| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༢. ཏཱལཔུཊསུཏྟཾ
2. Tālapuṭasuttaṃ
༣༥༤. ཨེཀཾ སམཡཾ བྷགཝཱ རཱཛགཧེ ཝིཧརཏི ཝེལུ༹ཝནེ ཀལནྡཀནིཝཱཔེ། ཨཐ ཁོ ཏཱལཔུཊོ 1 ནཊགཱམཎི ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ ཏཱལཔུཊོ ནཊགཱམཎི བྷགཝནྟཾ ཨེཏདཝོཙ – ‘‘སུཏཾ མེཏཾ, བྷནྟེ, པུབྦཀཱནཾ ཨཱཙརིཡཔཱཙརིཡཱནཾ ནཊཱནཾ བྷཱསམཱནཱནཾ – ‘ཡོ སོ ནཊོ རངྒམཛ྄ཛྷེ སམཛྫམཛ྄ཛྷེ སཙྩཱལིཀེན ཛནཾ ཧཱསེཏི རམེཏི, སོ ཀཱཡསྶ བྷེདཱ པརཾ མརཎཱ པཧཱསཱནཾ དེཝཱནཾ སཧབྱཏཾ ཨུཔཔཛྫཏཱི’ཏི། ཨིདྷ བྷགཝཱ ཀིམཱཧཱ’’ཏི? ‘‘ཨལཾ, གཱམཎི, ཏིཊྛཏེཏཾ། མཱ མཾ ཨེཏཾ པུཙྪཱི’’ཏི། དུཏིཡམྤི ཁོ ཏཱལཔུཊོ ནཊགཱམཎི བྷགཝནྟཾ ཨེཏདཝོཙ – ‘‘སུཏཾ མེཏཾ, བྷནྟེ, པུབྦཀཱནཾ ཨཱཙརིཡཔཱཙརིཡཱནཾ ནཊཱནཾ བྷཱསམཱནཱནཾ – ‘ཡོ སོ ནཊོ རངྒམཛ྄ཛྷེ སམཛྫམཛ྄ཛྷེ སཙྩཱལིཀེན ཛནཾ ཧཱསེཏི རམེཏི, སོ ཀཱཡསྶ བྷེདཱ པརཾ མརཎཱ པཧཱསཱནཾ དེཝཱནཾ སཧབྱཏཾ ཨུཔཔཛྫཏཱི’ཏི། ཨིདྷ བྷགཝཱ ཀིམཱཧཱ’’ཏི? ‘‘ཨལཾ, གཱམཎི, ཏིཊྛཏེཏཾ། མཱ མཾ ཨེཏཾ པུཙྪཱི’’ཏི། ཏཏིཡམྤི ཁོ ཏཱལཔུཊོ ནཊགཱམཎི བྷགཝནྟཾ ཨེཏདཝོཙ – ‘‘སུཏཾ མེཏཾ, བྷནྟེ, པུབྦཀཱནཾ ཨཱཙརིཡཔཱཙརིཡཱནཾ ནཊཱནཾ བྷཱསམཱནཱནཾ – ‘ཡོ སོ ནཊོ རངྒམཛ྄ཛྷེ སམཛྫམཛ྄ཛྷེ སཙྩཱལིཀེན ཛནཾ ཧཱསེཏི རམེཏི, སོ ཀཱཡསྶ བྷེདཱ པརཾ མརཎཱ པཧཱསཱནཾ དེཝཱནཾ སཧབྱཏཾ ཨུཔཔཛྫཏཱི’ཏི། ཨིདྷ བྷགཝཱ ཀིམཱཧཱ’’ཏི?
