| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
20. තමාලපුප්‌ඵියවග්‌ගො
20. Tamālapupphiyavaggo
1-10. තමාලපුප්‌ඵියත්‌ථෙරඅපදානාදිවණ්‌ණනා
1-10. Tamālapupphiyattheraapadānādivaṇṇanā
වීසතිමෙ වග්‌ගෙ පඨමත්‌ථෙරාපදානං උත්‌තානමෙව.
Vīsatime vagge paṭhamattherāpadānaṃ uttānameva.
6. දුතියත්‌ථෙරාපදානෙ යං දායවාසිකො ඉසීති ඉසිපබ්‌බජ්‌ජං පබ්‌බජිත්‌වා වනෙ වසනභාවෙන දායවාසිකො ඉසීති සඞ්‌ඛං ගතො, අත්‌තනො අනුකම්‌පාය තං වනං උපගතස්‌ස සිද්‌ධත්‌ථස්‌ස සත්‌ථුනො වසනමණ්‌ඩපච්‌ඡාදනත්‌ථාය යං තිණං, තං ලායති ඡින්‌දතීති අත්‌ථො. දබ්‌බඡදනං කත්‌වා අනෙකෙහි ඛුද්‌දකදණ්‌ඩකෙහි මණ්‌ඩපං කත්‌වා තං තිණෙන ඡාදෙත්‌වා සිද්‌ධත්‌ථස්‌ස භගවතො අහං අදාසිං පූජෙසින්‌ති අත්‌ථො.
6. Dutiyattherāpadāne yaṃ dāyavāsiko isīti isipabbajjaṃ pabbajitvā vane vasanabhāvena dāyavāsiko isīti saṅkhaṃ gato, attano anukampāya taṃ vanaṃ upagatassa siddhatthassa satthuno vasanamaṇḍapacchādanatthāya yaṃ tiṇaṃ, taṃ lāyati chindatīti attho. Dabbachadanaṃ katvā anekehi khuddakadaṇḍakehi maṇḍapaṃ katvā taṃ tiṇena chādetvā siddhatthassa bhagavato ahaṃ adāsiṃ pūjesinti attho.
8. සත්‌තාහං ධාරයුං තත්‌ථාති තං මණ්‌ඩපං තත්‌ථ ඨිතා දෙවමනුස්‌සා සත්‌තාහං නිරොධසමාපත්‌තිං සමාපජ්‌ජිත්‌වා නිසින්‌නස්‌ස සත්‌ථුනො ධාරයුං ධාරෙසුන්‌ති අත්‌ථො. සෙසං උත්‌තානත්‌ථමෙවාති.
8.Sattāhaṃ dhārayuṃ tatthāti taṃ maṇḍapaṃ tattha ṭhitā devamanussā sattāhaṃ nirodhasamāpattiṃ samāpajjitvā nisinnassa satthuno dhārayuṃ dhāresunti attho. Sesaṃ uttānatthamevāti.
තතියත්‌ථෙරස්‌ස අපදානෙ ඛණ්‌ඩඵුල්‌ලියත්‌ථෙරොති එත්‌ථ ඛණ්‌ඩන්‌ති කට්‌ඨානං ජිණ්‌ණත්‌තා ඡින්‌නභින්‌නට්‌ඨානං, ඵුල්‌ලන්‌ති කට්‌ඨානං ජිණ්‌ණට්‌ඨානෙ කණ්‌ණකිතමහිච්‌ඡත්‌තකාදිපුප්‌ඵනං, ඛණ්‌ඩඤ්‌ච ඵුල්‌ලඤ්‌ච ඛණ්‌ඩඵුල්‌ලානි, ඛණ්‌ඩඵුල්‌ලානං පටිසඞ්‌ඛරණං පුනප්‌පුනං ථිරකරණන්‌ති ඛණ්‌ඩඵුල්‌ලපටිසඞ්‌ඛරණං. ඉමස්‌ස පන ථෙරස්‌ස සම්‌භාරපූරණකාලෙ ඵුස්‌සස්‌ස භගවතො චෙතියෙ ඡින්‌නභින්‌නට්‌ඨානෙ සුධාපිණ්‌ඩං මක්‌ඛෙත්‌වා ථිරකරණං ඛණ්‌ඩඵුල්‌ලපටිසඞ්‌ඛරණං නාම. තස්‌මා සො ඛණ්‌ඩඵුල්‌ලියො ථෙරොති පාකටො අහොසි. තතියං.
