| Library / Tipiṭaka / तिपिटक • Tipiṭaka / अपदानपाळि • Apadānapāḷi |
२. तम्बपुप्फियत्थेरअपदानं
2. Tambapupphiyattheraapadānaṃ
७.
7.
‘‘परकम्मायने युत्तो, अपराधं अकासहं।
‘‘Parakammāyane yutto, aparādhaṃ akāsahaṃ;
वनन्तं अभिधाविस्सं, भयवेरसमप्पितो॥
Vanantaṃ abhidhāvissaṃ, bhayaverasamappito.
८.
8.
‘‘पुप्फितं पादपं दिस्वा, पिण्डिबन्धं सुनिम्मितं।
‘‘Pupphitaṃ pādapaṃ disvā, piṇḍibandhaṃ sunimmitaṃ;
तम्बपुप्फं गहेत्वान, बोधियं ओकिरिं अहं॥
Tambapupphaṃ gahetvāna, bodhiyaṃ okiriṃ ahaṃ.
९.
9.
‘‘सम्मज्जित्वान तं बोधिं, पाटलिं पादपुत्तमं।
‘‘Sammajjitvāna taṃ bodhiṃ, pāṭaliṃ pādaputtamaṃ;
पल्लङ्कं आभुजित्वान, बोधिमूले उपाविसिं॥
Pallaṅkaṃ ābhujitvāna, bodhimūle upāvisiṃ.
१०.
10.
‘‘गतमग्गं गवेसन्ता, आगच्छुं मम सन्तिकं।
‘‘Gatamaggaṃ gavesantā, āgacchuṃ mama santikaṃ;
ते च दिस्वानहं तत्थ, आवज्जिं बोधिमुत्तमं॥
Te ca disvānahaṃ tattha, āvajjiṃ bodhimuttamaṃ.
११.
11.
‘‘वन्दित्वान अहं बोधिं, विप्पसन्नेन चेतसा।
‘‘Vanditvāna ahaṃ bodhiṃ, vippasannena cetasā;
अनेकताले पपतिं, गिरिदुग्गे भयानके॥
Anekatāle papatiṃ, giridugge bhayānake.
१२.
12.
‘‘एकनवुतितो कप्पे, यं पुप्फमभिरोपयिं।
‘‘Ekanavutito kappe, yaṃ pupphamabhiropayiṃ;
दुग्गतिं नाभिजानामि, बोधिपूजायिदं फलं॥
Duggatiṃ nābhijānāmi, bodhipūjāyidaṃ phalaṃ.
१३.
13.
सत्तरतनसम्पन्नो, चक्कवत्ती महब्बलो॥
Sattaratanasampanno, cakkavattī mahabbalo.
१४.
14.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा तम्बपुप्फियो थेरो इमा गाथायो अभासित्थाति।
Itthaṃ sudaṃ āyasmā tambapupphiyo thero imā gāthāyo abhāsitthāti.
तम्बपुप्फियत्थेरस्सापदानं दुतियं।
Tambapupphiyattherassāpadānaṃ dutiyaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / अपदान-अट्ठकथा • Apadāna-aṭṭhakathā / २. तम्बपुप्फियत्थेरअपदानवण्णना • 2. Tambapupphiyattheraapadānavaṇṇanā