354. Ekaṃ samayaṃ bhagavā rājagahe viharati veḷuvane kalandakanivāpe. Atha kho tālapuṭo 2 naṭagāmaṇi yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho tālapuṭo naṭagāmaṇi bhagavantaṃ etadavoca – ‘‘sutaṃ metaṃ, bhante, pubbakānaṃ ācariyapācariyānaṃ naṭānaṃ bhāsamānānaṃ – ‘yo so naṭo raṅgamajjhe samajjamajjhe saccālikena janaṃ hāseti rameti, so kāyassa bhedā paraṃ maraṇā pahāsānaṃ devānaṃ sahabyataṃ upapajjatī’ti. Idha bhagavā kimāhā’’ti? ‘‘Alaṃ, gāmaṇi, tiṭṭhatetaṃ. Mā maṃ etaṃ pucchī’’ti. Dutiyampi kho tālapuṭo naṭagāmaṇi bhagavantaṃ etadavoca – ‘‘sutaṃ metaṃ, bhante, pubbakānaṃ ācariyapācariyānaṃ naṭānaṃ bhāsamānānaṃ – ‘yo so naṭo raṅgamajjhe samajjamajjhe saccālikena janaṃ hāseti rameti, so kāyassa bhedā paraṃ maraṇā pahāsānaṃ devānaṃ sahabyataṃ upapajjatī’ti. Idha bhagavā kimāhā’’ti? ‘‘Alaṃ, gāmaṇi, tiṭṭhatetaṃ. Mā maṃ etaṃ pucchī’’ti. Tatiyampi kho tālapuṭo naṭagāmaṇi bhagavantaṃ etadavoca – ‘‘sutaṃ metaṃ, bhante, pubbakānaṃ ācariyapācariyānaṃ naṭānaṃ bhāsamānānaṃ – ‘yo so naṭo raṅgamajjhe samajjamajjhe saccālikena janaṃ hāseti rameti, so kāyassa bhedā paraṃ maraṇā pahāsānaṃ devānaṃ sahabyataṃ upapajjatī’ti. Idha bhagavā kimāhā’’ti?
‘‘ཨདྡྷཱ ཁོ ཏྱཱཧཾ, གཱམཎི, ན ལབྷཱམི 3 – ‘ཨལཾ, གཱམཎི, ཏིཊྛཏེཏཾ, མཱ མཾ ཨེཏཾ པུཙྪཱི’ཏི། ཨཔི ཙ ཏྱཱཧཾ བྱཱཀརིསྶཱམི། པུབྦེ ཁོ, གཱམཎི, སཏྟཱ ཨཝཱིཏརཱགཱ རཱགབནྡྷནབདྡྷཱ། ཏེསཾ ནཊོ རངྒམཛ྄ཛྷེ སམཛྫམཛ྄ཛྷེ ཡེ དྷམྨཱ རཛནཱིཡཱ ཏེ ཨུཔསཾཧརཏི བྷིཡྻོསོམཏྟཱཡ། པུབྦེ ཁོ, གཱམཎི, སཏྟཱ ཨཝཱིཏདོསཱ དོསབནྡྷནབདྡྷཱ། ཏེསཾ ནཊོ རངྒམཛ྄ཛྷེ སམཛྫམཛ྄ཛྷེ ཡེ དྷམྨཱ དོསནཱིཡཱ ཏེ ཨུཔསཾཧརཏི བྷིཡྻོསོམཏྟཱཡ། པུབྦེ ཁོ, གཱམཎི , སཏྟཱ ཨཝཱིཏམོཧཱ མོཧབནྡྷནབདྡྷཱ། ཏེསཾ ནཊོ རངྒམཛ྄ཛྷེ སམཛྫམཛ྄ཛྷེ ཡེ དྷམྨཱ མོཧནཱིཡཱ ཏེ ཨུཔསཾཧརཏི བྷིཡྻོསོམཏྟཱཡ། སོ ཨཏྟནཱ མཏྟོ པམཏྟོ པརེ མདེཏྭཱ པམཱདེཏྭཱ ཀཱཡསྶ བྷེདཱ པརཾ མརཎཱ པཧཱསོ ནཱམ ནིརཡོ ཏཏྠ ཨུཔཔཛྫཏི། སཙེ ཁོ པནསྶ ཨེཝཾདིཊྛི ཧོཏི – ‘ཡོ སོ ནཊོ རངྒམཛ྄ཛྷེ སམཛྫམཛ྄ཛྷེ སཙྩཱལིཀེན ཛནཾ ཧཱསེཏི རམེཏི, སོ ཀཱཡསྶ བྷེདཱ པརཾ མརཎཱ པཧཱསཱནཾ དེཝཱནཾ སཧབྱཏཾ ཨུཔཔཛྫཏཱི’ཏི, སཱསྶ ཧོཏི མིཙྪཱདིཊྛི། མིཙྪཱདིཊྛིཀསྶ ཁོ པནཱཧཾ, གཱམཎི, པུརིསཔུགྒལསྶ དྭིནྣཾ གཏཱིནཾ ཨཉྙཏརཾ གཏིཾ ཝདཱམི – ནིརཡཾ ཝཱ ཏིརཙྪཱནཡོནིཾ ཝཱ’’ཏི།
‘‘Addhā kho tyāhaṃ, gāmaṇi, na labhāmi 4 – ‘alaṃ, gāmaṇi, tiṭṭhatetaṃ, mā maṃ etaṃ pucchī’ti. Api ca tyāhaṃ byākarissāmi. Pubbe kho, gāmaṇi, sattā avītarāgā rāgabandhanabaddhā. Tesaṃ naṭo raṅgamajjhe samajjamajjhe ye dhammā rajanīyā te upasaṃharati bhiyyosomattāya. Pubbe kho, gāmaṇi, sattā avītadosā dosabandhanabaddhā. Tesaṃ naṭo raṅgamajjhe samajjamajjhe ye dhammā dosanīyā te upasaṃharati bhiyyosomattāya. Pubbe kho, gāmaṇi , sattā avītamohā mohabandhanabaddhā. Tesaṃ naṭo raṅgamajjhe samajjamajjhe ye dhammā mohanīyā te upasaṃharati bhiyyosomattāya. So attanā matto pamatto pare madetvā pamādetvā kāyassa bhedā paraṃ maraṇā pahāso nāma nirayo tattha upapajjati. Sace kho panassa evaṃdiṭṭhi hoti – ‘yo so naṭo raṅgamajjhe samajjamajjhe saccālikena janaṃ hāseti rameti, so kāyassa bhedā paraṃ maraṇā pahāsānaṃ devānaṃ sahabyataṃ upapajjatī’ti, sāssa hoti micchādiṭṭhi. Micchādiṭṭhikassa kho panāhaṃ, gāmaṇi, purisapuggalassa dvinnaṃ gatīnaṃ aññataraṃ gatiṃ vadāmi – nirayaṃ vā tiracchānayoniṃ vā’’ti.
ཨེཝཾ ཝུཏྟེ, ཏཱལཔུཊོ ནཊགཱམཎི, པརོདི, ཨསྶཱུནི པཝཏྟེསི། ‘‘ཨེཏཾ ཁོ ཏྱཱཧཾ, གཱམཎི, ནཱལཏྠཾ – ‘ཨལཾ, གཱམཎི, ཏིཊྛཏེཏཾ; མཱ མཾ ཨེཏཾ པུཙྪཱི’’’ཏི། ‘‘ནཱཧཾ, བྷནྟེ, ཨེཏཾ རོདཱམི ཡཾ མཾ བྷགཝཱ ཨེཝམཱཧ; ཨཔི ཙཱཧཾ, བྷནྟེ, པུབྦཀེཧི ཨཱཙརིཡཔཱཙརིཡེཧི ནཊེཧི དཱིགྷརཏྟཾ ནིཀཏོ ཝཉྩིཏོ པལུདྡྷོ – ‘ཡོ སོ ནཊོ རངྒམཛ྄ཛྷེ སམཛྫམཛ྄ཛྷེ སཙྩཱལིཀེན ཛནཾ ཧཱསེཏི རམེཏི སོ ཀཱཡསྶ བྷེདཱ པརཾ མརཎཱ པཧཱསཱནཾ དེཝཱནཾ སཧབྱཏཾ ཨུཔཔཛྫཏཱི’’’ཏི། ‘‘ཨབྷིཀྐནྟཾ, བྷནྟེ, ཨབྷིཀྐནྟཾ, བྷནྟེ! སེཡྻཐཱཔི, བྷནྟེ, ནིཀྐུཛྫིཏཾ ཝཱ ཨུཀྐུཛྫེཡྻ, པཊིཙྪནྣཾ ཝཱ ཝིཝརེཡྻ, མཱུལ༹ྷསྶ ཝཱ མགྒཾ ཨཱཙིཀྑེཡྻ, ཨནྡྷཀཱརེ ཝཱ ཏེལཔཛྫོཏཾ དྷཱརེཡྻ – ཙཀྑུམནྟོ རཱུཔཱནི དཀྑནྟཱིཏི; ཨེཝམེཝཾ བྷགཝཏཱ ཨནེཀཔརིཡཱཡེན དྷམྨོ པཀཱསིཏོ། ཨེསཱཧཾ, བྷནྟེ, བྷགཝནྟཾ སརཎཾ གཙྪཱམི དྷམྨཉྩ བྷིཀྑུསངྒྷཉྩ། ལབྷེཡྻཱཧཾ, བྷནྟེ, བྷགཝཏོ སནྟིཀེ པབྦཛྫཾ, ལབྷེཡྻཾ ཨུཔསམྤད’’ནྟི། ཨལཏྠ ཁོ ཏཱལཔུཊོ ནཊགཱམཎི བྷགཝཏོ སནྟིཀེ པབྦཛྫཾ, ཨལཏྠ ཨུཔསམྤདཾ། ཨཙིརཱུཔསམྤནྣོ ཙ པནཱཡསྨཱ ཏཱལཔུཊོ…པེ॰… ཨརཧཏཾ ཨཧོསཱིཏི། དུཏིཡཾ།
Evaṃ vutte, tālapuṭo naṭagāmaṇi, parodi, assūni pavattesi. ‘‘Etaṃ kho tyāhaṃ, gāmaṇi, nālatthaṃ – ‘alaṃ, gāmaṇi, tiṭṭhatetaṃ; mā maṃ etaṃ pucchī’’’ti. ‘‘Nāhaṃ, bhante, etaṃ rodāmi yaṃ maṃ bhagavā evamāha; api cāhaṃ, bhante, pubbakehi ācariyapācariyehi naṭehi dīgharattaṃ nikato vañcito paluddho – ‘yo so naṭo raṅgamajjhe samajjamajjhe saccālikena janaṃ hāseti rameti so kāyassa bhedā paraṃ maraṇā pahāsānaṃ devānaṃ sahabyataṃ upapajjatī’’’ti. ‘‘Abhikkantaṃ, bhante, abhikkantaṃ, bhante! Seyyathāpi, bhante, nikkujjitaṃ vā ukkujjeyya, paṭicchannaṃ vā vivareyya, mūḷhassa vā maggaṃ ācikkheyya, andhakāre vā telapajjotaṃ dhāreyya – cakkhumanto rūpāni dakkhantīti; evamevaṃ bhagavatā anekapariyāyena dhammo pakāsito. Esāhaṃ, bhante, bhagavantaṃ saraṇaṃ gacchāmi dhammañca bhikkhusaṅghañca. Labheyyāhaṃ, bhante, bhagavato santike pabbajjaṃ, labheyyaṃ upasampada’’nti. Alattha kho tālapuṭo naṭagāmaṇi bhagavato santike pabbajjaṃ, alattha upasampadaṃ. Acirūpasampanno ca panāyasmā tālapuṭo…pe… arahataṃ ahosīti. Dutiyaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༢. ཏཱལཔུཊསུཏྟཝཎྞནཱ • 2. Tālapuṭasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༢. ཏཱལཔུཊསུཏྟཝཎྞནཱ • 2. Tālapuṭasuttavaṇṇanā
