| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
2. தாலபுடஸுத்தவண்ணனா
2. Tālapuṭasuttavaṇṇanā
354. து³தியே தாலபுடோதி ஏவங்னாமகோ. தஸ்ஸ கிர ப³ந்த⁴னா பமுத்ததாலபக்கவண்ணோ விய முக²வண்ணோ விப்பஸன்னோ அஹோஸி, தேனஸ்ஸ தாலபுடோதி நாமங் அகங்ஸு. ஸ்வாயங் அபி⁴னீஹாரஸம்பன்னோ பச்சி²மப⁴விகபுக்³க³லோ. யஸ்மா பன படிஸந்தி⁴ நாம அனியதா ஆகாஸே கி²த்தத³ண்ட³ஸதி³ஸா, தஸ்மா ஏஸ நடகுலே நிப்³ப³த்தி. வுட்³டி⁴ப்பத்தோ பன நடஸிப்பே அக்³கோ³ ஹுத்வா ஸகலஜம்பு³தீ³பே பாகடோ ஜாதோ. தஸ்ஸ பஞ்ச ஸகடஸதானி பஞ்ச மாதுகா³மஸதானி பரிவாரோ, ப⁴ரியாயபிஸ்ஸ தாவதகாவாதி மாதுகா³மஸஹஸ்ஸேன சேவ ஸகடஸஹஸ்ஸேன ச ஸத்³தி⁴ங் யங் யங் நக³ரங் வா நிக³மங் வா பவிஸதி, தத்த²ஸ்ஸ புரேதரமேவ ஸதஸஹஸ்ஸங் தெ³ந்தி. ஸமஜ்ஜவேஸங் க³ண்ஹித்வா பன மாதுகா³மஸஹஸ்ஸேன ஸத்³தி⁴ங் கீளங் கரொந்தஸ்ஸ யங் ஹத்தூ²பக³பாதூ³பகா³தி³ஆப⁴ரணஜாதங் கி²பந்தி, தஸ்ஸ பரியந்தோ நத்தி². ஸோ தங்தி³வஸங் மாதுகா³மஸஹஸ்ஸபரிவாரிதோ ராஜக³ஹே கீளங் கத்வா பரிபக்கஞாணத்தா ஸபரிவாரோவ யேன ப⁴க³வா தேனுபஸங்கமி.
354. Dutiye tālapuṭoti evaṃnāmako. Tassa kira bandhanā pamuttatālapakkavaṇṇo viya mukhavaṇṇo vippasanno ahosi, tenassa tālapuṭoti nāmaṃ akaṃsu. Svāyaṃ abhinīhārasampanno pacchimabhavikapuggalo. Yasmā pana paṭisandhi nāma aniyatā ākāse khittadaṇḍasadisā, tasmā esa naṭakule nibbatti. Vuḍḍhippatto pana naṭasippe aggo hutvā sakalajambudīpe pākaṭo jāto. Tassa pañca sakaṭasatāni pañca mātugāmasatāni parivāro, bhariyāyapissa tāvatakāvāti mātugāmasahassena ceva sakaṭasahassena ca saddhiṃ yaṃ yaṃ nagaraṃ vā nigamaṃ vā pavisati, tatthassa puretarameva satasahassaṃ denti. Samajjavesaṃ gaṇhitvā pana mātugāmasahassena saddhiṃ kīḷaṃ karontassa yaṃ hatthūpagapādūpagādiābharaṇajātaṃ khipanti, tassa pariyanto natthi. So taṃdivasaṃ mātugāmasahassaparivārito rājagahe kīḷaṃ katvā paripakkañāṇattā saparivārova yena bhagavā tenupasaṅkami.
ஸச்சாலிகேனாதி ஸச்சேன ச அலிகேன ச. திட்ட²தேதந்தி திட்ட²து ஏதங். ரஜனீயாதி ராக³ப்பச்சயா முக²தோ பஞ்சவண்ணஸுத்தனீஹரணவாதவுட்டி²த³ஸ்ஸனாத³யோ அஞ்ஞே ச காமஸ்ஸாத³ஸங்யுத்தாகாரத³ஸ்ஸனகா அபி⁴னயா. பி⁴ய்யோஸோமத்தாயாதி அதி⁴கப்பமாணத்தாய. தோ³ஸனீயாதி தோ³ஸப்பச்சயா ஹத்த²பாத³ச்சே²தா³தி³த³ஸ்ஸனாகாரா. மோஹனீயாதி மோஹப்பச்சயா உத³கங் க³ஹெத்வா தேலகரணங், தேலங் க³ஹெத்வா உத³ககரணந்தி ஏவமாத³யோ மாயாபபே⁴தா³.
Saccālikenāti saccena ca alikena ca. Tiṭṭhatetanti tiṭṭhatu etaṃ. Rajanīyāti rāgappaccayā mukhato pañcavaṇṇasuttanīharaṇavātavuṭṭhidassanādayo aññe ca kāmassādasaṃyuttākāradassanakā abhinayā. Bhiyyosomattāyāti adhikappamāṇattāya. Dosanīyāti dosappaccayā hatthapādacchedādidassanākārā. Mohanīyāti mohappaccayā udakaṃ gahetvā telakaraṇaṃ, telaṃ gahetvā udakakaraṇanti evamādayo māyāpabhedā.
பஹாஸோ நாம நிரயோதி விஸுங் பஹாஸனாமகோ நிரயோ நாம நத்தி², அவீசிஸ்ஸேவ பன ஏகஸ்மிங் கொட்டா²ஸே நச்சந்தா விய கா³யந்தா விய ச நடவேஸங் க³ஹெத்வாவ பச்சந்தி, தங் ஸந்தா⁴யேதங் வுத்தங். நாஹங், ப⁴ந்தே, ஏதங் ரோதா³மீதி அஹங், ப⁴ந்தே, ஏதங் ப⁴க³வதோ ப்³யாகரணங் ந ரோதா³மீதி ஏவங் ஸகம்மகவஸேனெத்த² அத்தோ² வேதி³தப்³போ³, ந அஸ்ஸுவிமோசனமத்தேன. ‘‘மதங் வா அம்மரோத³ந்தீ’’திஆத³யோ செத்த² அஞ்ஞேபி வோஹாரா வேதி³தப்³பா³.
Pahāsonāma nirayoti visuṃ pahāsanāmako nirayo nāma natthi, avīcisseva pana ekasmiṃ koṭṭhāse naccantā viya gāyantā viya ca naṭavesaṃ gahetvāva paccanti, taṃ sandhāyetaṃ vuttaṃ. Nāhaṃ, bhante, etaṃ rodāmīti ahaṃ, bhante, etaṃ bhagavato byākaraṇaṃ na rodāmīti evaṃ sakammakavasenettha attho veditabbo, na assuvimocanamattena. ‘‘Mataṃ vā ammarodantī’’tiādayo cettha aññepi vohārā veditabbā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 2. தாலபுடஸுத்தங் • 2. Tālapuṭasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2. தாலபுடஸுத்தவண்ணனா • 2. Tālapuṭasuttavaṇṇanā
