| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
২. তালপুটসুত্তং
2. Tālapuṭasuttaṃ
৩৫৪. একং সমযং ভগৰা রাজগহে ৰিহরতি ৰেল়ুৰনে কলন্দকনিৰাপে। অথ খো তালপুটো 1 নটগামণি যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নো খো তালপুটো নটগামণি ভগৰন্তং এতদৰোচ – ‘‘সুতং মেতং, ভন্তে, পুব্বকানং আচরিযপাচরিযানং নটানং ভাসমানানং – ‘যো সো নটো রঙ্গমজ্ঝে সমজ্জমজ্ঝে সচ্চালিকেন জনং হাসেতি রমেতি, সো কাযস্স ভেদা পরং মরণা পহাসানং দেৰানং সহব্যতং উপপজ্জতী’তি। ইধ ভগৰা কিমাহা’’তি? ‘‘অলং, গামণি, তিট্ঠতেতং। মা মং এতং পুচ্ছী’’তি। দুতিযম্পি খো তালপুটো নটগামণি ভগৰন্তং এতদৰোচ – ‘‘সুতং মেতং, ভন্তে, পুব্বকানং আচরিযপাচরিযানং নটানং ভাসমানানং – ‘যো সো নটো রঙ্গমজ্ঝে সমজ্জমজ্ঝে সচ্চালিকেন জনং হাসেতি রমেতি, সো কাযস্স ভেদা পরং মরণা পহাসানং দেৰানং সহব্যতং উপপজ্জতী’তি। ইধ ভগৰা কিমাহা’’তি? ‘‘অলং, গামণি, তিট্ঠতেতং। মা মং এতং পুচ্ছী’’তি। ততিযম্পি খো তালপুটো নটগামণি ভগৰন্তং এতদৰোচ – ‘‘সুতং মেতং, ভন্তে, পুব্বকানং আচরিযপাচরিযানং নটানং ভাসমানানং – ‘যো সো নটো রঙ্গমজ্ঝে সমজ্জমজ্ঝে সচ্চালিকেন জনং হাসেতি রমেতি, সো কাযস্স ভেদা পরং মরণা পহাসানং দেৰানং সহব্যতং উপপজ্জতী’তি। ইধ ভগৰা কিমাহা’’তি?
354. Ekaṃ samayaṃ bhagavā rājagahe viharati veḷuvane kalandakanivāpe. Atha kho tālapuṭo 2 naṭagāmaṇi yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho tālapuṭo naṭagāmaṇi bhagavantaṃ etadavoca – ‘‘sutaṃ metaṃ, bhante, pubbakānaṃ ācariyapācariyānaṃ naṭānaṃ bhāsamānānaṃ – ‘yo so naṭo raṅgamajjhe samajjamajjhe saccālikena janaṃ hāseti rameti, so kāyassa bhedā paraṃ maraṇā pahāsānaṃ devānaṃ sahabyataṃ upapajjatī’ti. Idha bhagavā kimāhā’’ti? ‘‘Alaṃ, gāmaṇi, tiṭṭhatetaṃ. Mā maṃ etaṃ pucchī’’ti. Dutiyampi kho tālapuṭo naṭagāmaṇi bhagavantaṃ etadavoca – ‘‘sutaṃ metaṃ, bhante, pubbakānaṃ ācariyapācariyānaṃ naṭānaṃ bhāsamānānaṃ – ‘yo so naṭo raṅgamajjhe samajjamajjhe saccālikena janaṃ hāseti rameti, so kāyassa bhedā paraṃ maraṇā pahāsānaṃ devānaṃ sahabyataṃ upapajjatī’ti. Idha bhagavā kimāhā’’ti? ‘‘Alaṃ, gāmaṇi, tiṭṭhatetaṃ. Mā maṃ etaṃ pucchī’’ti. Tatiyampi kho tālapuṭo naṭagāmaṇi bhagavantaṃ etadavoca – ‘‘sutaṃ metaṃ, bhante, pubbakānaṃ ācariyapācariyānaṃ naṭānaṃ bhāsamānānaṃ – ‘yo so naṭo raṅgamajjhe samajjamajjhe saccālikena janaṃ hāseti rameti, so kāyassa bhedā paraṃ maraṇā pahāsānaṃ devānaṃ sahabyataṃ upapajjatī’ti. Idha bhagavā kimāhā’’ti?