Tatiyattherassa apadāne khaṇḍaphulliyattheroti ettha khaṇḍanti kaṭṭhānaṃ jiṇṇattā chinnabhinnaṭṭhānaṃ, phullanti kaṭṭhānaṃ jiṇṇaṭṭhāne kaṇṇakitamahicchattakādipupphanaṃ, khaṇḍañca phullañca khaṇḍaphullāni, khaṇḍaphullānaṃ paṭisaṅkharaṇaṃ punappunaṃ thirakaraṇanti khaṇḍaphullapaṭisaṅkharaṇaṃ. Imassa pana therassa sambhārapūraṇakāle phussassa bhagavato cetiye chinnabhinnaṭṭhāne sudhāpiṇḍaṃ makkhetvā thirakaraṇaṃ khaṇḍaphullapaṭisaṅkharaṇaṃ nāma. Tasmā so khaṇḍaphulliyo theroti pākaṭo ahosi. Tatiyaṃ.
17. චතුත්‌ථත්‌ථෙරස්‌සාපදානෙ රඤ්‌ඤො බද්‌ධචරො අහන්‌ති රඤ්‌ඤො පරිචාරකො කම්‌මකාරකො අහොසින්‌ති අත්‌ථො.
17. Catutthattherassāpadāne rañño baddhacaro ahanti rañño paricārako kammakārako ahosinti attho.
19. ජලජුත්‌තමනාමිනොති ජලෙ උදකෙ ජාතං ජලජං, කිං තං පදුමං, පදුමෙන සමානනාමත්‌තා පදුමුත්‌තරස්‌ස භගවතොති අත්‌ථො. උත්‌තමපදුමනාමස්‌ස භගවතොති වා අත්‌ථො. චතුත්‌ථං.
19.Jalajuttamanāminoti jale udake jātaṃ jalajaṃ, kiṃ taṃ padumaṃ, padumena samānanāmattā padumuttarassa bhagavatoti attho. Uttamapadumanāmassa bhagavatoti vā attho. Catutthaṃ.
පඤ්‌චමං උත්‌තානත්‌ථමෙව.
Pañcamaṃ uttānatthameva.
28. ඡට්‌ඨෙ නගරෙ ද්‌වාරවතියාති මහාද්‌වාරවාතපානකවාටඵලකාහි වතිපාකාරට්‌ටාලගොපුරකද්‌දමොදකපරිඛාහි ච සම්‌පන්‌නං නගරන්‌ති ද්‌වාරවතීනගරං, ද්‌වාරං වතිඤ්‌ච පධානං කත්‌වා නගරස්‌ස උපලක්‌ඛිතත්‌තා ‘‘ද්‌වාරවතී නගර’’න්‌ති වොහරන්‌තීති නගරෙ ද්‌වාරවතියාති වුත්‌තං. මාලාවච්‌ඡො පුප්‌ඵාරාමො මම අහොසීති අත්‌ථො.
28. Chaṭṭhe nagare dvāravatiyāti mahādvāravātapānakavāṭaphalakāhi vatipākāraṭṭālagopurakaddamodakaparikhāhi ca sampannaṃ nagaranti dvāravatīnagaraṃ, dvāraṃ vatiñca padhānaṃ katvā nagarassa upalakkhitattā ‘‘dvāravatī nagara’’nti voharantīti nagare dvāravatiyāti vuttaṃ. Mālāvaccho pupphārāmo mama ahosīti attho.
31. තෙ කිසලයාති තෙ අසොකපල්‌ලවා. ඡට්‌ඨං.
31.Te kisalayāti te asokapallavā. Chaṭṭhaṃ.
සත්‌තමට්‌ඨමනවමානි උත්‌තානත්‌ථානෙව. දසමෙපි අපුබ්‌බං නත්‌ථීති.
Sattamaṭṭhamanavamāni uttānatthāneva. Dasamepi apubbaṃ natthīti.
වීසතිමවණ්‌ණනා සමත්‌තා.
Vīsatimavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi
2. තිණසන්‌ථාරකත්‌ථෙරඅපදානං • 2. Tiṇasanthārakattheraapadānaṃ
4. අසොකපූජකත්‌ථෙරඅපදානං • 4. Asokapūjakattheraapadānaṃ
6. කිසලයපූජකත්‌ථෙරඅපදානං • 6. Kisalayapūjakattheraapadānaṃ
