| Library / Tipiṭaka / д̇ибидага • Tipiṭaka / сам̣яуд̇д̇анигааяа • Saṃyuttanikāya |
2. д̇аалабудасуд̇д̇ам̣
2. Tālapuṭasuttaṃ
354. згам̣ самаяам̣ бхаг̇аваа рааж̇аг̇ахз вихарад̇и взл̣уванз галанд̣̇аганиваабз. ат̇а ко д̇аалабудо 1 надаг̇ааман̣и язна бхаг̇аваа д̇знубасан̇гами; убасан̇гамид̇ваа бхаг̇аванд̇ам̣ абхиваад̣̇зд̇ваа згаманд̇ам̣ нисийд̣̇и. згаманд̇ам̣ нисинно ко д̇аалабудо надаг̇ааман̣и бхаг̇аванд̇ам̣ зд̇ад̣̇авожа – ‘‘суд̇ам̣ мзд̇ам̣, бханд̇з, буб̣б̣агаанам̣ аажарияабаажарияаанам̣ надаанам̣ бхаасамаанаанам̣ – ‘яо со надо ран̇г̇амаж̇жхз самаж̇ж̇амаж̇жхз сажжаалигзна ж̇анам̣ хаасзд̇и рамзд̇и, со гааяасса бхзд̣̇аа барам̣ маран̣аа бахаасаанам̣ д̣̇зваанам̣ сахаб̣яад̇ам̣ убабаж̇ж̇ад̇ий’д̇и. ид̇ха бхаг̇аваа гимаахаа’’д̇и? ‘‘алам̣, г̇ааман̣и, д̇идтад̇зд̇ам̣. маа мам̣ зд̇ам̣ бужчий’’д̇и. д̣̇уд̇ияамби ко д̇аалабудо надаг̇ааман̣и бхаг̇аванд̇ам̣ зд̇ад̣̇авожа – ‘‘суд̇ам̣ мзд̇ам̣, бханд̇з, буб̣б̣агаанам̣ аажарияабаажарияаанам̣ надаанам̣ бхаасамаанаанам̣ – ‘яо со надо ран̇г̇амаж̇жхз самаж̇ж̇амаж̇жхз сажжаалигзна ж̇анам̣ хаасзд̇и рамзд̇и, со гааяасса бхзд̣̇аа барам̣ маран̣аа бахаасаанам̣ д̣̇зваанам̣ сахаб̣яад̇ам̣ убабаж̇ж̇ад̇ий’д̇и. ид̇ха бхаг̇аваа гимаахаа’’д̇и? ‘‘алам̣, г̇ааман̣и, д̇идтад̇зд̇ам̣. маа мам̣ зд̇ам̣ бужчий’’д̇и. д̇ад̇ияамби ко д̇аалабудо надаг̇ааман̣и бхаг̇аванд̇ам̣ зд̇ад̣̇авожа – ‘‘суд̇ам̣ мзд̇ам̣, бханд̇з, буб̣б̣агаанам̣ аажарияабаажарияаанам̣ надаанам̣ бхаасамаанаанам̣ – ‘яо со надо ран̇г̇амаж̇жхз самаж̇ж̇амаж̇жхз сажжаалигзна ж̇анам̣ хаасзд̇и рамзд̇и, со гааяасса бхзд̣̇аа барам̣ маран̣аа бахаасаанам̣ д̣̇зваанам̣ сахаб̣яад̇ам̣ убабаж̇ж̇ад̇ий’д̇и. ид̇ха бхаг̇аваа гимаахаа’’д̇и?
354. Ekaṃ samayaṃ bhagavā rājagahe viharati veḷuvane kalandakanivāpe. Atha kho tālapuṭo 2 naṭagāmaṇi yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho tālapuṭo naṭagāmaṇi bhagavantaṃ etadavoca – ‘‘sutaṃ metaṃ, bhante, pubbakānaṃ ācariyapācariyānaṃ naṭānaṃ bhāsamānānaṃ – ‘yo so naṭo raṅgamajjhe samajjamajjhe saccālikena janaṃ hāseti rameti, so kāyassa bhedā paraṃ maraṇā pahāsānaṃ devānaṃ sahabyataṃ upapajjatī’ti. Idha bhagavā kimāhā’’ti? ‘‘Alaṃ, gāmaṇi, tiṭṭhatetaṃ. Mā maṃ etaṃ pucchī’’ti. Dutiyampi kho tālapuṭo naṭagāmaṇi bhagavantaṃ etadavoca – ‘‘sutaṃ metaṃ, bhante, pubbakānaṃ ācariyapācariyānaṃ naṭānaṃ bhāsamānānaṃ – ‘yo so naṭo raṅgamajjhe samajjamajjhe saccālikena janaṃ hāseti rameti, so kāyassa bhedā paraṃ maraṇā pahāsānaṃ devānaṃ sahabyataṃ upapajjatī’ti. Idha bhagavā kimāhā’’ti? ‘‘Alaṃ, gāmaṇi, tiṭṭhatetaṃ. Mā maṃ etaṃ pucchī’’ti. Tatiyampi kho tālapuṭo naṭagāmaṇi bhagavantaṃ etadavoca – ‘‘sutaṃ metaṃ, bhante, pubbakānaṃ ācariyapācariyānaṃ naṭānaṃ bhāsamānānaṃ – ‘yo so naṭo raṅgamajjhe samajjamajjhe saccālikena janaṃ hāseti rameti, so kāyassa bhedā paraṃ maraṇā pahāsānaṃ devānaṃ sahabyataṃ upapajjatī’ti. Idha bhagavā kimāhā’’ti?
