தங் ஸரணங் க³ச்சா²மி த⁴ம்மஞ்ச பி⁴க்கு²ஸங்க⁴ஞ்ச. லபெ⁴ய்யாஹங், ப⁴ந்தே, ப⁴க³வதோ ஸந்திகே பப்³ப³ஜ்ஜங், லபெ⁴ய்யங் உபஸம்பத³’’ந்தி. அலத்த² கோ² தாலபுடோ நடகா³மணி ப⁴க³வதோ ஸந்திகே பப்³ப³ஜ்ஜங், அலத்த² உபஸம்பத³ங். அசிரூபஸம்பன்னோ ச பனாயஸ்மா தாலபுடோ…பே॰… அரஹதங் அஹோஸீதி. து³தியங்.
Evaṃ vutte, tālapuṭo naṭagāmaṇi, parodi, assūni pavattesi. ‘‘Etaṃ kho tyāhaṃ, gāmaṇi, nālatthaṃ – ‘alaṃ, gāmaṇi, tiṭṭhatetaṃ; mā maṃ etaṃ pucchī’’’ti. ‘‘Nāhaṃ, bhante, etaṃ rodāmi yaṃ maṃ bhagavā evamāha; api cāhaṃ, bhante, pubbakehi ācariyapācariyehi naṭehi dīgharattaṃ nikato vañcito paluddho – ‘yo so naṭo raṅgamajjhe samajjamajjhe saccālikena janaṃ hāseti rameti so kāyassa bhedā paraṃ maraṇā pahāsānaṃ devānaṃ sahabyataṃ upapajjatī’’’ti. ‘‘Abhikkantaṃ, bhante, abhikkantaṃ, bhante! Seyyathāpi, bhante, nikkujjitaṃ vā ukkujjeyya, paṭicchannaṃ vā vivareyya, mūḷhassa vā maggaṃ ācikkheyya, andhakāre vā telapajjotaṃ dhāreyya – cakkhumanto rūpāni dakkhantīti; evamevaṃ bhagavatā anekapariyāyena dhammo pakāsito. Esāhaṃ, bhante, bhagavantaṃ saraṇaṃ gacchāmi dhammañca bhikkhusaṅghañca. Labheyyāhaṃ, bhante, bhagavato santike pabbajjaṃ, labheyyaṃ upasampada’’nti. Alattha kho tālapuṭo naṭagāmaṇi bhagavato santike pabbajjaṃ, alattha upasampadaṃ. Acirūpasampanno ca panāyasmā tālapuṭo…pe… arahataṃ ahosīti. Dutiyaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2. தாலபுடஸுத்தவண்ணனா • 2. Tālapuṭasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2. தாலபுடஸுத்தவண்ணனா • 2. Tālapuṭasuttavaṇṇanā
