| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) |
೨. ತಾಲಪುಟಸುತ್ತವಣ್ಣನಾ
2. Tālapuṭasuttavaṇṇanā
೩೫೪. ದುತಿಯೇ ತಾಲಪುಟೋತಿ ಏವಂನಾಮಕೋ। ತಸ್ಸ ಕಿರ ಬನ್ಧನಾ ಪಮುತ್ತತಾಲಪಕ್ಕವಣ್ಣೋ ವಿಯ ಮುಖವಣ್ಣೋ ವಿಪ್ಪಸನ್ನೋ ಅಹೋಸಿ, ತೇನಸ್ಸ ತಾಲಪುಟೋತಿ ನಾಮಂ ಅಕಂಸು। ಸ್ವಾಯಂ ಅಭಿನೀಹಾರಸಮ್ಪನ್ನೋ ಪಚ್ಛಿಮಭವಿಕಪುಗ್ಗಲೋ। ಯಸ್ಮಾ ಪನ ಪಟಿಸನ್ಧಿ ನಾಮ ಅನಿಯತಾ ಆಕಾಸೇ ಖಿತ್ತದಣ್ಡಸದಿಸಾ, ತಸ್ಮಾ ಏಸ ನಟಕುಲೇ ನಿಬ್ಬತ್ತಿ। ವುಡ್ಢಿಪ್ಪತ್ತೋ ಪನ ನಟಸಿಪ್ಪೇ ಅಗ್ಗೋ ಹುತ್ವಾ ಸಕಲಜಮ್ಬುದೀಪೇ ಪಾಕಟೋ ಜಾತೋ। ತಸ್ಸ ಪಞ್ಚ ಸಕಟಸತಾನಿ ಪಞ್ಚ ಮಾತುಗಾಮಸತಾನಿ ಪರಿವಾರೋ, ಭರಿಯಾಯಪಿಸ್ಸ ತಾವತಕಾವಾತಿ ಮಾತುಗಾಮಸಹಸ್ಸೇನ ಚೇವ ಸಕಟಸಹಸ್ಸೇನ ಚ ಸದ್ಧಿಂ ಯಂ ಯಂ ನಗರಂ ವಾ ನಿಗಮಂ ವಾ ಪವಿಸತಿ, ತತ್ಥಸ್ಸ ಪುರೇತರಮೇವ ಸತಸಹಸ್ಸಂ ದೇನ್ತಿ। ಸಮಜ್ಜವೇಸಂ ಗಣ್ಹಿತ್ವಾ ಪನ ಮಾತುಗಾಮಸಹಸ್ಸೇನ ಸದ್ಧಿಂ ಕೀಳಂ ಕರೋನ್ತಸ್ಸ ಯಂ ಹತ್ಥೂಪಗಪಾದೂಪಗಾದಿಆಭರಣಜಾತಂ ಖಿಪನ್ತಿ, ತಸ್ಸ ಪರಿಯನ್ತೋ ನತ್ಥಿ। ಸೋ ತಂದಿವಸಂ ಮಾತುಗಾಮಸಹಸ್ಸಪರಿವಾರಿತೋ ರಾಜಗಹೇ ಕೀಳಂ ಕತ್ವಾ ಪರಿಪಕ್ಕಞಾಣತ್ತಾ ಸಪರಿವಾರೋವ ಯೇನ ಭಗವಾ ತೇನುಪಸಙ್ಕಮಿ।
354. Dutiye tālapuṭoti evaṃnāmako. Tassa kira bandhanā pamuttatālapakkavaṇṇo viya mukhavaṇṇo vippasanno ahosi, tenassa tālapuṭoti nāmaṃ akaṃsu. Svāyaṃ abhinīhārasampanno pacchimabhavikapuggalo. Yasmā pana paṭisandhi nāma aniyatā ākāse khittadaṇḍasadisā, tasmā esa naṭakule nibbatti. Vuḍḍhippatto pana naṭasippe aggo hutvā sakalajambudīpe pākaṭo jāto. Tassa pañca sakaṭasatāni pañca mātugāmasatāni parivāro, bhariyāyapissa tāvatakāvāti mātugāmasahassena ceva sakaṭasahassena ca saddhiṃ yaṃ yaṃ nagaraṃ vā nigamaṃ vā pavisati, tatthassa puretarameva satasahassaṃ denti. Samajjavesaṃ gaṇhitvā pana mātugāmasahassena saddhiṃ kīḷaṃ karontassa yaṃ hatthūpagapādūpagādiābharaṇajātaṃ khipanti, tassa pariyanto natthi. So taṃdivasaṃ mātugāmasahassaparivārito rājagahe kīḷaṃ katvā paripakkañāṇattā saparivārova yena bhagavā tenupasaṅkami.