‘‘ад̣̇д̇хаа ко д̇яаахам̣, г̇ааман̣и, на лабхаами 3 – ‘алам̣, г̇ааман̣и, д̇идтад̇зд̇ам̣, маа мам̣ зд̇ам̣ бужчий’д̇и. аби жа д̇яаахам̣ б̣яаагариссаами. буб̣б̣з ко, г̇ааман̣и, сад̇д̇аа авийд̇арааг̇аа рааг̇аб̣анд̇ханаб̣ад̣̇д̇хаа. д̇зсам̣ надо ран̇г̇амаж̇жхз самаж̇ж̇амаж̇жхз яз д̇хаммаа раж̇анийяаа д̇з убасам̣харад̇и бхияяосомад̇д̇ааяа. буб̣б̣з ко, г̇ааман̣и, сад̇д̇аа авийд̇ад̣̇осаа д̣̇осаб̣анд̇ханаб̣ад̣̇д̇хаа. д̇зсам̣ надо ран̇г̇амаж̇жхз самаж̇ж̇амаж̇жхз яз д̇хаммаа д̣̇осанийяаа д̇з убасам̣харад̇и бхияяосомад̇д̇ааяа. буб̣б̣з ко, г̇ааман̣и , сад̇д̇аа авийд̇амохаа мохаб̣анд̇ханаб̣ад̣̇д̇хаа. д̇зсам̣ надо ран̇г̇амаж̇жхз самаж̇ж̇амаж̇жхз яз д̇хаммаа моханийяаа д̇з убасам̣харад̇и бхияяосомад̇д̇ааяа. со ад̇д̇анаа мад̇д̇о бамад̇д̇о барз мад̣̇зд̇ваа бамаад̣̇зд̇ваа гааяасса бхзд̣̇аа барам̣ маран̣аа бахаасо наама нираяо д̇ад̇т̇а убабаж̇ж̇ад̇и. сажз ко банасса звам̣д̣̇идти ход̇и – ‘яо со надо ран̇г̇амаж̇жхз самаж̇ж̇амаж̇жхз сажжаалигзна ж̇анам̣ хаасзд̇и рамзд̇и, со гааяасса бхзд̣̇аа барам̣ маран̣аа бахаасаанам̣ д̣̇зваанам̣ сахаб̣яад̇ам̣ убабаж̇ж̇ад̇ий’д̇и, саасса ход̇и мижчаад̣̇идти. мижчаад̣̇идтигасса ко банаахам̣, г̇ааман̣и, бурисабуг̇г̇аласса д̣̇виннам̣ г̇ад̇ийнам̣ ан̃н̃ад̇арам̣ г̇ад̇им̣ вад̣̇аами – нираяам̣ ваа д̇иражчаанаяоним̣ ваа’’д̇и.
‘‘Addhā kho tyāhaṃ, gāmaṇi, na labhāmi 4 – ‘alaṃ, gāmaṇi, tiṭṭhatetaṃ, mā maṃ etaṃ pucchī’ti. Api ca tyāhaṃ byākarissāmi. Pubbe kho, gāmaṇi, sattā avītarāgā rāgabandhanabaddhā. Tesaṃ naṭo raṅgamajjhe samajjamajjhe ye dhammā rajanīyā te upasaṃharati bhiyyosomattāya. Pubbe kho, gāmaṇi, sattā avītadosā dosabandhanabaddhā. Tesaṃ naṭo raṅgamajjhe samajjamajjhe ye dhammā dosanīyā te upasaṃharati bhiyyosomattāya. Pubbe kho, gāmaṇi , sattā avītamohā mohabandhanabaddhā. Tesaṃ naṭo raṅgamajjhe samajjamajjhe ye dhammā mohanīyā te upasaṃharati bhiyyosomattāya. So attanā matto pamatto pare madetvā pamādetvā kāyassa bhedā paraṃ maraṇā pahāso nāma nirayo tattha upapajjati. Sace kho panassa evaṃdiṭṭhi hoti – ‘yo so naṭo raṅgamajjhe samajjamajjhe saccālikena janaṃ hāseti rameti, so kāyassa bhedā paraṃ maraṇā pahāsānaṃ devānaṃ sahabyataṃ upapajjatī’ti, sāssa hoti micchādiṭṭhi. Micchādiṭṭhikassa kho panāhaṃ, gāmaṇi, purisapuggalassa dvinnaṃ gatīnaṃ aññataraṃ gatiṃ vadāmi – nirayaṃ vā tiracchānayoniṃ vā’’ti.
