| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
২০. তমালপুপ্ফিযৰগ্গো
20. Tamālapupphiyavaggo
১-১০. তমালপুপ্ফিযত্থেরঅপদানাদিৰণ্ণনা
1-10. Tamālapupphiyattheraapadānādivaṇṇanā
ৰীসতিমে ৰগ্গে পঠমত্থেরাপদানং উত্তানমেৰ।
Vīsatime vagge paṭhamattherāpadānaṃ uttānameva.
৬. দুতিযত্থেরাপদানে যং দাযৰাসিকো ইসীতি ইসিপব্বজ্জং পব্বজিত্ৰা ৰনে ৰসনভাৰেন দাযৰাসিকো ইসীতি সঙ্খং গতো, অত্তনো অনুকম্পায তং ৰনং উপগতস্স সিদ্ধত্থস্স সত্থুনো ৰসনমণ্ডপচ্ছাদনত্থায যং তিণং, তং লাযতি ছিন্দতীতি অত্থো। দব্বছদনং কত্ৰা অনেকেহি খুদ্দকদণ্ডকেহি মণ্ডপং কত্ৰা তং তিণেন ছাদেত্ৰা সিদ্ধত্থস্স ভগৰতো অহং অদাসিং পূজেসিন্তি অত্থো।
6. Dutiyattherāpadāne yaṃ dāyavāsiko isīti isipabbajjaṃ pabbajitvā vane vasanabhāvena dāyavāsiko isīti saṅkhaṃ gato, attano anukampāya taṃ vanaṃ upagatassa siddhatthassa satthuno vasanamaṇḍapacchādanatthāya yaṃ tiṇaṃ, taṃ lāyati chindatīti attho. Dabbachadanaṃ katvā anekehi khuddakadaṇḍakehi maṇḍapaṃ katvā taṃ tiṇena chādetvā siddhatthassa bhagavato ahaṃ adāsiṃ pūjesinti attho.
৮. সত্তাহং ধারযুং তত্থাতি তং মণ্ডপং তত্থ ঠিতা দেৰমনুস্সা সত্তাহং নিরোধসমাপত্তিং সমাপজ্জিত্ৰা নিসিন্নস্স সত্থুনো ধারযুং ধারেসুন্তি অত্থো। সেসং উত্তানত্থমেৰাতি।
8.Sattāhaṃ dhārayuṃ tatthāti taṃ maṇḍapaṃ tattha ṭhitā devamanussā sattāhaṃ nirodhasamāpattiṃ samāpajjitvā nisinnassa satthuno dhārayuṃ dhāresunti attho. Sesaṃ uttānatthamevāti.
ততিযত্থেরস্স অপদানে খণ্ডফুল্লিযত্থেরোতি এত্থ খণ্ডন্তি কট্ঠানং জিণ্ণত্তা ছিন্নভিন্নট্ঠানং, ফুল্লন্তি কট্ঠানং জিণ্ণট্ঠানে কণ্ণকিতমহিচ্ছত্তকাদিপুপ্ফনং, খণ্ডঞ্চ ফুল্লঞ্চ খণ্ডফুল্লানি, খণ্ডফুল্লানং পটিসঙ্খরণং পুনপ্পুনং থিরকরণন্তি খণ্ডফুল্লপটিসঙ্খরণং। ইমস্স পন থেরস্স সম্ভারপূরণকালে ফুস্সস্স ভগৰতো চেতিযে ছিন্নভিন্নট্ঠানে সুধাপিণ্ডং মক্খেত্ৰা থিরকরণং খণ্ডফুল্লপটিসঙ্খরণং নাম। তস্মা সো খণ্ডফুল্লিযো থেরোতি পাকটো অহোসি। ততিযং।
Tatiyattherassa apadāne khaṇḍaphulliyattheroti ettha khaṇḍanti kaṭṭhānaṃ jiṇṇattā chinnabhinnaṭṭhānaṃ, phullanti kaṭṭhānaṃ jiṇṇaṭṭhāne kaṇṇakitamahicchattakādipupphanaṃ, khaṇḍañca phullañca khaṇḍaphullāni, khaṇḍaphullānaṃ paṭisaṅkharaṇaṃ punappunaṃ thirakaraṇanti khaṇḍaphullapaṭisaṅkharaṇaṃ. Imassa pana therassa sambhārapūraṇakāle phussassa bhagavato cetiye chinnabhinnaṭṭhāne sudhāpiṇḍaṃ makkhetvā thirakaraṇaṃ khaṇḍaphullapaṭisaṅkharaṇaṃ nāma. Tasmā so khaṇḍaphulliyo theroti pākaṭo ahosi. Tatiyaṃ.
