| Library / Tipiṭaka / တိပိဋက • Tipiṭaka / ကင္ခာဝိတရဏီ-အဘိနဝ-ဋီကာ • Kaṅkhāvitaraṇī-abhinava-ṭīkā |
၅. တလသတ္တိကသိက္ခာပဒဝဏ္ဏနာ
5. Talasattikasikkhāpadavaṇṇanā
တလသတ္တိကန္တိ တလမေဝ တလသတ္တိကံ။ ‘‘ပောထနသမတ္ထဋ္ဌေန သတ္တိက’’န္တိ (ဝဇိရ. ဋီ. ပာစိတ္တိယ ၄၅၆) ဧကေ။ ဥစ္စာရေယ္ယာတိ ဥက္ခိပေယ္ယ။ နပဟရိတုကာမတာယ ဒိန္နတ္တာ ဒုက္ကဋန္တိ ဧတ္ထ ပဟရိတုကာမတာယ ပဟရိတေ ပုရိမသိက္ခာပဒေန ပာစိတ္တိယံ။ ဥစ္စာရေတုကာမတာယ ကေဝလံ ဥဂ္ဂိရဏမတ္တေ ကတေ ဣမိနာ ပာစိတ္တိယံ။ ဣမိနာ ပန ဝိရဇ္ဈိတ္ဝာ ပဟာရော ဒိန္နော, တသ္မာ ဒုက္ကဋံ။ ဧတ္ထ ပန ‘‘တိရစ္ဆာနဂတာဒီနံ အသုစိကရဏာဒီနိ ဒိသ္ဝာ ကုဇ္ဈိတ္ဝာပိ ဥဂ္ဂိရန္တသ္သ မောက္ခာဓိပ္ပာယောယေဝာ’’တိ (သာရတ္ထ. ဋီ. ပာစိတ္တိယ ၃.၄၇၁) ဝဒန္တိ။
Talasattikanti talameva talasattikaṃ. ‘‘Pothanasamatthaṭṭhena sattika’’nti (vajira. ṭī. pācittiya 456) eke. Uccāreyyāti ukkhipeyya. Napaharitukāmatāya dinnattā dukkaṭanti ettha paharitukāmatāya paharite purimasikkhāpadena pācittiyaṃ. Uccāretukāmatāya kevalaṃ uggiraṇamatte kate iminā pācittiyaṃ. Iminā pana virajjhitvā pahāro dinno, tasmā dukkaṭaṃ. Ettha pana ‘‘tiracchānagatādīnaṃ asucikaraṇādīni disvā kujjhitvāpi uggirantassa mokkhādhippāyoyevā’’ti (sārattha. ṭī. pācittiya 3.471) vadanti.
တလသတ္တိကသိက္ခာပဒဝဏ္ဏနာ နိဋ္ဌိတာ။
Talasattikasikkhāpadavaṇṇanā niṭṭhitā.