звам̣ вуд̇д̇з, д̇аалабудо надаг̇ааман̣и, барод̣̇и, ассууни бавад̇д̇зси. ‘‘зд̇ам̣ ко д̇яаахам̣, г̇ааман̣и, наалад̇т̇ам̣ – ‘алам̣, г̇ааман̣и, д̇идтад̇зд̇ам̣; маа мам̣ зд̇ам̣ бужчий’’’д̇и. ‘‘наахам̣, бханд̇з, зд̇ам̣ род̣̇аами яам̣ мам̣ бхаг̇аваа звамааха; аби жаахам̣, бханд̇з, буб̣б̣агзхи аажарияабаажариязхи надзхи д̣̇ийгхарад̇д̇ам̣ нигад̇о ван̃жид̇о балуд̣̇д̇хо – ‘яо со надо ран̇г̇амаж̇жхз самаж̇ж̇амаж̇жхз сажжаалигзна ж̇анам̣ хаасзд̇и рамзд̇и со гааяасса бхзд̣̇аа барам̣ маран̣аа бахаасаанам̣ д̣̇зваанам̣ сахаб̣яад̇ам̣ убабаж̇ж̇ад̇ий’’’д̇и. ‘‘абхигганд̇ам̣, бханд̇з, абхигганд̇ам̣, бханд̇з! сзяяат̇ааби, бханд̇з, ниггуж̇ж̇ид̇ам̣ ваа уггуж̇ж̇зяяа, бадижчаннам̣ ваа виварзяяа, муул̣хасса ваа маг̇г̇ам̣ аажигкзяяа, анд̇хагаарз ваа д̇злабаж̇ж̇од̇ам̣ д̇хаарзяяа – жагкуманд̇о руубаани д̣̇агканд̇ийд̇и; звамзвам̣ бхаг̇авад̇аа анзгабарияааязна д̇хаммо багаасид̇о. зсаахам̣, бханд̇з, бхаг̇аванд̇ам̣ саран̣ам̣ г̇ажчаами д̇хамман̃жа бхигкусан̇гхан̃жа. лабхзяяаахам̣, бханд̇з, бхаг̇авад̇о санд̇игз баб̣б̣аж̇ж̇ам̣, лабхзяяам̣ убасамбад̣̇а’’нд̇и. алад̇т̇а ко д̇аалабудо надаг̇ааман̣и бхаг̇авад̇о санд̇игз баб̣б̣аж̇ж̇ам̣, алад̇т̇а убасамбад̣̇ам̣. ажируубасамбанно жа банааяасмаа д̇аалабудо…бз… арахад̇ам̣ ахосийд̇и. д̣̇уд̇ияам̣.
Evaṃ vutte, tālapuṭo naṭagāmaṇi, parodi, assūni pavattesi. ‘‘Etaṃ kho tyāhaṃ, gāmaṇi, nālatthaṃ – ‘alaṃ, gāmaṇi, tiṭṭhatetaṃ; mā maṃ etaṃ pucchī’’’ti. ‘‘Nāhaṃ, bhante, etaṃ rodāmi yaṃ maṃ bhagavā evamāha; api cāhaṃ, bhante, pubbakehi ācariyapācariyehi naṭehi dīgharattaṃ nikato vañcito paluddho – ‘yo so naṭo raṅgamajjhe samajjamajjhe saccālikena janaṃ hāseti rameti so kāyassa bhedā paraṃ maraṇā pahāsānaṃ devānaṃ sahabyataṃ upapajjatī’’’ti. ‘‘Abhikkantaṃ, bhante, abhikkantaṃ, bhante! Seyyathāpi, bhante, nikkujjitaṃ vā ukkujjeyya, paṭicchannaṃ vā vivareyya, mūḷhassa vā maggaṃ ācikkheyya, andhakāre vā telapajjotaṃ dhāreyya – cakkhumanto rūpāni dakkhantīti; evamevaṃ bhagavatā anekapariyāyena dhammo pakāsito. Esāhaṃ, bhante, bhagavantaṃ saraṇaṃ gacchāmi dhammañca bhikkhusaṅghañca. Labheyyāhaṃ, bhante, bhagavato santike pabbajjaṃ, labheyyaṃ upasampada’’nti. Alattha kho tālapuṭo naṭagāmaṇi bhagavato santike pabbajjaṃ, alattha upasampadaṃ. Acirūpasampanno ca panāyasmā tālapuṭo…pe… arahataṃ ahosīti. Dutiyaṃ.
Footnotes:
Related texts:
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) / 2. д̇аалабудасуд̇д̇аван̣н̣анаа • 2. Tālapuṭasuttavaṇṇanā
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 2. д̇аалабудасуд̇д̇аван̣н̣анаа • 2. Tālapuṭasuttavaṇṇanā