‘‘অদ্ধা খো ত্যাহং, গামণি, ন লভামি 3 – ‘অলং, গামণি, তিট্ঠতেতং, মা মং এতং পুচ্ছী’তি। অপি চ ত্যাহং ব্যাকরিস্সামি। পুব্বে খো, গামণি, সত্তা অৰীতরাগা রাগবন্ধনবদ্ধা। তেসং নটো রঙ্গমজ্ঝে সমজ্জমজ্ঝে যে ধম্মা রজনীযা তে উপসংহরতি ভিয্যোসোমত্তায। পুব্বে খো, গামণি, সত্তা অৰীতদোসা দোসবন্ধনবদ্ধা। তেসং নটো রঙ্গমজ্ঝে সমজ্জমজ্ঝে যে ধম্মা দোসনীযা তে উপসংহরতি ভিয্যোসোমত্তায। পুব্বে খো, গামণি , সত্তা অৰীতমোহা মোহবন্ধনবদ্ধা। তেসং নটো রঙ্গমজ্ঝে সমজ্জমজ্ঝে যে ধম্মা মোহনীযা তে উপসংহরতি ভিয্যোসোমত্তায। সো অত্তনা মত্তো পমত্তো পরে মদেত্ৰা পমাদেত্ৰা কাযস্স ভেদা পরং মরণা পহাসো নাম নিরযো তত্থ উপপজ্জতি। সচে খো পনস্স এৰংদিট্ঠি হোতি – ‘যো সো নটো রঙ্গমজ্ঝে সমজ্জমজ্ঝে সচ্চালিকেন জনং হাসেতি রমেতি, সো কাযস্স ভেদা পরং মরণা পহাসানং দেৰানং সহব্যতং উপপজ্জতী’তি, সাস্স হোতি মিচ্ছাদিট্ঠি। মিচ্ছাদিট্ঠিকস্স খো পনাহং, গামণি, পুরিসপুগ্গলস্স দ্ৰিন্নং গতীনং অঞ্ঞতরং গতিং ৰদামি – নিরযং ৰা তিরচ্ছানযোনিং ৰা’’তি।
‘‘Addhā kho tyāhaṃ, gāmaṇi, na labhāmi 4 – ‘alaṃ, gāmaṇi, tiṭṭhatetaṃ, mā maṃ etaṃ pucchī’ti. Api ca tyāhaṃ byākarissāmi. Pubbe kho, gāmaṇi, sattā avītarāgā rāgabandhanabaddhā. Tesaṃ naṭo raṅgamajjhe samajjamajjhe ye dhammā rajanīyā te upasaṃharati bhiyyosomattāya. Pubbe kho, gāmaṇi, sattā avītadosā dosabandhanabaddhā. Tesaṃ naṭo raṅgamajjhe samajjamajjhe ye dhammā dosanīyā te upasaṃharati bhiyyosomattāya. Pubbe kho, gāmaṇi , sattā avītamohā mohabandhanabaddhā. Tesaṃ naṭo raṅgamajjhe samajjamajjhe ye dhammā mohanīyā te upasaṃharati bhiyyosomattāya. So attanā matto pamatto pare madetvā pamādetvā kāyassa bhedā paraṃ maraṇā pahāso nāma nirayo tattha upapajjati. Sace kho panassa evaṃdiṭṭhi hoti – ‘yo so naṭo raṅgamajjhe samajjamajjhe saccālikena janaṃ hāseti rameti, so kāyassa bhedā paraṃ maraṇā pahāsānaṃ devānaṃ sahabyataṃ upapajjatī’ti, sāssa hoti micchādiṭṭhi. Micchādiṭṭhikassa kho panāhaṃ, gāmaṇi, purisapuggalassa dvinnaṃ gatīnaṃ aññataraṃ gatiṃ vadāmi – nirayaṃ vā tiracchānayoniṃ vā’’ti.