১৭. চতুত্থত্থেরস্সাপদানে রঞ্ঞো বদ্ধচরো অহন্তি রঞ্ঞো পরিচারকো কম্মকারকো অহোসিন্তি অত্থো।
17. Catutthattherassāpadāne rañño baddhacaro ahanti rañño paricārako kammakārako ahosinti attho.
১৯. জলজুত্তমনামিনোতি জলে উদকে জাতং জলজং, কিং তং পদুমং, পদুমেন সমাননামত্তা পদুমুত্তরস্স ভগৰতোতি অত্থো। উত্তমপদুমনামস্স ভগৰতোতি ৰা অত্থো। চতুত্থং।
19.Jalajuttamanāminoti jale udake jātaṃ jalajaṃ, kiṃ taṃ padumaṃ, padumena samānanāmattā padumuttarassa bhagavatoti attho. Uttamapadumanāmassa bhagavatoti vā attho. Catutthaṃ.
পঞ্চমং উত্তানত্থমেৰ।
Pañcamaṃ uttānatthameva.
২৮. ছট্ঠে নগরে দ্ৰারৰতিযাতি মহাদ্ৰারৰাতপানকৰাটফলকাহি ৰতিপাকারট্টালগোপুরকদ্দমোদকপরিখাহি চ সম্পন্নং নগরন্তি দ্ৰারৰতীনগরং, দ্ৰারং ৰতিঞ্চ পধানং কত্ৰা নগরস্স উপলক্খিতত্তা ‘‘দ্ৰারৰতী নগর’’ন্তি ৰোহরন্তীতি নগরে দ্ৰারৰতিযাতি ৰুত্তং। মালাৰচ্ছো পুপ্ফারামো মম অহোসীতি অত্থো।
28. Chaṭṭhe nagare dvāravatiyāti mahādvāravātapānakavāṭaphalakāhi vatipākāraṭṭālagopurakaddamodakaparikhāhi ca sampannaṃ nagaranti dvāravatīnagaraṃ, dvāraṃ vatiñca padhānaṃ katvā nagarassa upalakkhitattā ‘‘dvāravatī nagara’’nti voharantīti nagare dvāravatiyāti vuttaṃ. Mālāvaccho pupphārāmo mama ahosīti attho.
৩১. তে কিসলযাতি তে অসোকপল্লৰা। ছট্ঠং।
31.Te kisalayāti te asokapallavā. Chaṭṭhaṃ.
সত্তমট্ঠমনৰমানি উত্তানত্থানেৰ। দসমেপি অপুব্বং নত্থীতি।
Sattamaṭṭhamanavamāni uttānatthāneva. Dasamepi apubbaṃ natthīti.
ৰীসতিমৰণ্ণনা সমত্তা।
Vīsatimavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi
২. তিণসন্থারকত্থেরঅপদানং • 2. Tiṇasanthārakattheraapadānaṃ
৪. অসোকপূজকত্থেরঅপদানং • 4. Asokapūjakattheraapadānaṃ
৬. কিসলযপূজকত্থেরঅপদানং • 6. Kisalayapūjakattheraapadānaṃ