ಸಚ್ಚಾಲಿಕೇನಾತಿ ಸಚ್ಚೇನ ಚ ಅಲಿಕೇನ ಚ। ತಿಟ್ಠತೇತನ್ತಿ ತಿಟ್ಠತು ಏತಂ। ರಜನೀಯಾತಿ ರಾಗಪ್ಪಚ್ಚಯಾ ಮುಖತೋ ಪಞ್ಚವಣ್ಣಸುತ್ತನೀಹರಣವಾತವುಟ್ಠಿದಸ್ಸನಾದಯೋ ಅಞ್ಞೇ ಚ ಕಾಮಸ್ಸಾದಸಂಯುತ್ತಾಕಾರದಸ್ಸನಕಾ ಅಭಿನಯಾ। ಭಿಯ್ಯೋಸೋಮತ್ತಾಯಾತಿ ಅಧಿಕಪ್ಪಮಾಣತ್ತಾಯ। ದೋಸನೀಯಾತಿ ದೋಸಪ್ಪಚ್ಚಯಾ ಹತ್ಥಪಾದಚ್ಛೇದಾದಿದಸ್ಸನಾಕಾರಾ। ಮೋಹನೀಯಾತಿ ಮೋಹಪ್ಪಚ್ಚಯಾ ಉದಕಂ ಗಹೇತ್ವಾ ತೇಲಕರಣಂ, ತೇಲಂ ಗಹೇತ್ವಾ ಉದಕಕರಣನ್ತಿ ಏವಮಾದಯೋ ಮಾಯಾಪಭೇದಾ।
Saccālikenāti saccena ca alikena ca. Tiṭṭhatetanti tiṭṭhatu etaṃ. Rajanīyāti rāgappaccayā mukhato pañcavaṇṇasuttanīharaṇavātavuṭṭhidassanādayo aññe ca kāmassādasaṃyuttākāradassanakā abhinayā. Bhiyyosomattāyāti adhikappamāṇattāya. Dosanīyāti dosappaccayā hatthapādacchedādidassanākārā. Mohanīyāti mohappaccayā udakaṃ gahetvā telakaraṇaṃ, telaṃ gahetvā udakakaraṇanti evamādayo māyāpabhedā.
ಪಹಾಸೋ ನಾಮ ನಿರಯೋತಿ ವಿಸುಂ ಪಹಾಸನಾಮಕೋ ನಿರಯೋ ನಾಮ ನತ್ಥಿ, ಅವೀಚಿಸ್ಸೇವ ಪನ ಏಕಸ್ಮಿಂ ಕೋಟ್ಠಾಸೇ ನಚ್ಚನ್ತಾ ವಿಯ ಗಾಯನ್ತಾ ವಿಯ ಚ ನಟವೇಸಂ ಗಹೇತ್ವಾವ ಪಚ್ಚನ್ತಿ, ತಂ ಸನ್ಧಾಯೇತಂ ವುತ್ತಂ। ನಾಹಂ, ಭನ್ತೇ, ಏತಂ ರೋದಾಮೀತಿ ಅಹಂ, ಭನ್ತೇ, ಏತಂ ಭಗವತೋ ಬ್ಯಾಕರಣಂ ನ ರೋದಾಮೀತಿ ಏವಂ ಸಕಮ್ಮಕವಸೇನೇತ್ಥ ಅತ್ಥೋ ವೇದಿತಬ್ಬೋ, ನ ಅಸ್ಸುವಿಮೋಚನಮತ್ತೇನ। ‘‘ಮತಂ ವಾ ಅಮ್ಮರೋದನ್ತೀ’’ತಿಆದಯೋ ಚೇತ್ಥ ಅಞ್ಞೇಪಿ ವೋಹಾರಾ ವೇದಿತಬ್ಬಾ।
Pahāsonāma nirayoti visuṃ pahāsanāmako nirayo nāma natthi, avīcisseva pana ekasmiṃ koṭṭhāse naccantā viya gāyantā viya ca naṭavesaṃ gahetvāva paccanti, taṃ sandhāyetaṃ vuttaṃ. Nāhaṃ, bhante, etaṃ rodāmīti ahaṃ, bhante, etaṃ bhagavato byākaraṇaṃ na rodāmīti evaṃ sakammakavasenettha attho veditabbo, na assuvimocanamattena. ‘‘Mataṃ vā ammarodantī’’tiādayo cettha aññepi vohārā veditabbā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೨. ತಾಲಪುಟಸುತ್ತಂ • 2. Tālapuṭasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) / ೨. ತಾಲಪುಟಸುತ್ತವಣ್ಣನಾ • 2. Tālapuṭasuttavaṇṇanā