এৰং ৰুত্তে, তালপুটো নটগামণি, পরোদি, অস্সূনি পৰত্তেসি। ‘‘এতং খো ত্যাহং, গামণি, নালত্থং – ‘অলং, গামণি, তিট্ঠতেতং; মা মং এতং পুচ্ছী’’’তি। ‘‘নাহং, ভন্তে, এতং রোদামি যং মং ভগৰা এৰমাহ; অপি চাহং, ভন্তে, পুব্বকেহি আচরিযপাচরিযেহি নটেহি দীঘরত্তং নিকতো ৰঞ্চিতো পলুদ্ধো – ‘যো সো নটো রঙ্গমজ্ঝে সমজ্জমজ্ঝে সচ্চালিকেন জনং হাসেতি রমেতি সো কাযস্স ভেদা পরং মরণা পহাসানং দেৰানং সহব্যতং উপপজ্জতী’’’তি। ‘‘অভিক্কন্তং, ভন্তে, অভিক্কন্তং, ভন্তে! সেয্যথাপি, ভন্তে, নিক্কুজ্জিতং ৰা উক্কুজ্জেয্য, পটিচ্ছন্নং ৰা ৰিৰরেয্য, মূল়্হস্স ৰা মগ্গং আচিক্খেয্য, অন্ধকারে ৰা তেলপজ্জোতং ধারেয্য – চক্খুমন্তো রূপানি দক্খন্তীতি; এৰমেৰং ভগৰতা অনেকপরিযাযেন ধম্মো পকাসিতো। এসাহং, ভন্তে, ভগৰন্তং সরণং গচ্ছামি ধম্মঞ্চ ভিক্খুসঙ্ঘঞ্চ। লভেয্যাহং, ভন্তে, ভগৰতো সন্তিকে পব্বজ্জং, লভেয্যং উপসম্পদ’’ন্তি। অলত্থ খো তালপুটো নটগামণি ভগৰতো সন্তিকে পব্বজ্জং, অলত্থ উপসম্পদং। অচিরূপসম্পন্নো চ পনাযস্মা তালপুটো…পে॰… অরহতং অহোসীতি। দুতিযং।
Evaṃ vutte, tālapuṭo naṭagāmaṇi, parodi, assūni pavattesi. ‘‘Etaṃ kho tyāhaṃ, gāmaṇi, nālatthaṃ – ‘alaṃ, gāmaṇi, tiṭṭhatetaṃ; mā maṃ etaṃ pucchī’’’ti. ‘‘Nāhaṃ, bhante, etaṃ rodāmi yaṃ maṃ bhagavā evamāha; api cāhaṃ, bhante, pubbakehi ācariyapācariyehi naṭehi dīgharattaṃ nikato vañcito paluddho – ‘yo so naṭo raṅgamajjhe samajjamajjhe saccālikena janaṃ hāseti rameti so kāyassa bhedā paraṃ maraṇā pahāsānaṃ devānaṃ sahabyataṃ upapajjatī’’’ti. ‘‘Abhikkantaṃ, bhante, abhikkantaṃ, bhante! Seyyathāpi, bhante, nikkujjitaṃ vā ukkujjeyya, paṭicchannaṃ vā vivareyya, mūḷhassa vā maggaṃ ācikkheyya, andhakāre vā telapajjotaṃ dhāreyya – cakkhumanto rūpāni dakkhantīti; evamevaṃ bhagavatā anekapariyāyena dhammo pakāsito. Esāhaṃ, bhante, bhagavantaṃ saraṇaṃ gacchāmi dhammañca bhikkhusaṅghañca. Labheyyāhaṃ, bhante, bhagavato santike pabbajjaṃ, labheyyaṃ upasampada’’nti. Alattha kho tālapuṭo naṭagāmaṇi bhagavato santike pabbajjaṃ, alattha upasampadaṃ. Acirūpasampanno ca panāyasmā tālapuṭo…pe… arahataṃ ahosīti. Dutiyaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ২. তালপুটসুত্তৰণ্ণনা • 2. Tālapuṭasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ২. তালপুটসুত্তৰণ্ণনা • 2. Tālapuṭasuttavaṇṇanā
