| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
৫. তলসত্তিকসিক্খাপদৰণ্ণনা
5. Talasattikasikkhāpadavaṇṇanā
৪৫৭. পঞ্চমে ন পহরিতুকামতায দিন্নত্তা দুক্কটন্তি এত্থ পহরিতুকামতায পহটে পুরিমসিক্খাপদেন পাচিত্তিযং, উচ্চারেতুকামতায কেৰলং উগ্গিরণমত্তে কতে ইমিনা পাচিত্তিযং। ইমিনা পন ৰিরজ্ঝিত্ৰা পহারো দিন্নো, তস্মা দুক্কটং। কিমিদং দুক্কটং পহারপচ্চযা, উদাহু উগ্গিরণপচ্চযাতি? তত্থ কেচি তাৰ ৰদন্তি ‘‘পহারপচ্চযা এৰ দুক্কটং, উগ্গিরণপচ্চযা পাচিত্তিযন্তি সদুক্কটং পাচিত্তিযং যুজ্জতি। পুরিমঞ্হি উগ্গিরণং, পচ্ছা পহারো, ন চ পচ্ছা পহারং নিস্সায পুরিমং উগ্গিরণং অনাপত্তিৰত্থুকং ভৰিতুমরহতী’’তি।
457. Pañcame na paharitukāmatāya dinnattā dukkaṭanti ettha paharitukāmatāya pahaṭe purimasikkhāpadena pācittiyaṃ, uccāretukāmatāya kevalaṃ uggiraṇamatte kate iminā pācittiyaṃ. Iminā pana virajjhitvā pahāro dinno, tasmā dukkaṭaṃ. Kimidaṃ dukkaṭaṃ pahārapaccayā, udāhu uggiraṇapaccayāti? Tattha keci tāva vadanti ‘‘pahārapaccayā eva dukkaṭaṃ, uggiraṇapaccayā pācittiyanti sadukkaṭaṃ pācittiyaṃ yujjati. Purimañhi uggiraṇaṃ, pacchā pahāro, na ca pacchā pahāraṃ nissāya purimaṃ uggiraṇaṃ anāpattivatthukaṃ bhavitumarahatī’’ti.
মযং পনেত্থ এৰং তক্কযাম ‘‘উগ্গিরণস্স অত্তনো সভাৰেনেৰ অসণ্ঠিতত্তা তপ্পচ্চযা পাচিত্তিযেন ন ভৰিতব্বং, অসুদ্ধচিত্তেন কতপযোগত্তা পন ন সক্কা এত্থ অনাপত্তিযা ভৰিতুন্তি দুক্কটং ৰুত্তং। ‘ন পহরিতুকামতায দিন্নত্তা’তি ইমিনা চ পহারপচ্চযা পুরিমসিক্খাপদেন পাচিত্তিযাসম্ভৰে কারণং ৰুত্তং, ন পন পহারপচ্চযা দুক্কটসম্ভৰে। ন হি অপহরিতুকামতায পহারে দিন্নে পুরিমসিক্খাপদেন পহারপচ্চযা পাচিত্তিযেন দুক্কটেন ৰা ভৰিতুং যুত্ত’’ন্তি। ‘‘তিরচ্ছানাদীনং অসুচিকরণাদিং দিস্ৰা কুজ্ঝিত্ৰাপি উগ্গিরন্তস্স মোক্খাধিপ্পাযো এৰা’’তি ৰদন্তি। সেসমেত্থ উত্তানমেৰ। কুপিততা, ন মোক্খাধিপ্পাযতা, উপসম্পন্নস্স তলসত্তিউগ্গিরণন্তি ইমানি পনেত্থ তীণি অঙ্গানি।
Mayaṃ panettha evaṃ takkayāma ‘‘uggiraṇassa attano sabhāveneva asaṇṭhitattā tappaccayā pācittiyena na bhavitabbaṃ, asuddhacittena katapayogattā pana na sakkā ettha anāpattiyā bhavitunti dukkaṭaṃ vuttaṃ. ‘Na paharitukāmatāya dinnattā’ti iminā ca pahārapaccayā purimasikkhāpadena pācittiyāsambhave kāraṇaṃ vuttaṃ, na pana pahārapaccayā dukkaṭasambhave. Na hi apaharitukāmatāya pahāre dinne purimasikkhāpadena pahārapaccayā pācittiyena dukkaṭena vā bhavituṃ yutta’’nti. ‘‘Tiracchānādīnaṃ asucikaraṇādiṃ disvā kujjhitvāpi uggirantassa mokkhādhippāyo evā’’ti vadanti. Sesamettha uttānameva. Kupitatā, na mokkhādhippāyatā, upasampannassa talasattiuggiraṇanti imāni panettha tīṇi aṅgāni.
তলসত্তিকসিক্খাপদৰণ্ণনা নিট্ঠিতা।
Talasattikasikkhāpadavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৮. সহধম্মিকৰগ্গো • 8. Sahadhammikavaggo
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ৫. তলসত্তিকসিক্খাপদৰণ্ণনা • 5. Talasattikasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৫. তলসত্তিকসিক্খাপদৰণ্ণনা • 5. Talasattikasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৫. তলসত্তিকসিক্খাপদং • 5. Talasattikasikkhāpadaṃ
